[K11出品] 曼聯K角度 - 信心.喜悅.享受

蘇斯克查執教後取得二連勝且大勝而回，雖然所面對只是一眾下游球隊但最重要還是表現令人滿意而且睇得出眾將開始展現了信心。而今仗除了繼續展現出信心，更睇到一眾球員有相當嘅喜悅表現出來，相信主場壓力繼放仗後亦已順利克服，最後更睇到一眾攻擊球員於今仗踢得甚為享受，順利以4:1主場大勝般利茅夫而回，目前已經追至距離第五位嘅阿仙奴只有3分之差。

陣容方面，門將繼續為迪基亞，後防右至左分別為楊格，拜利，連迪洛夫及梳爾，三中場有靴里拉，馬迪及普巴，前場三子為連加特，拉舒福特及馬斯亞。

門將嘅迪基亞今仗繼續所受壓力不多，對手只有5次攻門而中門框只得3次，均出現於上半場，而京治嘅窄位射門被迪基亞擋出，其餘兩個攻門均來自艾基嘅頭鎚，第一次被迪基亞擋出後再由靴里拉及馬迪解圍但第二次則被艾基搶贏馬迪一頂入網，再一次不能零封而非迪基亞之責任。

後防方面，右路嘅楊格今仗表現亦算稱職但上半場卻嫌過勇下魯莽於底線領黃。不過楊格嘅在陣代表會有極多急勁嘅傳中球出現。左閘方面，梳爾繼續穩佔正選而今仗再睇到與馬斯亞有更多嘅配合，防守方面面對速度已經算高嘅佐敦艾比亦應付有餘，不過賽事尾段疑似受傷令人有點擔心。

中堅方面，連迪洛夫於適應英超踢法後已成為摩連奴及蘇斯克查中堅之選，因為其用波能力不俗，能由後防開始策動攻勢，而且即使擔任左中堅或右中堅亦看似影響不大，只是過頭波方面亦是其弱點。另一中堅拜利，難得獲得正選表現自己，本以為可用穩定表現搶走中堅一位，78分鐘前亦算穩陣且表現冷靜可惜一次落腳太狠便被球証用紅牌趕離場，將要面對三場停賽嘅懲罰，亦將會錯過作客熱刺嘅大戰。

三中場方面，先講講馬迪，上仗近門攻入開齋波而今仗亦繼續正選上陣，始終蘇斯克查不能睇小中場能力不俗嘅客軍，不過馬迪表現亦交到貨更於14分鐘一次靚交造就攻勢嘅出現。下仗面對紐卡素或者係馬迪休息嘅時候了。

靴里拉方面，蘇斯克查上任後已算係企穩常規正選嘅陣容內，而今仗亦起咗舉足輕重嘅作用，24分鐘一次重要嘅回防補位於前柱化險為夷，呢個意識算係傳奇堅尼所講聞到危險嘅氣味而作出相應嘅動作吧，而靴里拉依家除咗防守可以幫到球隊外，助攻亦有一手，32分鐘傳中交出漂亮嘅一球予普巴頂入成2:0。不過50分鐘因一次跣腳而要職業犯規下拉衫領黃，75分鐘由佩利亞入替。佩利亞入替後表現與費特有點相似，節奏上仍與曼聯有點不配，希望多一點機會可以讓佩利亞與球隊配合吧。

普巴方面，自從摩連奴下台後，普巴連續3場交出極佳表現，入球助攻停不了。今場再交出兩個入球一個助攻，除此之外更有一球中柱波可以連中三元。場上表現亦越黎越好，爽快之餘亦無再於中後場賣弄腳法，而且兩個入球均屬後上入攝完成足証只要普巴能踢出具侵略性嘅足球便極具殺傷力，賽後獲選為MOTM，連續兩場，期待第三場吧！

前場方面，右路嘅連加特繼續受蘇斯克查重用但今場表現顯得有點遲緩，不過仍有不停跑動帶出空位亦因此成為蘇斯克查重用嘅原因，應該話係受曼聯多位領隊重用嘅原因而且上季開始表現大躍進，控球及推進均越黎越成熟，場上決定亦越黎越好。

左路嘅馬斯亞方面，今仗復出後狀態似乎未完全回到十足，不過已足以交出一球漂亮嘅腳面助攻予拉舒福特埋門破網。81分鐘由於拜利嘅紅牌要換入鍾斯而提早離場休息。鍾斯入替後當然踢回中堅位置但由於當時大局已定下，未有受任何考驗至完場。

前鋒嘅拉舒福特，今場光芒四射，5分鐘嘅個人突破令艾基得個追字再傳中助攻普巴入球。而個人方面亦於45分鐘接應馬斯亞嘅傳中剷射入網成3:0鎖定勝局。重要嘅係近幾仗拉舒福特於場上決定越見進步而且本身有速度與技術，只差埋門需要多加練習便能再進化，70分鐘由盧卡古入替。盧卡古經過缺陣兩場後回來，而72分鐘便接應普巴用右腳射入一球，雖然此入球於越位位置下入球但總算為盧卡古取回不少信心。賽後蘇斯克查亦對如何將盧卡古解放有著一套心中有數嘅方案，即管等待成效吧！

戰術分析方面，明顯蘇斯克查有著費Sir嘅影子，期望以最佳陣容出擊盡快鎖定勝局便開始作出換輪，因此下半場盧卡古能於70分鐘入替拉舒福特，以便前者取回狀態而後者得以休息，76分鐘亦有佩利亞入替靴里拉嘅決定。只可惜拜利嘅紅牌打亂了最後嘅換人幸好不致影響賽果。

另外，因為蘇斯克查亦係球員出身，自然更能有效地理解球員嘅感受，經歷及所想。此方面有助蘇斯克查幫忙球員渡過樽頸位置，近日訪問已見蘇斯克查對於拉舒福特有著針對性嘅訓練而今仗亦見成效。而且亦因其後備次數眾多更能明白後備席上嘅球員心中所想，如何去安撫球員心理令佢地保持信心與士氣亦事關重要。目前黎講仍是成功的。

蘇斯克查曾提到自己希望讓進攻球員能盡情享受足球，此話亦由普巴近三仗嘅表現反映出黎，入球，助攻，傳球成功率及創造機會次數等等都得到震撼性嘅反彈。當然一名球員最重要有信心，才能將自己心中所想嘅能力展現，而且睇到除普巴外，其他球員包括拉舒福特及連迪洛夫等等亦越出信心來。有信心變繼而能有喜悅之情，呢一點亦從普巴所帶領嘅球員展現出黎，睇到普巴或連加特入球後嘅喜悅，慢慢再進一步地睇到，一眾進攻球員正在享受著足球。當然，曼聯已經連續多場失球，而且對手亦只是榜下游球隊足証後防亦有改善嘅空間。否則去到強強對碰下便極有危機。

鳴謝各位支持文字直播即討區，下場見。

[K11出品] 曼聯K角度 - 進攻粉底下的防守

粉底大家都知道係一眾女士用黎掩蓋臉上瑕疵嘅化妝品了，而曼聯由蘇斯克查執教後第一場主場賽事，雖然順利以3:1擊敗作客到來嘅榜下游球隊哈特斯菲，但實情蘇斯克查是把球隊壓前，利用了進攻來遮蓋著防守的漏洞，就好似粉底一樣，將防守危險與機會盡量減低。幸好能全取3分，繼續將與前列距離進一步縮窄，迎接下周繼續嘅緊密賽程。

陣容方面，門將繼續由迪基亞把守最後一關，後防右至左分別為達洛特，連迪洛夫，鍾斯及梳爾，三中場為費特，馬迪及普巴，前場右至左為馬達，拉舒福特及連加特。

迪基亞雖然再一次，係再一次保唔住零封，不過責任不在他身上，所失一球為後防頂唔住對手嘅攻勢被近門射入。而迪基亞今場60分鐘嘅撲救再次展示其迪神之功架，將迪保治接應角球嘅妙射如同攞籃板一板將皮球擒下來，賽後蘇斯克查亦盛讚此為佢見過其中一個最美妙嘅撲救。

後防方面，右閘嘅年青19歲新人達洛特獲機會上場，雖然佢屬於摩連奴嘅遺產但此子的確擁有極大潛力。不過今仗似乎面對充滿英超味道嘅哈特斯菲顯得未能適應，攻守也未算稱職，39分鐘浪費了拉舒福特恰到好處嘅傳中球射斜出界，防守更曾差點被梅賓沙爆過，54分鐘由楊格入替。楊格入替後，明顯用經驗彌補此位置的漏洞，多次由右路入中路包位，而且楊格亦為曼聯提供了較高質嘅自由球處理。

左閘嘅梳爾，今仗繼續成為正選而左路拍擋變成了連加特，拉舒福特，甚至普巴，感覺有點塞車結果今仗梳爾助攻不多但仍有乘空檔時上前達至射門嘅威脅。

中堅方面繼續為上仗拍檔鍾斯配連迪洛夫，位置相同且踢法亦一樣，第一個入球正是連迪洛夫角球助攻衝前柱下造成馬迪門前執雞成功。不過連迪洛夫今仗要為所失一球負點責任，雖然普巴爭頂失敗但皮球於其頭頂越過再忽視了後上嘅辛卡被近門射入，始終制空力弱屬這對中堅組合最大弱點。

防中方面，先說馬迪，馬迪今仗繼續正選而表現繼續可人，要知道馬迪的工作簡單而重要，控制節奏，轉邊或將皮球傳俾重心球員，雖然最近多了一項後防拍揮者的工作但勝任有餘，而今仗更於角球助攻下近門射入今季第一球，更是今仗為曼聯打破悶局重要的一球。

另一防中費特，鮮有上陣機會但今仗仍然顯得有點節奏不合，太快及太急了一點，29分鐘更領下黃牌。不過如果費特適應了英超而且捉摸到節奏，的確係一位重要嘅B2B，54分鐘由靴里拉入替。靴里拉入替後明顯將經驗與穩定帶到場上，由後場嘅搶截工作至前場助攻也參與在內，63分鐘便瞓身將皮球傳俾普巴射入2:0的一球，為曼聯打下強心針。

左中場嘅普巴，今仗獲選MOTM，因為其表現真的越來越好，後場減少咗無謂嘅盤扭而於中前場增加咗參與度且節奏明快，射入2:0嘅入球雖然難度不高但卻重要，需要冷靜嘅處理。而第三個入球於禁區外嘅快射，有角度且力度十足，屬於祖雲達斯時期嘅遠射。雖然3:1嘅失球為普巴與穆尼爾爭頂失敗，但近兩仗交出兩入球兩助攻，似乎普巴於蘇斯克查帶領下既開心又交到表現。

