[WKD手記] - 與Royce Sports的兩年半

撰文兩季半，陪隨住曼聯由摩連奴衝冠後走下坡到蘇斯克查執教重組，亦同球隊經歷過五、六種陣式戰術配搭。我決定藉英超落幕呢個機會同各位讀者暫別，希望喺休息同沉澱過後會帶到多啲新嘢比大家。今次就回顧下寫作理念、點樣踏上寫作之路同交代未來去向喇！開始之前首先要多謝RS從來唔審查寫作內容，等我一路以嚟都可以暢所欲言，分享最真實嘅睇法。

由細到大都覺得無論响聲音同文字上，如果平時唔上網搵英文網嘅話，香港球迷甚少接觸到球賽嘅深度分析。加上香港人連入場睇波嘅習慣都無，言談之間唔難發現佢地只會留意到粒波或持球者，對場上其他球員嘅走動同作用（例如提前現位、調整距離等）唔太理解、重視，單單靠螢幕上呈現嘅畫面角度其實好難全面地理解到足球係點樣關哂十一個人事。話雖如此，我自己都曾經係以上所講嘅人，直到去咗英國讀書先有所改變。

當時加利仔啱啱加盟Sky Sports，單單幾分鐘嘅分析已經顛覆哂我對限制空間、防守概念，連同埋BBC兩間電視台嘅高質足球節目，睇電視真係可以學「睇波」，去理解場上一個事件嘅前文後理，同戰術/個人/隊友嘅關連性，而唔係淨係睇到持球者嘅執行能力同狀態。同時期網上開始有更多中文足球文章，但風格傾向結果論、論調仍然脫離唔到中文果種非黑即白評論，容易令讀者忽略球員好多時面對兩難決擇，兩者無絕對啱同錯之分，視乎佢地最後執行成點；再唔係就走今時今日仲有人睇嘅「新浪文」風格，誇張無營養嘅文章真係不睇乜罷。

大概15/16嘅時候，發現RS出啲曼聯資訊又快又多，加深讀者對小將、教練團同其他職球員嘅認識，於是就Follow佢地兼介紹俾身邊嘅曼迷朋友。2016年底RS徵文，應付考試以外未曾有寫作經驗嘅我，可能就係靠寫出對費SIR嘅情感贏咗，然後就寫到今時今日。曼聯呢幾年戰術變動頻繁，陣容、針對性部署場場都唔同，喺分析方面提供咗唔少材料俾我去寫；球員變動多不勝數，喺摩連奴麾下更加不斷經歷位置調動同各種挑戰，我一路寫都觀察到好多球員撞板、成長再突破。

因為寫作唔係我嘅搵食工具，所以成日會反思寫作初衷同動力。第一、透過分享個人睇法嚟引發讀者思考。入場睇波坐龍門後面同坐兩邊都已經爭好遠，同樣道理踢波好多時都無絕對嘅對同錯，我希望提供多一個角度去刺激讀者諗嘢多過要佢地認同，全部人同一想法反而無討論價值。第二、改善鬧波風氣。正常睇愛隊係會肉緊啲，但唔同意踢得差少少就嗌清洗或者加一堆陰謀論落去。運動員生涯閒閒地十幾廿年，如果單憑幾場表現就可以準確評估到實力同成就，域奇林拔、華迪呢啲球員唔會踢到變神射手。即使非曼聯球員踢到一塌糊塗，我都唔會過份批評，因為職業球員嘅付出同可能性唔係我地可以想像到，有時等到一個機會就大爆發，又何必每件事都講到不可逆轉呢？最後就係捍衛粵語。我自己好享受聽旁述講波，所以都想讀者睇文嘅時候有類似感覺，以致我一直都用口語方式寫文。製造多啲相關產物，就係推廣、保護一種文化最好嘅方法。

事業步入另一階段，令我難以兼顧寫作同工作，加上有感自己响分析方面到咗樽頸位，所以決定先暫停出文，再利用工餘時間去學習足球。足球同科技一樣日新月異，但危險在好多人睇唔出前者嘅變化，覺得一套踢法一套理論可以用一世。傳統攻中被淘汰、高大中鋒死而復生、去到救波叻都唔夠，要識踢中場先係好龍門嘅年代，足球嘅變革唔單只淘汰緊球員，對足球評論員更加係一個警號。

球場以外，包括我在內有好多球迷都唔明白球會點樣運作，由日常營運到排陣、戰術、用人、臨場調動、訓練方向、買人，其實以上有好多瓣都唔係由領隊直接操作，但先入為主就以為乜都阿ger話事，正如一間公司嘅GM都未必會樣樣決定點做，反而要聽各部門阿頭嘅專業意見再以團隊方式去做好件事，以我所知由費格遜年代已經係咁運作。一個人一日得廿四小時，同踢波一樣唔靠合作就死硬。如果可以嘅話我會從戰術、球會營運兩個方向去認識職業足球，再同讀者分享，咁就唔洗報紙講咩都信到十足。

最後想講我從來都唔覺得自己夠資格分析足球，因為我唔係職業足球員/教練/作家同埋一千個原因，本身又好怕寫字，當初投稿亦只係一時興起。但正正因為RS俾咗一個平台我去分享，我先有機會去磨練同了解自己有咩進步空間。咁耐以嚟直播重播睇足哂咁多分鐘曼聯波（今季要捱得哂真係唔易），大大話話寫咗超過十萬字，兩年前我會答你無可能，但因為尊重呢個平台，隔離踢得幾精彩我都留喺度睇啲紅魔死扭亂傳，再寫一篇無乜人想睇嘅分析（正常人都唔想深入了解輸波原因）。如果要練到世一先可以落場，咁永遠唔會夠人踢波，所以有機會就要好好把握，盡力->犯錯->再盡力係不變嘅進步定律，所以我先鐘意韋碧克、華倫西亞，因為佢地對得住個徽章。嚟緊會繼續以其他方式同RS合作，未來見！

