[WKD手記] - 地獄賽程迎熱刺
連續踢四場作客波，而且英超﹒、歐聯、聯賽盃嘅對手唔弱，無論狀態幾好都會愈踢愈辛苦喇，不過曼聯就係咁樣俾同市宿敵曼城拉開左距離，優勢有成五分之差。以表現黎計，能夠兩勝一和已經算係不俗。輸俾哈特斯菲激嬲左好多魔迷，連迪洛夫更加因為犯下低級錯誤而淪為笑柄，英國傳媒可能已經準備好一塊水貨王嘅牌匾俾佢。曼聯可唔可以盡快重拾信心，無左幾個主力嘅情況下都能夠踢得出季初果種霸氣呢？其實不要問只要信，哈特斯菲就係因為球迷全力支持同打氣先守得住曼聯最後階段嘅狂攻。
我睇完呢場波之後一啲都無嬲，優勝劣敗，踢得好就應該獲得勝利。曼聯係咪踢得好差？除左兩個失波之外，佢地算係中規中矩，下半場無論係進攻同防守上都踢返出水準同回復冷靜。咁當然喇，係咁高水平嘅比賽只要一下失神就足夠全失三分，何況係幾次失誤？不過我就不盡認同摩連奴對球員心態嘅指摘喇，可能佢知道球隊只要保持集中應該根本可以避免落後，先會咁嬲。
上半場有三位球員踢得特別差:馬素爾、馬達、連迪洛夫。馬仔係好早階段就領黃，其後仍然多次犯規，主場球迷梗係乘機起哄向球證施壓，希望將佢趕出場。睇得出佢本身被呢張黃牌影響左發揮，無法專注返自己職責嘅情況都幾明顯，而呢種不安慢慢係隊友之間慢慢發酵。馬達要為第一個失波負上唔少責任，係中路做到嘅野唔多。數字上曼聯擁有絕對控球優勢，但大部份時間進攻都靠兩邊，中間唔敢推得太前，你見呢幾場波盧卡古少左接應短傳就知最近曼聯少左一瓣路數。其實有靴里拉同馬迪坐陣做防守掃蕩已經足夠，馬達應該踢得更加放，結果兩者都係半場被換走。
連迪洛夫臨危受命，點知只係用左十幾分鐘就大出洋相。第一球佢可以話係盡左力拖延快攻，不過拍埋去恩斯就顯得步伐好重，令人諗返起佢係歐洲超級盃俾巴爾用速度欺凌。第二球更加係完全錯判，我就覺得唔係技術問題，反而佢無做好心理準備就落場。如果佢本身唔係後備入替，好可能同利物浦嘅路夫蘭一樣咁早早被換出。摩帥認為佢現階段信心不足，要一段時間後先再出戰。要適應英超嘅作客氣氛同節奏唔容易，呢位中堅潛力唔差，最少應該達到伊雲斯嘅高度，希望伊巴幫幫佢喇！
落後之下曼聯反而放低左包袱，拉舒福特同米希達恩為中前場注入新動力，哈特斯菲決定守到完場，後段壓哂上去攻真係熱血十足，所以我絕對唔質疑佢地嘅爭勝心。如果要為呢場敗仗定一個原因，應該係因為佢地無諗過升班馬會咁難踢，形勢變得太差先醒覺。
小勝賓菲加未必夠說服力，輕取史雲斯就證明曼聯擁有控制戰局嘅能力，係主場迎戰TOP弗嘅熱刺之前可以挽回信心係好事。如果輸一場就識得反省、進步，咁可能係件好事，黎緊呢場波應該會激過雙紅會，但我地都係要坐和望贏！
[WKD手記] - 防守反不了擊
期待已久嘅雙紅大戰最終以零入球結束，而要為賽果感到慶幸嘅係曼聯。作為一場大戰曼聯當然踢得唔夠好喇，幾乎俾利物浦㩒住黎攻，反擊機會少至又少，執到一分算係好彩。盧卡古再次被外界點名批評，話佢大賽又隱形，但係咪佢一個人嘅問題呢？摩連奴賽前部署係咪只求一分，中途又有無諗過要改變戰術？無論如何，我相信如果同對方鬥搶下場可能更加慘，季尾我地就知摩帥咁踢係啱定錯。
賽前公佈嘅出場陣容有達米安、華倫西亞同埋楊格三隻閘，我當時仲好肯定曼聯將達米安擺做左中堅，楊格踢左閘幫助前者一齊看守沙拉，實行黎個532守住兩邊。現實就係踢返一套慣常嘅451陣式，達米安踢返左邊，楊格就踢華西前面果格。右楊右華發揮尚算平穩，但就更加突顯到左路攻守都有不足之處。成場波沙拉一攞波二話不說就直接突破，盤扭成功左幾次之後信心大增，創造左好多驚險鏡頭。當然你可以話因為利物浦左路無左文尼先顯得曼聯右邊輕鬆，達米安亦都叫做出腳準、守得住，但係每逢佢出場嘅比賽，邊線進攻真係會好疲弱，上落走動較多嘅楊格或者係更佳人選。