攻擊組合方面，連加特，馬達及拉舒福特於前場沒有被安排特定位置但卻有目標路線，馬達中前場自由走動，連加特於左邊走至中路入滲，拉舒福特由正中位置不時走到左路突破。不過上半場左路卻有點塞車，因為此三位球員加上普巴曾有一段時間集中在左路進攻，加上對手球員便變得密密麻麻，而在此情況不改的話，最大可能的換人會是犧牲馬達。幸好球隊下半場開始重新定位，馬達亦增加在右路嘅活動，結果63分鐘便由馬達於右路突破落底線再傳中下造成入球，79分鐘由高美斯入替馬達。高美斯嘅入替証明了曼聯重視青訓而且青訓有質素嘅肯定，當下一刻同場嘅曼聯青訓便有普巴，連加特，拉舒福特及高美斯。而高美斯亦非刷數據之輩，雖然矮小但靈活且有腳法，90分鐘於禁區嘅射門雖然不入但整套動作流暢，期待今季有更多一隊嘅上陣機會吧。

連加特方面，有佢在陣嘅話，能令球隊行軍速度變得流暢因為連加特喜歡跑動及向前引球推進而且亦有一定嘅遠射能力，今仗於77分鐘亦助攻予普巴射成3:0。

拉舒福特方面，的確仍有不少地方可以進步但見此名曼聯新10號近仗亦有不少進步，當中包括一些場上嘅決定，而39分鐘左路突破後傳中亦做得非常不俗。而上半場亦有兩次左路起腳射門勁度十足只是欠缺角度而已。

戰術分析方面，明顯地蘇斯克查於進攻上花了不少心思去佈陣，今仗上半場期望以拉舒福特拉左邊後多用連加特後上入滲中路搵空間。而下半場則由於楊格出場後，球隊進攻上左右比例取回一定平衡令對方後防空間增加，只要球員維持跑動及皮球運送便會有空間再次出現，2:0嘅入球亦因此出現。

不過，進攻雖然係蘇斯克查目前帶到俾曼聯嘅元素，但防守仍然係目前曼聯最大嘅問題，上半場初段曾出現險象幸好干高奴小禁區炒高，下半場迪保治嘅門前接應妙射亦因為完全走漏下出現，結果3:1也在防守不夠穩陣下被近門射入。其實目前蘇斯克查只是將球隊整條線路推前，令後防受壓減低但要知道其實其防守力仍然不足。只是在著重進攻希望以己隊進攻去減少對方進攻嘅機會從而彌補防守薄弱嘅問題，純粹是用進攻此粉底去遮蓋防守的瑕疵，到底曼聯一月是否仍要購入中堅還是蘇斯克查可以令史摩寧及拜利等等去成為領袖級後防大將? 仍有未來三仗(兩場聯賽加一場足總盃)可以俾蘇斯克查去尋找此答案，及後便要迎來與熱刺搏擊嘅賽事。

鳴謝各位支持文字直播及即討區，下場見。

[K11出品] 曼聯K角度 - 歡樂今宵

首先預祝各位聖誕快樂，摩式曼聯成為過去，蘇斯克查走馬上任成為今季餘下賽季嘅代領隊，除咗帶來了一眾紅魔久違了的大勝，全場以5:1作客大破卡迪夫城，為蘇斯克查打嚮成為曼聯領隊之頭炮，最重要還是重現了一眾紅魔久違了的歡笑，歡樂今宵再會，各位觀眾晚安，好好地甜睡了一晚。

陣容方面，門將繼續為迪基亞，後防由右至左為楊格，連迪洛夫，鍾斯及梳爾，防中由馬迪配靴里拉加上普巴，前場由右至左為連加特，拉舒福特及馬斯亞。

門將嘅迪基亞今仗又再一次保唔住零封，所失一球卻是來自12碼，而除此之外，其實迪基亞曾經以一次水準撲救將梅菲禁區內嘅燙射撲出界。

後防方面，楊格由摩連奴軍下轉至蘇斯克查仍然獲得信任，今仗繼續成為隊長加右閘正選，不斷嘅助攻加上落力指揮球隊，事實上比華倫西亞更有隊長風範，而其實最重要嘅係本身翼鋒出身嘅楊格，配合蘇斯克查勇於向前嘅戰術，感覺越黎越年輕一樣。而球隊較遠嘅罰球及角球都主要由楊格負責，可見楊格將會繼續受蘇斯克查之重用。

左閘方面，梳爾傷癒復出，而其表現仍然維持今季高水準，亦曾有助攻至對方禁區嘅情況出現。不過值得高興嘅係，梳爾今仗開始與左翼嘅馬斯亞產生多一點默契。

中堅方面，連迪洛夫配上鍾斯，前者今仗有別摩佬時代以左中堅出現而是以右中堅現身，而且經常用波，更有兩次殺上對手三閘線甚至禁區去助攻，比摩佬時代更具侵略性。不過公道一點講，防守上經過摩連奴旗下嘅訓練，亦已見能應付英超節奏了。但要留意一點，連迪洛夫應付對手從後長傳過頭波回防呢一點明顯較弱，著實要針對性解決呢個問題。鍾斯方面，今仗負責左中堅一職，而主要負責防守工作且相當稱職。更曾有一次角球助攻下起腳射門嘅機會。

防中方面，馬迪配上靴里拉，先講講馬迪，其實馬迪嘅工作無變，一樣主要做控制節奏及作為一對中堅嘅屏障。其實以馬迪嘅角色，如果球隊攻守平衡得宜，馬迪於比賽中在精神方面嘅消耗比體力方面大，87分鐘由費蘭尼入替。費蘭尼入替後基本上觸球次數不多。靴里拉方面，其實以鬥志方面及使球隊攻守平衡，靴里拉理應早早獲得正選。今仗靴里拉亦表現出作為球隊攻守串連嘅重要角色，B2B嘅功能其實比普巴更明顯，防守上經常於自己禁區邊做搶截，中場亦會與隊友做短傳嘅串連工作，更會後上到對手禁區邊助攻，29分鐘便正正於離門三十多碼接應普巴橫傳後遠射入網成2:0，雖然皮球因省中人改變方向入網，但敢於起腳射門亦係靴里拉嘅優點，加上佢由後場至中場再到前場也有參與球隊工作，咪就係B2B囉，我K11已經講咗好多次！不過亦要提醒一點，靴里拉做綠葉比做球隊主角嘅表現更優異。

重回正選而位置處於偏左中場嘅普巴，今仗表現其實來個先苦後甜，或者太耐無比賽，開波初段幾腳轉方向嘅力度與位置都好差，但慢慢地重掌節奏而且表現成熟穩重，簡單而且絕不花巧，69分鐘嘅遠射亦有一定水準只可惜被門將撲出。今仗更交出兩球助攻包括橫傳轉方向予靴里拉遠射入波及完場前直線傳俾轉為前鋒嘅連加特單刀入球。明顯地，今場普巴為咗踢爭氣波及希望重新取悅曼聯球迷，好多波都以大局為重，而且連加特搏得12碼後亦睇到普巴讓出機會予連加特入波，賽後亦講咗佢與摩連奴嘅關係與結論，希望佢可以乖乖集中精力繼續踢好波啦。

前場三子方面，先說說左路嘅馬斯亞，其實今季已明顯看到馬斯亞於攻守上都再有進步，而今場波於上半場被追成2:1後，見到馬斯亞勇於成為球隊進攻策劃者，走到中路迎波及做波，結果只需3分鐘便為曼聯再次拉開比數，而且與普巴及連加特更來一次漂亮組織入滲後射地波遠柱成3:1。而且最值得高興嘅係與梳爾開始多一點配合，如果日漸成熟的話將會令曼聯左路威脅倍增，86分鐘由佩利亞入替。佩利亞入替後過於集中中路組織，反而令進攻變得緩慢，睇到佩利亞好希望表現自己但似乎有點心急了，放心吧！相信蘇斯克查會繼續俾機會你証明自己於曼聯嘅將來。

正前鋒嘅拉舒福特，今仗3分鐘便用漂亮罰球來為曼聯先開紀錄，而其後踢法跟以往擔任正前鋒時相若，可惜一次由連迪洛夫後場開始策動嘅進攻卻有點操之過急，結果半單刀下失機了而其實還可選擇回傳後上跟進嘅連迪洛夫。而且一次不小心嘅手球曾經令曼聯被卡迪夫城以12碼追近至2:1，亦令迪基亞失去了今場零封，下半場79分鐘由費特入替。費特入替後於防中位置出現不過睇到仍然與隊友欠缺一點默契，但其勇於由中場開始推進嘅特點或會於將來成為蘇斯克查重要嘅武器，繼續適應吧。

右路嘅連加特，上半場其實表現只是平平，不過勤力嘅走動加上勇於推進已經影響卡迪夫城後防佈陣，而41分鐘接應普巴直傳再回傳予馬斯亞射入3:1一球為佢拎回一定分數，不過當時蘇斯克查若要選擇半場換人則會是熱門人選。下半場再來個爆發，先有56分鐘於左路禁區頂開始盤球直闖引來對手犯規獲得12碼，更親自操刀射入成4:1，其後當福馬齊齊換走後，連加特轉為正前鋒，正是等待著獲得直線奔跑嘅機會而普巴正好於完場前一個靚直線予連加特推過門將後梅開二度，賽後更成為MOTM。

戰術分析方面，明顯地，蘇斯克查雖然仍舊以接近摩連奴嘅排陣出擊但細節方面已加入自己嘅元素，亦係師承費Sir嘅元素。節奏明快，將後防與中場推前，要求個別球員盡量以一兩腳波來使行軍速度加快，特別係令普巴於中場踢得更爽朗直接。

另外，連迪洛夫於摩連奴時代會以左中堅出現但今仗則重回右中堅，而且亦勇於上前助攻至對方禁區頂。摩連奴曾解釋連迪洛夫是目前最能勝任左中堅一職嘅曼聯球員但蘇斯克查則將連迪洛夫嘅自由度增加而由或者不擅長此位置但只需專注防守便足夠嘅鍾斯擔任左中堅，此舉可令連迪洛夫嘅優點放大，而當連迪洛夫上前助攻時便由馬迪負責留後助守，而摩連奴則較注重平衡與穩陣嘅排位，明顯看到蘇斯克查較摩連奴大膽佈陣。

再者，明顯地目前曼聯後防未有領袖級球員而蘇斯克查看似委任馬迪作為後防拍揮者，包括龍門球是否開長或短，需要壓前還是後退，當然用防中馬迪來做後防指揮只屬緩衝之計，一旦面對組織力更強嘅球隊仍然會有大危機出現，所以也要重點解決此問題。

還有蘇斯克查今仗於賽事末段安排連加特任正前鋒便再次運用到球員優點，因為連加特踢法直接簡單，有速度，只要有機會便向前走位及接應，造就了5:1嘅入球出現。當然也得有普巴嘅美妙傳送才可成事。

雖然作客大破卡迪夫城不算甚麼，但總算係蘇斯克查作為代領隊上任後第一場就打開勝利之門，為其信心做好根基。而且曼聯於英超攻入對手5球呢個數字亦係自費Sir於12/13球季退休後等了6年再次出現。加上球員臉上嘅笑容重現，球迷亦終於可於曼聯比賽日晚上來個歡樂今宵了。