[WKD手記] - 備戰下季的首要任務

失機，失誤，完場，無需再深入解釋。曼聯正式宣佈爭四失敗，意味住一大班球員會被強制降薪四分一。喺進行清洗同買人名單之前，首先要考慮邊啲球員即將離隊，然後先會得出重建方向同理想人腳。相信好多球迷都會認同曼聯唔係淨係輸球員質素或者心態，戰術上都太過保守落後，而我就認為有兩樣嘢要優先處理，否則曼聯今個夏天只會重蹈覆徹，白忙一趟。

普巴今場中咗兩次楣，表現喺隊中僅次於麥湯美尼，對只能賽和哈迪斯菲爾德極為失望。係人都知普巴個人能力有幾強，但同時知道佢狀態心態起伏有幾大，加上佢响球場上嘅身體動作同表情都係不滿多於鼓勵，我真係對蘇斯克查要圍住佢建立球隊，甚至做未來隊長呢個決定有所保留。由於減薪兼無歐聯踢，普巴離隊呼聲甚高。在於佢嘅角度，廿六歲唔再係新星，現時隊友級數非常一般，爭奪重要錦標幾乎係不可能任務，留係喺都未必有心機踢。在於球會角度，究竟仲值唔值得用人力物力去”Keep him happy every day”，定其實曼聯呢幾年需要一個務實、有毅力嘅團隊多於一個心情飄忽嘅球星去帶領球隊前進？佢嘅超級經理人拉奧拿啱啱被罰三個月不得執行職務，反而係一個比球員同球會直接溝通，好好了解彼此目標嘅契機。無論結果如何，留係得喺度就要每分鐘都付出所有，呢個係做紅魔鬼嘅基本要求。

後防係另一個要改善嘅範疇，而佢本身又會引發出另一堆問題，所以要盡快搵到方向同解決辦法。上季摩連奴曾經向管理層指名需要購入兩個心水中堅，最後高層拒絕其要求成為導火線。今季後防實力之弱暴露得一清二楚，蘇斯克查開口要買人應該唔係問題，但陣中嘅人應該如何安置呢？如果曼聯想頂得住現代足球節奏，用波能力就係中堅必備條件，唔一定要進取到參與進攻，但最少要有腳下功夫，受壓下控波轉向傳波都要保持到質素。講到呢度，我諗都無人覺得鐘斯同史摩寧做到掛？偏偏佢兩個就續咗約，而且英人身份令佢地離隊機會好微。近季無論中前場試過無數配搭，但陣地戰一踢得唔順就會老鼠拉龜兼輸反擊，其中一個原因就係後防參與度低、控傳速度慢，迫多兩迫仲會自爆。我地成日觀察到三中場創造唔到空間，但足球趨勢係踢十個甚至十一個中場球員，曼聯當然唔需要咁極端，但好嘅防守體系已經進化到唔能夠單靠中場揹起哂組織工作。如果佢地仲繼續正選上陣，其他位置買咩人都蛻變唔到。

[WKD手記] - 兩個西班牙人

敗走麥迪遜公園後，曼聯繼續响場上交出非常一般嘅表現，對曼城同車路士自然創造唔到奇跡。同堅尼嘅睇法差唔多，呢段時間我唔會相信球員喺媒體上嘅言論，因為佢地極有可能只係為咗公關技巧而做呢啲表面功夫。球員要應付英媒壓力，做好公關工作無可厚非，但與其驗證佢地究竟幾有鬥志，我寧願等佢地用表現證明好過。球隊無甚起色，體能、埋門等老毛病依舊，今次不如講下兩個西班牙人嘅處境。

迪基亞最近因為屢次失誤而成為討論焦點，唔少球評將續約問題同其狀態扯上關係，更加有意見指佢應該要被貶為後備。門將喺一個好特別嘅位置，佢地犯錯會直接導致失波，而且好多時會成為笑話，一次失誤就可以將全季甚至成個生涯建立出嚟嘅信心抹光。由咁多年嚟英軍龍門魔咒，到上年卡利奧斯歐聯出醜後變成足球白痴都係因為失誤令狀態一去不返/持續下滑。以卡利奧斯呢個例子嚟講，我認為利物浦用咗雙贏而又不失大方嘅手法處理：佢絕對唔可能喺今季英超踢，淨係作客都俾球迷蝦到傻，去次級聯賽反而可以有出場時間慢慢回復水準。呢一刻迪基亞放棄佢對佢未來表現嘅傷害可能會更大，基於佢本身實力屬於世界級，唯有無限量支持並希望佢餘下兩場唔再蝦碌，至於留唔留隊或者羅美路應唔應該踢多啲正選就等休季再處理。最後想重申失波通常涉及多於一個錯誤，只要其中一個人做好啲就可能影響到結果。迪基亞接唔實粒波點解係阿朗素而唔係四個紅衫執到第二點？迪基亞當年咪又係用一己之力彌補隊友失誤。

靴里拉同樣有合約問題，離開曼聯幾成定局，點解仲要花時間討論呢？相信曼迷對佢只有愛、沒有恨，因為佢係近年最有魔性嘅球員，任勞任怨不特只，贏波時比所有隊友都更熱血激情，當佢傳出唔再續約時我都覺得非常遺憾。我同意以佢呢個歲數未必值得加咁多薪酬，更加理解到佢呢種踢法喺曼聯嘅「理想計劃」中佔唔到席位，離開對佢發展可能有益添。

