[WKD手記] - 喂你地準備好未㗎
無人解釋到點解頭段永遠都踢得咁差，醒目嘅靴里拉接受訪問時就話呢個問題要留返係更衣室內檢討，摩連奴直頭話球迷睇完上半場會唔敢相信曼聯用咗一個星期去準備呢場比賽。有趣嘅係今場波由頭到尾都踢緊同一種戰術，頂多有位換位嘅調動︰如果班球員慢熱、夢遊球場，連自己崗位嘅基本職責都完成唔到，又點可以執行到戰術呢？球員實力無容置疑，下半場就證明咗佢地靠走位同傳球創造空間都有一線水準，但開波初段心理狀態之差真係令人覺得而家最需要增強嘅位置係運動心理學家呀。
費特連續兩場正選上陣，但今場真係災難級演出，基本上犯哂攻中會犯嘅防守錯誤同防中會犯嘅進攻錯誤，下半場開波仲見到佢都算意料之外。傳球成功率不足七成，以佢呢個位置嚟講絕對唔合格，而且仲係咁習慣喺資訊不足嘅情況下用轉身搏取空間，結果成日俾人夾走個波。有時佢會企喺防中位，但好易俾個波引走咗，變相都係要普巴落嚟補位支援馬迪，所以靴里拉換入後先真正解放到普巴。史摩寧係另一個踢到走哂樣嘅球員，好幾球波猶豫不決，判斷同出腳都比平常慢，用騰雞嚟形容佢一啲都唔過份。賽前部署應該想主動同般尼茅夫搶波，所以態度上唔被動，問題在於高波或者清波後經常拎唔到第二點，一路都壓唔返上去主攻，當中場處於呢種咁尷尬嘅情況下，馬迪就會容易犯錯，過往多次見到佢同梳爾、連迪洛夫之間嘅區域被對手擾亂而未能挺身而出。
盧卡古獲得休息時間，曼聯就要適應Plan B，上仗試過用拉舒福特當柱躉踢效果有目其睹。今場山齊山雖然都係叫做中鋒，但功用夠哂多元化。首先山齊士護波、高空搶點同二傳始終比福仔稍強，喺前場打反擊時可以幫隊友爭取到時間上嚟支援。其次因為般尼茅夫防守唔採用大巴戰術，防線配合中前場比較進取，曼聯就針對性地放過頭波。雖然睇落同啲入球無關，但馬斯亞同山齊士瘋狂攻擊中堅背後嘅盲眼點，令後衛無時無刻都多一份顧忌，當個波係空中時佢地又要捉人又要判斷落點。呢個踢法除咗要無球意識高之外，其實都需要對手後防有一定空間先成立到，但作為一種變招的確有其作用，呢場波就認真突顯到山齊士嘅長處同風格喇。
最後要讚一讚熱血小子靴里拉，佢嘅閱讀球賽能力一啲都無退步到。閱讀球賽即係知道球隊當下最需要做咩嚟改善整體攻防流暢度，賽際工作未必最難最講個人技術，但足球係鬥做得多正確決定嘅運動，而佢用僅有嘅上陣時間就已經幫隊友踢起嚟舒服得多。普巴要點先發揮到極限，經過兩年已經頗有共識，剩底嘅就係同邊個拍檔先令佢可以長踢攻中。
[WKD手記] - 遇強才會變強
英超比賽節奏相近，本土球員又唔興外流以至戰術認知有限，出戰歐洲賽往往都係一種試煉。曼聯以前用費爵果套萬變不離其宗嘅戰術可以喺歐聯度砌低唔同國家嘅球隊，甚至兩奪歐聯。如今無論對陣西班牙、意大利以至荷蘭球隊，我地踢起上嚟都好被動，好多時都先觀察對方踢法再修正戰術，變相俾對手踢得舒服。輸俾祖雲達斯反映出兩隊差咗大半班波，但同時令球員搵到正確方向，至少對愛華頓一仗大部分球員嘅集中力同信心都增強咗，無浪費到輸波嘅價值。
面對中場具創造力嘅球隊，摩連奴會將中場線推前以限制對手嘅組織空間，所以對祖記防守得比以往積極。可惜老婦人經驗老到、攻擊戰術多元化、走位自由度高，單單靠古亞達度、簡些路同賓坦古已經搞到梳爾同馬迪多番失位。祖記自領先之後就開始踢養生足球，保持體力之餘準備好隨時反擊。雖然只有一球差距，但睇得出佢地未盡全力，無論攻守戰術都仲有法寶未出，當中基亞連尼同邦路斯呢對中堅拍檔完美示範後衛應該點樣轉守為攻，隔住半個場教史摩寧同連迪洛夫點樣更上一層樓。