鳴謝各位支持文字直播及即討區，Boxing Day再會。

[K11出品] 曼聯K角度 - 創世紀下的犧牲品

2018年12月18日，曼聯正式宣布時任領隊摩連奴離任，正式結束摩氏紅魔。首先我K11要利申一下我非撐摩或反摩，我最著眼的只有曼聯，而摩連奴所帶領嘅曼聯，曾經為沉寂咗3年嘅紅魔球迷帶來希望，因為摩連奴就是冠軍保證。摩連奴所執教第一季，引入世界級射手伊巴謙莫域，前曼聯青訓卻於祖雲達斯踢出身價嘅法國中場普巴，德甲MVP米希達恩及年輕有潛力嘅拜利。雖然聯賽成績談不上成功但卻成功奪取聯賽盃冠軍及歐霸盃冠軍，亦因歐霸盃冠軍而再度帶領球隊晉身歐聯賽場。

上一季因伊巴受重傷，季前摩連奴決定買入前鋒代替者盧卡古，後防則再購入年輕同樣有潛力嘅瑞典冰人連迪洛夫，結果球隊上半季表現穩定且慢慢穩佔聯賽第二位，可惜曼城嘅超班狀態令曼聯只能為保第二而戰，而聯賽盃未能衛冕加上歐聯於16強在劣評表現下被西維爾踢出局。餘下足總盃避免成為零冠賽季，可惜最終卻敗於冤家干地及仇家車路士腳下。其實季中山齊士加盟嘅一場賭博而埋下將帥加劇不和嘅伏線。

來到今季，本以為上季以防守強橫嘅後防加上金手套得主迪基亞坐鎮，只要改善前線入球力便嘗試衝擊聯賽冠軍。誰不知，摩連奴與普巴關係決裂，球隊進攻乏力，更甚嘅係球員士氣低落，信心不足，後防嚴重不濟，最終聯賽未到半季，摩連奴便要下馬。

以上摩連奴的曼聯回憶錄，其實只係曼聯由格拉沙家族入主，活禾特掌管曼聯大權後，為了將曼聯打造成世界第一商業球會下這個創世記的犧牲品之一。倒帶一想，由莫耶斯執教不足一季便因成績不濟而被炒，代領隊傑斯補上，卻最終由名帥雲高爾補上，傑斯只能成為助教，此一刻開始，曼聯便開始走上商業之路。

雲高爾第一季成績一般，但仍然保住了歐聯，可惜第二季即使拿下足總盃，卻因為失去了歐聯席位而要落鑊，需要明白曼聯這品牌是要爭冠軍，參加歐聯，參加歐洲最頂級賽事才能吸金，所以雲高爾嘅落鑊是預計之內。不過曼聯嘅處事方式卻受質疑，因為據雲高爾所說，佢於奪得足總盃後2日仍抱著慶祝心情下，卻非由活禾特口中得知自己被辭去，這做法的確欠缺尊重。為何會這樣呢？因為4日後即5月27日，曼聯正為當時話題十足，商業價值高昂嘅摩連奴空降來到而鋪路。

摩連奴到來，還帶來了伊巴及普巴，明顯就是要製造一個超級巨大嘅商業效應。在於商業上，活禾特成功了，即使曼聯該季只能參與歐霸盃，但聲勢比當時嘅曼城及利物浦更強大，於全世界嘅受歡迎程度只有增無減，而且摩連奴亦成功於首季帶領曼聯以歐霸冠軍重回歐聯。

不過上季開始，曼聯對於摩連奴開始缺乏支持，或多或少因為冬窗山齊士嘅失敗交易影響，但其實摩連奴一直想要嘅係國米嘅佩列錫，卻因幾M歐元而無疾而終，完成不了摩連奴心中嘅理想陣容。山齊士嘅收購看似摩連奴一意孤行，但需知道最後批核嘅仍然係活禾特，點解活禾特會批? 睇到山齊士加盟時嘅彈琴儀式就知道呢個都同商業價值有關係啦。到了今季開季，摩連奴一直希望收購一名可以即食嘅中堅但管理層拒絕再放水，這完全對於摩連奴組軍影響極大，結果今季曼聯後防大穿窿，印證摩連奴嘅需要。

或者不少球迷認為摩連奴帶來曼聯嘅收購均失敗居多，而且價值高昂，管理層拒絕再放水也合情合理，而且摩連奴嘅戰術太保守，令不少球迷反感，但回到初心，難度管理層一開始選擇摩連奴會認為摩連奴會大踢進攻足球? 難度認為摩連奴會放棄其擅長嘅低位防守再加以反擊這一套嗎？既然年初仍然相信摩連奴這一套，選擇續新約，卻半路停工，年中決定收水唔俾買人，此舉實在令人費解，亦肯定令摩連奴感心灰意冷。

其實細心留意摩連奴呢2年多的買人方針，亦看得出端倪。第一季帶來自己信賴嘅伊巴，而普巴嘅回歸，我認為商業因素不少，米希達恩嘅加盟更令人感到是同一經理人拉奧拿嘅拉攏。最後是拜利，亦係摩連奴第一個官宣帶到曼聯嘅球員，再看看上季收購嘅連迪洛夫，同樣是年青且具潛力，睇得出摩連奴有心想長教，否則，一開始便收購年若28歲以上嘅即食球員吧。可惜嘅係，曼聯作為上市公司，要成績支持商業價值，壓力自然回到摩連奴身上，所以季初才強烈要求收購一名即食嘅中堅穩定防線，卻被拒絕。

無可否認，摩連奴自身亦有不少問題，強悍率直嘅性格使其與球隊商業價值最高嘅普巴鬧翻並貶於後備。回想一下摩連奴最反對旗下球員所做嘅其中一件事就係參與商業活動，包括經常出現在社交平台，怕會影響場上表現。偏偏社交活動及商業活動卻是普巴的最愛，而且普巴於賽事嘅表現亦未能說服摩連奴，結果二人嘅裂痕由第一季嘅緊密合作變成陌路人。而且，曼聯近年於活禾特的商業手腕下大賺，更令旗下球員嘅商業價值不斷上升，亦令一眾球員認為多參與社交平台及商業活動是合理不過的事，但理智一點其實某部分球員嘅真正實力卻不及市場所估值般高，當中包括咗連加特及盧卡古等等，如果佢地去到其他一線球隊是否仍然穩佔必然正選呢？看官自有定斷吧，這就是商業因素的影響力了，亦是當年費Sir與碧咸交惡的重要因素之一。

當然，球隊成績始終最實際，曼聯選擇被利物浦擊倒後將摩連奴辭去，某程度看似合情合理，即使仍有機會重回前四(雖然機會不大)，即使歐聯晉級16強，管理層亦選擇不再給予耐性及時間，因為曼聯害怕再次失去商業價值極高的歐聯資格。不過回想雲高爾嘅第二季，難度比今季好嗎？雲高爾卻可以留到季尾並確定失去歐聯資格後才被落鑊，那為何摩連奴要於呢一刻就落鑊？誰知道摩連奴呢位曾經叱吒葡英意西聯賽嘅世界級領隊唔能夠起死回生? 可惜世事沒如果，呢一刻亦無人再會知道摩連奴教到季尾的話，曼聯可以去到邊度。

道不同，不相為謀，摩連奴亦已成為曼聯嘅過客，但如果曼聯繼續以商業價值行先去管理球隊，不給予足夠時間及支持，只會無限輪迴去更換領隊及球員班底，亦只會有更多創世紀下的犧牲品出現。曼聯終於宣布今季餘下時間由曼聯名宿蘇斯克查作為代領隊，再邀請費Sir以前副手費倫回歸加入教練團，希望真的可以撥亂反正，不再追求名牌，不再以商業行先，以重建球隊為首要目標吧。

[K11出品] 曼聯K角度 - 原.敗與再會

一場本已有心理準備嘅雙紅會，一開波已被壓著半場黎踢嘅雙紅會，一比一嘅比數維持到七十多分鐘嘅雙紅會，因為高普一次針對性調動而摩連奴卻選擇等待下，最終球隊以三比一完敗，不過完敗不如說是原.敗，原先的排陣已經令球隊致成今場落敗的因素，現時距離利物浦已有19分之多，距離第四位的車路士亦有11分，唯有寄望下周及時反彈勿再被拋離吧。

今場陣容為門將嘅迪基亞，三中堅由右至左為達米安，拜利及連迪洛夫，左右翼衛分別為達洛特及楊格，雙防中有靴里拉與馬迪，進攻中場有連加特，雙箭頭有盧卡古及拉舒福特。

迪基亞今場雖然失掉三球，但也並非迪基亞問題所在，第一球面對文尼近射也只能搏一搏，而第二及第三球均因為改變方向而令迪基亞失守。其實利物浦所謂三十六次射門也只有11次射門中框，除3個入球外，其餘8個攻門均可以說成在迪基亞控制之內，不過可惜也救不了球隊。

三中堅方面，右中堅嘅達米安再次回到正選陣容內，而今仗達米安再次顯示其高度防守意識，應解圍時解圍，應遮線時遮線，半場後轉任右後防也表現穩定，到底冬窗過後仲會唔會留於奧脫福仍是個謎。左中堅方面，極速康復嘅連迪洛夫正選上陣而由佢看管沙拿嘅時候表現稱職，基本上未有一次放過沙拿，只可惜第一個失球便正正在他頭頂飛過來說明了為何史摩寧會穩佔中堅位置其中一員。

正中堅方面，由賽前公佈嘅史摩寧突然改為拜利，因為前者似乎仍未準備好下，拜利今仗嘅表現卻繼續是相當突出，多次成功搶截利物浦嘅進攻組織，而且冷靜得宜，希望拜利可以重回正選之列啦。

左翼衛方面，由於梳爾仍受傷，楊格繼續受重用而其拚搏精神繼續，只可惜第一個失球的危機意識不足眼白白看著文尼走甩再接應射入迪基亞大門，不幸嘅係，第二個失球由於沙基利射門省中人改變方向而楊格正是該不幸者。

右翼衛方面，達洛特再次擔任正選但19歲小將於首次雙紅會下，相信心理壓力影響發揮，基本上令右路失去了支援，經驗也不足下，半場由費蘭尼入替。費蘭尼入替後，球隊轉回四後防而費蘭尼亦將上半場活躍嘅法賓奴壓下，不過當球隊有控球時要費蘭尼快速作出決定則有點勉強，球隊亦未能成功將皮球傳到費蘭尼最強的部分去製造威脅。

