[讀者投稿] - 歷經波浪而不沉沒 - 亨利

“Fluctuat Nec Mergitur”

這是巴黎的城市格言。意思是「歷經波浪而不沉沒」( “Tossed by the waves but does not sink.”)

巴黎人形容這是巴黎城市的resilient motto.

這陣子跟一個67歲的婦人談天。剛好也提到 resilience這個字 - 她的新書書名。

Resilience, 中文譯作「復原力」最貼切。早年在書店也找到蔡東豪先生的一本，我原地站著看了兩三小時。

踢逆境波, 不是人人懂踢，結局有喜有悲。最好用我愛隊曼聯作例。十二月，曼聯手無縛雞之力對利物浦踢出球隊史上精神面貌最差的一場比賽，連輸到腳軟的絕谷下怨氣領隊被炒，陽光新領隊用同一陣容竟然連勝9場。上月作客巴黎缺乏整隊正選下大奇蹟日補時反勝，相信賽前九成球迷就算資深如我都想也沒想過。看到名宿領隊齊齊握拳慶祝，那種精神面貌完全在比賽中展現到最後一秒。就這短短三個月的表現，絕對是二十年來我看過球隊最強的一次反撲。

何以如此？從新領隊對傳媒講話可以知道， 他是先處理球員心情 (讚揚正選安撫後備)，後處理球隊事情(調整戰術應付對手)。

然而正當大家認為曼聯如魚得水時，球隊卻在過去7場裡輸掉5場。數小時前才被巴塞橫掃出局，又掉進低谷。球迷再次怒罵球員領隊不是。作為一個球迷，盡抒己見，天經地義，有何不可。不過品字三個口，粉絲選擇默默支持，還是潑婦指罵？旁觀者清，自己卻不知道 three fingers pointing you back when you point a finger at someone。

而且真正喜歡足球的人，甚至會超出球場勝負之外。

假如死敵遇上低潮，有人選擇踩多兩腳，希望他們早日降班。但我卻真心希望他們能谷底反彈，寧願齊齊踢一場難忘的經典比賽，就如二十年後曼聯拜仁一眾球星再次聚首紀念99年歐聯決賽。畢竟，現在能夠勾起將來回憶的東西現在也不是很多了。

經典是永恆，變幻也是永恆。People come and go, emotions ups and downs. 信仰，家庭，事業，人際關係，周遭環境，人人苦心經營，年年總有勝負。香港人，有更多東西是生命中不可取替的。我們有這麼多仗要打，把時間花在值得的事情上吧。不枉此生的。

Bad news: Nothing lasts forever!

Good news: Nothing lasts forever!

P.S. 隨想關於復原力的心水分享

Book: Peaks and Valleys - Spencer Johnson

Documentary Series: Losers - Netflix

Movie: Facing the Giants 永不放棄

Talk: 余德淳博士面對太太離逝非常紮實嘅親身經歷。

Music: 大叔情歌 [電影《逆流大叔》插曲] -RubberBand

人生只能跟水流轉彎

人生總是急彎誰可揀

人生不停闖關才好玩

鬥志不散

[讀者投稿] - 500中的29 - 伊巴謙莫域

日前, 前曼聯射手伊巴謙莫域在美職聯代表洛杉磯銀河作客多倫多FC並攻入一球, 可惜球隊最後仍然以5:3不敵主隊. 雖然球隊落敗, 但伊巴謙莫域的入球為自己個人的球員生涯建立了重要的里程碑, 因為這一個入球是他職業生涯的第500個入球, 當中球會賽事的入球佔了438個, 而他為瑞典國家隊亦攻入了62球. 在現役的足球員中, 職業生涯能夠攻入超過500個入球就只有美斯及C朗. 若然要將退役球員也計算在內 當然大家也比不上巴西球皇兼名宿比利, 他在整個職業生涯中曾經攻入1281個入球的驚人紀錄, 相信此紀錄將會是”前無古人, 後無來者”.

在國家隊, 伊巴謙莫域為瑞典國家隊攻入62個入球, 也是瑞典國家隊的入球紀錄保持者. 在球會的賽事當中, 伊巴謙莫域都可以話算是球壇浪人, 因為在他的職業生涯中一共效力了9間職業球會, 當中當然包括自己的愛隊曼聯, 而更早之前他還有效力7間歐洲球會, 包括馬模、阿積士、祖雲達斯、國際米蘭、巴塞隆拿、AC米蘭及巴黎聖日耳門. 當然身為曼聯球迷也想集中討論伊巴謙莫域在曼聯的表現.

2016年7月1日, 曼聯官方正式宣佈免費簽入瑞典前鋒伊巴謙莫域, 並與曼聯簽約一年, 與同年成為曼聯領隊的摩連奴再續前緣. 伊巴謙莫域更成為歷來第四位效力曼聯的瑞典球員. 伊巴謙莫域適應每一個新聯賽也有著比普通球員更強的能力, 他此前無論在瑞典甲、荷甲、歐聯、意甲及法甲的所有處子戰均取得入球, 加盟曼聯在英超後也不例外! 2016年8月7日, 曼聯在社區盾迎戰當年奇蹟地勇奪英超冠軍的李斯特城, 是曼聯當季首場正式賽事, 也是伊巴謙莫域在曼聯的處子戰, 當賽事進行到83分鐘兩隊仍然以1:1打和, 此時華蘭西亞在右路傳中, 伊巴謙莫域一招「泰山壓頂」成功壓過李斯特城中堅韋斯摩根頂入, 成為歷史上第107位為曼聯在處子戰上陣便入球的球員, 為曼聯最後以2:1取勝, 成功捧走加盟曼聯後的第一個錦標. 2016年8月14日, 完成社區盾後的一個星期, 英超正式揭幕, 曼聯在第一場英超賽事作客面對般尼茅夫, 伊巴謙莫域正選上陣, 並在64分鐘在30碼外以一記割草式射門取得入球, 令他達到在瑞典甲、荷甲、歐聯、意甲、法甲及英超的所有處子戰均取得入球的里程碑. 此外, 他亦成為歷史上第16位為曼聯英超處子戰上陣便入球的球員. 此後伊巴謙莫域在開季的時候還是一帆風順, 單單在8-9月期間已經為曼聯取得6個入球. 可惜當伊巴謙莫域在歐霸盃主場對烏克蘭球隊索爾亞一箭定江山後, 隨後7場為曼聯上陣的賽事中他均沒有取得入球, 在整個10月都未能取得入球, 陷入個人職業生涯最大的低潮.

2016年11月6日, 曼聯作客面對史雲斯, 伊巴謙莫域不單打破入球荒, 而且還梅開二度, 兩個入球均具有特別意義, 他在賽事中的第一個入球是英超歷史上第25000個入球, 而第二球更加是他球會生涯第400個入球, 最後協助曼聯以3:1勝出, 終止曼聯在10月聯賽不勝的頹態. 可惜這一場勝仗並未能完全帶領曼聯走出低谷, 雖然伊巴謙莫域不斷為曼聯繼續入波, 但曼聯其後再連和三場聯賽, 14場聯賽只得18分. 雖然曼聯在聯賽成績不佳, 但在盃賽卻表現出色, 歐霸盃第五輪分組賽曼聯主場以4:0大炒飛燕諾後已奪回出線主導權, 在最後一輪分組中曼聯以2:0擊敗索爾亞, 伊巴謙莫域當中亦取得一個入球, 帶領曼聯次名出線. 還有一場聯賽盃八強主場對韋斯咸, 伊巴謙莫域梅開二度, 帶領曼聯晉級四強.