迎戰愛華頓嘅排陣中只有費特休息充足，其餘正選喺一星期內都踢咗超過一百六十鐘，令人擔心。可幸曼聯採取主動，防守由中場施壓開始、組織就利用費特做馬迪同普巴嘅跑腿，令運波上前場嘅過程更加暢順，啲進攻未至於水銀瀉地但都打得出氣勢，愛華頓只能步步為營。馬斯亞搏返嚟嘅十二碼屬於誤判，但佢最近踢得非常好生就無可否認，普巴連帶整條中場線壓前絕對令到佢有多啲時間接近危險地帶，短傳配合都多幾個隊友可以俾，自己殺入去亦得、得咗。另一邊嘅拉舒福特同楊格之間有嚴重斷層：前者制空力有限，馬達又唔係好做到地波俾佢轉身跑，感覺就好似梗硬當佢盧卡古咁用，又點會湊效呢？
防線方面，相信連迪洛夫最近令唔少球迷改觀，其實佢嘅進步係預計之內。只要留意佢無球狀態下嘅視線同企位就知道佢嘅防守觀念同意識比起其他後衛好，而且佢敢用波，盡量做到個攻勢經中場組織而唔係盲目分邊/大斬，呢個先係曼聯當下最需要嘅改變，即使而家仍然會交失波但起碼態度正確。佢最大問題當然係單對單能力，包括起動慢、對抗性低等，但呢啲比較容易靠後天訓練甚至隊友掩護搭夠，相反佢潛在嘅指揮、領導防線能力就無幾多個隊友做到。
呢場波大部份球員都相信自己嘅判斷然後執行，此為有信心。誤判當然要反省，例如普巴同史摩寧兩個人都犯咗導致失波嘅失誤，但猶疑往往會令結果更加差，形成惡性循環。陣中有三個人因為失去自信而影響判斷同執行力，愈踢愈迷失，愈唔敢犯錯就愈犯錯，佢地係馬迪、盧卡古同埋拉舒福特，暫時就唔批評佢地喇，呢個時候就只能靠隊友將佢地拉返入真正紅魔鬼嘅世界。
[WKD手記] - 未解決
星期六晚同一班Royce Sports手足睇紅藍大戰，雖然未能夠全取三分，但下半場踢得咁生性都無令一眾球迷失望。摩連奴對衝突事件嘅回應成為賽後焦點，唔難感受到後者每次重返史丹福橋球場都承受住極大壓力，所以先會有咁大反應。再次見到曼聯上下半場判若兩隊，一隊係摩連奴想見到嘅曼聯；另一隊係係球迷想見到嘅紅魔鬼，幾時先揉合到兩種踢法呢？
近兩季失死球嘅程度令我諗起當年瘋狂輸死球嘅阿仙奴，好彩戴立已經無再踢英超，唔係玩手榴彈戰術都揼得入我地，有邊個會估到以防守見稱嘅領隊會教極都教唔好死球防守呢？普巴呢球難辭其咎，角球單檔戰術唔係咩新鮮事，相比起英格蘭喺世界盃果陣四五個隊友走埋一齊同後衛玩麻鷹捉雞仔，魯迪加呢球就頂得太輕鬆喇，難怪普巴都揼地發脾氣。電視台因為衝突關係無即時重播到，其賽二比二呢球一樣咁抵鬧。楊格望住喺空中嘅波，以為將會係史摩寧同基奧特嘅對決，完全忽略咗大衛雷斯喺佢後面準備衝頂。睇重播前我仲以為佢只係俾雷斯壓住所以跳唔起，但其實佢根本無俾過壓力對方，連身體接觸都無，距離勝利就係爭咗果二十秒嘅專注力。