但經過呢幾個月嘅起跌，我對「理想計劃」嘅睇法又有所改變。原本我以為曼聯希望重新成為冠軍球隊，但踢完強隊就知道鬥心以外紅魔喺戰術、體力同實力等範疇都落後於現代足球，呢個距離並非一朝一夕就進步得到，就算下季買哂啲人、踢套新戰術都需要時間同經驗去磨合，所以蘇斯克查先會講「重建」。曼聯踢得順果陣，靴里拉會顯得無咁重要，因為佢近年已經轉型做有視野嘅工兵，將組織工作交哂比前面去做，如非必要都唔會推得太前、交冒險波；但隊波老鼠拉龜，靴里拉就會明顯地為隊友走多步，為阻止對手進攻而聰明地犯規。响技術層面上，爭少少嘅費特同佩雷亞或者可以逐步接班，甚至你鐘意買個世界級中場都得，但似乎佢嘅戰鬥精神係重建路上第一樣要所有球員去達到嘅嘢。如果佢最後選擇離開，我認為影響唔會太大，但個人更加希望有佢同曼聯一齊過渡呢幾年。

[WKD手記] - 求其踢，求其寫?

「唔好講咩潛質、天分，如果無足夠態度去著住呢件波衫踢波嘅話就走人。」相信陣中無人敢反駁前隊長加利佬呢番說話。對愛華頓踢到下半場我已經決定唔寫任何技術/戰術分析，因為連基本傳送同走動都做唔到嘅球隊，仲使乜研究執行問題？佢地今日愧對心口上面嘅徽章，唔係因為踢得差，係未完場就放棄嘅眼神賽在太丟架。呢篇文會分享場上一啲令人失望嘅觀察。

曼聯差，曼聯球迷都唔好過。祖記對阿積士打得幾激烈都好，我就算難受都願意專心睇埋果場一早已經無關痛癢嘅波，呢場都得，但我睇完就同其他付出時間金錢支持曼聯嘅球迷一樣，絕對有資格去評論、甚至指責一班無靈魂嘅球員。我鐘意嘅紅魔包括傑斯、韋碧克、夏格維斯同華倫西亞（現役連加特仍在觀察中），佢地實力功績生涯各異，但每次著住曼聯波衫都有為球隊尊嚴而戰，順境波有邊個唔識踢？逆境唔加倍努力奮鬥到底，唔嘗試死搶狂攻算咩紅魔鬼？

第二個失波基本上反映咗幾個問題。一、無人自覺要做dirty work用職業犯規暫停對方快攻（達洛特第四球無要波要人都係同一道理）；二、馬迪完全無視施古臣遠射能力，老馮認為對方會拖慢攻勢所以無擺好姿勢防佢轉重心；三、其他防守球員一樣求其回防，信哂馬迪單對單會搞掂，有射波就交俾迪基亞、射得靚就交俾個天處理；四、迪基亞再次曝露讓近柱俾人射嘅壞習慣；五、失波後無人處於即時反省狀態，我只係見到一堆球員純粹失望而唔了解自己邊一部份出錯，前者都未做到，更莫講喺餘下時間修正行動同心態。當曼城同熱刺合演一場歐聯經典，最後分野喺艾達韋特有跟防線走先帶幸運成份、造成越位而出線，我地一次防守、四個失誤，原因甚至同先前失嘅遠射一樣（迪尼球遠射又係差唔多，不過無人知散得快啲會唔會擋到），你話要重建幾耐先可以有穩健嘅團隊防守？

一種無力而絕望嘅病毒喺曼聯嘅球員間彌漫，由平時最肯跑嘅連加特最迎開始迷失，到成條中後場連三碼短傳都可以不停失誤，我以為從巴塞兩回合比賽中學到知恥近乎勇，原來可能佢地意識到差距太大，被衝擊到再唔知喺球場上應該點踢，但無論如何都唔會因此而合理化佢地今場嘅敗者心態。

楊格從來都係全球球迷恥笑對象，開波前亦見到有社交媒體話終於唔使見到佢踢，結果呢？對於我嚟講佢能夠穩站正選名單唔係單純靠防守能力，而係維持場上士氣同態度嘅影響力。失第一球波後我見唔到有人帶領球隊，反而係一個又一個低頭愁眉、自言自語嘅球員。隊中無人敢大聲指揮同嗌住隊波，只有交失波然後發個人脾氣嘅隊友，咁就唔好怪又老又易派膠嘅楊格仲係隊長喇。佢同麥湯美尼係我覺得可以抬起頭離開麥迪遜公園嘅紅魔鬼之一。

前個月睇東方對南區仲笑緊後面有個阿叔鬧愛隊「唉踢埋呢場唔好L踢喇，（全部）退休喇！」，而家就明白原來隊波唔上心真係可以嬲到有咁嘅感覺，我夠膽講果隊東方嘅態度都積極過呢場嘅曼聯，所以完場仲留喺度鼓勵球員嘅客隊球迷真係唔話得。我能夠做嘅就係幾難頂嘅曼聯都哽足每一場，但唔該啲球員面對逆境要比我地更加硬淨！