踏入12月, 伊巴謙莫域在曼聯大發神威, 除了以上提及在歐霸盃最後一輪分組賽取得入球外, 在六場英超賽事中亦取得5個英超入球. 12月4日, 伊巴謙莫域在作客愛華頓的英超賽事中, 成功趁愛華頓門將史迪基倫堡出迎之際逗高皮球射門, 皮球中楣及中柱後慢溜入網, 即使有守衛趕及護空門但皮球已過白界, 這球是我認為伊巴謙莫域在曼聯期間最漂亮的入球, 可惜該場賽事最後被愛華頓逼和. 不過經歷完這場和波後, 曼聯開始走出低谷, 聯賽取得6連勝, 伊巴謙莫域一共取得5個英超入球, 當中除了對愛華頓的漂亮入球外, 還有絕殺水晶宮的入球、對西布朗梅開二度、以及對新特蘭的入球, 伊巴謙莫域更奪得12月份英超最佳球員.

踏入2017年1月, 曼聯成績又開始起伏不定, 聯賽三場只得一勝二和的平穩戰績, 不過盃賽成績卻有不同, 足總盃第三圈及第四圈均以4:0大炒對手晉級, 聯賽盃更加成功殺入決賽, 雖然過程中伊巴謙莫域並沒有取得入球, 但他卻扮演一個非常重要的角色. 2月份, 伊巴謙莫域重拾狀態, 2月5日作客李斯特城的英超賽事中他接應華蘭西亞右路地波傳中射穿卡斯柏舒米高的十指關, 助曼聯以3:0取勝. 2月16日, 曼聯在歐霸盃三十二強主場面對法甲球隊聖伊天, 這對伊巴謙莫域來說絕對是一大優勢, 因為伊巴謙莫域效力巴黎聖日耳門期間與聖伊天已經多次交手, 果然不負曼迷眾望, 伊巴謙莫域成功面對老對手大演帽子戲法, 也是伊巴謙莫域在曼聯的唯一一次連中三元. 2月19日, 曼聯在足總盃第五圈作客布力般流浪, 伊巴謙莫域和普巴也是在後備名單, 球隊是先落後的一隊, 但很快就靠華舒福扳平1:1, 不過球隊戰情仍然膠著, 摩連奴換入普巴及伊巴謙莫域加強攻力, 75分鐘普巴一次長傳, 伊巴謙莫域突破越位射遠柱入網, 而這一球亦令伊巴謙莫域成功在一個球季內在五項不同賽事(社區盾,英超,歐霸盃,聯賽盃及足總盃)均取得入球的球員, 是後費格遜時期第二位達到這項紀錄的球員(第一位為2015/16球季的馬斯亞), 最終曼聯險勝2:1, 能夠晉身足總盃第六圈. 二月份曼聯真正的戲肉是2月26日的聯賽盃決賽迎戰修咸頓, 是伊巴謙莫域加盟曼聯後首場盃賽決賽, 19分鐘伊巴謙莫域先射入靚罰球領先1:0, 打破修咸頓在該季聯賽盃的0失球紀錄, 而曼聯在38分鐘有連加特為曼聯再下一城領先2:0, 滿以為曼聯能夠輕輕鬆鬆渡過這場賽事, 豈知對方皇牌前鋒加比亞甸尼在臨完半場前及下半場48分鐘各入一球, 為修咸頓迅速追平2:2, 修咸頓氣勢如虹, 更一度令曼聯陷入苦戰, 伊巴謙莫域一度需要回後做防守, 防止曼聯被修咸頓反超前. 87分鐘, 伊巴謙莫域在後場策動攻勢, 經過幾腳傳送後, 輾轉之間落到靴里拉腳下, 靴里拉右路再傳中洽到好處, 伊巴謙莫域接應頭槌破網, 為曼聯劣勢下再度領先3:2, 最終曼聯亦以3:2擊敗修咸頓, 伊巴謙莫域奪得加盟曼聯後第一個盃賽冠軍, 而他亦順理成章地當選為決賽最佳球員. 而整場賽事中曼聯亦只有伊巴謙莫域表現稱得上對板, 難怪有球迷會覺得這個聯賽盃是由伊巴謙莫域一個奪取的冠軍. 總結整個二月份, 伊巴謙莫域在各項賽事中攻入7球, 是他加盟曼聯後為曼聯入球最多的月份.

踏入三月份, 伊巴謙莫域狀態有所回落. 3月4日, 曼聯在英超主場迎戰般尼茅夫, 下半場曼聯獲得十二碼機會, 可惜伊巴謙莫域射失, 令曼聯最終被般尼茅夫逼和1:1, 喪失全取三分的大好機會. 此外伊巴謙莫域更因一次與對方球員明斯碰撞, 而且向對方報復而被英足總抽後算帳罰停賽三場本土賽事. 這三場賽事曼聯取得一勝一和一負的戰績, 當中包括足總盃作客被車路士以1:0淘汰出局, 而且伊巴謙莫域在整個三月中都沒有取得任何入球. 雖然如此, 不過伊巴謙莫域在歐霸盃十六強兩回合都交出助攻, 協助曼聯總比數以2:1擊敗羅斯托夫, 晉身八強.

四月份, 伊巴謙莫域停賽期滿復出, 復出的首場賽事就是4月4日主場對愛華頓的英超賽事, 球隊不幸地上半場22分鐘被對方中堅球員積基卡先開紀錄而落後. 及後曼聯換入普巴加強攻力, 可惜曼聯的射門亦沒有辦法製造入球, 71分鐘伊巴謙莫域本應頭槌攻入為曼聯追平1:1, 可惜被旁證誤判越位, 令曼聯繼續落後0:1. 當以為曼聯即將落敗之際, 直到補時3分鐘, 後備入替的梳爾射門被對方另一名中堅艾殊利威廉斯在禁區內用手擋出, 曼聯搏到十二碼之餘, 艾殊利威廉斯被球證直紅趕出場, 十二碼由伊巴謙莫域順利抽射入網, 為曼聯驚險地扳平1:1取回一分. 4月9日, 曼聯作客包尾的新特蘭, 上半場30分鐘伊巴謙莫域接應靴里拉的傳送, 擺脫兩名守衛射遠柱入網, 下半場46分鐘曼聯已經靠米希達恩入球領先2:0. 尾段伊巴謙莫域再交出助攻給華舒福射入, 曼聯最終大勝3:0. 4月13日, 曼聯在歐霸盃八強首回合作客安德列治, 雖然曼聯靠米希達恩取得作客入球兼領先, 可惜仍被主隊在尾段追和1:1. 4月16日曼聯主場迎戰榜首車路士, 摩連奴罕有地將伊巴謙莫域先列後備, 代替伊巴謙莫域的是華舒福, 後者卻不負所望在上半場7分鐘已經先開紀錄, 下半場49分鐘曼聯再靠靴里拉擴大比數至2:0, 伊巴謙莫域在81分鐘才入替, 最後曼聯維持嬴2:0, 算是曼聯全季的代表作. 4月20日, 曼聯歐霸盃八強次回合主場迎戰安德列治, 卻是伊巴謙莫域惡夢的開始. 上半場10分鐘曼聯再一次靠米希達恩建功領先, 可惜曼聯未能維持領先優勢, 先有中堅洛荷受傷需由白連特入替, 而安德列治亦很快追平1:1, 曼聯及後加強攻力, 可惜90分鐘內曼聯亦無法取得入球, 更不幸的是伊巴謙莫域在尾段重傷需要提早收咧, 最終只能以1:1到90分鐘, 總比數以2:2打和, 由於作客入球數字兩隊均相同, 所以兩隊需要加時作賽. 伊巴謙莫域需由馬斯亞入替, 而曼聯終於在加時107分鐘由華舒福射入奠勝球, 最終曼聯以2:1(總比數3:2)險勝晉級四強. 可是伊巴謙莫域已經無法再參與餘下的賽事.

