國際賽前擊敗般尼重奪嘅唔止係3分，更係球隊嘅精神同戰意，回來後要作客今季開季4連勝嘅屈福特，實在係一種考驗。所謂考驗除咗球隊要保住與前列球隊嘅積分差距，更重要係球隊能否保持鬥志與戰意，最終上半場由盧卡古先開紀錄加上史摩寧世界級處理嘅車身射門加上賽事尾段迪基亞嘅撲救為球隊力保2:1嘅勝果，3分到手，且球隊的戰意仍在，証明表現開始穩定，背後嘅意義更值得高興，簡直係粉紅色勢頭，可遇不可求。

出場陣容為門將嘅迪基亞，後防右至左為華倫西亞，史摩寧及連迪洛夫，左閘為楊格，三中場為馬迪及費蘭尼，加上普巴自由活動，攻擊組合為連加特，山齊士及盧卡古。

迪基亞今場需要做嘅工作不多，因為一對中堅於防守上都有不俗嘅演出，但能成為世界級除咗本身實力外，集中力都非常重要，15分鐘救出甸尼禁區頂嘅射門令球隊繼續以清白之身尋找破門機會，即使64分鐘始終失守下，89及93分鐘嘅重要撲救令曼聯保得住勝利，亦令迪基亞獲選為今仗MOTM，力証迪神世界級嘅實力。

右閘方面，華倫西亞復出後再次擔任正選，不過明顯地助攻力已經無以往咁強，而主要亦以防守為主，於80分鐘意外手球下領黃，92分鐘由拜利入替作為消耗時間之作用。左閘嘅楊格，藉著梳爾避戰而重奪今仗正選，比之前擔任右閘時表現好得多，而且助攻嘅時機與走位亦能幫助山齊士。今仗亦交出助攻予盧卡古先開紀錄，摩連奴賽後亦表示球隊不能只得一位左閘，有輪換絕對係好事黎。

一對中堅方面，賽後均獲摩連奴力讚。首先係連迪洛夫，明顯呢兩仗被安排於左中堅的位置，因為除仍然受傷嘅洛荷外，連迪洛夫算是目前陣中最好的左中堅而且用波最好嘅一位，睇情況摩連奴是有心此安排，而連迪洛夫今仗亦算成功令安迪格雷嘅威脅減至最低，雖然仍被對手射入一球但大部分時間都算壓制成功。另一中堅史摩寧，今仗踢出身價波，防守上基本上令甸尼處於低沉表現中，而且史摩寧更於一次角球助攻中接應費蘭尼頭鎚二傳，心口控定後近門車身射入成2:0，一流嘅處理，只是令摩連奴最不滿的卻是其髮型......

防中方面，費蘭尼繼續與馬迪鎮守中路，馬迪的工作相對簡單，防守，屏障及把球傳給普巴或前場球員。可惜嘅係賽事尾段因為要補位作出一次犯規而變成兩黃一紅下離場，歐聯再見吧，下周英超便休息休息了。費蘭尼方面，今季工作明顯多了，需要兼顧中路防守高空波的工作，而當需要中場截擊時亦有很好的遮線及攔截，得到皮球後亦能簡單而直接的傳給隊友，進攻需要時也可以入禁區幫手頂波。2:0的出現便是來自他的二傳，Plan B球員? 似Plan A吧！

普巴方面，今仗表現不俗而且乾脆利落的傳球與控球，上半場更有三次直接入球的機會只是全被科士打救出而已。下半場尾段雖然又出現一點小賣弄但整體而言都是出色的。而且看到普巴今場享受著足球的快樂也表現出高水準來，繼續吧，普巴。

進攻三子方面，連加特繼續負責走上走落及自由跑動的工作，目的都係提供更多嘅無球跑動令曼聯進攻線上出現更多空位出黎，任務是完成了的。71分鐘馬斯亞入替連加特，此換人相信因為摩連奴眼見球隊氣勢不及主隊，而且對手亦開始壓前令後防空間增加下，馬斯亞的突破力會成為關鍵，不過馬斯亞入場後表現只是一般，曾經於禁區內找到射門機會但被守將所封阻，而賽事尾段更因一次回防太慢而間接令馬迪領下第二張黃牌而需要離場。

山齊士方面，主要於左路活動，而今仗山齊士亦曾食詐糊，也曾有禁區邊推入禁區內攻門的鏡頭，可以期待山齊士的狀態正慢慢提升，84分鐘由麥湯米尼入替。麥湯米尼入場後出現於右路，但明顯位置並非其擅長位置令表現只屬一般，更有交失波令對手有反擊的機會出現。

正前鋒嘅盧卡古，今仗表現非常積極，於上半場接應楊格傳中用腹部近門撞入為球隊先開紀錄，而且可以看到盧卡古於前點停球及二傳嘅功夫都大有改善，最重要相信是完場前由中場線狂奔回防到右閘位置鏟走皮球更令曼聯球迷加以欣賞其拚勁，今季已經5場入4球，繼續吧，渣古！

戰術分析方面，從過去幾仗看到摩連奴開始將4-2-3-1轉變為4-3-2-1的陣式，普巴變得更為自由，而連加特自由跑動加上多入中路，山齊士亦並非只站於左翼位置，此舉令盧卡古更多機會於禁區活動，而左右翼亦有更多空間上前助攻，最重要是讓普巴變得自由，當普巴有信心時有可遇神殺神之感，似乎摩連奴正在構建此進攻模式。

中後場方面，用史摩寧及連迪洛夫來頂住對手雙前鋒，加上費蘭尼與馬迪兩條大杉來倒塞中場線，其餘時間便讓連加特，山齊士及盧卡古於前場做吧。不過馬迪今場領紅令下仗對狼隊的聯賽增添多一點變數，幸好還有費特及佩利亞作後補之選。當然目前最重要係維持近仗嘅戰意與鬥志，呢3分先拎得有意義。

鳴謝各位支持文字直播即討區，下場見。