[WKD手記] - 敗走魯營球場

2017年曼聯以一比二輸俾皇家馬德里敗走歐洲超級盃，當時寫過一篇《差距》，講曼聯球員把握力、穩定性同埋歐洲賽經驗都比唔上對方，以致佢地面對強隊時即使製造到僅有嘅機會，都會因為各種原因未能轉化成入球，呢個就係一線同世界級之分。文中亦有講到當皇馬站穩陣腳後慢慢操控節奏，無力感最後滲透整隊曼聯。講到呢度，唔知大家對啱啱場波有無一種似曾相識嘅感覺呢？重建計劃事在必行，無論球員或者踢法都要經歷一段長時間嘅改革先可以追返上嚟。

當拉舒福特先有射中楣，後有自己跣腳食唔應個波嘅時候，我心裡面就有「場波已經完咗」嘅預感，因為我見過太多呢啲一來一回就輸波嘅情況發生，結果由果刻開始實力同狀態都好過我地嘅巴塞就將局勢扭轉。

今仗曼聯無咗梳爾，焗住用楊格同連迪洛夫一左一右，兩個都唔算踢緊最佳位置，右路更加係搓多兩腳都難;唔單只助攻次數少，連壓過半場參與組織嘅機會都唔多。上回合4.5人防線尚算湊效，但不過今場要贏波嘅前提下蘇斯克查只好轉踢433。美斯一上腳的確如入無人之境，MOTM當之無愧，但如果用返上次果套戰術去守又會唔會限制到佢呢？

楊格同迪基亞嘅失誤直接導致失波，首當其衝被球迷炮轟，而其他隊友發揮亦只係平平無奇。呢球波楊格無第一時間解圍埋下失波伏線，其實唔只係佢一個人嘅責任。從上帝視角可以見到佢附近每一個傳球選擇都被緊迫住，蘇亞雷斯同時一邊比壓力鐘斯，一邊匿喺鐘斯背脊後面搏楊格回傳俾迪基亞。如果第一腳清上去就未必會輸孤寒波，但佢左腳清得唔慌遠、邊線又有三個巴塞球員等住截波，反映出巴塞套戰術就係會迫到啲後衛入困境。如果我地仲有一個穩健嘅後備左閘，或者就唔會出現呢個典型逆足閘嘅失誤。

早喺抽籤之時就同朋友討論過究竟穩守定同鬥搶先有機會打贏對方，當中一個有趣嘅觀點係巴塞破密集已經有咁多年經驗，我地泊大巴反而開正佢地果瓣。回望呢個回合，未輸到三球之前曼聯幾乎下下都有四個人喺最前線施壓，三線距離被拉開，客觀效果就係後衛有更多單對單嘅情況出現。三球遠射說明咗因為古天奴同美斯都有過人能力，後衛單對單果陣唔敢標波，希望拖延時間等隊友回防，最後苦了迪基亞。三個失波嚟講我最唔滿意古天奴球世界波，因為史摩寧點都唔應該俾古一招擺正隻右腳射波，一個頂級後衛必定會埋身阻止佢出最勁嘅招數，早前對阿仙奴俾剎卡遠射得手就係犯同樣錯誤。如果戰術真係希望做成單對單局面，咁首先我地要有個人質素夠高嘅球員。

比賽發展到四球差距時大局已定，雙方亦為未來比實作出相應調動。球證鳴笛，曼聯今屆歐洲之旅到此為止，球員終於認清實力差距，至於佢地點利用呢兩回合去激發爭四決心就睇下蘇斯克查點推動球隊喇。

[WKD手記] - 4.5人防線

蘇斯克查上任接近一個月，球隊表現下滑，令呢場大戰由抽籤時曼眾期待去到賽前有啲強弱懸殊嘅味道，主場輸一球未必人人滿意，但至少無扼殺哂出線機會。同前三場比較曼聯雖然照樣失波但防守上起碼夠緊密少甩漏，呢個4.5人防守戰術夾得幾有默契。曼聯不乏埋門同反擊機會，但喺唔同環節都發揮得唔夠到位，再次响一線之差分出勝負。近五仗輸嘅四場入面，呢九十分鐘已經算最踢得出部署，次回合如果把握力好少少都仲有價講。

鑒於曼聯無一個好穩陣又夾得熟嘅三中堅組合，442同532互換陣型下經常會用4後衛其中一隻閘嚟踢中堅，而達洛特就會化身防線第4.5人。佢對巴黎同狼隊試過踢半個右閘，今場又轉踢半個左閘，兩次都有效鞏固防線，感覺同泊大巴有明顯分別。防線轉換人數時過程暢順，其中一個俾到新鮮感嘅畫面係當攻方嘗試傳入禁區時，中堅會迅速標出嚟令入攝者無法接應，壓制對方短傳機會。五後衛本身可以堵塞中路組織，同時應付到快速轉邊嘅踢法，即使中路標波都總有隊友補位，相比同樣踢3中場嘅433，咁踢某程度彌補到中場中攔截效率低嘅問題。執行呢個戰術嘅難度在於防線要迅速橫移同補位，令中路唔會忽然暴露出太大破綻，而楊格同達洛特都有足夠意識去填補空隙。整場賽事巴塞都無太多打入禁區嘅攻勢，我會視之為戰術成功，唯獨球失波係因為後衛無跟哂而輸咗一個三守五嘅戰局。

曼聯全場十腳射門但無一球中龍，證明最近球員腳風唔順之餘，鋒線喺歐洲賽嚟講真係未到Carry級數。對住迪史達根，罰球、推順遠射呢啲機會可以話唔係咁易射入，但中龍真係基本要求。下半場五十一分鐘，拉舒福特喺無人看管下，嘗試十二碼點附近窩利抽埋去，但因為時機唔啱同落點判斷錯誤而只能用護脛射出底線，拉弓過後佢自己都好唔滿意，但黃金機會可一不可再，往後嘅時間佢只有多一腳罰球射門，結果同樣高出。盧卡古最近唔再喺純中鋒，做多咗拉邊工作甚至留响福仔身後做傳送，但相對就少咗進入埋門距離，今場亦未曾起腳。如果次回合佢兩個可以平衡、混合到進攻瓣數，相信可以考驗到碧基同朗格勒呢對中堅。