得中場得天下，係呢一環我地今場絕對係處於下風。一開始雙方小心翼翼，兩邊都唔敢亂攻，但利物浦係節奏仲係極慢嘅時候選擇控住黎踢。二十分鐘打後利記加快行軍速度，曼聯雖然擋得住啲攻勢，但觸球次數愈黎愈少，結果處理反擊嘅質素都隨之下降，成場波只有一次贏波嘅機會。
無左兩個大隻中場，靴里拉終於有機會正選上陣，而呢場難啲說服到摩帥俾返個正選位佢。防守上佢算係幾專注，沙拉踢得咁Sharp唔多唔少係因為佢盯到古天奴無乜機會造波同遠射，情況有啲似對車路士時死跟夏薩特咁。奈何佢同全條中前場一樣，傳球成功率不足八成 (只有馬迪、連加特超過)，難得拎返個波又好易咁送走。中場失利又點只因為佢一個丫？馬迪今場刻意留後，只專心做兩位中堅嘅屏障，應該係收到領隊指示而一改前幾場嘅踢法。但正正係保守所以靴里拉踢得咁吃力，進攻時又同兩閘一樣俾唔到足夠支援米希達恩、馬素爾同盧卡古，啲波就上左去就傳唔返黎慢慢搓，控球就慢慢變得一面倒。
盧卡古錯失唯一入球機會故然值得檢討，但佢成場波無乜供應亦係事實。佢唔係懶惰嘅球員，不過作為單箭頭佢唔應該成日返去後面要波，反而要一直牽制對方一對中堅。邊個踢得最唔合格？我會話係米希達恩，佢對強隊隱形程度不下於盧卡古，呢場亦不例外。摩連奴應該好清楚只有踢強勢足球先會發揮到佢嘅能力，佢唔係四六/三七波時搶返主導權嘅球員。以防守表演黎講，曼聯算係做到賽前部署，但摩連奴如果想主守的話點解會出佢做正選呢？下半場換入福仔同連加特但為時已晚，因為馬迪同靴里拉已經無乜進攻嘅意志同信心。
對上一次國際賽後我地有好明顯嘅體力問題，加上高普擅於踢高壓足球，或者就係摩連奴選擇呢個戰術嘅原因。不失球和波唔係問題，但必須重新考慮排一個點樣嘅中場先可以製造到有效反擊出黎。
[WKD手記] - 蓄勢待發！
國際賽期前在主場迎戰頹勢未止的水晶宮，三分應該十拿九穩，最後亦不負眾望大勝四粒。同樣是四比零，但今次是贏得最有說服力的一場。與其話係曼聯踢出超水準，不如話水晶宮完美解釋左點解佢地處於榜尾而未入一球。當然，曼聯全場控制住局面亦係實力嘅表現，作為雙紅會嘅前一場比賽，我地當然收貨喇。
比賽發展異常簡單，就係我地上下半場各一球早段入波令水晶宮完全無法執行賽前部署。上半場客隊尚有積極嘗試迫和，但下半場幾乎是抱住破蛋、爭取個人表現嘅心態黎踢，試問咁樣又點可能踢得贏而家呢隊團隊至上嘅曼聯呢？
賽前有傳受傷而無法上陣嘅盧卡古同費蘭尼都出任正選，前者繼續交出入球，爆炸頭更加做埋最佳球員添。無論外界點質疑曼聯今季重奪聯賽嘅可能性，佢地都無法否認呢隊波係進攻上係非常立體嘅。
表面上，我地買入盧卡古後就係為左靠高波搵食，甚至似當年莫耶斯九九八十一斬戰術。非也！以前我地每一次傳中只係因為中路塞車、組織乏力而迫於無奈地斬出黎;而家係只要有波在腳，打短波定長波我地都有方法入波。對防守方黎講，呢度已經有好大差別，因為佢地唔可以再係禁區內佈防，而要將防守範圍向外推。
馬達、米希達恩同拉舒福特各有突破同中路造波嘅能力，有更多空間俾兩閘疊馬助攻，所以見到近兩季有好多機會Early Cross，亦造成唔少入波。再者，由於高點選擇不再得費蘭尼一個，所有死球都變得有威脅，仲記得費爵爺離開後幾季以來差唔多未試過用角球造成入波，人地就更加唔怕將個波清出底線。今場馬達入果球波正正顯出左當人地掛住盯實盧卡古費蘭尼時，反而會走甩較矮嘅馬達，防守球員走少一步就會空哂任人射。
防守方面今場可謂完全無受威脅，雖然水晶宮係上半場有一小段時間嘗試反撲，但實質做到嘅攻勢少之又少。史摩寧久休復出，頭鎚判斷準確、生波處理冷靜，有望重回受傷前嘅狀態。鍾斯繼續當弗，可惜賽後又證實受傷，連國際賽都無法上陣，雙紅會可能見佢唔到。