即使落後緊一球波，曼聯喺上半場後段仍然嚴格執行賽前部署，就係任人控球。車仔今季機動性十足，三兩下就跑散哂曼聯條中場線，令高華積有好多空間入攝同串連，俾人直入中路都咪話唔驚。雖然外人難以理解但摩連奴就係要佢地維持踢法入更衣室，直到換邊後就見到中場同兩翼壓前，令阿朗素同艾斯比烈古達有所顧忌，順帶減低佢地喺兩邊帶嚟嘅威脅。馬仔今場展示射手本色，證明只要有輸送佢就能夠發揮作用，問題在於佢地由中圈開始就已經要參與控球突破，做呢類佢地唔擅長嘅工作反而容易令人迷失，睇到上半場福仔連過人都無哂信心同創意就知。當下諗到最直接嘅解決方法就係主動控球，等馬達同普巴等人可以有更多時間喺中前場餵波。
大家有無覺得曼聯而家踢得太斯文？我地未必會再有堅尼呢種悍將，但最少要敢出腳，去波要去哂。楊格雖然最近場場都踢得好狼狽，但佢深明輸人唔輸氣勢嘅道理。佢或者唔夠夏薩特好波，但即使慢咗出腳都要犯規攔低佢，只要令佢之後進攻時有丁點猶疑，心理戰上已經佔咗上風。現今數據計算精密，落場前已經知道對手優缺點，踢得聰明當然係好事，但心態先係以弱勝強、扭轉形勢嘅關鍵。如果楊格有一個原因值得做代隊長，唔係因為佢老、服務時間長，而正正係因為佢任何情況之下都會抬起個頭踢波。
[WKD手記] - 自救之後
「球員唔夠膽犯錯係件令人膽心嘅事。」李奧費迪南半場時咁樣評價曼聯，指嘅係佢地因為深怕再犯錯所以連適當風險都唔敢去冒，只係識踢最無侵略性嘅足球。隔住螢幕都感受到球員心裡面果種迷失，失第二球後拜利嘅眼神話俾我地知佢完全見唔到曙光，隊友亦唔好得幾多。失波總會有原因，唔會每次都係領隊責任，領隊幾勁幾渣都要班球員發揮水準先得。今場反勝佢地算係保住紅魔鬼嘅尊嚴同態度，但現場球迷都佔好大功勞，因為當無人覺得會追得返嘅時候，佢地反而嗌得最大聲。呢場波未必係反彈之作，畢竟仲有好多人事同戰術問題未解決，但就俾返少少希望球迷。
失果兩球都屬於低級錯誤，唔應該喺佢地身上發生，楊格同拜利當然要負上唔少責任，但中場掩護不足都係幾明顯嘅問題。第一球波源自中圈一個毫無威脅嘅解外球，考慮到普巴同麥湯美尼都係佢前面，後面果幾個隊友又無乜應變能力，馬迪絕對無必要撲上去殺波。或者佢判斷呢球波應該偷得到，但執行失敗就要付上代價，作為中場最後一人，呢下都算魯莽。自上季尾起馬迪已經越踢越差，除咗經常帶得太耐/格硬由後面帶上去俾人夾擊搶走，防守表現亦都一直下滑。今季佢好多時進攻都踢前半格，但效果不及其他中場創造型球員好，反而回防速度太慢以致反擊時中門大開。表現唔會呃人，一周兩賽對佢已經太多，所以先希望風格同態度近似嘅麥湯美尼可以盡快上位接班。值得一讚嘅係，佢通常係成個中後場最遲失去冷靜同判斷力嘅人，只係而家呢種踢法對佢嚟講太大負荷喇，專注做好防守可能更加維持到水準。
進攻方面，馬斯亞、福仔同盧卡古一齊出嘅話幾乎每次都睇到心累，因為好多時連射門都製造唔到，將攻勢終結於萌芽中。三鋒之間嘅配合仍然好差，極度依賴中場供應最後一腳嘅同時，中場又因為縮得後同偏重防守球員而組織唔到，追平一球都係因為普巴走到上去先同馬仔打到個撞牆，所以都要正視下前線選人呢個問題。自從連加特缺陣開始，中前場斷橋情況嚴重，而陣中只有馬達能夠做到佢嘅工作。用綠葉球員去形容佢地唔係咁適合，因為要將個波用最簡單安全直接嘅方法傳去危險區域，將攻勢由慢轉快呢個動作本身已經係一件難事，睇下呢幾場盧卡古無左身後人踢得幾辛苦仲要成日回防就知，所以佢地加埋靴里拉起碼要出到其中一個負責連絡中前場。