呢隊巴塞比想像中低侵略性，只有一小段時間迫搶曼聯，主要原因係佢地週末先惡鬥完馬體會，而且有一個作客入球優惠真係無乜必要同你博。啱啱呢個星期嘅西甲比賽佢地就收起大部份主力，返到魯營球場佢地肯定唔會俾普巴同費特咁易上腳，到時麥湯美尼仲可唔可以交到今場嘅表現？定係會重新起用狀態不足但經驗老到嘅馬迪？

[WKD手記] - 應該要更易袋的3分

近年國際賽後曼聯永遠都踢唔出最佳水準，唔同嘅係今次陣中其實無幾多個球員踢足國家隊比賽，有人傷癒有人狀態不足，咁樣代唔代表曼聯就可以踢得差呢？我睇咗大約十分鐘先驚覺原來場波喺奧脫福踢，因為佢地交唔出應有嘅信心同統治力。蘇斯克查坐正第一場波就袋走三分梗係好事，表現麻麻時能夠忟水贏波更加係成為強隊嘅條件之一，但都唔可以忽視穩定性嘅問題。

防線今仗表現合格，梳爾就算唔計果球助攻都會係我嘅MOTM，皆因佢出腳果斷而唔魯莽、攻防企位正確，連單對單都應付有餘，反映出佢信心同集中力都處於高水平。史摩寧雖然繼續手多多惹嚟不必要嘅犯規，但又真係頭頂腳踢無嚴重失位，甸尼即使已經好落力走位搶點但都轉化唔到啲半機會做入波；代替連迪洛夫嘅鐘斯亦都穩健，防守快攻時多次幫隊友補位兼提場，呢對中堅用嚟守啲典型英式前鋒的確湊效。美中不足喺應付邊線時中堅之間嘅空隙唔細，幾容易俾敵人拉走，似乎默契同溝通都仲有改善空間；用波方面已經慢慢變得自然，等冰人返嚟之後應該可以再順暢同進取啲。

兩個前鋒都有波入，拉舒福特更加係呢個踢法最大嘅得益者，因為佢可以用速度同走位觸角嚟擔任中鋒角色，無再被迫要成為第二個盧卡古。最近喺心態同射門決定上有啲似後生嘅C朗拿度，唔怕擔大旗亦無懼犯錯對佢成長有利無害，剩低嘅問題反而係佢可唔可以同魔獸有更多機會踢雙前鋒。馬斯亞喺左路帶波仍然好有威脅，不過曼聯未必場場都有俾到足夠配套佢去突破，相反佢响反擊時嘅走位同意識仲未夠好夠自然，佢要更上一層樓就要夠多元化同增強戰術理解，如果恐怕會變馬一招。

勢估唔到中場先係踢得最差果條線，與其講成戰術失效，不如話佢地嘅球感、狀態同體能根本執行唔到咩戰術。出得馬達其實都會預咗曼聯爭波踢，因為有控球先用得盡佢嘅視野、短傳配合同組織力，上半場紅魔掌控節奏果段佢喺中路真係打咗幾球靚組織出嚟，以曼聯嘅班底應該要有更多時間主導球賽。另一招當然就係防守反擊喇，第一球已經完美示範咗球員對呢個戰術幾咁熟練，但防守方面我認為中場活力太低而增加後衛嘅壓力。引屈福特派更多人去前場固然係戰術需要，但唔代表對方就理所當然有更多埋門機會。︰反擊唔一定源自對手完成攻勢而回唔切防，更有效係响危險區域以外成功堵塞、搶截然後快攻。今仗中場冚出去殺波嘅速度太慢，而且轉身、帶波多次俾人從盲眼位偷到，於是就踢得更加被動。馬迪無犯下直接導致失波嘅失誤但成為whoscored全場得分最低(5.5)嘅球員，可想而知佢今日發揮得幾差，如果蘇斯克查認為麥湯美尼未做得常規正選，咁夏天就真係要諗諗呢個位置有無買人嘅需要。

[WKD手記] - 狼來了

狼隊嚟到三月份仲處於第七位絕非僥倖，只要睇過佢地點樣令列強吃盡苦頭就知領隊紐奴有料，戰術並非一味死守、中前場嘅組織更加有板有眼，單單以呢場波計直頭係示範返俾曼聯睇點樣用波。曼聯當然要為自己踢得唔好而負責，但令我驚訝嘅係對手由部署到執行都擊中哂我地嘅弱點，感覺就好似做啱哂預備功夫嘅一方贏咗，邊到你唔服？

狼隊第一個任務就係針對返曼聯由後過渡去前場嘅效率問題，盡量令中路難以傳波。好似對完李斯特城之後，曼聯嘅對手就無再用消耗體力、多身體碰撞嘅方式去迫搶反防球員，施壓區域由中堅轉移咗去中場，甚至乎喺我眼中佢地只係想迫你傳得差，而唔係直接偷/標走粒波。姒呢場為例，曼聯要有控球權唔難，但馬迪同靴里拉過咗半場就一定俾人攞住個背脊轉唔到身，迫佢地向後傳，以致整條防線都唔能夠推上去。普巴並無受到特別款待，但佢留守前場一直等唔到波、返嚟後場又做唔到進攻點，九十分鐘就咁流走。

