曼聯今場在作客環境下以0:2負於榜首嘅利物浦，我哋睇吓有咩問題可以探討：

一、佩利亞今場表現值得俾佢踢正選嗎？

二、曼聯整體進攻同利物浦最大分別响邊？

三、曼聯中後場防守簡評。

一、佩利亞今場都有帶俾對手威脅，但真係寥寥可數。上半場有一腳遠射，可惜射得太正龍門。另外有一球由馬斯亞於左路斬俾雲拜沙卡，再由後者傳中，佩利亞只差一步就可以送個波入網。而下半場就有一球同馬斯亞做撞牆，可惜後者單刀射高。

雖然佩利亞對球隊唔係話無貢獻，但作為一個曼聯10號位球員今場就真係唔合格。論盤扭，佢速度同身位完全俾對手比下去，多次被對手拍甩腳下球。而傳球方面，佢唔夠當機立斷，做唔到第一時間嘅傳送，佢一遲咗出腳，就俾對手封實晒傳球路線，無晒空位。合作性方面，佢以前踢華倫西亞時係踢翼鋒，嗰個位對球賽閱讀能力嘅要求同進攻中場比較始終無咁高，加上踢法已經定咗型，所以佢唔識點樣去踢攻中位置，做啲簡單波。一有波在腳就一味帶上去，永遠做唔到致命傳送。另外佢做唔到暗示效果，即係隊友了解到佢想點做但對方守衛唔察覺，反而佢係令到隊友唔知佢想點，但對手了解到佢下一步點做，所以同佢合作嘅隊友都幾辛苦。例如：有一球佢帶住個波，占士想幫佢，但佢竟然撞埋占士嗰度。

與其係咁，不如擺番佩利亞打翼鋒，馬達打攻中。雖然馬達係慢同埋唔夠對抗性。始終佢都係打開攻中，同埋佢轉數真係快。佢可以一路hold波一路諗點樣製造攻勢，而且佢可以做長傳同短傳。此外，佢隻左腳所做出嚟效果亦都好有效，無論係射門同傳送都俾到好大威脅感對手。仲有佢嘅傳波可以帶動一班年青人發揮佢哋嘅潛能。例如：對諾域治時福仔嘅搶點入球同埋馬斯亞嘅頭搥，證明好嘅傳球係可以引發隊友潛能。

二、利物浦同曼聯最大分別就係利物浦總係帶種正能量去踢波。唔知點解高普帶俾隊員有一種動力，依種動力令到球員响比賽時遇到啲不合心意事時，好快就會收拾心情重新出發。例如：我睇到佢哋俾曼聯球員截到個波就會立刻做逼搶。當然蘇B亦都會叫球員失波後做同一樣嘢，但我見到嘅係利物浦班球員個精神臉貌係有股衝勁。蘇B嗰啲係Push班球員去做嘢，同埋班球員有時好似唔係咁明佢想點，唔識得自我調節，好多時要蘇B親自落嚟提場。

仲有就係團隊合作默契，班球員跟咗高普4年幾5年，班球員合作得非常純熟。佢哋傳波根本唔洗望隊友，佢哋亦都唔需要特別去估隊友係交到腳波定係交落個位。佢哋做撞牆、叠瓦係唔洗特別遷就隊友，造成又快又準嘅效果。加上球員質素平均地高，沙拿、文尼同費明奴都係速度、技術兼備，又肯大家互相合作，依個先至最難得。曼聯球員質素唔差，但個別位置真係爭啲世界級球員支撐球隊，好似防中同攻中都缺乏世界級球員。年青球員好需要一啲高質嘅外來球員俾啲衝擊佢哋。而且佢哋好似只係專注提高某一兩項嘅技術。例如：引球推進同盤扭，其他嘅好似無球走動就比較弱。

三、中場費特同馬迪鎮守中路表現尚算不錯，尤其係費特，佢全場覆蓋範圍廣泛，擁有跑不完嘅體力，跑步速度快，而且多次作出準確嘅攔截，瓦解咗對方唔少嘅攻勢。馬迪就做一啲遮線嘅工作，雖然佢速度係慢啲，但佢嘅經驗幫到球隊做啲補位工作。佢嘅高度亦都幫到球隊應付高空波。另外，佢哋兩個應付控、傳球都做得唔錯。

左、右翼衞威廉斯同雲拜沙卡可能因為變陣加上對手實力強，初時未完全適應同投入。尤其係右邊雲拜沙卡支援連迪洛夫不足，好多時要後者單打獨鬥。不過，始終雲拜沙卡單對單防守力強，當適應到文尼節奏就可以跟得上佢嘅速度，同埋成功作出攔截。左邊威廉斯首度作客紅軍算打得唔錯，球場上拼勁係佢最大本錢，只要佢爭取多啲上場經驗，將來左閘正選非佢莫屬。

三中堅左邊連迪洛夫好明顯要佢獨立防守後場左邊感到有啲力不從心，多次跟甩對手。要叫番雲拜沙卡做屏障。正中堅麥佳亞表現算中規中矩，做攔截都算準確，應付高空波除咗第一球失波外其餘都應付自如。左邊梳爾表現出色，全場盯到沙拿發揮唔到應有實力。

龍門迪基亞，除咗應付高空波之外，表現尚算穩定。

最後，今場雖然輸波，但曼聯上下半場都有機會追和。當然兩隊實力係有差距，不過我哋都有傷兵福仔同麥湯文尼。仲有蘇B點解唔出馬達，依個都係一個問題。希望下場馬達有正選啦！