而伊巴謙莫域其後缺陣的賽事, 曼聯聯賽7場只能取得2勝3和2負的劣績, 不過歐霸盃四強有驚無險地淘汰切爾達殺入決賽, 最終曼聯決賽亦以2:0擊敗阿積士成功捧盃, 奪得2017/18球季的歐聯入場券, 伊巴謙莫域亦可首嚐奪得歐洲賽冠軍的滋味. 總結2016/17球季的伊巴謙莫域出場46次入28球, 作為一個35的老將來說已經是一個很誇張的數字.

及後伊巴謙莫域選擇不與曼聯續約, 可是8月中曼聯官方宣佈與伊巴謙莫域續約一年, 對曼迷來說也算是天大的喜訊. 11月18日, 曼聯英超主場迎戰紐卡素, 下半場尾段伊巴謙莫域後備入替, 相隔7個月後伊巴謙莫域首次重返球場, 雖然伊巴謙莫域沒有取得入球, 但曼聯最後亦以4:1大勝紐卡素. 其後, 伊巴謙莫域也少有地再為曼聯上陣. 11月22日, 曼聯在歐聯分組賽作客巴素利, 伊巴謙莫域後備入替, 為曼聯首次在歐聯上陣, 也是歷史上首位為7支球隊(阿積士、祖雲達斯、國際米蘭、巴塞隆拿、AC米蘭、巴黎聖日耳門、曼聯)在歐聯上陣的球員. 12月20日, 曼聯在聯賽盃8強作客英冠球隊布里斯托城, 雖然伊巴謙莫域正選上陣之餘亦在下半場為曼聯扳平1:1, 可惜球隊最後被主場絕殺8強止步, 而這個入球也是伊巴謙莫域為曼聯的最後一個入球. 12月26日, 曼聯在英超主場迎戰般尼, 伊巴謙莫域大傷後首度為曼聯在英超正選上陣, 可是球隊在上半場的表現非常不濟, 以0:2落後, 下半場摩連奴因戰術需要而換走伊巴謙莫域, 至此之後伊巴謙莫域再沒有為曼聯在任何賽事中上陣, 3月中的時候曼聯官方更宣佈與伊巴謙莫域提早解約, 其後伊巴謙莫域轉投美職聯洛杉磯銀河, 延續自己的職業生涯.

總結伊巴謙莫域在曼聯的整個生涯, 為曼聯上陣53場射入29個入球, 平均每場賽事射入0.55個入球, 作為當時已經36歲的老將來說, 已經是不錯的數字. 轉投美職聯後, 伊巴謙莫域為洛杉磯銀河上陣27場射入22個入球, 平均一場賽事射入0.81球. 雖則美職聯的整體質素也不算是太高, 可是伊巴謙莫域能夠維持良好的職業態度也是現時球員值得學習的對象. 現時美職聯正在休季, 未知伊巴謙莫域會否重返曼聯幫忙呢? 未必是為曼聯上陣, 但他的經驗或許能夠幫助現時曼聯的一眾年青球員, 以改善今季曼聯成績不濟的問題.

Konan King

[讀者投稿] - 談談白連特

日前，效力咗曼聯4個球季嘅後防球員戴利白連特證實回歸自己的母會阿積士，因此想寫一些文字談及對白連特的表現及感受。

2014年,，戴利白連特喺巴西世界盃嘅表現出色，因此走馬上任嘅曼聯領隊雲高爾亦將自己嘅愛將由阿積士帶到嚟曼聯，8月30日曼聯官方宣布以1380萬鎊的轉會費由阿積士簽入白連特，與雲高爾延續喺世界盃嘅合作之路。

14/15球季，亦即是白連特加盟曼聯的第一季，白連特主要以防中位置出現， 其閱讀球賽能力及長傳的質素， 令當時一眾曼迷都認為白連特有能力成為老將卡域克的接班人。 而該球季白連特亦為曼聯射入兩個入球，分別喺2014年10月20日英超作客西布朗同埋2015年2月8日英超作客韋斯咸均射入一球，雖然入球並不多，但這兩個入球含金量都非常大， 因為這兩個入球都係為曼聯追平嘅入球，為曼聯搶回一分。而去到季尾階段，白連特以左閘姿態上陣，與該季翻生嘅艾殊利楊格在左路合作頗佳，相信最令人深刻嘅係雙紅會中佢曾經令對手防中安利簡趴在地下上，而白連特出任左閘期間， 球隊亦獲得聯賽六連勝的佳績。

15/16球季， 雲高爾卻簽入2014年世界盃冠軍成員舒韋恩史迪加以及當時法國國家隊中場主力舒拉達連，令本身在曼聯出任防守中場的戴利白連特需要退位讓賢，於是雲高爾決定將白連特放在中堅位置， 與史摩寧夥拍中堅位置，雲高爾的原意是想讓一個用球能力較高的球員能夠在後場組織攻勢，以及能夠在後場位置有更多控球在腳時間，而該季白連特擔任中堅亦成功取得幾個助攻，不過雲高爾卻忽略白連特的身高以及體型在中堅的位置上較為輸蝕，所以讓一眾曼迷都覺得白連特在中堅位置非不穩健， 經常有甩漏要史摩寧協助他。 雖然如此， 但白連特亦不乏良好表現， 身為曼迷的一定記得他對死敵利物浦的入球， 2015年9月12日主場對利物浦的賽事當中， 下半場初段一個罰球攻勢，馬達巧妙地妙傳地波白連特成功射入為曼聯先開紀錄， 最後曼聯以3:1勝出。

 此後在足總盃第四圈作客打比郡的賽事中入球， 而該季曼聯成功取得足總盃冠軍，白連特當然是其中一位奪冠功臣。 2016年4月3日，曼聯主場迎戰愛華頓的賽事中，白連特全場嚴密看管對方前鋒盧卡古非常成功，受到一眾球迷的讚賞。可惜在2016年5月10日英超作客韋斯咸的賽事當中，白連特連番犯錯令曼聯反輸3:2全失三分， 失去爭前四的主導權，最終曼聯以第五完成聯賽， 喪失歐聯資格，雲高爾亦要下台。