另一個拖慢曼聯行軍速度咁慢嘅戰術就係狼隊封死咗兩閘參與進攻嘅機會。兩閘今場幾乎無响前場區域突破過咁滯，同馬福二人就自然產生唔到化學作用喇。以往每當左路塞滿人嘅時候，普巴總能夠輕易地轉邊等右閘長推直進，但今場狼隊長期用左右中場（基本上係閘）跟實梳爾達洛特，務求兩人只能喺三閘線接應短傳，而唔係普巴一個大斜線放落底。當然我地無做足夠入擾亂敵方，但對面防守紀律之高令我諗起鬥贏PSG果條曼聯防線。就呢兩點狼隊已經從戰術上克制住我地最剎食嘅招數，淨低嘅就睇曼聯球員可唔可以憑個人質素破敵陣。

今仗三個前場默契同狀態都欠奉，又唔算得上好差，但難免令人掛住盧卡古在陣時俾到嘅多元性。馬斯亞似乎要踢純左翼位先至發揮自如，同預期中嘅雙前鋒有所出入，而連加特就變成三不像：中鋒唔夠牽制力令佢踢唔到影子前鋒；踢前一格又擔當唔到一個射手，最後只好周圍現位幫波，浪費咗呢個位置嘅攻擊力。其餘球員唔算失哂魂，只係踢到60分鐘後開始跟唔上對方節奏，尤其馬迪同靴里拉體力下降得頗為明顯，防守球員亦懶於起動，好多波比平時慢半拍先起步。

如果蘇斯克查有需要擔心嘅地方，應該係我地套踢法雖有可取之處，但已經比其他球隊洞悉並嘗試針對性地破解，正如守和利物浦後其他球隊都會參考同分析點鬥利記，往後我地都會一場比一場難踢，戰術、用人都要不停微調同改善先會達標。

歐聯八強抽中巴塞無論娛樂性同競技水平都會相當高，因為英超對壘平時都睇得夠多，怕輸嘅話對阿積士波圖一樣可以輸，而且曼聯要遇強先會愈強，所以趁主力相繼復出，兩回合淘汰對手唔係無可能嘅事。可惜朝早仲同朋友討論緊應唔應該用防守反擊嚟打專破密集嘅巴塞，夜晚曼聯就喺足總盃被狼隊頗有說服力地踢出局。如果蘇斯克查唔著手改善球隊主攻時嘅效率同控球質素，我真係睇唔到短期內曼聯面對強隊有信心同經驗去鬥搶甚至反客為主。

[WKD手記] - 運氣

任你上一場踢得幾咁出色，呢九十鐘嘅發揮完全唔會因而變得容易咗。曼聯整體表現有唔少進步空間，全失三分或者有啲唔好彩，但反過嚟睇如果埋門做好少少，我地就係帶住嚟踢果隊，級數、質素嘅分野往往就喺呢啲比賽度反映出嚟。同摩連奴時期比較，呢隊曼聯喺球賽唔同階段執行嘅戰術有明確分別，一場波可以睇到哂佢地反擊、主攻、調高/低防線等嘅部署同實際表現。你又覺得今場邊瓣做得差呢？

講波之前，首先要評下球旁証團隊。不論有利阿仙奴定曼聯，今場好多判決都令球員摸不著頭腦，由角球、越位到犯規都睇到執法水平麻麻，唔少吹錯又或者第一時間做唔到決定，感覺唔太清楚見到事件點樣發生，可能同企位有關。至於球十二碼其實費特已經收咗腳、拿卡錫迪亦唔係故意插水，但從球證角度睇的確似有好大接觸，只能夠講佢認真唔好彩。

回顧比賽，達洛特故然係右中場，但另一邊嘅普巴走位就自由得多。為咗向阿仙奴後衛施壓，防守不時見到普巴有如左翼一般衝上嚟，剩低嘅三人中場就要向左橫移，而或者梳爾要即時推前一格。呢個踢法令到阿仙奴右中場尼爾斯進攻上無左路咁活躍，但同時普巴踢左中場好似有啲錯配，佢傳波同推進嘅威脅要靠近中路先發揮到出嚟，又無多一隻左翼幫佢創造空間，落底傳中更加要靠哂梳爾，對於呢個442我就有所保留喇。

撇開兩球中柱中楣，曼聯啲攻勢都夠哂入肉，喺Final third嘅組織同傳送亦達到戰術預期，前場部署上我認為無乜好挑剔，問題再次出現喺由後場過渡去前場嘅階段度。縱使費特對巴黎展現出鬥志同搶截能力，但登陸英超後用波、護波差係不爭嘅事實，呢點對修咸頓果陣已經表露無遺，加上佢經常離開崗位，中路經常穿窿要普巴同馬迪補位。呢個中場中位置需要極強嘅閱讀球賽能力，因為要隨時就住普巴同馬迪去現位補位，真真正正嘅逗住型中場，目前只見過靴里拉做得稱職，其餘配搭都會出現攻守失衡、愈踢愈急嘅問題。既然普巴能夠執行好防中職責，而費特由身型到進攻意慾都同佩利亞相似，俾佢試下踢攻中會唔會係更佳嘅選擇？

最後講下沙加球遠射，直播時第一印象係迪基亞犯咗個超低級失誤，因為我認為佢太早向左移。翻睇咗不下廿次，其實佢踏步時機尚算準確，只係太遲察覺到個波轉向反應唔切，又未去到發緊夢嘅，但集中力低絕對係主要原因。另外就係無理由沙加得一招遠射（仲要射死過曼聯）都唔早早埋去拍佢，中場球員都要負上一定責任。

雖然好似講極都係曼聯點樣踢得唔夠好，但如果拎以上幾點同前幾任領隊帶嘅曼聯比較，呢啲問題相對地易解決，只不過喺唔夠好運嘅時侯，細節位就有決定性嘅影響力。This is sport.

