今場比賽之前，曼聯連贏熱刺同曼城，諗住今場可以贏埋愛華頓，可惜最後1比1打和。我哋可以睇吓究竟隊波發生咩事，點解對Big6成績咁好，但對所謂弱隊點解會發揮唔到實力呢？

攻擊線：福仔多次在左路發難，可惜唔能夠轉化成有威脅嘅射門。佢最突出嘅就係上半場嗰球罰球。馬斯亞就响前線冇波傳送俾佢，攻門次數寥寥可數。占士响右路俾對方有極大威脅，有幾次於邊路出波。下半場轉打左邊之後，嘗試帶波入中路，但都係製造唔到入球。連加特表現對比上兩場差好遠，帶動唔到攻勢之餘，發揮唔到嗰種無球走動嘅威力。格連活特射嗰球非常冷靜，穿過對方後衞大細然後入網。但之後再無機會俾佢射門。

簡略地講咗佢哋嘅場上表現，我就想分析翻佢哋咩原因發揮得唔好。個關鍵在於費特同連加特兩個球員發揮唔到佢哋長處。首先費特今場被對方前鋒同中場前後夾擊，令佢做唔到一啲滲透性傳送俾前場，佢多數將啲波分邊，而連加特又分擔唔到費特嗰種傳送工作，所以少啲能夠為福仔同馬斯亞製造入涉嘅機會。而且連加特嘅缺點响今場顯露晒出嚟，就係打攻中最後要係變化，當一套路嘅進攻被睇穿，就要去嘗試改變，但佢帶唔出改變。

另外，愛華頓後防除咗封殺咗費特之外，佢哋屯積重兵在禁區頂，令到馬斯亞同福仔唔容易靠個人能力去突破。尤其係福仔，佢一帶波就有兩至三人去釘實佢，一個包佢，另一個等佢有啲甩腳就去攔截，而且對方後衞一見到佢擺軚就即刻阻止佢做射門動作，從而減低佢嘅威力。馬仔就直情唔俾佢响禁區頂同禁區入面掂波，盡量減低佢一擊中龍嘅能力。對方中堅盡量唔俾佢轉身，即使佢想走位接應來球就會用身體抗衡性去阻止佢攞波。反而占士方面，愛華頓班後衞就容易被佢落底出波，不過其實作用唔大。原因係占士出波唔夠急勁，尤其係地波，所以好容易就俾對方後衛解圍。仲有馬斯亞同福仔都唔係搶點型攻擊球員，加上佢哋响接應傳中波嘅默契完全未建立，所以於邊路側擊發揮唔到威力。

中場突破唔到，就要一啲變化。然後就靠邊線出波，邊線出波被對方後衞睇通咗就要靠角球或死球。可惜，制空力最強嘅麥佳亞對抗性實在太弱，只要有守衞單對單纏繞佢就已經解決到問題，其他球員衝頂能力都唔高。仲有曼聯中前場球員好少可以靠製造混亂而入波，所以雖然班後生仔係有天賦，但應變能力就唔高。仲有愛華頓班球員好識得利用犯規去阻止佢哋打反擊，上下半場夾埋都有三、四次，尤其係戴維斯第一次犯麥湯文尼嗰球。

中場線：麥湯文尼在防守上做得好稱職。無論企立遮線，幫手協防佢都做到防守第一道屏障。由於佢身高腳長，在攔截同爭搶皮球亦都佔有優勢。而當佢搶到個皮球就會第一時間交回個波俾中堅或俾其他有空位嘅球員。不過由於今場壓住對方嚟打，所以期望佢在進攻上有多啲貢獻，尤其係角球同罰球應該利用身高優勢去爭取入球。

費特可以話做到基本要求，在防守上冇咩甩漏。進攻又可以將個波運上前，如果要講就係射門嘅準繩度實在太差，我個人認為在無後衞影響下應該都要射中龍門。基於今場被對方前後夾擊，費特有時可以同連加特互換位置，等响進攻效果上有一定嘅變化，從而令對方出錯。

後防線：兩閘在今場比賽被重點攻擊，好明顯係想搏角球，所以受到嘅壓力都唔少。雲拜沙卡攔截效率極高，基本上係冇人可以輕易過到佢，而且佢好少犯規。不過對方都有一招去對付佢，就係搵兩個球員夾擊佢，務求做成二打一局面，令佢要兼顧埋第二個敵。如果有咁嘅情形，占士會幫手協防。助攻方面始終都係冇咁熟練，出波威脅性不足。梳爾防守就冇雲拜沙卡穩健，但都算稱職，反而佢就喜歡上前場助攻，仲有一球射門，差啲俾佢得手。不過佢同福仔睇落唔算太夾。佢出波亦都係差啲，做唔到一個令對方混亂嘅後果。

連迪洛夫同麥佳亞兩位中堅都冇乜犯大錯，連迪洛夫嗰球失球係非戰之罪，其餘時間都冇走甩人。兩位中堅用波傳波都非常淡定，好少話响後場交失波。攔截方面大致上都準確，而高空波麥佳亞頂晒。麥佳亞有時亦會帶波上中場，引出多啲空位俾隊友。唯一做得唔夠好就係角球同死球嘅助攻威力唔夠強，因為如果前場入唔到波，但又搏到好多罰球同角球，咁中堅就要做嘢。當然唔一定要入波，但都希望可以衝散對方防線。

龍門：迪基亞今場失嗰球係有人犯規，但冇辦法，VAR判入球，但迪基亞係咪都要去強化身體條件，增強對抗性，除非佢唔係踢英超咁體力化嘅聯賽。

最後，都係果句: 問題唔會一時三刻可以即刻解決，始終有潛質年青人都需要時間同機會。不過，冬季轉會窗就快嚟，究竟買人同培訓之間點平衡，就係蘇B嚟緊嘅考驗，始終曼聯都要爭前四。