十字軍名單陸續增加，但摩連奴已經有哂心理準備。今季全隊狀態有明顯提升，接近每一個位置都有後備，稍一不慎就會被搶去正選位置，所以傷兵不會影響爭冠心態。摩帥之前用冷淡嘅方式回應普巴傷勢就係為左向球員重申球隊目標，免得佢地分心。
國際賽後兩日就要作客晏菲路球場，未知曼聯會唔會踢得守勢一啲，但我好有信心佢哋可以踢出水準！
[WKD手記] – 三分險袋
上週講過無普巴嘅曼聯可以點踢，週末就即刻受到開季以來最大考驗。直播時我正旁述FIFA比賽，仲俾隔離位利迷拍擋抽水笑盧卡古射術差添，結果就係靠魔獸一箭定江山，邊到佢唔服！
完場後大部份關於場波嘅Facebook post都充滿嬲嬲，已經想像到呢三分拎得有幾辛苦。再重溫埋全場賽事，的確有進步空間，但真係踢得咁差咩？
上半場雙方以快打快，有波就放前無波就高壓迫搶，如果係一場拳賽，兩個拳手就係不停摶搥、攻防之間不留空檔。球賽幾乎要到盧卡古入波後，二十五分鐘先見到曼聯有機會係修咸頓禁區外圍住黎猜多兩腳，然後又再次加快節奏直踩到半場完結。修咸頓踢法向來積極進取又充滿熱血，如果唔係又點會吸引到咁多球迷鐘意丫。摩連奴早已預料球賽會相當接近，我本來以為佢會更保守一啲用靴里拉加強中路串連。馬達同米希達恩都踢得太好，好難收起其中一個進攻發動者。整體而言上半場都叫做合格，反擊夠快夠效率，但節奏上有少許對方被牽著走嘅感覺。
換邊後聖人攻得更加狂放，六十分鐘打後完全壓住半場黎打。佢地犀利在於隨便一個中前場球員都可以斬出孤度、勁度、落點都一流嘅波，K角位、底線一樣傳得咁靚。加埋突破力強嘅列蒙同泰迪偶爾係兩邊內切施射，曼聯最後真係要泊架紅色大巴頂住兩邊出波。列蒙賽後好失望，但勝利最終都係屬於我地，而且係應得的。
放係幾年前，迪基亞晨早就可能因錯判傳中落點而失波。今日佢已經有足夠經驗應對，即使有球傳中佢有半分猶疑，但下一刻都作出正確決定，信任隊友可以係小禁區頂贏對方。以鐘斯為首嘅防線全場保持高度集中力，無乜點走漏過修咸頓嘅人。面對兩個邊衛疊瓦式助攻，拉舒福特同馬達下下都全速回防跟到足，連反擊都係由邊路策劃為主，尤其是前者每次攞波打快攻都構成到一定威脅。費蘭尼護半空門，靴里拉追到返禁區令對方射門角度收窄，看似係份內事，但點點滴滴加埋就係曼聯近年最缺少嘅集中力。修咸頓到完場都無乜大餐士要迪基亞神救，守得好佔好大原因，而唔係對方唔夠運。
曼聯防守上慢慢邁向摩連奴心目中嘅水平，即使機動性同體力仲未比得上當年佢帶領嘅車仔同皇馬，對佢黎講贏1:0絕對比4:3更滿意。普巴傷勢未明，可能要做手術休養一段時間，中場硬度尚可，但短期內要解決雙核問題。兩個都需要有足夠控球權先可以發揮最佳表現，偏偏佢地都唔擅長搶波。柏歷堅奴針對性緊盯二人，用修咸頓嘅體力去消耗我地嘅創造力，將來其他球隊一定會有樣學樣。黎緊要連續踢幾場作客波，係時間俾多啲時間連加特同靴里拉等活力派球員喇！
[WKD手記] - 沒有普巴的日子
開季成績數據驚人，球隊嘅狀態同穩定性亦慢慢進步當中，難得八月份頗為順利，普巴就率先加入傷兵團。普巴貴為必然正選，係球隊未來橋樑不在話下，甚至乎現有戰術都係為左令佢發揮得暢順而精心設計同調整嘅。呢一百六十分鐘缺少左佢嘅賽事，曼聯繼續不失球狂數對手。究竟曼聯已經演化到無左邊個都得，定係早已準備左一個普巴後備計劃？順便藉著對愛華頓一役黎睇下最近球隊踢法有乜轉變。
紅魔﹑拖肥糖本來就不乏倒戈球員，由菲臘仔﹑吉遜到今季直接轉會對家嘅朗尼﹑盧卡古，試問有邊個唔想踢贏舊東家證明自己丫？呢場波由隊長華倫西亞一球窩利世界波開局，好似好耐未試過咁早領先，以為可以更早踢出水銀瀉地嘅攻勢，大開殺戒。頭三十分鐘曼聯保持控球，繼續創造到半餐士甚至單刀機會，但硬係把握唔到，兩個前鋒表情開始有啲迷茫。下半場差啲俾踢得好生嘅朗尼追成平手，好彩有迪基亞救左幾球靚波，加上愛華頓後勁不繼我地先得以鎖定勝局。