[WKD手記] - 十年一遇的球迷奇遇記

上次令我心情咁激動嘅係08年歐聯決賽，曼聯十二碼擊敗車路士捧盃果場波，仲記得當晚贏波嗌到失聲，連學校計分嘅Presentation都要搵同學調日子。十年嚟我仍然會為唔少大賽嘅緊湊度、觀賞性同技術水平而興奮，但大多停留喺“睇好波大飽眼福”嘅層面。呢場波去到末段我就喪失理智地諗“贏埋佢喇，贏咗場波個故仔就屬於你地”，無再分析個進攻做得好定差，淨係想佢地快啲又再拎到波，然後唔知點樣入埋。呢個就係做球迷最純粹嘅狀態。

踢走巴黎唔代表曼聯喺歐洲重振聲威，因為我地好清楚奪冠仲有漫漫長路（而家真係唔敢話無機會），但呢場勝利嘅意義在於紅魔鬼復興係極需要一個咁嘅故仔。從任何角度（人腳、對賽表現、經驗、客場）去考慮，越專業嘅人就越難講得出曼聯可以出線，贏都難！甚至乎球迷都會視蘇斯克查積極樂觀嘅言論係為咗鼓勵球員，反正聯賽爭四更緊要。

No！佢同啲球員就證明咗無100%嘅波，係咪Underdog只係外界嘅睇法，唔影響佢地操練嘅目的同成果。今日親歷其境嘅所有紅魔鬼以後面對逆境都一定會更加硬淨，而我地作為球迷就更加要咁諗先得。

蘇斯克查接手後，曼聯場內場外表現出團體精神不在話下，如果有留意最近兩個月嘅訪問，曼聯職球員面對鏡頭時都好一致咁強調成績源自訓練。於是就會出現一種現象，就係興奮嘅心情回復得好快，受訪時顯得相對平淡同冷靜，而且講得出入波贏波並非奇蹟，反而係練習同部署得宣令佢地理所當然地更接近勝利。

訓練固然有效，但更重要係自我預言得以實現(Self-fulfilling prophecy)。由佩利亞入遠射、盧卡古今場執雞到領隊嘅發言都不斷確定返佢地練習同賽前分析係啱同有效嘅。如果最後都係出局，相信佢地仍然累積到唔少經驗，但就無辦法同球迷講點樣正確備戰去贏波。呢九十八分鐘嘅體驗會使佢地更加相信球隊訓練方針，對陣中一班我經常評為歐戰唔夠經驗嘅球員有莫大益處，單單睇麥湯美尼同達洛特呢兩個月嘅進步已經提供到無限動力俾後輩奮鬥。

第一回合以為大把有利條件，點知今場先係坐擁地利人和。雨戰幫我地第一二點搶到唔少優勢，間接製造入球之餘，麥巴比單刀亦推得唔順;迪斯拿傷出令迪馬利亞頓時無哂空間去創造威脅，表現奇差嘅拜利受傷提早被換出;最後一腳十二碼先不論是否蓄意手球，事件其實僅僅發生喺禁區線內。比賽已過，成隊士氣一時無兩，只要教練團保持到隊內沉實嘅態度，下季分分鐘連歐聯外圍賽都唔洗踢！

[WKD手記] - 爭四沒有藉口

傷兵數目突然飄升至十人嘅曼聯仍然要應付一週兩賽嘅賽事，但細心一睇條後防其實齊齊整整，對住水晶宮同修咸頓梗係要拎足六分先收貨喇，No excuse！結果五場不失球嘅紀錄就到此為止，兩場失三球唔單只後場球員有責任，同時都反映出中場質素對於防守係幾咁重要。中前場雖然傷兵滿營，但造就咗後備球員同新仔有上陣機會，協助球隊保持到進攻銳利度，當中佩利亞同盧卡古更加大放異彩，相信蘇斯克查遲啲又會有揀正選嘅煩惱喇。

一講到水晶宮，自不然會諗起曾經為曼聯上陣過四次嘅沙夏，佢回歸水晶宮後一直變強，成為球隊靈魂人物咁滯，配合埋雲安賀治同舒洛比嘅後上能力，連曼聯都要忌佢地幾分。楊格單對單防守無乜輸蝕、達洛特不時返嚟夾擊，後段更加換入身型速度都唔失禮嘅拜利踢右閘，令沙夏表現唔出水準，呢個戰術部署算係相當成功。相反左邊嘅費特同山齊士喺防守上補位都比較慢，梳爾要企得好高去單防唐辛，後者幾多機會突破切入同出波，製造出唔少驚險鏡頭。

論中路攻防實力水晶宮同曼聯始終有一段距離，埋門質素就成為咗勝負嘅關鍵。盧卡古冷靜處理兩個入波令人眼前一亮，楊格亦用窄位入波嚟將功補過、鎖定勝局。但防守上就因為中場企位唔夠緊密，搶截力又稍弱，導致鵝眉月附近經常有混戰，失果球波就係楊格搵唔到人俾、孤寒唔大腳解圍而落返响水晶宮腳下。費特同山齊士一樣，喺用波嘅思路上同其他隊友有出入，明顯需要更多時間先可以融入現有戰術體系，在此之前應該仲會見到唔少漏洞比人有機可乘。

