遇上勢頹嘅般尼，曼聯必須反底贏波，否則摩連奴帥位隨時不保。最後形勢贏哂兼三分已袋，球員用積極表現去回應外界批評，但仍然睇到球迷間有唔少負評，甚至不自覺地用哥迪奧拿同高普嘅進攻標準嚟評價曼聯。輸俾白禮頓後，我諗無乜幾多人想像到呢兩場佢地會踢得出咁有侵略性嘅足球。即使有好幾個黃金機會都把握唔到，但我見到進攻上比以往有Form，而呢樣嘢正正係因為摩連奴一直唔敢下放自由度，所以球迷們應該要明白其實佢都好努力突破緊。

摩連奴、作客、雙前鋒，三個平日唔會一齊用到嘅詞，喺摩亞球場同場出現。領隊一貫風格係就算對住弱隊都會先用返保守嘅451入得一粒得一粒，去到60分鐘仲未領先嘅話再換入翼鋒或者推多個中場上攻擊線，所以今場算有驚喜。山齊士的確依舊企係左邊，但就唔係貼住邊線推進，反而一見到梳爾上前就會自己移入中路，幫佢拉走防守球員之餘亦可以拉近同盧卡古之間嘅距離，絕對係執行緊影子前鋒嘅工作。另一個同左翼嘅明顯分別係防守時佢唔會每次都返嚟當左中場咁守，所以進攻時可以好快就喺前面接應，活躍範圍盡量控制係盧卡古之後、中場球員之前。多咗正面闖入禁區同埋交短波俾魔獸呢啲選擇令佢唔再得Cut大位斬波射波一招，箍波呢個職責亦都因為中場壓得夠前而唔洗佢做。整體嚟講佢踢得好自然好享受，被換出只係因為難得領先兩球想俾狀態不足嘅福仔落場操下，可惜後者極速直紅出場，將全隊競爭最激烈嘅位讓出嚟。

摩連奴咁少用442係因為佢要中場長期維持極高工作量。好幾次轉守為攻嘅情況都會見到盧卡古同山齊士係兩翼位置等待，令對方兩閘唔敢壓得太前，當曼聯一拎返波佢地先至移入中路，同時間普巴同連加特會一中一右插上嚟，形成接近三個前鋒加一個持球者嘅局面。相反，防守時費蘭尼幾乎只會喺一對中堅前面做掩護，連同馬迪在內嘅其餘三中場就必須平排防守，變相跑死回緊防嘅普巴同連加特。上半場尾段未入第二球前，曼聯有幾分鐘無哂主導權，好似就失波咁，連加特換唔切氣要留係前場回氣，盧卡古就即刻跑返右中場協防，可見四中場要做到摩連奴心目中嘅攻守兼備有幾難。

盧卡古今場未能戴帽除咗要怪自己把握力差啲之外，祖赫特神勇嘅表現都係原因之一。兩次單刀嘅企位都好好亦無太早落地，收窄咗射門範圍。空門射出界果球其實係因為米爾喺後面成個攬住佢，我認為係一個明顯犯規添。或者佢永遠都唔會有世界級射手嘅冷靜，但佢貢獻到俾球隊嘅入波同功能都唔係其他前鋒俾到嘅。退一萬步講，因為我地夏季無買中鋒，所以就算棄用魔獸都搵唔到後備踢451（山、福、馬可能比較適合雙前鋒陣），咁點解我地仲要咁大力評擊一個從來唔埋怨，形勢點差都會搏盡嘅球員呢？

般尼攻守都爭兩班，加上後防有多一個費蘭尼幫手，所以今場踢得幾輕鬆。其中連迪洛夫開始做多咗指揮工作，史摩寧相對就可以退落嚟專注盯人，大家不彷多加留意前者喺無球下嘅舉動。