下半場入到三粒全賴大家肯壓前嚟踢，構成成隊得返一個正中堅嘅奇景，其餘中場互相補位爭取進攻機會。咁樣踢係好冒險，奇招出多兩次都會失效，但紐卡素見到曼聯來勢洶洶咪又係唔敢攻，最後曼聯受壓次數比上半場更少，呢個就係球迷希望曼聯踢得進取啲原因。無球隊會見到普巴前插到禁區頂位置而唔驚嘅，關鍵係一場波佢有幾多次可以咁樣壓上嚟而唔使輸反擊俾人鬧，同埋曼聯有無鬥心由第一分鐘開始主導比賽。
[WKD手記] - 三中堅非靈丹妙藥
經歷完無得再差啲嘅一個星期，摩連奴被炒風聲已經升到歷史新高。由莫耶斯年代開始已經明白到，一個領隊值唔值得留係在於球隊有無向正確方向前進同埋球員仲信唔信任自己，莫耶斯同雲高爾都係因為後者而離開。所謂唔信任唔代表球員憎你搞對抗，而係想像唔到自己執行戰術能夠達致勝利。一班唔知自己拍緊乜嘅演員，套戲仲可能靠後製補救，但係無NG嘅足球場上又點會踢得好呢？對韋斯咸就暴露出佢保守到極致嘅踢法有幾出事。
擺出一個以為無翼442本來都唔算奇怪，頂多當佢保守行先，始終後備夠攻擊手想換入都唔係問題，甚至乎我非常樂見麥湯美尼有得上陣，因為襯馬迪仲未退落嚟可以盡量响前輩身上學習。殊不知佢竟然踢右中堅，咁就出事喇：唔係佢應唔應該踢中堅嘅問題，而係絕對唔應該踢三中堅！對屈福特三中堅踢得好係因為對手兩翼能力較低，而且球賽由曼聯主導，踢三中屋屬於有驚喜但正確嘅判斷。韋斯咸兩位新球員安達臣同耶莫蘭高瘋狂攻擊兩翼衛同邊中堅之間嘅空隙，楊格同梳爾企位甚高但真正進攻次數同平時踢邊衛一樣，甚至有啲進退失據，證明人地用兩個人牽制住我地四個人，咁你話邊個著數？失第一球正正係麥湯美尼俾人捉身後。
若果控球權一直喺我方嘅話翼衛先會放心上去攻，事實係除咗上半場中段有十五分鐘比較主動控球之外，基本上都好少俾壓力對手，唔睇比數以為贏緊添。一個截圖就已經理解到個情況有幾嚴重：當時曼聯已經落後緊，但竟然任由韋斯咸班中場同兩閘控住個波慢慢做。馬蘇亞古、賴斯同盧保波底唔係特別好，就算唔係直接搶走佢地個波打反擊，只要俾返少少壓力已經足夠令佢地踢得無咁舒服同做錯決定，有乜可能過咗中圈仲俾成格草皮人地帶波？掉返轉到曼聯控球嘅時候，盧保都唔會俾普巴輕鬆多過五秒喇。
另一個奇景同樣發生喺防守狀態上，六人防線究竟想防啲乜嘢？阿奴杜域唔係甸尼，韋斯咸亦唔會淨係餵高波俾佢，何需放咁高佬係後面？咁樣擺陣可能瓦解到攻勢，但後遺症係完全打唔到反擊，因為中場無哂人。韋斯咸今場贏好多第二點唔係因為佢地搶得好，而係因為我地根本無人爭。好似下圖咁當高波頂返出嚟，第二點一定係鎚仔幫人多，甚至當後面六個控到個波落嚟最後都會因為散唔切而焗住向前大斬望盧卡古同馬仔喺前面可以控多幾秒。
呢兩個好明顯係戰術指令，因為班球員好嚴格咁一直執行到轉返442為止，而且前幾場唔係咁踢。進攻可能係最好嘅防守，但防守係進攻嘅起點，所以今場都無乜攻勢值得分析。曼聯有好多球員係要有控球先識進攻，或者話需要保持球感先發揮到實力，尤其係馬、福同普巴呢類型球員。仲記得對年青人一役，領先二比零果陣有好幾個反擊機會由馬、福同盧卡古去處理，結果個組織差到連射門造唔到。最後三比零果球就係要普巴帶波交出最後一腳俾馬仔先有個半單刀機會。憑呢啲都觀察到佢地嘅判斷力已經俾信心同士氣所影響，呢個時候仲有邊個可以拯救鋒線呢？
[WKD手記] - 變變變