返到奧脫福就以為修咸頓易食？差啲就痛失兩分！開賽初段有好幾個機會把握唔到，然後比賽節奏就慢返落嚟，對面仲放咗幾球有威脅嘅直線，如果球證手緊少少，上半場可能就先輸兩球十二碼。上半場修咸頓唔係踢得特別出色，但曼聯喺後防無太大迫搶壓力下仍然好難組織上前場，原因係普巴同佩利亞一左一右都壓得好前。如果踢單防中果個係馬迪，或者都可以靠自己帶上去，但對麥湯美尼嚟講就有相當難度，結果普巴又要回防創造空間，解放失敗。

下半場蘇斯克查索性將普巴調埋去踢防中，等佩利亞移入攻中位，結果兩者以至球隊發揮都有改善。我就覺得呢個舉動幾大膽喇，畢竟普巴已經展示出進攻級數喺陣中無出其右，而佩利亞只係一名近排有進步嘅小將，保守啲嘅話可能會收起後者而換入費特、推普巴上一格。領隊嘅信任最終又得到回報，包括埋達洛特嘅入替，佢嘅戰術調動直接為球隊帶嚟勝利，賽後更加再次重申佩利亞更適合踢8號同10號位，嚟緊會有更多機會，對呢位青訓嘅事業發展真係百利而無一害。

如果要講值得改善嘅地方，就係中場線偏後、硬度不足兼補位較慢。今場列蒙同貝查蘭特瘋狂攻擊左路，當楊格同史摩寧喺危險區域都要出手阻撓對手入攝、近禁區嘅罰球亦比前幾場要多嘅時候，要問嘅問題反而係中場係咪要再早一步施壓，減少後衛單對單、輸直線嘅機會？

[WKD手記] - Solskjaer早已預備

上一篇文章講到蘇斯克查用人方式有利提升後備球員嘅比賽狀態同心態、臨危受命時較易發揮出水準，估唔到今場就（被迫）睇到效果。一場大家都意想不到嘅雙紅會，反而證明咗領隊管理球隊同鋪排有原因同成果。蘇斯克查月頭講過佢已經知道下個月嘅約莫陣容，加上其輪換風格，代表住整個教練團都有去拉近同控制正副選球員嘅比賽狀態。個個領隊都會咁講，但又有幾多個實踐到費格遜果種程度？同利物浦打和唔係咩驕傲嘅事，但紅魔鬼文化同氛圍好似由職球員至球迷都復興緊。

從數據上去睇呢場波係唔多吸引，真正有威脅嘅鏡頭亦唔多，但鐘意睇防守嘅我就幾滿意喇。兩邊攻力十足，互無紀錄反證兩隊防守戰術成功先會令到雙方埋門機會咁少，唔只沙拿俾梳爾完封，費明奴加埋史社列治幾乎失蹤足九十分鐘，諗下有幾耐無聽過「曼聯條防線踢得好好呀，龍門連波都唔洗點撲」就理解到成個防守系統真係有進步到。我地今仗攻力受限，拉舒福特足踝受傷而又無哂換人名額，唯有連防守時都用盧卡古踢右邊，等前者淨係需要做進攻跑動，雖然製造唔到入球但都收貨，囉獨睇唔到佢兩個正面挑戰雲迪克有少少遺憾。全埸最近磅嘅攻勢嚟至連加特嘅半單刀同史摩寧完場前嘅門前機會，其實我地比利物浦更接近呢三分。

返番去十二月中，我認為新帥上任後費蘭尼仍然會係重要棋子之一，當時馬迪嘅表現同體能都麻麻地，佢就係後備同過渡（到麥湯美尼）期嘅最任人選。佢轉會去山東魯能意味住麥湯美尼將會成為第一把交椅，喺呢場比賽前佢有成個半月無試過踢足九十分鐘，但對富咸就後備換入嚟拎球感。就係呢十幾分鐘令麥湯美尼今日表現唔錯，亦都知道自己將來可以接班甚至而家就一爭長短，而唔係「後備，無人用就用你喇」。

同樣情況發生喺佩利亞身上，好多球迷盛讚佢夠魔性夠熱血，邊個記得一個月前佢派膠令曼聯先失一球之後仲俾人換走埋？對車路士後備入嚟對賽果同球迷未必重要，但呢十幾分鐘嘅曼聯攻中體驗對佢可能係一種認同，而今場入替後嘅眼神就知道佢完全唔怯自己會表現得差，亦準備好幫球隊贏波。

如果覺得以上太誇張嘅話，有個朋友提及到場上一個細節：「你有無見到山齊士無信心到上陣之前要祈禱？」，唔敢斷定佢係咪祈緊禱，但我相信佩利亞連呢個整理思緒嘅需要都無。當一個球員有自信又被信任，配合埋腎上腺素，應該未落場就已經表現出極專注同對勝利慾望。咁樣講唔代表山齊士已經無得救，只係反映出場上表現非常一般同佢而家嘅心理狀態有幾大關係。

中場三人組淨低嘅普巴就表達咗呢份爭勝心，最近呢兩場波見到佢心態上成長好多，防守只要應該出現佢就會第一時間出現，以前啲踱步變哂做鏟波。六十九分鐘佢同山齊士有啲誤會，比著以往佢好可能會預期梳爾去跟返，失波嘅話就一副疑惑嘅表情兼自言自語；呢次佢回身死追住占士米拿，完成整個防守後只係向山齊士做咗一個表示不滿嘅動作就即刻行入禁區，準備防守角球。呢種態度摩連奴同球迷等咗好耐，但真正激發到佢改變嘅係蘇斯克查（同埋對PSG嘅敗仗），如果每一場都進入到呢個打吡Mode，佢就真係突破到下一個層次。