防中方面，馬迪是今仗較為令人失望嘅其中一位曼聯球員，面對利物浦快速壓迫嘅中場，馬迪明顯未能適應，多次被迫甩而且感覺也有點越踢越縮，而為何利物浦今仗能有多次遠射亦是防中之責任，所以第二及三球均是沙基利於禁區邊位置空晒黎射。另一防中靴里拉，今仗再次表現出佢有力成為紅魔隊長嘅人選，鬥志十足，而且其捉路嘅搶截真有一手，多次於中場成功攔截利物浦嘅傳送，只可惜缺乏下一步去轉守為攻，79分鐘時由於當時落後2:1，摩連奴用馬斯亞入替靴里拉。馬斯亞傷癒復出但今仗入替時已要救球隊，可惜屋漏兼逢連夜雨，入替1分鐘便被利物浦射成3:1，基本上賽事已被殺死了。即使今季回勇嘅馬斯亞也無力去成為今仗嘅救世主了。

進攻中場嘅連加特，今仗再度獲得摩連奴信任成為正選，而相信用連加特棄馬達於此位置主因是希望連加特不斷跑動嘅踢法將球隊行軍速度能提高之餘再有力去做一定防守工作。今仗連加特曾於33分鐘出現在正確位置入攝禁區把握艾利臣犯錯為球隊追平1:1，可惜今仗球隊始終被動嘅踢法令連加特跑多過掂波，即使多努力，最終也在85分鐘由馬達入替。馬達入替此動作相信只作為讓連加特休息及搏一搏有奇蹟罰球嘅出現，整體上對賽事起不了作用。

雙箭頭嘅拉舒福特及盧卡古，前者繼續是延續近仗拚命嘅鬥志，上半場亦曾經嘗試遠射但被艾利臣輕鬆接實，而下半場開始明顯見到體力有點不繼下，今仗未能為球隊帶來希望。

盧卡古方面，雖然主要以他與利物浦兩名中堅包括露夫雲及雲迪克對抗，但實話實說，其實利物浦只需其中一人便足以令盧卡古沉寂下來，搶位，停波等等工作未能令利物浦後防帶來吃力之感。幸好球隊追平一球來自盧卡古左路傳中，也算是為自己增加信心與球隊帶來一點貢獻。

戰術分析方面，為何我K11認為今場是一場原.敗的賽事? 其實正選名單上以馬迪配靴里拉作為防中已經是一種錯誤，還記得曼徹斯特打比戰也是以馬迪配靴里拉作為防中，結果被曼城緊迫嘅中場迫得透不過氣來，人類總要重複犯錯。更甚嘅係面對比曼城更大迫搶力嘅利物浦竟然重蹈覆轍，此原先的排陣便種下敗仗嘅結果。既然明知要同利物浦搶中場是玩火行為，我K11則會選擇用費特配靴里拉，最多鬥搶，靴里拉搶完會懂得將皮球傳結隊友而費特搶完則喜歡引球推進，因為馬迪最擅長的控制節奏根本於這類對抗中用不上，除非有信心己隊嘅控球力在對方之上吧。結果法賓奴嘅活躍亦創造了第一個入球嘅出現。

其實曾經有機會讓摩連奴修正過來，半場只是1:1嘅比數，雖然摩連奴馬上用費蘭尼作為前半格嘅搶截令利物浦中場組織力減低，亦使對手只能於禁區頂附近起腳，但正正因為馬迪越縮越後才出現對方極多遠射嘅出現。當然費特未有入選大軍之中，而後備名單根本未有相類似防中，既然如此，不如直接了當用費蘭尼換走馬迪。只可惜在摩連奴的盤算中，用馬迪來控制節奏還是最重要，即使換入馬斯亞時也期望追平後仍有馬迪在陣中去控制節奏，結果未能再次追平更被拋開比數了。

再者，摩連奴一向擅於臨場調動改變絕不拖泥帶水，但明顯今季摩連奴已經亂了陣腳，或者覺得根本唔識用手上兵源。今仗摩連奴雖然半場即時針對法賓奴換入費蘭尼應對，但高普於賽事膠著情況下換入沙基利，摩連奴卻未有即時反應卻是希望等賽果改變才調動，結果最終便由後備入替嘅沙基利連入兩球終結賽事，明顯地敗給了高普。

最後，昨晚曼聯已官方確認摩連奴已離開球會，此做法是否正確，各界自有評價，但只知道一切要重頭再來，暫時仍未知會由誰接任但即使如此，仍要對摩連奴這2季半為曼聯曾經帶來了遠大的希望，祝願摩連奴未來有順利發展，感謝你，再會了。

鳴謝各位支持文字直播及即討區，下場再見。

[K11出品] 曼聯K角度 - 改變

聯賽四場不勝，主場成績差劣，包括2場面對榜下游球隊均和波終結，今場面對榜尾球隊富咸，又是主場，令人認為今場又是一大失分危險嘅出現，結果摩連奴再次收起普巴，但球隊踢出摩連奴所講嘅癲狗論，全場跑動，鬥志十足，踢出咗多年無見嘅紅魔精神，半場領先3球下，最終以4:1取勝全取3分。雖然今仗對手係較弱嘅富咸，但相信球迷睇到嘅係- 改變，包括咗鬥心，走位及戰意。

正選陣容方面，迪基亞繼續為正選門將，後防右至左為達洛特，史摩寧，鍾斯及楊格，雙防中為靴里拉與馬迪，進攻中場右至左分別為馬達，連加特及拉舒福特，正前鋒為盧卡古。

迪基亞方面，今場所面對嘅挑戰可謂今季最少一場聯賽，8次射門只有4球中框但除咗所失嘅12碼外，其餘3球都只係隔靴搔癢嘅攻門，不過可惜嘅係，因為12碼，迪基亞今場又保唔住零封。

左閘方面，今仗由停賽期滿復出嘅楊格代替受傷初癒嘅梳爾，呢名隊長今場踢出今季其中一場代表作。13分鐘於左路突破入禁區再射網仔入網成1:0，而其餘時間亦助攻頻頻，走位不斷，令對手右後防嘅奧度疲於奔命，最後拉舒福特嘅入球亦來自其助攻。

右閘方面，被摩連奴譽為曼聯未來10年右閘之人嘅達洛特繼續正選，今仗更一戰成名，全場助攻力強，而且傳中質素極高，其急勁傳中令我K11憶起咸爺碧咸嘅急勁，當然力度與角度仍然要磨練下火候。加上勇於迎波，去波及幫波，令曼聯右路進攻力大增，當然防守上仍需要留意被人劏穿直線嘅情況，但對於只有19歲嘅年青人黎講絕對係超班右閘，賽後被選為MOTM。

中堅方面，今仗以史摩寧及鍾斯合作，史摩寧一度令富咸威脅球員米杜域變得沉寂，更令對手半場便被換出，可惜史摩寧於59分鐘疑似因傷離場由洛荷入替。洛荷入替後其實連提佢嘅名都少之又少，其實都証明咗富咸嘅反擊力亦不見太大威脅，洛荷今仗可以輕鬆度過。鍾斯方面，仍然以其拼命踢法為曼聯後防帶來一定嘅硬朗而近仗更顯得較上季有準確嘅預判，不過65分鐘因其於禁區內被卡馬夏撞開後，靴里拉被判12碼而守唔住零封較為失色一點。

防中方面，先講講靴里拉，今場再次於中場負責搶截及轉守為攻嘅任務，再次表現出眾，全數共錄得10次截擊，而且亦有後上插入攻門嘅能力只可惜接應馬達傳中一球竟然柱邊出柱而已，不過靴里拉於場上感染隊友嘅能力的確好好，希望繼續有上陣機會同埋續約曼聯。

另一防中馬迪，今仗表現非常搶鏡而且更有兩次漂亮嘅後踭成功傳俾隊友，而其實馬迪嘅任務一如既往地去控制節奏與分波，不過由於有靴里拉在場負責標波嘅工作令馬迪更得心應手去做佢本身嘅任務，雖然場場都有佢但今場嘅馬迪絕無疲態出現，而且所需體力亦不多，與其一直說如何解放普巴，今場摩連奴嘅排陣似乎更能解放馬迪吧。

進攻中場方面，右路嘅馬達今仗亦一如既往般經常走到中路去做策劃，而由於右閘嘅達洛特已接近玩晒整條右邊，馬達可以用更多時間於中路幫忙做派牌，28分鐘更自己入攝禁區內接應拉舒福特傳中撞射尾柱成2:0，而42分鐘嘅一次角球戰術中，馬達接應連加特直線於底線傳中予盧卡古撞射成3:0，結果一入球一助攻令馬達今仗達成個人英超50入球加50助攻紀錄，如果唔係靴里拉一次門前失機，馬達嘅助攻數字可以再添一次。

進攻正中場嘅連加特，今仗繼續其勤力跑動，而雖然未有直嘅入球或助攻數字，但經常能迫搶成功，或自行引球推進，甚至交出直線波，第三個入球便是連加特直傳馬達使其可以底線傳俾盧卡古近門射入。73分鐘費特入替連加特，摩連奴曾經講過希望球隊中後場防守力增加以便費特嘅工作能更集中應付串連進攻方面，今仗的確係唔錯嘅機會，可惜睇到佢同隊友嘅默契仍然不足，令下半場尾段進攻節奏唔夠順暢。

左翼嘅拉舒福特，今仗維持之前數仗嘅拼勁與跑動，而最重要嘅係，今仗連場上決定都做得好好。28分鐘於左路突破後傳中予馬達撞射入網，而其後雖然仍有一兩球處理得唔夠好，但其實表現不俗，39及47分鐘嘅射門亦相當有威脅，更於82分鐘於左路K角位附近來個冷箭入網成4:1，亦將球隊狠狠殺死。84分鐘由麥湯米尼入替似乎係俾拉舒福特休息及接受主場球迷嘅掌聲吧。

正前鋒嘅盧卡古方面，今仗復任正選而亦都跟著球隊嘅拼勁去追波，雖然一直好努力但仍然好似唔順咁，好彩嘅係42分鐘終於接應馬達傳中近門撞射入網成3:0，而今仗都慢慢見到盧卡古有改變，係好嘅改善包括控球及停球。你踢得掂就最好啦，渣古。

戰術分析方面，其實今場只是再次運用對阿仙奴一役嘅戰術而中後場稍為調整一下。不過最重要係連續兩場賽事中，曼聯球員似乎作出了改變，只要佢地團結，一齊盡全力，原來所帶出來嘅能力係可以達到此程度，明顯看到戰意，拼勁與鬥心均與季初明顯不同。而此改變，卻是普巴並不在陣中也能發揮出來，應該話更能發揮出來。

或者曼聯球員一直認為，普巴在陣能改變戰局，所以當普巴在場時，會經常圍繞普巴來傳球，其餘時間便可以企定定等，但呢兩場波發現，沒有普巴也能做到，只要大家多跑一步。最明顯嘅影響其實係馬迪，雖然今場波對手富咸實力不高，但要留意如果馬迪有疲態或唔識走位郁動，會跟今季多場賽事一樣只懂企定定，即使持球球員在身邊也不懂走位拉空位，但今場嘅馬迪覆蓋範圍其實好大，而且走位也更"生"，當然拍擋嘅靴里拉幫忙分擔防守工作有關但就今場賽事，馬迪應該踢得幾輕鬆及開心吧。