因為米希達恩同馬達係自己嘅位置都踢得好稱職，摩連奴決定由費蘭尼取代普巴以維持中場防守硬度。馬迪又當選最佳球員，但費蘭尼絕對功不可沒。如果馬迪係為左令普巴自由發揮而作出遷就嘅人，費蘭尼就係同馬迪互相配合嘅拍擋。兩位身高同樣係一米九四嘅防守球員專注做好第一層防衛網，平排雙防中一方面可以降低馬迪嘅負荷，減少輸反擊嘅次數，同時騰出左更多前場空間俾馬達同米希達恩去發揮創造力。
缺少左鐘意上腳主導進攻嘅普巴後，兩個攻中踢得更加自由，整場比賽嘅進攻都由二人策動，除非需要協助華倫西亞防守，否則都會見到佢地不停互換位置以串連起中前場嘅傳球。呢個可能係唔錯嘅陣式，尤其當其中一人狀態回落或對陣強隊時，仍然可以將佢收起，用活力十足嘅靴里拉踢後半格助攻助守，再將進攻模式轉為兩翼快放。呢一刻好難界定曼聯踢緊451定442，因為佢地會視乎球賽嘅推進而不停咁調整，最明顯不過就係當拉舒福特偶爾移入中路，左閘﹑中場﹑中鋒都可以適時走到442嘅位置作配合，少啲默契都做唔到; 防守時就較少自由，主要以451為主。
最近踢法上仲有一個大轉變，黎緊不妨留意一下。賽和史篤城一仗，我以為曼聯係因為心急先係上半場踢高壓反搶，睇埋今場波就明白呢個係摩連奴落嘅指示。雖然係執行方面球隊仍然係有體力問題，但無可否認佢地上半場嘅壓迫令愛華頓中後防連波都傳得好吃力。連帶嘅另一個指令係盡量將犯規放係中前場，等對手更難靠死球得分，結果威廉斯同堅尼就無乜走入曼聯禁區爭頂嘅機會。正選球員平均年齡低，隨住狀態慢慢提升，曼聯有能力去執行呢種咁有霸氣嘅踢法。襯住係下個月雙紅會之前嘅對手唔算太強，我地有足夠比賽時間去提升狀態。
[WKD手記] - 兩發兩中失兩分
上季同史篤城兩戰兩和，次輪更加靠朗尼係補時階段嘅世界波先追和對手。今睇返數據雖然同上兩次交手差唔多，擁有六成半控球同較多射門次數，但無可否認史篤城今場踢得非常出色，絕無守和收貨嘅諗法。
摩連奴認為曼聯比主隊更加接近勝利，我就覺得呢場咁緊湊嘅比賽真係兩邊都唔值得輸喇。至於咩叫兩發兩中？咪就係發左兩次夢俾人入兩粒囉‥
摩連奴必定視呢場為硬仗，所以收起馬達，將米希達恩放係右中場，靴里拉正選上陣自然成為中路第三人。有左靴里拉之後，馬迪可以長期墮後，專注於分波同控制節奏嘅工作。基於佢頭幾場展示過唔錯嘅腳法同進攻意識，佢或者可以更加積極去參與進攻，但我就認為呢場證明左"卡域克"就係佢踢得最舒服嘅位置。我地係失左兩球，但除左迪基亞神救果下之外，成場波無乜俾機會對手打反擊，原因就係因為馬迪留守係雙中堅前面作第一道屏障。
上半場曼聯嘅進攻好有新鮮感，新鮮在盧卡古同拉舒福特有好多單對單鬥哨嘅機會。史篤城踢三中堅陣，此前曼聯對皇馬都示範過呢個陣式對中堅嘅挑戰係幾大。
拉舒福特話就係左中場，但不時同盧卡古平排踢雙前鋒，米希達恩亦讓條右路比華倫西亞殺上黎，球員之間不停係451同442之間轉換，史篤城嘅防守球員有啲無所適從。受惠於前場嘅壓迫力，靴里拉同米希達恩放左好多球靚直線，福仔同魔獸多次接應傳波後就即刻可以正面埋門。
攻勢睇落好簡單直接，其實要由中間向外跑拉空防線，甚至跑贏對手係極花體力嘅事。即使下半場體力下降，整體進攻表現仍然唔錯，如果係入唔到波而和波我係樂於接受嘅。
我對防守球員嘅要求一向比較嚴格，如果因為個人實力較差而導致失波，例如跳盡都唔夠人頂、出腳慢俾人扭過等等，呢種差距係比較易改善嘅，起碼領隊可以利用其他球員作針對性嘅彌補。