16/17球季，摩連奴正式上任成為曼聯領隊，摩連奴上場後並沒有如球迷所願即時將白連特從中堅位置剔除，反而選擇用白連特夥拍拜利作為正選中堅的組合，或許是因為史摩寧季初需要停賽的關係吧。當季第一場正式賽事就是社區盾對戰李斯特城，白連特以正選中堅姿態上場， 而曼聯亦以2:1勝出，協助摩連奴取得執教曼聯後第一個錦標。隨後曼聯頭4場英超賽事白連特均以正選上陣，可惜在第4場英超賽事主場對曼城犯下兩次嚴重錯誤，其中堅位置由史摩寧取替。雖然中堅位置被取代，不過白連特其後較多時間都以左閘位置出現，但是上陣時間已經比雲高爾執教年代為低。該季其中一個亮點應該是中堅的組合，皆因洛荷夥拍鍾斯的效果甚佳，直到歐霸盃八強階段主場對安德列治的賽事中洛荷受傷需要收咧， 白連特終於獲得上陣機會， 再一次以他夥拍拜利應戰餘下的歐霸賽事， 臨危受命的情況下，白連特總算不過不失， 去到四強階段主場對切爾達拜利領直紅出場， 去到歐霸決賽摩連奴選用雲高爾第二季的正選中堅組合， 以白連特夥拍史摩寧，卻得到甚佳的效果，曾幾何時這對讓球迷感到不穩的中堅組合， 摩連奴選擇在球季最重要的一場賽事中第一次選用這對中堅組合，或許是對手實力還差一班，最終曼聯奪得歐霸盃，取得歐聯入場券， 曼聯在季內奪得三項錦標，其中兩項賽事都以正選姿態上場，證明他在眾領隊心目中都是頗重要的球員。

17/18球季，白連特也是季初獲得不少正選機會，頭3場英超以正選左閘姿態出現，不過摩連奴這季選擇信任經驗老到的艾舒利楊格，而白連特則在盃賽賽事獲得較多機會，而歐聯分組賽當中白連特6場都是全場打足，並入選歐聯分組賽的最佳陣容，聯賽盃也是全部打足，可惜八強不敵布里斯托城出局。而白連特其後都不斷受到傷患困擾， 已經未能得到太多上陣機會。

總括而言，白連特在曼聯都頗受兩位領隊的重用，而且屢次在決賽賽事中上陣，這位曾經在曼聯擔任防中，中堅及左閘的球員為了在國家隊爭取更多上陣機會選擇離開曼聯重返阿積士， 都可以話是一個正確的決定， 寄望他在阿積士能夠繼續發光發亮。

隨文附送白連特對利物浦時的精彩入球:

Konan King

[WKD之曼迷周記]－總結（讀者投稿）

投稿至今啱啱好第二十篇文章， 寫完之後會好似班曼聯球員咁暫別一陣。 多謝Royce Sports一路俾好大自由度我寫野， 請大家繼續向身邊嘅紅魔鬼分享呢個咁有心機嘅專頁! 講返曼聯， 漫長嘅球季終於落幕， 有無諗過今年我地會經歷咁多高低起伏? 只講數字摩連奴同雲高爾係聯賽嘅成績無甚分別， 但球隊上下嘅表現出黎嘅信心同鬥志， 你又感唔感受到?

返翻去八月， 摩連奴接手， 米希達恩、普巴、伊巴強勢加盟， 單單係呢啲新閒已經令我地深信今年一定可以重返爭標份子嘅行列。 我份人一向都唔鐘意太樂觀， 而且我認為當時曼聯要解決嘅問題並非人手不足， 而係點樣將陣中一啲有質素嘅球員打返起。 另外我最擔心嘅就係摩帥究竟會點安置朗尼呢位逐漸走下玻嘅隊長。 經過左大半年， 我就非常滿意佢係呢兩個問題上嘅處理方式。 曾經以為走硬嘅馬達、 買返黎雪左幾個月嘅米希達恩、甚至加盟咁耐就俾人罵足咁耐嘅費蘭尼， 都一一搵返屬於自己嘅位置， 係戰術入面發揮到最擅長果瓣。 至於朗尼， 佢無再獲得優待場場踢足， 而要同其他球員一齊爭取正選， 呢個做法對任何人都有利無害， 朗尼嘅狀態亦都回復返些少。

季初中場有人滿之患， 加上普巴太全能嘅關係， 曼聯無辦法搵到一個攻守平衡， 分工清晰嘅陣式。 迪比、 小豬、舒拉達連證明唔到佢地係摩連奴需要嘅人，只能相繼離開。 以普巴為核心既中場出現過好多組合，但曼聯仍然唔知點先踢得出水準，係呢個過程我地失左好多分，爭標變為爭四。季尾終於見到佢地好清楚自己崗位，開始培養出執行戰術嘅紀律，起碼證明佢地方向正確，來季應該會更加進步。

依家嘅曼聯有一點仲未比得上摩連奴以前執教過嘅冠軍球隊，就係佢地領先時轉踢守勢波時會非常唔自然，彷彿適應唔切當下要點樣執行防守工作，中場線縮得過後但企位缺乏一致性，反而造成更多漏洞。相反，如果一落場就以守代攻，佢地絕對可以踢出高效率嘅穩守突擊，完勝車路士就係最佳例子。第二季再無藉口賴默契不足，可唔可以成為銅牆鐵壁就睇班球員造化。

攻力方面我地見證住曼聯由中路塞車到兩閘兩翼解放，由只靠伊巴柱躉到福仔連加特以速度致勝，慢慢踢出呢個進攻班底應有嘅多變性。令人在意嘅係幾位年輕鋒將同伊巴嘅實力、經驗同風格差距始終太大，即使後者留隊都應該簽多一位制空力強身位好，而非基沙文呢類突破型前鋒，咁先可有更加彈性嘅變陣，否則可能要繼續推費蘭尼上去做替工。

成績只能反映現況，而一個領隊係球會裡面仲有無將來就取決於佢得唔得到球員嘅信任。一旦無法認同領隊嘅管理手法或者足球哲學， 佢地就好難為球隊賣命， 甚至乎會搞更衣室政變， 球會再俾更多嘅時間都係徒然。 當年莫耶斯及雲高爾無一幸免， 車仔年代摩連奴都曾經深受其害。 今季迷茫嘅時間唔少， 但解決難題唔再只係領隊嘅責任， 全隊都非常拼博同積極。 摩連奴會犯錯， 試嘅戰術亦失敗過， 但再試下一個戰術時球員依然充滿信心， 甚至努力爭取正選希望成為變陣成功嘅一塊拼圖。 留係一隊入面嘅人， 每一個都被告知有機會上位， 淨係呢份令球員之間良性競爭嘅影響力， 已經肯定左摩連奴今季嘅貢獻。 來季要贏更多獎盃!

[WKD之曼迷周記]－衝線（讀者投稿）

隊長朗尼捧起歐霸盃，曼聯奪得近年首個歐洲錦標！六十四場比賽後，球隊終於走完滿途荊棘嘅球季。呢個獎盃唔單止肯定左球隊過去一年嘅努力，更可以藉此將正面力量帶翻去剛受恐怖襲擊嘅曼徹斯特市。關鍵時刻足球就會團結人心，The city is united!