屈福特季初四場全勝令人眼前一亮，狀態飄忽嘅曼聯自然唔敢輕敵，尤其而家每場都有基本要求：一係贏波一係踢進攻足球，兩樣都做唔到就即刻敲起換帥警號。利物浦全場壓住熱刺嚟踢又係贏一球；我地踢得不過不失又係贏一球，勝負之分就喺可以爭咁少，而我地呢三分最後由迪基亞係袋口執返嚟。由下半場睇得出解放中場後嘅弊端，唔難明白摩連奴點解一直都咁抗拒進攻中場，但哭笑不得嘅係佢真係無退路，時勢迫佢一定要跳出保守觀念，險中求變。
今季微調甚密，每場攻守都有不同理念、戰術，作為球迷當然大開眼界，更令人佩服嘅係班球員執行力提升咗好多，落到場全部都好清晰自己定位同工作，唔會俾人“成場唔知佢做過啲乜”嘅感覺。今場最有趣梗係費蘭尼踢變型中堅/防中，防守時只要有任何疑似長傳，佢都會直接搵甸尼同格雷嚟守，以防佢地有任何衝頂機會；進攻時一對中堅會平排散開等佢去分波。因為上半場嚴格執行踢法所以留下好深嘅印象，單單係肯平排三中堅已經令傳球選擇大大增加，缺點係持球者只要出錯一次就等如中門大開，所以身型瘦削嘅佩利亞幾乎唔可能搶到呢個位置。戰術對兩邊中堅嘅走動要求高，好多時費蘭尼會刻意等埋中堅上嚟先開始組織攻勢，所以節奏偏慢。兩閘企得好前但又唔夠侵略性，情況有如熱刺進攻時老鼠拉龜一樣，甚至好容易俾人放對角過頭波，楊格有好幾球睇落似失位但其實係戰術效果。毫無疑問前場人多能夠壓制到對方，加上普巴上半場發揮出水準，領先係合理嘅。
戰至六十分鐘，呢種戰術漸漸走向崩潰。踢完國際賽令體力下降當然係原因之一，屈福特下半場踢法非常直接，瘋狂爭頂之後曼聯即使有反擊機會都因為轉數趺、隊友跟唔切而白白浪費。更大問題係上次提及嘅中場工作量過高：今季普巴同馬迪都可以上去進攻，但防守要同以前一樣效率。有控球權還好，回防唔切果陣就要費蘭尼上去補位，放棄掩護中堅嘅職責，甚至乎要用返連迪洛夫做波。兩閘同樣愈踢愈辛苦，華倫西亞近乎爆炸嘅情況下要盧卡古返嚟幫手，仲特登換埋麥湯美尼去支援佢。究竟係班球員體力未回復，還是係上半場嘅踢法本身就預支體力？相信要再對高Q大棍型球隊先知道，因為曼聯絕對唔會用呢個陣去踢啲有快翼嘅球會，否則兩閘必然出事。
最後必須譴責馬斯亞，單憑二十分鐘嘅表現就足以了結佢喺曼聯嘅生涯。反擊處理得唔好、走位麻麻呢啲尚可以歸咎於出場時間少，但佢唔追波令馬迪要做代罪羔羊就無得抵賴。哪怕佢全速回防都追唔到個波，馬迪起碼可以選擇拖延進攻而唔係格硬犯規。早一個月，32歲嘅朗尼係第96分鐘做Last man，攔截完再交出助攻。球迷可能有千百個原因去解釋係曼聯對佢唔住先，但作為一個職業球員落場盡力踢係唔應該要原因嘅。朗尼都大唔過球會，你呢？
[WKD手記] - 差少少的奇招
曼聯好耐都無試過喺主場淨吞三隻蛋，摩連奴被炒嘅呼聲越嚟越高，嚟緊呢三個月每一個比賽日都可能係佢嘅最後一場。大敗，但無乜人會否認呢場係開季以嚟曼聯踢得最積極嘅九十分鐘。輸比白禮頓會嬲係因為以呢個陣容唔應該踢得咁消極咁無冒險精神，相反今場輸到三比零嘅時候球迷仍然大聲吶喊唱歌，正正表達咗佢地支持球隊放膽去攻嘅聲音。當醜陋都拎唔到三分，摩連奴又四面受壓，曼聯就無唔進攻嘅條件。大方向正確，但輸個人質素，你地又點睇呢？
