前曼聯門將教練史迪利係外國報章寫左篇文章，內容係佢憶起當日說服費Sir 簽入迪基亞嘅往事。史迪利話佢記得27 年來費Sir 只係缺席左兩場曼聯賽事，一次係2000 年嘅曼徹斯特打吡，因為佢要出席阿仔嘅婚禮。而另一次就係為左考察迪基亞。
史迪利諗番係2008 年加盟曼聯時，第一樣展開嘅工作就係為雲達沙嘅退休做好準備，亦即係要著手搵曼聯一號球衣嘅接班人。佢好努力說服費Sir 19 歲嘅迪基亞就係最佳人選，首先佢整合左迪基亞三場賽事嘅精華燒做DVD 比費Sir 睇。2010 年9 月22 號，佢地飛埋去西班牙睇馬體會對華倫西亞嘅賽事。而個一晚曼聯要係聯賽盃迎戰斯肯索普。
係個場賽事65 分鐘內，費Sir 就認定迪基亞將會係一筆絕佳嘅簽約。迪基亞係球場入面神情自若，但係就保持集中，亦都展示佢敏捷嘅反應。其中一球係佢係球員混戰入面做出一個靚絕嘅撲救。
史迪利繼續表示，當時費Sir 為一個小朋友作出一千七百萬鎊嘅報價，係一個好勇敢嘅決定。費Sir 對於心儀嘅年青球員往往都會保持耐性，想睇多幾次再做決定。但係簽入迪基亞就唔同，佢係第一次迅速咁對一個年輕門將做出買入嘅決定。迪基亞加盟無耐時，大部份球隊都針對佢身體上嘅弱點做重點打擊，但係曼聯並無因為咁而改變迪基亞嘅改善計劃。曼聯上下都深信迪基亞一定會展現佢嘅實力。
費Sir 同史迪利一直都鼓勵迪基亞，而費Sir 更加無批評過佢，係一次都無。費Sir 試過將佢放係後備席，但係從無對住迪基亞開過風筒。再睇睇依家嘅迪基亞，佢最突出嘅優點係係球場上佢可以保持鎮靜。佢依家成為左世上最強嘅門將，係英格蘭只有車路士嘅高圖爾斯係接近佢嘅level。迪基亞嘅實力值得同舒米高相提並論。舒米高加盟曼聯時27 歲，雲達沙就係35 歲，迪基亞，今年先27 歲，但係就啱啱先踏入佢嘅高峰時期。史迪利係文章尾段寫道：「相信我，迪基亞只會繼續進步，變得更強。」