餘下嘅問題，其實係要睇普巴經過兩場賽事於後備席上，看到隊友的積極性，想法到底會係"如果我都咁踢，會比佢地更勁"還是"我根本唔洗咁樣踢"，若是後者，真的救不了，但若是前者想法而積極去表現自己，試想想以普巴的技術與身體質素有著靴里拉嘅鬥心，會有多恐怖呢？改變與否及如何改變，留給普巴自己思考吧，而摩連奴亦打開口牌表明周三歐聯正選上陣而且希望普巴今場能用今場曼聯球員嘅鬥心一樣去表現自己，機會已在眼前，改變與否，拭目以待吧。

鳴謝各位支持文字直播及即討區，下場雙紅會再見。

[K11出品] 曼聯K角度 - 誠意搭夠的仙魔大戰

賽前不少曼聯球迷均睇淡主隊因為要面對剛反助熱刺4:2勝出北倫敦打比戰嘅阿仙奴，而且亦傳出將帥再度不和嘅消息，結果摩連奴的確將普巴收起，而後防亦用上周末全部因傷缺陣的拜利，史摩寧及洛荷，前場則用上三位快速的年青球員，最終與阿仙奴踢出一場精彩緊張的2:2和波賽事，雖然技術層面只屬一般，但兩隊均戰意十足，算是一場誠意搭夠的仙魔大戰。

出場陣容方面，門將為迪基亞，三中堅由右至左為拜利，史摩寧及洛荷，左右翼衛為達米安及達洛特，雙防中為靴里拉與馬迪，前線三子為左路嘅馬斯亞，右邊嘅連右加特及正前鋒拉舒福特。

迪基亞今場竟然因一次失誤而令球隊先落後，當時梅斯達菲壓贏史摩寧接應角球頂中龍而迪基亞竟然接波甩手，皮球向門框飛去而靴里拉嘗試救空門可惜皮球而入白界。不過除此球外，迪基亞其後救出杜里拉嘅近射，奧巴美揚近射及燙遠柱等等極具威脅嘅攻門，否則曼聯亦不止兩個失球，總算補救了第一個失球嘅責任。

後場三中堅方面，拜利是久休復出的一員而其實佢今場嘅水準與狀態卻是出奇地好，多次快狠準嘅攔截，而且相當冷靜，不過卻有時有一點輕挑，或者呢點會是摩連奴對拜利有保留的地方。

另一中堅史摩寧，今仗第一個失球被梅斯達菲壓贏可算是給比下去，幸好及後見到信心未有失去，表現漸見穩定下來。左中堅嘅洛荷，比起拜利是更加好久不見，今場為洛荷今季第一場賽事加上上周末才剛復操，今仗踢來穩定而且信心十足，而助攻角球魯莽拿下黃牌也見怪不怪，更主射角球與力度也不俗嘅罰球間接為球隊追平1:1，但無諗到嘅係，今場表現比一次後場傳失波所破壞，即使自己追回亦難阻拿卡錫迪射入2:1，幸好69分鐘一次長傳令連加特得以極速追平2:2，73分鐘由費蘭尼入替。費蘭尼入替後，位置處於中場與前場附近，但今仗所帶來效果唔夠明顯，亦欠缺直接嘅傳送到費蘭尼以便直接攻門。

左翼衛方面為季初以為已經離隊嘅達米安，今仗於左路雖然助攻力仍然一般但防守力卻做得相當不俗，多次以經驗及位置感彌補速度嘅不足。右翼衛方面，達洛特助攻力強而且傳中球有一定水準，以英超地標戰黎講算是非常不錯，但防守上今仗多次被阿仙奴集中進攻達至多次傳中造成中路嘅危險卻要多加注意。賽後摩連奴表示未來10年曼聯嘅右後衛都係達洛特嘅世界，我地拭目以待。

雙防中方面，今仗用上靴里拉與馬迪，馬迪方面，其實今仗以馬迪作為中堅前的屏障外，還為球隊作為控制節奏嘅中樞，而且其富有經驗為球隊亦帶來安全感，領下黃牌便因靴里拉傳失波後防止阿仙奴突襲下拉停對手領下。慢慢感覺馬迪有點像TVB嘅林峯，本身唔係差，但見得太多下，令人有唔想再見嘅感覺，其實適得其所，馬迪係幾好用嘅。

另一防中嘅靴里拉，今仗有不俗嘅演出，攔截，搶截，傳球成功率等等都非常亮麗，而且更重要嘅係交出一球及時且重要嘅助攻，當時洛荷射罰球被里奴救出後，靴里拉唔放棄並於底線前傳中予馬斯亞射入，雖然曾經一次致命傳失予阿仙奴球員幸得馬迪捨命拿黃牌相救，亦無阻今仗靴里拉嘅出色演出。

前線方面，連加特今仗主要於右路發難，而且走動頻頻，雖然唔顯眼亦未見有任何威脅，但卻於69分鐘出現在最適合的地方於阿仙奴小禁區附近近門射入網追成2:2，亦打破自己於奧脫福長達半年以上嘅入球荒，76分鐘由普巴入替。普巴與摩連奴嘅關係就好似傳統婆媳關係一樣，成日面阻阻但又會成日見，普巴又要睇摩連奴頭而摩連奴又唔可以將普巴全面棄用，摩連奴今仗大戰決定棄用普巴，賽前解釋為戰術平衡嘅原因而明眼人都知咩事啦，不過亦贊成摩連奴今次嘅決定，因為近幾仗又見普巴於場上顯得有點懶散，而普巴雖然曾解釋缺乏傳球目標所致但相比今仗中前場球員嘅積極，的確睇到普巴嘅落差，不過始終有普巴能令曼聯整個中場線級數提升，且看普巴幾時真的成熟了。今仗後備入替後表現繼續沉寂但未見有懶散情況，算好事吧。

正前鋒嘅拉舒福特，上仗被摩連奴以癲狗黎形容其戰意而今仗亦繼續如此，亦係摩連奴最想現時曼聯球員能表現出黎嘅鬥志，而拉舒福特今仗表現亦不俗，走位再接應再停波也做得不錯，當然仍有進步空間但最少能牽引對手後防嘅視線，而其射門亦曾考驗里奴只可惜射得太正中被沒收。

左路嘅馬斯亞，經過上仗小休後今仗重回正選，亦有積極演出，更於30分鐘接應靴里拉傳中射入空門成1:1，慶祝其正日23歲生日，而球隊於下半場亦圍繞著馬斯亞來進攻，可惜62分鐘一次由前場緊貼對手回防嘅攔截令其因傷退場，需要由盧卡古入替，不過馬斯亞已經足以拿下今場曼聯嘅MOTM。盧卡古63分鐘入替後，表現仍然有待改善包括其因體型有變而下降嘅速度，不過2:2嘅入球正是盧卡古以其身型迫令對手後防解圍失敗所致，始終禁區內才是渣古的最佳活動範圍。

戰術分析方面，摩連奴今仗可謂一場賭博，賭博包括了後防陣容，包括了棄用普巴，包括了正選陣容的排陣與進攻模式。後防方面採用了拜利與洛荷兩名今季絕少出場嘅球員而採用三中堅必須要相互默契做得好，否則更會變成多人就讓位而失誤嘅情況出現，但今仗此三人出奇地合拍，基本上未有因默契而出現防守錯誤，所失嘅波都因為個別球員所造成。

第二個賭博便是棄用普巴，以質素論，普巴確係目前曼聯陣中最強之人但論心態與穩定性，普巴自上季開始便一直未能達到摩連奴嘅要求而普巴卻不服，當然佢嘅論點係球隊戰術唔夠侵略性及搵唔到人交，但始終普巴於球場嘅積極性真的不夠，今仗於一場大戰下收起普巴，起用了馬迪及靴里拉，純於中場作為搶截再運用前場三名高速嘅球員，結果摩連奴亦搏成功了。曼市打比戰以靴里拉代替普巴做中場傳送者是完全失敗的，但如果靴里拉的角色由中場主角變為配角者，佢嘅能力則做得好好，今場成功令曼聯中場得以保護而且還交出助攻。

當然，排陣的賭博便是明買明賣地放棄中場控球而改為更直接了當地向前場三位球員作進攻，此舉若被針對性部署將非常危險，而阿仙奴其實踢至下半場已慢慢向此位置進行部署，控球指數亦被佔上風，幸好曼聯以戰意補救。雖然今場唔算得上太高技術層面嘅仙魔大戰，但亦相當緊張刺激，誠意搭夠啦。

鳴謝各位支持文字直播及即討區，下場見。

[K11出品] 曼聯K角度 - 失咗2分?執到1分乍

上周主場賽和水晶宮，周中險勝年青人，今場作客修咸頓當然希望能全取3分但卻口中有數存有暗湧，結果嚇死人地開波20分鐘已失2:0，還以為絕望來了卻於上半場追平2:2。可惜下半場無以為繼下，最終又失2分，但與其講失咗2分，以今場曼聯嘅表現，執到1分實是比較合適。

正選陣容為門將嘅迪基亞，三中堅由右至左為麥湯米尼，鍾斯及馬迪，左右翼衛為梳爾及楊格，三中場為靴里拉，費蘭尼及普巴，雙箭頭為拉舒福特及盧卡古。

迪基亞方面，20分鐘便失2球是否迪基亞之責任? 岩士唐嘅入球再一次為曼聯後防線失誤下讓其可以控定狂抽，第二個失球便因蘇亞雷斯罰球的確漂亮下失守。其後迪基亞將列蒙嘅罰球，加比亞甸尼嘅遠射及靴爾保嘅射門都能接實。其實迪基亞遲遲未肯續長約亦盡是可理解的，講真呢條咁嘅後防線都唔好意思迫迪神啦。

由於拜利與史摩寧亦有傷在身，洛荷只係剛剛復操，今仗轉陣3-5-2出擊下，麥湯米尼及馬迪要串演中堅顆拍鍾斯。其實麥湯米尼繼季初曾擔任中堅後，今仗似乎已經習慣，踢來淡定，亦曾經有帶波上前的情況出現，甚至嘗試直接攻門，表現的確越黎越好。

另一中堅鍾斯，作為中堅中位，主要作用為指揮後防線壓前與否而除咗第一個失球後，其餘時間表現亦稱職。左中堅嘅馬迪，其實上仗因連迪洛夫受傷而無換人名額後，曾經也要串演中堅一職，也已經看到不擅此位置，今仗再次串演下，明顯看到其患得患失嘅演出，亦不時走漏對手於其盲眼位，面對新人奧巴菲美更具明顯。

今仗作為左翼衛嘅梳爾，表現算是合格但明顯不太適應3-5-2踢法，所失第一球雖然為球隊整體防守結構問題但岩士唐最終正是在左路空晒下射入，當時梳爾跟隨對手被引到中路來，而其他後防球員則企定定睇波，所以此失球也絕非梳爾一人失位之過，其後梳爾也有嘗試助攻但效果好一般，71分鐘更有點傷下由達洛特入替。達洛特入替後位置於右翼衛而作為地標戰，也在適應英超的節奏吧。

