雲佩斯喺2012年由阿仙奴加盟曼聯，踢第一年就可以為球隊攞返失落咗嘅英超冠軍，而且係第20個頂級聯賽冠軍，當年佢亦都射入26球成為英超神射手，其中對阿士東維拉連中三元同埋射入由朗尼長傳嗰球窩利最令人難忘。究竟佢當年點解可以咁快融入球隊，為球隊射入咁多入球呢？

一、射手觸覺，技術全面。佢嘅入球板斧好多，佢可以自己高速盤球入禁區射波，亦都可以控定個波然後即刻拐向大位左腳熨射或抽射。但當對手一心以為雲佩斯會用左腳射門時，佢又會用右腳，所以有時真係估唔到佢想點，後衛見佢攞住個波想行住佢，佢就即刻起左腳，但如果想封佢左腳就做個假動作轉右腳。嗰季佢有兩至三球都係用右腳射入。而且佢又擅長窩利抽射，好似對維拉嗰球球不着地窩利抽射，入波之後對手都淨係做出無奈嘅表情，所以真係睇少佢一陣都唔得掂。另外，頂頭搥同罰球亦都係佢一大殺着，加上佢嗰季腳風好順，用膊頭都可以入到波同埋有幾球對手攔到個波改變方向都照入網，最佳例子就係對曼城補時入嗰球罰球，當時拿斯尼無端端伸隻腳出嚟，令個波改變方向收死龍門祖赫特。仲有就係對車路士時有一球雲佩斯射門撞柱之後個波彈出中咗大衞雷斯撞番入自己龍門。除此之外佢嘅心口控波同轉身停球嘅動作都做得好純熟，就係咁為自己制造到一啲射門機會同埋擺脫對手。好似對修咸頓華倫西亞右路傳中，然後佢心口控定窩利抽射入網嗰球。佢嘅全面技術除咗佢本身係有天份外，仲需要累積多年嘅經驗先至去到依個境界。

二、隊友互相配合，效果極佳。大家都知阿仙奴同曼聯係世仇，每次大家對壘都會份外激烈，加上雲佩斯效力阿仙奴8年，所以大家嘅了解其實係好深，無論喺球路同特性方面。咁亦都可以解釋到點解佢加盟曼聯第一季就可以同大家配合得咁好，所以佢除咗自己可以入波之外，仲可以為隊友鋪橋搭路，而隊友亦都可以夾到佢。佢固然可以入波，但其實佢亦都擅長開角球同罰球，所以佢嘅助攻數字亦都唔少，艾夫拿同伊雲斯都曾經接應佢嘅角球入波，加上有小豆同朗尼依啲經驗咁豐富同埋各有特點嘅射手，就令對方後衛防不勝防。好似當啲後衛釘實雲佩斯時，小豆就會利用佢段速搶點射門，朗尼亦都可以喺禁區外遠射或走入禁區撞射。而當對方守衛要防守朗尼同小豆，雲佩斯就空晒，隊友見到就緊係即刻交俾佢射門。加上當年曼聯擅長出波同傳波嘅球員實在太多，艾夫拿、華倫西亞、卡域克、朗尼同傑斯等。例如：艾夫拿對修咸頓斬球角球俾佢頂入，華倫西亞喺對車路士同史篤城右路傳俾空晒嘅佢撞射，仲有朗尼喺對雷丁嘅一個後㬹傳送俾雲佩斯單刀。仲有一點要提就係嗰幾年曼聯好似冇乜左腳球員，朗尼、小豆、貝碧同奧雲都係主要右腳，突然嚟咗個左腳仔，對手好似唔係咁適應曼聯新嘅攻擊套路。

三、動機明確，誓要奪冠。當年雲佩斯由阿仙奴轉去死敵曼聯都係為咗一嘗英超冠軍心願，就好似奧雲咁。大家都明白如果有球員係有實力但未攞過冠軍係一件好大嘅憾事，係一世都覺得遺憾，所以嗰種比賽動力就更加強。加上佢嚟到曼聯有咁多奪冠經驗豐富而且又會繼續保持爭勝心嘅隊友同領隊幫助。例如：老臣子傑斯、史高斯，亦都有鐵血硬漢艾夫拿、維迪，仲有沉着冷靜里奧同卡域克同埋技術全面嘅朗尼等去輔助雲佩斯，當然亦都要有個出色同要求高嘅領隊費格遜去帶領球隊。領隊嘅角色尤其重要，記得雲佩斯都講到當年曼聯輸咗俾曼城後，有球員出咗去夜蒲，雖然當時聯賽領先12分，但費格遜都好嬲咁話班球員，提醒球員唔好鬆懈。因為佢哋經歷對上一年領先8分下輸咗冠軍俾曼城，之後成班球員醒晒，當然嗰年就提前4輪奪得英超冠軍。不過嗰年最遺憾就係歐聯俾皇馬淘汰出局，首回合作客，雲佩斯有球單刀射得唔夠力俾人護空門同埋次回合主場領先一球下蘭尼俾球證紅牌罰出場，間接令球隊輸番1:2。

雲佩斯係一個好出色嘅射手，雖然脾氣就差啲。可惜係佢加盟曼聯時間太遲，如果唔係應該可以為曼聯攞多幾個冠軍。不過，無論點都好，佢喺2012-2013年球季嘅出色表現，會令人難以忘記。