單單係出場陣容已經夠哂大膽，點知落到場仲有驚喜。原本以為放棄邊路進攻轉踢鑽石型442，原來係352先真，更令人估唔到嘅係右中堅竟然係靴里拉。呢位通天老棺有活力有智慧又肯搏殺，單單講後防控球時佢跑住拉邊現位已經好過拜利，甚至以身作則咁示範咗後衛要夠機動先可以將個波盡早送上前場。可惜中場球員轉踢後衛必然會出現一個問題：反越位意識薄弱。面對快攻佢出於本能地想回防補位，但注意到已方人少防線高嘅中堅決定壓前擺越位陷阱。呢個失誤導致第二個失波都唔怪得佢，畢竟華倫西亞轉踢咗後衛咁多年都仲係會包越位，唔係咁易㗎。喺度必須強調呢個變陣屬於奇招，未來其他球隊將會有所準備，相信淨係放個英式高大前鋒專攻靴里拉已經好頭痕，所以長遠嚟講未必喺上計。
今場戰術執行得好好，團體性好強，偏偏三個失波都係輸個人質素。簡尼頂入一球咁乖巧嘅波令人心服口服，起碼唔係因為鐘斯走漏俾人任頂。兩人生涯發展大不同，後發先至嘅簡尼已經成為英人第一中鋒；鐘斯早早成名但就一直被傷患影響，呢球鐘斯已經盡跟，但嘗試起跳時已經俾簡尼上身嘅力完全壓倒，可以想像到果種失望同無力感。其餘兩球都無須多解釋，包括埋連迪洛夫嘅三個半中堅都各有不足﹐確立咗摩連奴夏季求購中堅嘅理由。再望下收購目標之一嘅艾達韋特點樣殺哂啲波，同曼聯班後衛形成強烈對比，呢場波實在夠哂諷刺。
盧卡古再次失機成笑柄，問題又回歸基本︰正選踢得唔好但又無後備頂佢個位，領隊同球會都要負責任。今仗三個中場中都幾多空間發揮，只係連加特下半場受壓令觸球次數減少，費特除咗最後一腳差啲之外係進攻上都幾有位置感。梳爾同華倫西亞踢得唔錯，即使無經常落底但都傳到幾腳有威脅嘅early cross。今場二十個射門裡面有唔少都係大機會入波，同平時啲浪射唔同，係真係有組織有空位先射。
未來仲會唔會咁進取要視乎摩連奴心態如何，當下難題反而係球迷接唔接受到佢同時棄用山齊士、拉舒福特同馬斯亞呢？而且352作為一個必須主攻同搶控球權嘅陣式，似乎好難可以係客場發揮作用，對手只要成功壓迫兩翼就已經令我方中場做唔到overload嘅效果。無論如何，嚟到第三季我認為球隊有兩套踢法嚟應變係好基本嘅事，希望我地盡快搵到Plan B，否則不停要啲球員轉位其實係害咗佢地。
[WKD手記] - 久違了的最差
全失三分近幾年已經唔係新鮮事，但輸到見唔到反勝曙光又係另一種層次，對上一次場波都未踢到一半就有絕望感已經要數到一二年作客俾紐卡素大炒三粒，當時仲係費爵爺教緊。我都算係相當包容嘅球迷，但今場真係由球員到領隊都要鬧，因為唔係令人失望咁簡單，直頭係唔值得球迷入場嘅表現。
本身排陣出楊格踢右閘係個無可厚非嘅決定，事關達米安上場都俾人爆到死死下。問題在於佢好多波標得太前，同整體防線距離太遠，以致身後嘅拜利要同時兼顧左右兩邊嘅過頭波，成條防線得一個人想壓前係無用㗎。至於中堅就絕對係輸波罪人，連迪洛夫第一球難辭其咎，一個好典型嘅走遲半拍就俾梅利攝咗前柱彈入；第三球當費特係中場失去控制權俾人打反擊時，拜利因為要盯實右邊嘅梅利，根本無可能控制到越位線，但連迪洛夫就嘗試衝出嚟令哥斯趺落越位陷阱，呢個連環失誤間接令拜利喺禁區入面犯規。除咗呢兩下之外，我認為連迪洛夫係各方面都有進步，最少肯積極配合迪基亞開短波，唔輕易放棄喺後面開始組織攻勢嘅機會，正式踏上用波型中堅之路，要追上全盛史摩寧非難事。