右翼衛兼隊長的楊格，今仗經常助攻及包辦罰球嘅處理，傳球質素算是不俗，而達洛特入替後轉往左路，其擅長嘅扯急勁斜線傳中嘅落點反而唔到位，結果未能為曼聯帶來再一次的反勝。

防中方面，費蘭尼今仗表現較為沉寂，只有一次助攻入禁區的頭鎚攻門頂斜，而其餘時間主要在中場作屏障。另一防中為靴里拉，今仗算是表現較為出色嘅一員，對比曼徹斯特打比一役，今仗靴里拉可以做回其綠葉工作反而更加出色，中場攔截，傳送再入攝也做得不錯，39分鐘便後上接應拉舒福特傳中用後踭射入追平2:2的一球。其實摩連奴希望的B2B，真的一早在陣中了。

今仗作為中場中至進攻中場嘅普巴，表現算是差勁，心不在焉嘅演出，不下數次自己於中場位置失去控球權，但之後並未有補救去搶回皮球的感覺，令人覺得其爭勝心。此外，作為中場傳送中樞，雖然曾經傳出一至兩球關鍵傳球但其餘時間均顯得漫不經心，到底是不適應今場的戰術轉變還是爭勝心問題呢？不曉得。

作為雙箭頭之一嘅拉舒福特，今仗經歷過山車嘅演出，雖然開波已顯示其爭勝心但一次不夠經歷嘅後踭浪費了曼聯可領先嘅機會，更於18分鐘在自己禁區頂一次過勇且魯莽嘅犯規，令自己拿下黃牌及輸掉罰球，結果蘇亞雷斯就此將罰球轉化成入球領先2:0，一度令曼聯陷入絕境，但其後卻因拉舒福特一次瞓身嘅傳送予後上入禁區嘅盧卡古一射破網追成1:2，幾分鐘後，一次過人突破落底線傳中予後上嘅靴里拉追成2:2，可惜其後未再有貢獻但其勤力與鬥心實令人讚賞，盡晒力嘅拉舒福特，於77分鐘由馬斯亞入替。之前有傷在身，摩連奴已表示馬斯亞未必能一周踢足三場，今仗先列後備以留力周中要與阿仙奴一拚，不過球隊遲遲未能領先下，今次換人便用上馬斯亞，但明顯未太入局，亦不夠時間讓其入局，還是周中惡鬥阿仙奴時上陣吧。

另一前鋒嘅盧卡古，經歷咗入球荒，今仗終於在禁區內接應拉舒福特一射破網為球隊追成1:2，其餘時間望到其嘗試但似乎仍然唔太上力吧，86分鐘由連加特入替。連加特入替後由於時間不足，看不到其出場所帶來嘅效果。

戰術分析方面，雖然賽前摩連奴解釋拜利及史摩寧均有傷未能上陣，結果正選陣容只有鍾斯這名正宗中堅，而後備席上也要派上洛荷這名剛復操嘅球員以備不時之需。不過陣式上轉踢3-5-2，我K11認為係敗北(雖然最終只係和波)之作，摩連奴擔心馬迪及麥湯米尼不適應中堅，便打算用鍾斯用中央中堅去指揮兩邊中堅去防守，結果令馬迪踢得患得患失，鍾斯嘅作用亦唔明顯，反而麥湯米尼較為突出，其實已經浪費咗一名球員。

3-5-2陣式要求兩翼衛助攻助守之效率要明顯，但整場賽事曼聯明顯無運用兩翼助攻，更多時間集中於中路與對手混戰。當然普巴於中場之失準為一重要原因，但整隊球隊均踢來好虛幻無定，最終主要看到拉舒福特不斷走，球隊得到控球後便試一腳向前或自己於中場搓失，最好嘅效果便是保持到控球但只能在中後場作無謂嘅傳球。

為何球隊總在開波初段失波? 集中力問題? 球隊爭勝心問題? 記得加利佬曾經講過，佢開波前會高度集中，因為佢要佢嘅第一次防守便令對手失敗，增加自己果場波嘅信心及減低對手嘅氣焰，目前嘅曼聯球員，似乎於開波初段俾先讓對手三拳，再黎開波。之前多次嘅反勝除咗鬥心之外，亦包括咗運氣，但運氣唔係次次有，連續兩場面對榜下游球隊失分，距離前四亦越黎越遠。不過以今場曼聯嘅表現黎講，執得翻1分已經係好彩。

鳴謝各位支持文字直播及即討區，下場見。

[K11出品] 曼聯K角度 - 不認不認還須認

連場的反勝，結果於國際賽前被曼城打破，國際賽後主場迎戰榜下游嘅水晶宮，還以為可以延續之前氣勢，結果又是一場沒有把握的賽事，更曾經差點失波，結果主場悶和水晶宮0:0，再失2分，與榜首曼城相距14分之多。不認不認，還須認目前曼聯的實力包括攻力，守力，球隊穩定度，控制球賽能力只是中上游分子，要重回前列行列必須踢出足夠嘅穩定性，否則，每場都要搏命。

出場陣容方面，迪基亞繼續正選，後防右至左分別為達米安，史摩寧，連迪洛夫及楊格，防中為普巴與馬迪，進攻中場右至左為連加特，馬達及馬斯亞，單箭頭為盧卡古。

今場賽事為門將嘅迪基亞代表曼聯各項賽事第250場，雖然最終能守住零封但卻是失掉了兩分，而迪基亞今場所做撲救不算太多，但62分鐘救出高耶迪禁區頂嘅射門後再救出雲安賀治嘅補射，盡力了。

右閘嘅達米安，自季初登場後便一直以後備姿態出現，其實以其萬能球員嘅身份，理應是摩連奴杯茶但卻不受重用。即使如此，今仗有機會登場下卻表現出不錯嘅狀態，防守上未有失誤之餘亦有助攻，不過傳中始終為其弱項，所造的傳中質素也不足以助球隊獲勝，即使其中一球傳到盧卡古頭上更頂至死角也被軒尼斯救出。

左閘嘅楊格，因梳爾停賽而再次出任此位置，防守上未有太大問題但助攻方面，多次左邊以右腳傳中都唔夠力，皮球根本未去到隊友位置便被解圍，今仗與馬斯亞嘅配合仍然不多。

中堅方面，史摩寧維持一定水平而且今仗比以往較為集中，更有一次助攻近門頂斜嘅黃金機會。不過作為球隊老大哥加中堅主將，仍然欠缺了把防線壓前的領導能力。另一中堅連迪洛夫，今仗繼續有好表現，幾乎沒有任何失誤的他今場成功壓制進行其防守範圍後嘅水晶宮球員，而且更多次作出成功搶截，除了一次因馬迪被唐辛推過後意外地再推過連迪洛夫。可惜嘅係完場前連迪洛夫拉傷了，不過由於換人名額已用完，連迪洛夫亦馬上通知馬迪作出位置互換防止球隊被突擊，而且完場前更拐著搶贏剛後備入替的佐敦阿休，完場後獲摩連奴步出現時給予鼓勵。希望連迪洛夫傷勢不重吧！

防守中場方面，馬迪繼續連環正選，不過今場波馬迪表現算是合格，由於水晶宮未有太多後上入攝類型嘅中場，也不致於令馬迪有太多需要即時轉身嘅弱點曝露出來，除了給唐辛一次正面擺脫差點造成大錯而已。另一防中普巴，今仗繼缺席曼徹斯特打比後復出，即時令曼聯中場控球力增加，不過也可看到普巴未在狀態，長傳雖有，但力度角度可再提升，射門也有但卻稍稍高出，特別是上半場接應連加特回傳的射門便知其狀態一般，中段看到體力稍為下降便由山齊士於68分鐘入替。山齊士入替後變成了進攻中場，而他亦表現積極，曾經傳交出一至兩球能製造射門的機會，雖然也浪費了拉舒福特一次精彩的二連攔截下搶到的控球權。未回到最好但已有改善來形容山齊士今場的表現吧。



進攻中場方面，右路嘅連加特今仗與攻中嘅馬達經常位置互換，開波初段亦打出效果來，可惜29分鐘接應楊格地波傳中的撞射被軒尼斯救出，58分鐘由拉舒福特入替。拉舒福特入替後的任務便是右路突破，此子今仗顯出鬥心來，一次兩連擊嘅攔截成功搶去皮球，呢種就係摩連奴要嘅精神。不過由於中路進攻已有盧卡古及費蘭尼，拉舒福特主要於右路出波，所製造嘅直接威脅不大，88分鐘一次後上入攝於禁區內射門又省中後衛於柱邊出界。

進攻中場的馬達，今仗正選上陣而其場上主要為傳送致命一擊為主，可惜更多時候更是駁腳為實，不過其處理死球能力確有一手，上半場曾罰球傳交予史摩寧近門一頂斜出最為接近。58分鐘由費蘭尼入替，作為Plan B，此時此刻入替相信都是意料中事，但可惜曼聯今場嘅傳送並未有好好利用費蘭尼的頂上功夫，山齊士入替後更要不時回到防中位置補位，新髮型嘅櫻木頭未為費蘭尼帶來勝仗。

左翼馬斯亞，國際賽期因傷而退出國家隊留於球隊養傷，不過經過兩星期的休息，今仗出來反而銳利度減下來，多次自己傳失波，而且亦未有具威脅嘅突破，同時因盧卡古在場，或者馬斯亞亦有任務多點傳高波到禁區內，影響了其發揮。

單箭頭的盧卡古，經過一段時間的批評，亦因傷休息了一段短時間，今仗復出看到其有一點點回勇，不過由於目標過大，而且傳送到其位置的供應也不足，令威脅也不多，但下半場一次越位嘅入球及一次接應達米安傳中頂中死角最有威脅，可惜最終也過不了對方門將軒尼斯嘅飛身撲救。

戰術分析方面，眾多批評陣容上的問題，在於馬迪及盧卡古，先講馬迪，其實這個問題源於整條中後場線而非馬迪一人之問題。由於一對中堅縮得太後，因此馬迪的區域便增加，而馬迪並非車路士的簡迪類型，要佢前仆後繼似乎有點勉強，當然球隊仍有靴里拉及費特此類防中球員但摩連奴始終對派出馬迪於中路較為安心。其實如果整條後防線可以壓前一點，馬迪與一對中堅的空間可以縮窄，咁樣都有助馬迪的發揮，不過中堅缺少了會將整條防線領導壓前的將軍，連迪洛夫執行及跟隨還有不俗發揮，所以最佳人選其實為球隊資歷較深，而且亦是近季摩連奴最常用嘅史摩寧。其實雲高爾執教該季，史摩寧踢出了目前職業生涯最好一季，該季史摩寧需要與白蘭特合作，或因此令前者有著領導者嘅發揮而且表現很好，可惜其後無以為繼，未能再發揮後防領導者嘅角色。如果中堅可以壓前，馬迪便容易處理工作了。