View fullsize

 

李奧費迪南話呢場唔係果種賞心悅目嘅決賽，但曼聯跟足賽前部署去踢就獲得確確實實嘅勝利。阿積士球員可能心有不甘，認為自己積極進攻嘅風格應該值得更好成績。事實係曼聯太早取得優勢，以慢打快令阿積士愈踢愈漉，正中摩連奴下懷，球賽就跟住佢預想中嘅發展下結束。如果話曼聯消極應戰，不如話阿積士未能將曼聯迫到要傾巢而出嘅絕境之中。

View fullsize

 

過去幾場波我都將焦點放係防守方面，一係因為前場球員選擇唔多而且狀態飄忽，攻勢依靠個人突破多於組織; 二係因為踏入五月後，球隊有一個明顯改變：放棄控球。曼聯今季一直擁有極高控球率但往往未能全取三分，可能亦因為咁佢地嘅防守專注力完全未達摩連奴要求，失左好多可以守得更好嘅無謂波，更唔好講要泊出一架有效率既大巴。

View fullsize

 

「進攻唔得，就更加要做好防守先！」就係我對摩連奴嘅認知。

 

仲記得對熱刺時早段先失一球仍然保持極深嘅中場線，若無其事咁繼續防守反擊，今日回看（馬後炮）可能另有玄機。同一戰術輸埋俾阿仙奴，但返去主場閉幕戰依然以防守為重點課題。呢幾場波嘅娛樂性不大，但俾機會一眾甚少主守嘅中場熟習無波在腳時嘅工作，同時迫使前場習慣要係以寡敵眾嘅情況下做出正確決定。最顯然易見嘅改變就係中場無再因為心急而係危險位置犯規; 反擊唔再拖泥帶水，盡快分俾前鋒由佢地嘗試闖入禁區，直接威脅門將。

 

黎到決賽，兩個入波都帶幸運成份，但阿積士亦要負上唔少責任。先有加利臣嚴重甩位令普巴有機會起腳，第二球角球阿積士有七名防守球員但盯唔住四個曼聯球員。整體進攻方面如同成個五月一樣，唔華麗唔壓倒性，馬達, 米希達恩做足基本工作，但始終未夠弗。

View fullsize

 

邊路中場唔得, 咁Plan B呢? 失去伊巴之後，拉舒福特少左一座高塔為佢做二傳，挾制中堅。費蘭尼今場將呢項職責發揮得淋漓盡致，十五次高空搶點成功為全場之最。相對佢缺陣嘅時候，福仔可以專注突破之餘，每次由費蘭尼拎波之後，仲可以比平時多出三幾秒走位。慳十五次騰空嘅氣力換黎幾十秒嘅無球走動對一個前鋒黎已經非常緊要，何況後期阿積士都無再浪費力氣係空中戰博鬥，寧願等個波落返草地先進行迫搶，反令曼聯踢得更輕鬆。費蘭尼係我嘅MOTM，因為佢除左助攻之外亦有做好防守工作，無令普巴同靴里拉陷入苦況，更加無好似之前咁不斷無謂犯規等人有機可乘。奧雲話佢嘅技術層面同踢法都稱唔上一個典型嘅曼聯，但我覺得佢有鬥志有態度就已經夠哂資格做紅魔鬼，半年前又有邊個估到佢可以重拾愛華頓時期嘅威風?
 

View fullsize

 

後防方面，因為白蘭特信心同狀態不足，而且鐘斯係最後幾輪英超都夥拍史摩寧，賽前我一直認為佢唔會爭到正選中堅一席。但今仗佢同達米安係左路守得非常好，展現出佢對母會阿積士嘅踢法好熟悉之餘，整場賽事都踢得好淡定。當然亦要歸功於教練團隊嘅賽前分析，睇穿對面不擅高空攻勢先會有咁嘅安排。

View fullsize

 

今場波每一個球員都嚴格執行到教練指示，勝利比八強四強更加有說服力。用左一年時間，大部份球員搵到自己嘅定位係邊度，踢出黎就變成一個十一人嘅團隊，咁嘅結局我地點會唔收貨?

View fullsize

 

下季隊波變成點無人知，但肯定嘅係曼聯一定會有力挑戰皇馬/祖記，以贏歐洲超級杯為目標!

View fullsize

 

 

[WKD之曼迷周記]－連環失波啟示錄（讀者投稿）

入正題之前，想係度同受病魔折磨嘅Bradley Lowery打打氣。平時球迷會為左愛隊拗個你死我活，但關鍵時刻足球必定會透過影響力黎團結人心，令有需要嘅人得到力量。呢位小朋友病情反覆，大家唔好吝嗇對佢嘅支持，佢先可以更堅強咁繼續接受治療。另外希望普巴可以捱過喪親之痛，重返球隊。

主場迎戰切爾達，我地差啲空手而回。早段明明有拉舒福特妙傳費蘭尼輕鬆頂入，只要再下一城就幾乎可以鎖定勝局。今季當然唔會咁輕易就過關，球迷們一於坐足九十分鐘過山車。雙方再次互有危險進攻但未能轉化為入球，切爾達決定放手一搏全面進攻。八十五分鐘隆卡里亞頭鎚追和後，曼聯球員面臨極大心理壓力，只能泊出一架唔算穩陣嘅大巴。要不是曼城棄將加迪提最後一腳撻大Q，出局嘅就係我地。

切爾達兩翼威脅性高，曼聯算係踢出預想中嘅防守戰術， 對方想落底線出波有一定難度， 即使切入中路都只能遠射， 反而幫左羅美路練手感。 唔知切爾達係咪參考左阿仙奴果場波， 次回合反而更加直接放高波入禁區爭頂。 尤其係左路嘅白蘭特同達米安， 俾人壓住黎頂固然關體格事， 但更值得檢討嘅係佢地多次俾人搶點， 甚至走甩哂目標，眼白白睇住人頂波。 果球失波相對上已經係守得好，只係拜利來遲半步。

作為白鹿徑球場閉幕戰嘅球隊，曼聯都算幾唔俾面。出場陣容由後備，復出球員同新秀組成，最有睇頭已經係史摩寧同鐘斯。佢兩個復出無耐，但幾肯定會係歐霸決賽嘅正選中堅，以佢地對阿仙奴嘅表現黎計，相信羅美路都有排忙, 所以摩連奴要佢地連續上陣餘下比賽，務求盡快提升狀態。由阿仙奴到修咸頓佢地的確有進步到， 但始終有唔少甩漏， 好難俾到穩陣嘅感覺我地。 要佢地復出無耐就弗返哂係苛刻左少少， 但決賽已經殺到埋身， 迫出黎啦!

今期比較下兩個最近失嘅波。

阿仙奴入嘅第二球， 張伯倫出波之前兩秒， 其實史摩寧已經留意到鐘斯望波望到甩哂位。 但佢選擇做嘅唔係嗌鐘斯搵返要盯住嘅目標， 而係離開自己個目標一步， 就係呢一步令韋碧克再次倒戈有波入。 呢球就係果種完全可以透過溝通而改善啲嘅防守。

對熱刺輸嘅第一球高空波， 就可以話係個人防守力嘅不足。賓戴維斯球波出得好靚， 但朗尼判斷錯誤走前一步結果跳空亦係事實 (其他隊友都跟足哂對手)。 兩球都係Free Header， 但原因同治本方法可以好唔同。

自從伊巴同洛荷收咧後， 傳中同死球再次威脅到我地嘅後防， 唯有寄望費蘭尼同普巴可以早少少回防， 起碼多一兩個大隻佬爭頂執漏。

小將又有咩表現? 今仗杜安沙比出任防中，盯實艾歷臣嘅工作做得還好，無乜犯下大錯。此子防守紀律抵讚，無因為身形或波底好嘅關係而作出多餘動作; 其次佢嘅位置感不俗，係中場踢得幾自然。

季前熱身賽時佢比我嘅印象係一個識用波，動作靈活嘅後衛，佢等到機會踢英超嘅時候，仍然表現克制，無急於表現自己。黎緊佢應該會逐步嘗試執行更多更複雜嘅指令， 但呢一刻我已經感受到果種青訓紅魔嘅味道， 就係團隊精神十足， 一落場就好似同班老大哥夾左好耐， 知道球隊需要佢做好咩職責咁。

下週出文之時已經完季， 我地捧住個杯返黎再講!