今場鐘斯只係鬆散左半秒都無，就俾卓普莫迪FAKE到失去平衡俾佢輕鬆頂入，已經抵鬧架喇。
拜利就真係暴露哂佢加盟至今仲有好大改善空間嘅問題 - 集中力。第一球失波佢首先包左越位，然後再係掛住望波嘅情況下走甩左禁區內唯一一個史篤城球員，察覺到嘅時候卓普莫迪已經係皮球面前喇。失波後睇得出拜利有啲心急，反而影響左判斷力，過勇嘅動作仲差啲令自己受傷。
下半場見到拜利爭跳標波更加狠，但明顯離開左慣常防守區域，好彩無再為拍檔增添麻煩。如果仲係費爵爺帶隊，佢肯定被換出再賽後訓話，唔知今次摩連奴同教練團又會點樣指導佢進步呢？
今場或多或少受國際賽影響表現，但正如靴里拉所講：「今季我地再無藉口！」
[WKD手記] - 雜談
又黎到國際賽期，呢個星期好多曼聯球員都被徵召入國家隊，為出線世界盃決賽週而努力。至今仲未有人受傷已經算係好消息，何況大家都表現得唔錯呢！最近球壇繼續多事，不過曼聯無牽涉係其中，最關事嘅已經係我地都再次借走左佩尼亞。趁住今個星期唔洗分析球賽，我都想分享下一啲睇法。
講下曼聯班球員先，佢地好似弗到入國家隊咁。鐘斯兩場正選上陣，獲修夫基盛讚為現時最佳嘅英格蘭中堅；拉舒福特後備有貨交，第二場仲搶走史達寧個正選位，交出一助攻一入波為三獅軍團反勝斯洛伐克；荷蘭大敗後白蘭特踢返場好波，科素文沙表現搶鏡；盧卡古兩場入四球，直接帶領比利時成為第一隊歐洲球隊出線決賽週。
同期仲有三場慈善賽，分別為六月倫敦大火(#Game4Grenfell)、Bradley Lowery基金會、曼聯基金會籌款。摩連奴係Game4Grenfell充當龍門，雖然失波兼食黃牌，但射入左一球幾專業嘅十二碼，睇黎盧卡古要搵佢教下路至得！球壇出現資金犯濫嘅同時，球場外仲有好多人需要幫助，繼續用足球影響生命、改善其他人嘅生活環境就啱喇！
瘋狂嘅歐洲轉會市場終於關門大吉，一方面我地要慶幸早左一年買普巴，因為以今年標準起碼要兩億歐元先買得到佢。另一方面不得不佩服曼聯行動迅速，莫講話要開季前買齊人，好幾個重大收購係暑假前已經部署好。咁樣唔單只可以俾多啲時間新球員融入球隊，亦都增加收購失敗嘅緩衝。望見巴克利臨門一腳忽然拒絕加盟車路士、巴塞賣走尼馬後收購目標被嚴重抬價、阿仙奴最後階段撤回對利馬嘅出價，呢幾個事件可以對佢地成季嘅排陣、成績有好大影響。
曼聯再次借走新星佩尼亞，此子腳法靈巧但未獲摩帥重用，此舉屬意料中事。我比較在意嘅係再次借去西甲球會未必幫助到佢係英超立足，或者試踢英超英冠球隊可以令佢有更強嘅對抗性同適應快速比賽節奏，今年唯有繼續觀望嘅進展喇。
英超最熱門話題當然係阿仙奴大變天，班主領隊球員球隊各有不滿，事情已經發展唔係話炒左邊個就可以解決，紐卡素, 車路士嘅情況亦唔見得特別好。然後體育總監漸漸係歐洲球壇興起、球會結構同權力愈黎愈複雜，呢啲真係我地想見到嘅野咩？
當年格拉沙家族入主曼聯後大玩財技令球會負上巨債，引起抗議。其實去到今日都仲有負債架，但點解再無乜反對聲音？因為球迷入場只係想睇到一場好波，一隊齊心嘅球隊，過多嘅政治、計算根本唔係足球嘅初衷。現任CEO活華特雖然只係一個商人，但佢呢幾年盡力配合各個領隊嘅要求，對佢地嘅信任有目共睹，成績自然慢慢上揚。
無論係愛隊定死敵都好，場外愈多事，球賽就愈失色，希望足球可以回歸純粹。
[WKD手記] – 複製勝利
今個星期喜訊不斷，伊巴強勢回歸重簽一年球員合約、球隊不失球三連勝，作為球迷真係好耐無試過咁樂觀喇。呢三場比賽嘅戰情推進、換人調動都非常相似，從中我地可以見到摩連奴嘗試複製奪冠方程式 : 固定十四五人班底，盡量踢足每一場聯賽。係分析佢呢個做法之前，不如淺談一下伊巴重披紅魔戰衣有咩影響先丫