或者會問，棄用馬迪，轉用費特與靴里拉便直接了當吧！首先馬迪的控制節奏是三者最好，前兩者會不斷向前但馬迪會有更多的橫傳，其次是馬迪於中堅前的位置給予的安全感較高，有著一座山的感覺，這些也可能是摩連奴的想法吧！當然，目前中堅位置不能改，便嘗試改變中場吧，且看摩連奴願不願意了。

盧卡古方面，之前被棄用期間，由於缺少了高大中鋒，曼聯變得多打地面進攻而且絕少用高波吊入禁區，不過由於盧卡古復出後，球隊便變回之前的進攻模式，但除咗盧卡古頂中死角被軒尼斯救出一球外，其實所謂湊巧的進攻不多了，印象中還有開波初段盧卡古禁區內頭鎚二傳連加特後上射門。其實之前的走位配合更見效果，不理解為何因盧卡古復出便踢回高波，不過對於今場所帶出的效果卻只屬一般，更令馬斯亞的威脅力降低。

古怪的，上季人腳與今季人腳相若，但今季所帶出的問題卻好像新鮮事一樣，感覺今季才是摩連奴接手的第一季，想再多給時間，卻要接受目前曼聯的穩定性與實力包括防守力及進攻威脅力，也只回到英超中上游級數，不認不認，也須承認這事實，才能認真面對問題。

鳴謝各位支持文字直播及即討區，下場見。

[K11出品] 曼聯K角度 - 優勝自然劣敗的雙曼

曼城自上季開始拋離曼聯成為英超冠軍，今季曼聯開季不順，而曼城則延續勝軌下，加上普巴缺陣影響中場實力，即使曼聯最近氣勢如虹亦無補於事，結果今仗曼徹斯特打比戰的賽果來得自然定律的優勝自然劣敗。目前曼聯已被榜首嘅曼城拋離12分，而且只排第八，路仍很遠，想追更遠，不過最重要還是保持士氣，路即使遠，還得盡力去追。

正選陣容為門將嘅迪基亞，後防右至左為楊格，史摩寧，連迪洛夫及梳爾，雙防中為費蘭尼及馬迪，中場中由靴里拉代替受傷嘅普巴，前線由連加特，拉舒福特及馬斯亞出任。

迪基亞再次延續今球失球，不過今次迪基亞亦要負上一定責任，第二個失球正是迪基亞傳球失誤被對手於中場搶截後由阿古路窄位抽入，此失球其實時間上非常重要，正是下半場開波初段而當時只以1球落後，希望迪基亞唔好因此而失去信心。

右閘方面嘅楊格，33歲高齡連踩多場，今場更要先後面對史達寧及辛尼此兩名高速翼鋒，而今場波其實楊格多次被曼城翼鋒於盲眼位入攝禁區，第一個失球也是該位置未能做好遮線的原因之一。不過楊格始終有傳球這一環，多次傳中或罰球也有一定水準可惜球隊未能因而再進一步取得入球。

左閘嘅梳爾，今仗速度上算是能應付對手的馬列斯及賓拿度施華等等，但第一個失球也是因其位置被賓拿度施華入攝後傳中所致。而由於長期受壓，今仗梳爾也難以助攻得太前亦令球隊邊路進攻乏力。

中堅方面，史摩寧與連迪洛夫今仗相當被動，史摩寧並非靈活型而連迪洛夫面對阿古路亦顯得有差距，結果三個失球均只能目送，特別係第三個失球更被曼城球隊引離小禁區而馬迪亦未能跟貼根度簡而失。而第二個入球更可看到曼城如何一撞即散嘅曼聯後防。

防中方面，先說馬迪，其實今季馬迪狀態一直未能追回上季水平，但由於其功能上主要作為中堅前的屏障，而隊中亦未有合適替補人選，固摩連奴一直沿用。即使狀態上明顯有問題也只能續用。雖然今仗馬迪已經能截下不少對手傳球但身後盲眼位成為其弱點下亦被多次穿越，回身也未能追回，下半場更體力明顯下降而最後一個失球就是攻其弱點的追緊對手後上入攝球員的失敗。另一防中費蘭尼，由於普巴受傷因而正選上陣，其用處為停波，加強制空權但狀態明顯未足，而且也不能在有威脅區域發揮其高空優勢下，今仗表現平平。

中場中的靴里拉，近兩次表現不俗的靴里拉，由於普巴受傷嘅關係，今仗正選上陣且兼負起前場與後場嘅連繫工作。不過由於其中場拍檔為馬迪與費蘭尼，靴里拉於中場控傳停嘅責任更大，實在地顯出與普巴之間的差距，多次傳失或被迫甩腳下球，幸好仍然勤力去追波，只令影響減至最低，結果令前場接近失去觸球機會，73分鐘由馬達入替。馬達入替後其實也未能找到場上嘅節奏，結果今場發揮不了上仗的神奇。

進攻線上，右路嘅連加特於大賽經常會被挑選而今次亦一樣，可惜狀態上似乎仍未回到最佳，亦發揮不了其推進的能力，56分鐘由盧卡古入替。盧卡古入替後1分鐘便為球隊搏來12碼，入攝禁區被出迎嘅艾達臣撲跌，算是有一點功勞，而其後亦由簡單做起，控停傳，雖然效果仍未回到上季，但總算未致失望。

正前鋒嘅拉舒福特，今仗表現一般，但跟上仗任前鋒時一樣，最少能於前場停波或搏得犯規。不過既然曼聯今仗希望以突擊為主要戰術，加上缺少普巴，拉舒福特回到後場太深的位置反令球隊難以引球向前，73分鐘由山齊士入替。山齊士入替後也發揮不出太大作用，結果又是平平淡淡渡過十多分鐘的比賽時間。

左路嘅馬斯亞由於缺乏供應，今仗未太有很多突破嘅機會，而且曼城亦對其有針對性部署，一旦取得皮球便會有二人夾擊。不過射入12碼嘅入球處理冷靜，而且連續5場攻入6球，成為最聯第七人可以達到此紀錄。希望可以延續落去及快快續約吧。

戰術分析方面，明顯看到普巴於球隊的重要性，失去咗普巴後，面對曼城呢類迫搶及前場細膩組織的球隊，中場只得靴里拉便給比下去，頓時令前場失去連繫。亦因護球力不足及缺乏有質素長傳，球隊多次未過半場便已失去控球權或是一些毫無目標的長傳，某程度便被對手踢得更輕鬆。其實今場賽事面對曼城這類地面進攻為主，平均身材不高的球隊，可以嘗試於馬迪及費蘭尼其中一人換成護球力不俗，亦有短傳連繫能力的費特或佩利亞代替，以分擔靴里拉的工作。當然我地唔知他們各人的狀態，只是由於費蘭尼於未足100%狀態下，賽事尾段想用Plan B也不可以了。

當然以排陣上，摩連奴希望正選以密密麻麻的中路令曼城組織力減低，而兩翼則以楊格及梳爾來對抗，餘下便是前場三子以最簡單直接嘅方式做突擊。連加特便是中路推進者，馬斯亞繼續左路突破而拉舒福特則作為中鋒破門球員。可惜嘅係，中路多次被搓散，兩閘被對手兩翼盲目位入攝，前場缺乏供應下變得沉寂。而且球隊的精神集中力仍然不足特別是頭兩個失球分別於上下半場開波初段所失，這對賽前部署及士氣也有相當大打擊。

優勝自然劣敗，亦得以面對。目前落後曼城12分，要追先追前四為上算，有幸有不幸，國際賽期過後，重整旗鼓吧！

鳴謝各位支持文字直播及即討區。

[K11出品] 曼聯K角度 - 先苦後甜的輪迴

上周有驚無險的擊敗愛華頓，今場作客般利茅夫，對手目前排名仍在曼聯之上，今仗早知極難踢嘅情況下，球隊又再先讓半場，上半場表現極差，防守線下達業餘級數水平，慶幸熱鬥小馬又再入波得以和局入更衣室。下半場出黎，曼聯又判若兩隊，但三連擊卻始終未能反超，大有失分之時，拉舒福特於補時門前射入關鍵球絕殺對手，再一次出現今季先苦後甜的輪迴。

出場陣容方面，龍門為迪基亞，後防右至左為楊格，史摩寧，連迪洛夫及梳爾，防中為馬迪及費特，中場中為普巴，前線右至左為馬達，山齊士及馬斯亞。

今季曼聯11場聯賽，經常出現先苦後甜嘅情況，而最無奈嘅必定係上季金手套得主迪基亞，今季目前竟然只有1場零封對手，而今場波開波初段後防線再一次令迪基亞失守，幸好迪基亞維持集中力及水準，及後救出幾次險球才不致多失。迪基亞目前成為今季英超最多撲救門將頭五名，可見問題不在迪神，而在後防線。

右閘方面，由於華倫西亞及達洛特仍受傷，楊格只好繼續頂上，雖然仍有達米安可用但明顯摩連奴需要一隻助攻力強嘅閘，結果高齡楊只好繼續頂上。今仗楊格亦繼續表現穩定且做出隊長應有風範，鬥心一流，兼前顧後，而且助攻出波質素亦不俗，更有一次射罰球中楣角。不過當然，年紀唔輕喇，亦曾被高速嘅費沙於右路爆破，唔知高齡楊仲頂到幾耐呢.......