[WKD之曼迷周記]－直路（讀者投稿）

作客切爾達前終於等到一連串嘅喜訊，就係一眾傷兵已經重返練習場上，當中包括史摩寧同鐘斯，而普巴亦可以正選上陣重組中路鐵三角。中路齊人之時，左邊又多返兩名十字軍，梳爾韌帶受損球季再度報銷，楊格拉傷大腿肌肉。睇黎下季要認真考慮買個即食又夠班嘅左閘，不過有乜野等我地完季出埋張成績表先再講!

呢場波雙方都有唔少入球機會，但無一球生波把握到。係呢度想讚下摩連奴對羅美路嘅器用。羅美路上季加盟後一直鮮有出場機會，尤其當曼聯擁有迪基亞呢位世界級門將嘅時候，好多人都認定羅美路會係另一個古斯鍚/連迪加特。雖然今季佢只係聯賽上陣過一次，但歐霸成為左佢嘅舞台。出場機會增加對門將嘅穩定度有重大嘅影響，除左無以前咁怯場同大意失誤之外，接波技巧同指揮防線方面都有唔少進步。一個球隊要有兩個狀態好嘅門將唔容易，佢既進步亦令到迪基亞明白後有來者，一唔集中就會被取代。若果能夠打入歐霸決賽，我都希望羅美路正選上陣。

當隊友頻頻失機之際，拉舒福特憑住妙絕嘅罰球幫曼聯拎住一個作客入球返去踢次回合。有人將佢呢腳直彎遠柱嘅射門同當年碧咸收死愛華頓果球比較，似得黎我相信佢都真係有參考過，畢竟佢每日加操苦練罰球又係百分百曼迷，點會無研究過大師兄嘅七旋斬呢?

如果唔係連加特同米希達恩連番失機，曼聯晉身決賽可能已經毫無懸念。連加特季尾不時轉踢前鋒，究竟佢係呢個位置上有無潛質?

論最後果腳嘅把握力，今季佢同拉舒福特都未夠好，但兩者最大嘅分別在於判斷力同閱讀球賽能力。拉舒福特多數係射得唔夠靚或者對面龍門上身，但連加特果種失機係心急導致誤差或做錯決定。今季唔少次見佢明明無人迫都急住起腳，踏唔順腳步就拉弓結果連龍門都唔中 ; 前面隊友仲有更好嘅機會，但無抬頭望過無考慮過就起腳遠射。同一情況下福仔可能都會照射，但就睇得出佢了解過衡量過其他選擇而作出決定。

其實連加特一樣有過人之處，就係無論球隊踢緊順境逆境波都好，只要控球在腳佢就會好有信心突破防線，一啲都唔猶疑亦唔會放軟手腳，係侵略性同自信方面同蘭尼非常相似。佢係邊路嘅時候會好自然地掌握到隊友嘅位置，周不時交到靚波又或者做One-two, 佢同福仔既默契亦會令後者踢得生好多。值唔值十萬鎊週薪就未知，但曼聯同英格蘭嘅正選翼鋒位佢係絕對有機會爭到架，最好就改善埋射術同埋玩少啲Twitter啦!

今期無乜篇幅講對阿仙奴嘅賽事，始終摩連奴嘅排陣已經說明左要休養主力去應付四強次回合嘅比賽。輸，唔係話無所謂，上陣嘅球員其實有實力亦有機會可以係酋長球場全取三分，但自己踢得唔好又怪得邊個呢? 經過呢場波我期望個別球員嘅比賽狀態會有所提升。雖則已經黎到季尾，但表現唔好嘅可能分分鐘會俾人掛牌，因為摩連奴都係鐵腕政策，對懶散嘅人絕不手軟! 兩位新兵踢得幾好，希望黎緊有更多機會上陣，等我地呢班球迷睇多幾場先分析都未遲。

過埋切爾達就可以係瑞典踢決賽，果度將會變成曼聯嘅主場，伊巴等緊我地。

[WKD之曼迷周記]－法寶盡失（讀者投稿）

呢個星期可以話係一個好嘅消息都無, 唔需要識波都睇得出最近曼聯踢得好差，但我唔會怪球員，因為我見到佢地攰得黎有盡力; 我更加唔會怪領隊，因為就算佢再諗到啲咩驚世戰術，呢十三四個球員都無咁嘅體力去執行。當一個球隊前中後嘅必然正選都傷哂嘅時候，你只可以調整期望，陪隊波捱到尾。摩連奴個百寶袋已經掏空，相信要放棄競逐聯賽。

打呲戰我就無睇到直播，但單憑精華片段同數據都可以估到成場賽事嘅發展。三成控球率一次中框埋門，除左靴里拉一次無人看管但門前頂斜之外，其餘時間都係死守求和。

唔單只阿古路比左好大威脅白蘭特，後備入替嘅新星捷西斯一樣搞到我地後防滿城風雨。九十分鐘任務完成，但就付出左好大同不必要嘅代價，令之後嘅路更難走，呢次真係蝴蝶效應。

事件始於費蘭尼尾段拎左一個黃牌後再次犯規，阿古路挑釁之下大家頭撞頭，球證理所當然認為高嘅一方有錯，直接出示紅牌趕佢出場。為左要保持防守力而換入嘅科素文沙，亦係最後一次防守受傷提早收咧。對史雲斯嘅出場陣容，幾乎係唔洗估，因為無得揀咁滯。

對史雲斯嘅上半場簡直係慘不忍睹: 居然俾一隊要爭分護級嘅球隊猜住黎踢，仲要不乏驚嚇場面，加上梳爾幾分鐘就傷出，成班好似等半場入更衣室聽教練指示咁。連旁述都話好少可踢左廿幾分鐘先第一次嗌靴里拉個名，可想而知我地嘅控球質素。

上半場尾段，拉舒福特接應直線引到對面門將出迎，當時球證視線受阻，佢插水成功，呃到一個十二碼。可能球隊形勢太差令佢有此一計，但插水有失體育精神，尤其佢俾外界嘅感覺一直都係謙虛勤力誠實嘅年輕人，難怪唔少名宿都覺得好失望。福仔，唔好走上呢條不歸路啊...

領先優勢最後由施古臣嘅罰球抵消，各執一分。至於果個罰球，正好反映左曼聯球員之間嘅溝通問題。

靴里拉本來想企近柱以防罰球彎過人牆，史雲斯前鋒洛蘭特趁機走前,原本守佢嘅華倫西亞無跟上，迪基亞見狀就立即嗌走靴里拉，事情發展到呢度仲未出事。問題就發生係靴里拉返去嘅時候拍埋人牆度，果個位置原本無人做反人牆，迪基亞可以好清楚見到個施古臣同個波。我唔敢講如果迪基亞見到佢起腳動作就一定救到球世界波，但至少唔會連撲波嘅反應都無。

費蘭尼缺陣令到我地連制空權都喪失埋，洛蘭特成場波壓住我地一對中堅黎踢，黎緊呢幾場硬仗唯有以速度制勝，但我地仲有幾多人快得起呢? 切爾達雖然名氣不大，但唔好忘記我地曾經係歐霸俾當時坐擁靴里拉同洛蘭特嘅畢爾包踢出局。

唔奢望曼聯可以華麗地贏哂餘下嘅賽事，但只要集中精神一定可以穩穩陣陣殺入歐霸決賽!