六月時曼聯雖然無同伊巴續簽合約，但其實一直為佢提供物理治療同負責有關開支，摩連奴當時應該考慮緊為佢提供一份球員定教練嘅合約。估唔到佢康復進度甚佳，將會成為新一代十號波衫嘅主人。
正當大家諗緊點樣同時出哂盧卡古同伊巴兩個前鋒，我就認為就算佢唔落場都已經對曼聯百利而無一害。伊巴只係用左一季就贏得隊友嘅尊重同信任，佢推動球隊爭勝心之餘，大家相處得又融合，加上去季屢救曼聯，你話更衣室收到消息後點會唔係一片歡騰呢？另外，現時三大尖刀盧卡古, 馬素爾, 拉舒福特各有不足之處，伊巴作為前輩絕對可以係技術同心理上傳授心得，睇下普巴份履歷就知道有世界級隊友教路係會行快人地幾多喇。個人因素黎講，我岩岩做完十字韌帶重建手術，雖然我無佢咁犀利，但佢超人嘅意志俾到好大鼓勵我去積極康復。
曼聯係奧脫福再次倒模式贏波，不論係球迷或者球員都漸漸忘記上季份失分劇本。眾所周知摩連奴以往只要建立左一套穩固嘅陣容就好少作出改變，經過呢三場聯賽後有朋友擔心個別球員今屆會長居後備，我反而持樂觀態度。
首先，開季至今嘅對手實力接近，而且摩連奴開季目標好清晰：就算擺大個頭都要先改善左進攻球員嘅信心問題先，所以採用同一戰術絕對能夠理解。第二，摩連奴已經證明左佢係一個與時並進嘅領隊。當個個都怕佢黎到曼聯後會踢消極足球嘅時候，佢就為曼聯帶黎三年來最有娛樂性嘅進攻風格。三後衛、雙前鋒呢啲陣式雖然唔係佢拿手好戲，但佢都積極嘗試為球隊制定好Plan B、Plan C，我相信佢唔會重蹈覆轍，用殘班球員。要記住曼聯今季有四條戰線，每個球員都肯定有機會上陣，睇下馬素爾就知道踢得好自然有回報，球迷們唔使過早擔心今季見唔到靴里拉啊！
費蘭尼最近被外界形容為幸運星，其實佢每次出場就令我地擴大比數絕非僥倖。
馬迪, 普巴, 米希達恩三人中場嘅問題在於輸反擊時回防太慢。後兩者本身就參與進攻為主，而馬迪加盟後為左支援佢地比以往壓得更前。李斯特城好幾次係中圈附迎搶截成功，即刻就形成三打四嘅危險局面，米希達恩亦要出動到超技術去打斷對方反擊。
當費蘭尼換入後會同馬迪變為雙防中，而普巴就得償所願踢前一格留守進攻位置，重現中場應有嘅攻守平衡。係黎緊對強隊既賽事，相信就會犠牲米希達恩或馬達而將佢或者靴里拉放翻係出場名單之中。
不過作為球迷，我又真係好享受呢幾場既瘋狂進攻既！
[WKD手記] – 魔性訓練營
主場揭幕戰﹑列強出閘相繼脫腳﹐加上上季令人汗顏嘅主場戰績﹐第一週英超守尾門嘅曼聯當然背負左一定壓力喇。要撇甩陰影一啲都唔容易﹐但想重奪英超﹐呢個已經係最簡單嘅挑戰。曼聯今場唔單只克服心魔﹐從大勝中我地仲睇到好多正面影響﹐魔性係咪已經慢慢重現奧脫福呢？
要達成目標梗係要有實質行動喇。摩連奴為左令球隊進攻火力更強﹐犧牲串連中前場嘅靴里拉。今場雖然慣常地排出451﹐但就同時出左米希達恩同馬達兩個攻中。後者同華倫西亞夾慣夾熟所以挨近右路﹐其實進攻時佢同米希達恩會互換位置﹐加上普巴可以隨便前插配合組織﹐自由度比以往高左好多。頭二十分鐘球賽依然膠著, 拉舒福特係比較少參與, 可能因為白蘭特未敢壓前而令佢留守中場區域居多。其後佢意識到貼近對方禁區先發揮到自己長處﹐於是壓前之餘更加嘗試切入中路甚至右路﹐成隊嘅走位即時變得立體。
第一個入波絕對係反擊嘅範例。馬迪首先以驚人嘅速度同出腳殺走奧比安嘅傳球，拉舒福特拎到個波就長驅直進由左邊帶入中路，盧卡古接應福仔直線後成功傳化成入球。馬迪係整個進攻雖然無再觸球，但佢嘅走動牽制住對面嘅列特，為拉舒福特提供左好大空間。考慮到佢只係加盟咁短時間已經可以感應到隊友行動而作出咁本能嘅配合，只能講佢真係將摩連奴本反擊手冊背到滾瓜爛熟喇。
魔性就由果一刻開始重現。
試諗下如果又要攻到七十分鐘先開紀錄，球隊又會陷入果個（繼續攻定死守好？）嘅兩難，最後又愈踢愈無信心俾人有機可乘。