左閘方面，梳爾維持今季高水平，雖然所失一球在左路但當時梳爾剛將角球頂走而正散出去。其後防守上亦未有失誤而且下半場更作出多次助攻令對手右路後防疲於奔命，賽事中後段更曾有一次助攻入攝禁區面對比高域可惜被救出。

中堅方面，作為後防主力，史摩寧絕對要為失球負責，角球由梳爾頂走後，帶領後防散出去時唔夠集中而且自己亦已失位下，被威爾遜入攝近門撞射入網。失球後史摩寧表現顯得患得患失，幸好未再有失誤出現。另一中堅連迪洛夫，延續近期表現穩定嘅演出而且明顯對英超硬朗型前鋒開始適應，而且用波亦對曼聯由守轉攻有一定幫助，希望今季可以繼續其穩定演出。

防中方面，馬迪繼續正選上陣而未知是否因上季開始帶傷上陣加上應付世界盃，季初雖然小休一段時間但復出後明顯狀態仍未夠，比以往較為緩慢而且更有過多嘅控球，曾出現成為被迫搶對象而顯得尷尬。不過靴里拉於下半場換入後為其減輕一定壓力後，表現亦穩定下來。

另一防中為近期重奪正選嘅費特，此B2B球員今仗前仆後繼，非常落力，亦為普巴提供了場上嘅自由，不過與隊友嘅默契仍然有待改善。56分鐘靴里拉入替費特，亦係摩連奴賽後表示今仗最關鍵球員，靴里拉入替後為中場提供了高位防守，令般利茅夫中場難以突破，相對令梳爾及楊格亦有足夠空間與時間去助攻，而且靴里拉自己亦曾有兩次遠射有好大機會破門只是柱邊出界而已。希望靴里拉從傷患康復後可以多點正選上陣，為曼聯中場提供更大支援。

中場中嘅普巴，今場其實表示不差，即使上半場全隊表現差勁，但普巴算是相對平穩，更曾有一球從中場追到左後防位置做防守，而下半場球隊表現回穩後，普巴表現亦回勇，多次於中場順利連繫到前場，賽事尾段更多次於左路發難，而且補時階段更傳出一球重要助攻，讓拉舒福特絕殺對手。



進攻線上，右路嘅馬達今仗繼續其半自由人嘅作用但上半場表現的確未盡如人意，下半場56分鐘由拉舒福特入替。拉舒福特入替後主要於正前鋒位置出現，而且作為停波嘅前點，即使未能控定亦引來犯規，其實已經做到所需作用。只是當楊格罰球中楣角後補射的處理有點心急，結果省中人未能入球。不過呢位曼聯10號嘅英格蘭球員有難得嘅第二次機會，而且於補時階段出現，今次較之前冷靜地處理把皮球近門射入為球隊絕殺反勝，重要嘅入球。

正前鋒嘅山齊士替補有傷避戰嘅盧卡古，而山齊士嘅踢法簡單，不斷走位而且喜歡走落兩邊底線拎波，即使要於前點停球亦做得不錯，最重要當然是34分鐘走到底線接應傳球後再傳中，正好出現嘅馬斯亞一射入網追成1:1。下半場於拉舒福特入替後，山齊士便往右路發展而表現繼續賣力，78分鐘由連加特入替。連加特入替後於右路及中間自由走動而曾經出現一次大好機會可惜過不了比高域嘅撲救。



左翼嘅馬斯亞，近期火熱狀態為馬斯亞提供了足夠信心不過般利茅夫有針對性部署限制其活動，結果今場上半場突破機會不多但35分鐘入攝中路接應山齊士傳中一撞入網為球隊追成1:1，近仗攻入5球之多。而下半場則與普巴及梳爾重點攻擊對手右後防嘅老將法蘭西斯而且造出不少威脅，今仗再次踢足全場，續約部唔該再快D做野。



戰術分析方面，摩連奴也難以解釋為何上半場球隊如此不集中的表現，但下半場卻作出了兩個重要調動，將靴里拉及拉舒福特入替費特及馬達。當然首先不是說後者兩位表現差勁，只是這調動將球隊防守線推前而不輕易失位，因為靴里拉喜歡遮線及看準才迫搶，而費特則喜歡向前標波後自己帶球前進。這樣靴里拉的作用便為了馬迪及兩閘作出保護，可以向前壓，同時普巴亦可以往較左路作針對性進攻。而拉舒福特這換人則可以將山齊士移到右路作突破或向前壓，加強對般利茅夫後防的壓力。

如以上提及，明顯地下半場曼聯主力般利茅夫右後防狂攻，馬斯亞加上普巴再配合梳爾疊瓦，實令此名33歲老將疲於奔命，而且當普巴走到左路時，馬斯亞會移上成為雙箭頭，中場則有靴里拉，馬迪繼續後。結果最終也在進攻左路此位置打穿缺口而被普巴作出傳中，禁區內嘅拉舒福特攻入絕殺一球。

馬迪及楊格的不斷出場，實在令人擔心，雖然楊格自季初表現下滑後已慢慢上力，但始終都已經33歲而且踢法所需體力及速度極高，今仗便被費沙多次爆破，體力是否可維持黎緊對祖雲達斯及曼城此兩仗非常值得留意。另外馬迪今季表現明顯下滑直到目前也未重拾佳態，經常成為對手迫搶嘅對象。而緊迫對手後上入禁區嘅球員亦一直係馬迪嘅死穴，即使上季表現良好也有此問題，更何況目前狀態呢？！

不過其實球隊最要解決嘅係經常上半場踢到地獄般，下半場卻上天堂，先苦後甜雖然總比先甜後苦好，但先苦能後甜始終也要帶點運氣，而且不一定每次也能反勝吧。集中力與由領袖級球員去帶領球隊實在重要，周中便迎來祖雲達斯的歐聯大戰，周日便是曼徹斯特打比戰，希望兩場都能甜到最後吧。



鳴謝各位支持文字直播及即討區。

[K11出品] 曼聯K角度 - 似曾相識的曼聯主場

曼聯主場對愛華頓，往績有壓倒性優勢，但愛華頓近況不俗，加上曼聯現時表現仍然飄忽，經常只有半場貨仔，賽前的確令人憂心。不過今場曼聯一開波便壓著客隊向前而且行軍速度流暢，雖然賽事尾段再有不穩情況出現，仍能以2:1擊敗客隊全取3分，而且今場賽事終於有著以往奧脫福應有嘅氣勢，似曾相識的感覺，真溫暖的曼聯主場賽事。

出場陣容方面，門將嘅迪基亞，後防由右至左為楊格，史摩寧，連迪洛夫及梳爾，防中為馬迪及費特，中場中嘅普巴，前線右路為馬達，左路馬斯亞及正前鋒嘅拉舒福特。

迪基亞今仗所受真正考驗其實不多，即使施格臣禁區內嘅頭鎚，李察里臣禁區邊嘅地波，禾確特窄位嘅硬射都唔能夠射破其大門，偏偏球隊因普巴中後場失控球，史摩寧心急犯天條，面對施格臣嘅12碼唯有再次失去一場零封。

右後防嘅楊格，連續幾場擔正而且鬥心仍然維持，呢樣都係摩連奴希望呢名代隊長帶到俾球隊嘅重要元素。今仗楊格亦繼續以翼衛姿態現身，多次助攻再傳中，防守上算是不過不失但賽事中段一次裝越位失敗卻差點成大錯，幸好賓納特單刀扭過迪基亞後射網側而已。左閘嘅梳爾，今季成為常規左閘而且表現十分好，不過今仗與馬斯亞的合作仍然有待磨合。而且其中一次防守失位差點被高文入攝攻門幸得回防嘅馬斯亞救駕。

一對中堅方面，已經成為暫時最穩定嘅組合，而史摩寧作為球隊老大哥，今仗表現一直很好但75分鐘禁區內心急犯規令其今仗表現即時扣分，幸好球隊最終仍能全取3分而回。另一中堅連迪洛夫，今季表現慢慢地變得可靠，而且開始懂得面對不同英超球員有不同應對辦法，閱讀球賽方面以中堅來說亦有明顯進步，近仗表現亦值得稱讚。



防中方面，馬迪不休止地上陣，實在令人擔心其體力問題，而今仗表現算是穩定，但其速度，場上靈敏度也有下降感覺，更因一次拉人而領下黃牌，摩連奴絕對要想想如何作出輪換讓馬迪有休息時間。另一防中費特，相隔多場後今仗終回正選位置，其場上活躍度十足，亦非常勤力，完場前亦於中場直線交給馬斯亞單刀，再次顯示其B2B嘅能力，不過與隊友默契仍有待改善是事實，仍要點時間適應。95分鐘連加特入替費特，只屬於浪費時間之用，不過連加特相隔數仗亦算是正式回歸了。

中場中嘅普巴，今場又是一場令人又愛又恨嘅演出。中場控制方面恰到好處，節奏亦一流，而且進攻與防守亦看到其勤奮跑動。上半場雖然用其獨特步法射出12碼，卻被碧福特救出，但人順自然有幸，皮球回到普巴腳下一射空門入網為球隊先開紀錄，而其後亦交出不少高質的傳送，包括兩次斜傳馬斯亞而其中一球更造成入球。可惜愛完便要恨，75分鐘的一次中後場高章波把球挑起令愛華頓於心臟地帶得到一次極佳機會更引得史摩寧犯天條，因而被追成1:2下令餘下接近10分鐘嘅賽事極其危險。



攻擊線方面，馬達連續正選而與之前不同嘅係今仗佢由進攻中場轉為右翼，而馬達一如既往地自由走動，雖然有一段時間較為沉寂但一旦馬達於前場得到皮球，其傳送便有一定水準。85分鐘靴里拉入替馬達，以靴里拉於中場嘅攔截力增加中路防守而靴里拉亦交足功課，曾成功截下愛華頓中路皮球讓費特交出直線予馬斯亞單刀。

前鋒嘅拉舒福特，今仗代替近期備受壓力嘅盧卡古。而其表現算是合格，因為拉舒福特於前場會進行迫搶，實行球隊第一道防線令對手守衛唔會咁輕易睇定黎做波，再加上能於前點進行一定的停球，只是高空波方面較弱。進攻上亦有一次面對碧福特嘅射門處理算是不俗，只是先前推入禁區的做法可以更聰明地幫自己擴大射門面積而非推落窄位吧，65分鐘由盧卡古入替拉舒福特。近期備受批評嘅盧卡古入場後未有太多表現，不過似乎休息一下對佢都係減壓嘅好事，今場做停波或回傳也做得較為簡單而有效，不過接應普巴嘅一次傳中處理，於無人看管嘅情況下卻頂斜出界。

左路嘅馬斯亞，今仗賽後獲選為MOTM，實在實至名歸，左路威脅極大，12碼便由他搏回來，而且下半場接應普巴冷靜射入世界波為球隊拉開比數。但最值得人稱讚嘅係進攻上除了於左路活動外，亦有一段時間走到中路去協助球隊行軍，其中有一球與馬達及普巴於中場位置開始小組組織做得非常漂亮。防守上，不再是漫不經心，咩都無所謂嘅馬斯亞，回防協助梳爾，向對手施壓等等，而其中一球回防力壓助攻嘅高文令其射門高出實在功不可沒。可惜完場前嘅單刀失機打了丁點折扣而已，賽後見到其耗盡體力的表情，這就是鬥心所在，能否升級就看他會否維持此態度了。

戰術分析方面，今仗摩連奴以拉舒福特代替盧卡古，一來為後者減減壓，二來亦可以看到球隊於不同前鋒下的表現。而拉舒福特明顯能於前點做進行迫搶使對手無法從容策動攻勢。

另外，今仗用上費特的主要目的便是使中場保持一定的活躍度，因為費特喜歡引球推進，為普巴減低焦點使普巴可以放長傳或推進也可，而且也為普巴減低中場要防守的壓力，明顯看到近仗普巴的自由度增加了而今場波有費特在陣下更覺明顯。而賽事尾段換入靴里拉亦是一個正確換人使中場攔截力增加，亦為馬迪身前再有一名遮線能力強的球員作防守屏障。

最後便是摩連奴似乎終於將曼聯球員的信心帶回來，今場於主場奧脫福出擊便積極向前，又陌生而又似曾相識的感覺回來，這才是曼聯主場的氣勢吧。

鳴謝各位支持文字直播及即討區，下場見。