[WKD之曼迷周記]－踩鋼線 （讀者投稿）

就係交左一篇嗌球員咬實牙關嘅稿之後果晚，洛荷同伊巴同場收咧。洛荷需要養傷五個月，而伊巴好可能已經踢左佢為曼聯最後上陣嘅比賽。我地梗係好傷心，但球隊無時間沉淪係呢種情緒之中。既然後無退路，就用盡手中嘅球員，行去鋼線嘅另一端，為兩位今屆咁出色嘅表現爭取佢地應得嘅成績。

最近兩場比賽娛樂性比之前大減，但總算有驚無險咁晉級。踏入後費格遜時代嘅曼聯，無論由邊位教練帶隊，係歐洲賽嘅成績退步左，進攻都無以往咁流暢咁華麗。有時面對歐洲二線球隊都只可以踢成五五波，甚至失分而回，都咪話唔失望，大大打擊左我地週中捱夜捧愛隊嘅決心。

歐霸八強返到奧脫福，以為可以食住個勢大炒安德烈治，點知繼續俾體能同傷兵呢兩隻惡魔纏繞住。早段憑米希達恩先開紀錄之後一直未能將比數擴大，而客隊一直靜待入球機會，兩回合都能夠將反擊有效轉化成威脅，甚至入波。

反觀曼聯被追和後，錯失左好幾個黃金機會，要去到加時階段先射入到致勝嘅一球，好彩福仔去到果個階段仲有想像力同夠冷靜"CUP"過後衛射返近柱，但都間接造成左伊巴嘅嚴重受傷。

至於失果球波，全隊都絕對值得吹風筒式訓話。成條中場回防慢不特止，俾對手起到腳後雖然由羅美路加條門柱救出，但竟然無人係六碼點幫手解圍，人地門前執雞一刻，鏡頭見到大部份防守球員企係禁區頂舉手搏旁證舉越位旗。

作為一個後衛，最洩氣嘅唔係俾人射入世界波，而係失啲因為欠缺防守紀律而造成嘅入波。今季已經唔係第一次見到呢種失波，黎緊一定要戒左輕敵，防守鬆散嘅惡習!

至於對般尼嘅客場賽事，又踢得出乎意料地穩陣。呢場彷彿見到以前嘅車路士咁，攻勢未必浪接浪，但入完一球之後就成隊縮後一格，直頭連控球權都唔搶，拖慢節奏保留體力。

馬素爾終於重返正選行列，出任正前鋒仲交出左一入波一助攻成為贏波功臣。睇得出佢仲未回復翻上年果種自信，但呢場波對佢一定有好大幫助，正如福仔前排一樣陷入低迷，最近都慢慢係球場上搵返自己，比之前敢於突破同多左嘗試唔同踢法。

久違嘅隊長朗尼都有斬獲，而且全場都有指揮住隊友，尤其係普巴，免得佢又令球隊愈踢愈急自亂陣腳。係而家傷兵滿營嘅時勢，可唔可以再次靠佢擔起頭家呢?

最新消息指普巴都無法上陣曼市打呲，難得磨合成功嘅中場鐵三角又遭強拆。歐霸已經殺入四強，聯賽又因為利物浦失分而再次有希望打入前四，就算而家幾缺人都無原因要放棄共中一邊，就當係俾呢班球員嘅一個大考驗。

有球迷覺得最近曼聯士氣受挫，計我話班球員而家係雄心壯志先啱，因為佢地要將獎盃交到伊巴同洛荷手上，Giving up is not an option!

[WKD之曼迷周記]－重要嘅勝仗（讀者投稿）

對車路士開賽前公佈出場陣容，竟然連伊巴都唔出，仲要久未上陣嘅楊格做隊長。朋友Whatsapp問我曼聯係咪已經放棄左聯賽前四專注歐霸，我只係答左句"睇下摩連奴呢鋪賭唔賭得中"。我都係普通球迷，見到咁嘅名單，仲要係排出之前發揮得麻麻嘅雙鋒陣，真係又驚又期待。驚，係因為呢場一輸，佢必然會受到口諸筆伐，要為排陣失誤而負上全責; 期待，係因為我肯定即使佢要放棄聯賽， 就憑佢同車仔嘅恩怨情仇，都一定唔會揀呢場黎認輸。

開賽無耐,球評家同旁述已經知道曼聯想複製足總杯僅負車路士嘅戰術。果場比賽係靴里拉領紅被逐之前其實一直守得好穩，亦都有高效反擊，今次決定照辦煮碗真係押上左佢嘅判斷。泊大巴係會令對方好難起腳，但今場曼聯直頭瓦解左進攻嘅源頭，一切由中場開始.

中場嘅部署非常明顯,中路採取人盯人戰術，利用普巴同費蘭尼嘅身體質素，分別令到干堤同馬迪無時間上腳，繼而減少佢地向前傳波嘅次數。而靴里拉就負責夏薩特，不過佢靠嘅係閱讀球賽能力，集中力同體力。用一次防守去解釋佢全日嘅任務: 夏薩特見勢色唔對打算走位甩開佢，曾經由本來嘅左翼位跑返去中圈，前插入禁區頂再上去右翼，全程二十幾秒，靴里拉形影不離，永遠係兩個身位以內。

千析唔好以為人盯人好容易，因為跟住對手走動嘅話，隊友嘅防守範圍一定會不斷改變。好似以上例子咁，靴里拉一離開邊線，左楊右華就要相應地回防填補空位，我諗摩連奴就係睇中左楊格協防嘅判斷力同埋速度所以先突然間用返佢。同樣地，曼聯嘅陣式係九十分鐘內不斷係雙中堅同三中堅之間轉變，講求嘅係全隊嘅集中力同合作性，心水清嘅球迷會發覺好耐未見過成條防線有咁多提場咁多溝通，呢個絕對係致勝關鍵！不得不提嘅當然有一樣緊盯右翼柏度嘅達米安，仲有成場夾擊哥斯達嘅中堅孖寶拜利同洛荷。佢地嘅努力令車路士繼零七年後第一次錄得全場零中框射門，夏薩特更加連一次過人嘅鏡頭都無。

進攻嘅套路嘅係左楊右華係兩邊放長波俾連加特同福仔，企位似兩翼用黎拉空車仔三個中堅之間嘅距離，踢落會見到一個係邊線等餵波另一個就移入中路做中鋒。兩個人踢三個位，體力消耗當然大啦，所以後段兩位處理快攻都顯得力有不遞。但拉舒福特今仗踢出信心，唔單止入左球教科書式嘅破越位半單刀，五五波同雷斯拍埋一啲都唔輸蝕，有幾球仲差啲搶到。黎到季尾伊巴都有嚴重嘅體力問題，拉舒福特如果可以搵返射門感覺，摩連奴一定敢用佢做plan b，甚至係plan a！

呢場勝仗同球迷證明佢地絕對夠料擊敗最強嘅球隊，亦幫自己打左一支強心針。更加重要嘅係，佢地一定要用呢場嘅表現去警惕自己，唔可以再好似踢歐霸咁懶散咁漫不經心。你地話啦，如果黎緊每場都有今晚嘅鬥志同決心，我地有咩可能會入唔到前四?

遲到好過無到，咬實牙關贏到季尾不是夢!