因為入波時間尚早，球隊無變得保守沉悶，反而踢得更放，最後先全面擊潰對手。
對我黎講，魔性就係無論咩比數、幾多分鐘都可以好專注咁處理好當下嘅進攻，而唔會俾上一球失機影響信心。呢個特質相信大家都會係拉舒福特身上見到，而憑住呢種勝利應該可激發到更多隊友嘅魔性。
作為九號接班人，盧卡古少不免俾人拎黎同伊巴比較。呢場佢一個人食住哂列特同奧邦拿兩個中堅，無論地波高波佢都發揮到絕對嘅身體優勢。雖然腳下功夫無伊巴咁靈巧，但佢好多時走出禁區做一啲簡單Pass & Go嘅動作都合格有突。黎緊佢仲有大把挑戰，但我欣賞佢賽後訪問表現得非常謙虛、亦清楚自已仲有進步空間，曼聯就係需要自發性強、積極嘅球員！
至於又實又華嘅馬迪直頭騎劫左成場賽事，以防中身份勇奪本場最佳球員。馬迪踢法簡單高效而專注防守，感覺上似卡域克同夏格維斯嘅混合體。不過曼聯嘅中場配搭同踢法都有好多變化，所以不妨再睇多幾場先再下定論。暫時黎睇摩連奴仲係想透過其他中場球員嘅配搭，黎搵出普巴最佳效能化嘅答案，故此我地見到佢上下半場有唔同踢法。
踢得唔錯，我地今年真係希望奪冠架！
[WKD手記] – 差距
等左兩個月，曼聯第一場正式賽事以二比一僅負皇家馬德里，未能以歐霸身份奪得歐洲超級盃。皇馬實力較強，賽果實屬正常，但輸波都可以分自己踢得出水準同踢得差咁輸，曼聯今場就偏向後者喇。
賽前公佈嘅陣容令我誤以為摩帥排出老本行451，米希達恩同連加特係兩邊協防助攻。殊不知佢踢嘅係3511，達米安移入中路成第三中堅，連加特﹑華倫西亞踢翼衛。呢個陣式想達到嘅進攻效果無非係想米希達恩作為影子前鋒可以直接供應機會比盧卡古，等後者唔使返中場拎波，將佢柱躉嘅能力完全發揮出黎。頭十分鐘左路連加特﹑普巴﹑馬迪三個猜得幾流暢，分擔左米希達恩做波嘅工作。但皇馬漸漸入局壓前中場線，重奪控球權後，兩邊翼衛幾乎無睱參與進攻。米希達恩本來就係要踢控球嘅球員，護球下缺乏支援，結果又將個波送返俾對手。打反擊時如果翼衛殺唔切上黎，成個陣就無左佢最大嘅優勢。
防守上，三中堅嘅走動仍然綁手綁腳，機動性不足。最恐怖嘅巴爾睇中連迪洛夫經驗同默契都未到火侯， 每每拎波就直接同佢鬥哨，失波前已經睇到我心驚膽顫。呢位新仔實力未必差，但三中堅其中一個特點就係比四後衛防守範圍更大，會面對更多單對單(尤其係速度上)嘅挑戰，所以三中堅從來都唔係一個容易適應嘅踢法。落後之下華倫西亞踢返熟悉嘅右後衛反而更加自在，更多機會落底線出波，現階段我認為隊中無乜球員真係踢得掂352，只能偶爾當奇招咁出。
下半場嘅表現改善返唔少，調動都有明顯作用，所以今次淨係針對返上半場嘅失準去分析。
皇馬第一球雖然有越位之嫌(*其實應該只當平排) ，但重點係班球員根本無心裝越位！ 旁證未必每一球都睇得咁清楚，但如果自己連越位都無準備好就唔可以怪人喇。呢球卡斯米路擺明車馬攝連迪洛夫盲眼位而且刻意企係佢同華倫西亞中間，令兩者都埋唔到身緊盯。關鍵在華倫西亞無提到場而做成呢個失位，過往有好多次俾人突破越位都關佢事，畢竟佢中場出身係呢方面嘅本能意識比較弱，但呢球佢係要負上一定責任架。
* Any part of the body that can LEGALLY play the ball is considered when the referee looks for offside。That excludes the hands and arms，as they cannot legally play the ball。The same is true of the hands and arms of the opposing players.