[WKD之曼迷周記]－繼續讚, 繼續彈（讀者投稿）

[WKD之曼迷周記]－繼續讚, 繼續彈（讀者投稿）

終於重回勝軌，三球輕取護級球隊新特蘭。今場當然有抵讚之處，但主要係因為黑貓真係踢得太差喇，再咁落去領隊莫耶斯準備四年內三度被炒魷。

新特蘭無效仿西布朗局部壓迫嘅踢法，反而指示球員向曼聯整個中後場施壓，我認為係幾不智。只講個人技術曼聯當然高一班波，新特蘭嘅中場幫忙堵住後面都吃力，仲點敢壓上去大範圍迫搶呢？結果得兩個前鋒去追六個曼聯球員嘅傳球空間，嘥力之餘又得唔到回報。

呢場波中場咁多空間上腳，調整節奏，仲有時間等埋隊友走位先甩個波，就知道莫耶斯捉錯棋。

曼聯排出倒三角嘅中場中，普巴同費蘭尼成為左靴里拉嘅高強度屏障，直接解放左佢嘅活動範圍。係缺乏馬達嘅致命直線下，靴里拉嘅活力都係一把唔錯嘅武器，何況米希達恩都需要搵人做短傳接應。

呢個戰術嘅另一特點係無論普巴同費蘭尼都會刻意地限制自己係前場嘅活動。

以往總會見到普巴盡量參與每一個攻勢，想為球隊交出致命傳送或者係直接埋門，但亦曾經多次因為心雄而失去控球權自亂陣腳。呢場見到佢非常清楚自己嘅崗位，無過份上腳令自己陷入危機之中，仲好留意住自己同靴里拉嘅距離，務求做到第一個支援佢幫佢解圍嘅隊友。

費蘭尼係三人之中已經企得最前，但亦有執行好自己嘅任務，除左偶爾走入十八碼點提供傳中嘅選擇外，大部份時間都留守係三十碼嘅區域。

靴里拉今場踢得咁生，其實係因為同隊友交換左無名英雄嘅角色。佢閱讀球賽嘅能力同卡域克不相伯仲，而且仲可以插入禁區助攻，要佢演活中場大腦嘅角色，佢合格有餘。只要有足夠嘅保護，或者下季買入到一個純防中，相信佢會愈黎愈多機會。

講到咁犀利，其實頭兩個入波都係單靠個人技術，呢個戰術可以走到幾遠就要受多啲考驗先再下定論。相反，對住新特蘭呢隊榜尾波都睇得出有好大改進空間。

獲外界高度評價嘅拜利，攔截準硬淨腳下功夫好，成個大隻版李奧費迪南咁，但我就認為佢同李奧仲有一段距離。今場佢又同門將羅美路有一下誤會，雖然無造成失波，但有今季有一路睇波嘅話都知道呢種情況出現過好幾次，當中包括識聽佢講西班牙文嘅迪基亞同靴里拉。

如果佢要成為後防領袖，必先要係溝通方面下苦功，否則單對單有幾叻都係徒然嘅.

另外一樣抵罵嘅係，當球隊領先二比零，去到六十分鐘嘅時候突然間失去集中力，無論攻守都踢得好求其，兩三次人多打人少嘅機會都把握得好差，差到連射門都構成唔到。一直坐係教練席嘅犘連奴終於忍唔住出黎嗌醒班球員，同時換入要爭取表現嘅馬素爾同拉舒福特，隊波先重新積極起黎。最後福仔都打破接近兩個月嘅入球荒，幫紅魔錦上天花。

四月最輕鬆嘅日子已經過去，曼聯究竟會雙線博盡定係作出取捨，就睇下今個星期主場贏唔贏到車路士。我地狀態固然未夠好，但係奧脫福咩事都有可能發生!

[WKD之曼迷周記]－困局（讀者投稿）

[WKD之曼迷周記]－困局（讀者投稿）

前兩週講過嘅攻守問題幾乎中哂，唔係筆者醒目，而係其他球隊已經識用針對性嘅踢法去守波。每個領隊都參考翻上一隊波係奧脫福拎分嘅戰術，再根據球員實力加以調整同強化，只要曼聯解決唔到信心問題，人地只會愈守愈輕鬆，此謂不進則退。

星期日晚對西布朗，我本來就比一般曼聯球迷悲觀。西布朗從來都唔係前列分子，陣中亦無咩大球星，就咁提起隊波可能無咩人會覺得有威脅，但其實佢地發揮非常穩定，仲啱啱贏埋阿仙奴。

佢地嘅最強武器唔係球員，而係領隊普利斯。佢能夠將手上嘅球員用盡之餘，亦可以以有限嘅資源踢出成績同風格。摩連奴離開車路士之前曾經講過，如果佢係一個英超球會嘅班主，一定會搵普利斯做領隊。

戰術上，其實上半場已經分出勝負。西布朗嘅部署非常簡單直接，只做好防守就足夠。點解佢地可以做到滴水不漏? 除左係曼聯狀態不佳之外，最主要係普利斯用左最少嘅氣力去有效阻擋紅魔嘅組織。曼聯係缺少左普巴，靴里拉同馬達嘅情況下，惟有起用卡域克同費蘭尼踢平排中場。

對面嘅中後場如常地防守，亦唔怕你單對單突破，唯一要額外執行嘅指令就係比壓力呢對中場，明顯見到呢兩位球員一拎波就會俾人迫搶。普利斯就係睇中拉舒福特,連加特等人嘅判斷力同視野較差嘅缺點，而將防守重點放係會交靚波俾佢地嘅球員身上。

費蘭尼努力嘗試為卡域克做掩護但唔太成功，馬素爾同米希達恩亦都做唔到咩組織，結果曼聯又再一次踢唔出節奏。

咁嘅上半場已經嚴重打擊成隊波嘅信心，之後嘅表現都係預計之內。呢場係近半年進攻最無板斧最悶嘅一場波，大部份嘅射門都係來自禁區外。

戰術有好多可以批評嘅地方，例如要福仔踢伊巴嘅角色根本係不切實際，前者既然唔夠對抗性踢柱躉做二傳同爭身位，就應該安排兩翼比平常接近中路，多做配合而唔係要佢單打獨鬥然後浪射。不過球隊嘅信心問題先係癥結所在。

呢個星期有好多細微位都顯得球員嘅唔集中，心急，而呢啲野係會堆疊埋一齊的。由迪基亞下半場一次失誤差少少將一個無威脅嘅射門撲入網，到對愛華頓時各人嘅甩漏愈黎愈多; 由米希達恩射失半單刀，到靴里拉嘅門前擦楣。早前辛辛苦苦建立嘅進攻體系，因為幾個重心球員嘅傷病而瓦解，即使佢地而家全部可以上陣，隊波都要重新上路。

但足球就係咁，何況無利用輪換黎增強後備球員嘅信心同狀態都係原因之一，今日嘅果唔係淨係用'唔好彩’就解釋到嘅。

當下我地無時間去回顧球場內外嘅每一個決定，因為四月真係好難踢，唯一可以做嘅係盡快做好下一場賽事嘅準備功夫。摩連奴公開批評好幾位球員嘅表現同心態，我希望佢係為左激勵呢班後生仔而咁講，佢地亦要知道而家球隊能夠贏波係佢地最重要嘅工作。

成日和波對我黎講都好失望，唔想面對, 唔想落筆去分析場賽事，何況有份踢嘅球員? 但而家無時間灰心架啦，唯有Show our support，信佢地可以季尾反彈!