上半場有兩個扳平機會，分別由普巴同盧卡古浪費左。唔係要個別指責佢地，反而想講當時全隊都踢到神不守舍，就算拎到個波都無哂方向無哂紀律。我相信將情況重演一百次，盧卡古都會知道自己處於越位位置，普巴都會知道交波係更加好嘅決定，但果一刻佢地就係唔夠集中，淨係睇到眼前嘅野。一線同世界級嘅差距，在於係最關鍵嘅時刻交到功課，最大壓力嘅情況下答岩問題。
我地陣中有唔少一線球員，上唔上到去就要睇佢地可唔可以從呢類大賽中吸收經驗，鍛鍊出果種冷靜同自如。
就呢場波去睇，皇馬班球員嘅處理真係成熟唔少，睇黎施丹連做領隊都有令隊友打高一班波嘅能力。
英超就黎開鑼，呢場波俾曼聯嘅球員知道佢地距離世上最強仲相當遠，不過影響應該係幾正面嘅！
[WKD手記] - 舊鋒、新鋒
襯住未開季，就寫一篇圍繞鋒線嘅文章黎歡送朗尼。朗尼近年狀態下滑係不爭嘅事實，但眼見球迷對佢嘅批評好多時都變得針對性，都想為佢平反下，因為我覺得佢仲有改變球賽嘅能力。
對廿歲出頭嘅英格蘭足球員黎講，朗尼曾經係佢地嘅朗拿度。
加盟曼聯後嘅首季已經拎左英超最佳年輕球員，朗尼用入球黎證明自己可以成為球隊未來嘅中流砥柱。果個年頭曼聯可謂陷入低潮，失去萬人迷碧咸後曼聯嘅傳統442開始失衡，加上油王入主車路士後實力大增，曼聯壟斷英超之勢不復再。費格遜為朗尼安排左一個專屬位置—影子前鋒。曼聯轉踢4411初時成續仍無起色，進攻又無以前咁入肉，費Sir經常被球評家同球迷批評得體無完膚。直至朗尼開始取代史高斯成為雲佬背後嘅男人之後，兩位開始產生化學作用。朗尼可以任意施展遠射之餘，雲佬亦受惠於前者嘅跑動同傳送。
仲記得08年贏歐聯果屆嘅曼聯嘛，係令人聞風喪膽嘅無鋒陣！出場陣容中雖然有列出前鋒，但落到場會見到六個前場球員輪流助攻協防。此陣式利用迪維斯同朗尼超大範圍嘅跑動，加上佢兩個同C朗拿度都當弗，基本上皮球處於前場任何位置都創造到機會。C朗拿度離隊後，朗尼成功擔當起神射手嘅角色，而當貝碧托夫同雲佩斯加盟，佢又可以根據領隊要求而調整自己嘅職責。直到費格遜榮休嘅第一季， 佢每季都保持到雙雙嘅入球助攻數， 又或者係二十個入球嘅數據。
進入後費格遜年代， 曼聯嘅進攻銳利度急跌， 莫講話要嬴波， 連進攻方程式都令球迷摸不著頭腦。 莫耶斯嘅傳中大法當然為人垢病， 但果季朗尼仍然交出十七個入波同十個助攻， 佢同贊奴沙、迪基亞可以話係該季踢得最好嘅球員。 入波嘅職責唔再係由一兩個球員分擔， 而係由整個中前場去參與， 甚至係完成埋最後一腳。 呢個轉變或多或少因為中場供應減少， 對小豆, 雲佩斯呢類需要餵波嘅球員黎講少左好多機會， 變相中場球員會自己突破或者遠射。 所以同期買入嘅派牌型球員如馬達、靴里拉都無法將自己最擅長嘅野係球場上發揮出黎。
黎到今日， 曼聯嘅攻力仍然有待改善， 但進攻套路已經好明確， 鋒線亦比過往多左支援。 摩連奴嘅451/433開始踢得出兩翼快攻之餘， 以普巴為首嘅中場中更加令到前場侵略性大增。 歲月催人，係短短一年其實可以睇得出年輕球員同老大哥嘅分別。 同小豬一樣， 無論出任前鋒或者中場， 朗尼落到場上好似跟唔上球隊嘅轉變， 仲踢緊兩年前嘅節奏一樣。 加上傷患困擾， 對比起拉舒福特同連加特果種戰術適應力， 佢唔係摩連奴嘅未來計劃之中只係時間問題。
來季嘅進攻焦點將會係睇盧卡古、馬素爾、 拉舒福特同連加特係前線如何分工， 依我估計摩連奴絕對有野心試踢雙前鋒陣式， 就算唔用黎做主要陣式都可以用作落後時嘅變陣。 相信以上四位球員都以大家為競爭對手，今季進攻一定比上年更精彩。
好多人覺得倒掛金勾係朗尼嘅代表作, 而我就最鐘意佢對紐卡素窩利勁射死角果球, 係一個打不死嘅波牛先會諗都唔諗就抽埋去, 返翻愛華頓仲有大把機會啊！