拜利今場可謂露哂底，不幸地確立咗我一直都認為佢被高估嘅理據。第一球佢其實唔一定要立即包楊格個位，因為費特已經回緊防理應可以限制對手進一步帶入禁區，自己企好危險區域清波就足夠。如果呢個只係佢唔好彩選擇錯誤咁都情有可原，但留意咗咁耐唔難察覺佢只看眼前波，不顧身後位。放返喺呢個情況，其實佢好可能無衡量過等費特補位會唔會比較好，因為佢根本睇唔到呢個選擇。今季開始佢開始踢Last man同埋指揮越位線，熱身賽對祖雲達斯失過一球破越位，今場更加睇到好多過頭波喺斬起咗佢先開始搵自己要mark嗰個喺邊。最後就係佢連走位都比以前懶惰，迪基亞控住個生波時佢竟然可以慢條斯理咁行幾步先發覺自己要拉邊，但對手一早迫到埋嚟喇。呢啲看似"好少事啫"嘅細節，最後就會變成出一個球員實力同潛力嘅差距。大局觀比起個人技術更緊要，因為前者唔會隨年紀流逝，仲會令一個後衛係體能下跌時仍然調節出適合自己嘅踢法。
進攻今場大可以拉埋一齊簡單講，不要分那麼細，個個都踢得差。差不在個人技術同發揮，而係心態。踢到下半場幾乎每個進攻球員都投訴判決，心裡面果種迷失愈滾愈大，仲傳染埋自己友，情況就等於尼馬最渣嘅時候就係佢不停投訴、插水而唔係每球都專心去盡咁。
進攻毫無部署可言，責任自然落喺摩連奴身上。第三季喇，我唔係要求曼聯踢到曉飛，但如果進攻同Day 1一樣嘅話，你點說服球迷我地係進步緊？佢講過當佢隊曼聯不變應萬變或者作出嘗試而失敗都會被狠狠抨擊，可能佢其中一個新嘗試就係用上場踢得唔錯嘅佩利亞而非高大嘅麥湯美尼繼續打單防中，效果喺預料之內︰上場個個掛住拍普巴同費特所以先俾到空間佩利亞用波，但作客波就好難唔迫你。
好多朋友都問過我點解摩連奴教到啲進攻咁難睇，有機會再解釋呢個幾乎不會被解決嘅問題，在此奉上一張睇到我R哂頭嘅現場截圖，呢個神秘三角型幾乎放到每日150個單程證來港人士。
[WKD手記] - 不敢樂觀的一季
呢篇文章早就喺世界盃前諗好，只係估唔到經過咗咁耐都無任何收購行動，所以我嘅觀點亦無改變過。摩佬有樣嘢講得好啱，就係熱身賽絕無意義︰頂多提升到呢班後備或邊緣球員嘅狀態，但對來季踢法同戰術無乜啟示同影響，因為我地心裡都知道當世盃球員回歸後佢地又會長任正選，而家呢班大部份都會坐板凳坐到無哂狀態。最斃係熱身賽仲要踢到一塌糊塗，只會更加難俾到信心摩佬去起用佢地。領隊都要負上責任架，因為無意義得嚟佢又唔利用呢個無傷大雅嘅機會去試一個啱佢地嘅陣式，而係要呢班用得嘅球員踢佢果家波。
點解啱啱完季就覺得下季會出事？係因為世界盃。眾所周知摩連奴最大缺點就係輪換能力差，拎冠唔拎冠都好，成季踢極都係果十六、七個球員，其他球員就算有出場機會你都唔會覺得佢地喺最佳狀態，俾人一種正選同後備差距好大嘅感覺。摩三季呢個魔咒同球員體能下跌有莫大關係，加上主力球員今年要踢埋世界盃先休息得三個星期，試問又點可以唔擔心來季表現呢？
完季我第一時間諗嘅係曼聯咩位置最需要增兵，果一刻嚟講絕對係兩閘同中鋒。首先兩閘年事漸高，要不是左楊右華本身屬速度型又操得夠弗，可能已經俾英超淘汰咗。就算當年實力不俗嘅伊雲洛域同高拉洛夫，只要運動神經稍稍退步就已經醜態盡出，量你有幾好路數，踢閘位就係咁殘忍。老實講，華倫西亞臨近季尾都開始回塘，只係佢好聰明咁少咗上去助攻所以無乜犯下大錯，但球隊唔應該再依賴佢踢哂成條右邊。曼聯好迅速咁買咗迪洛特，暫時未有機會睇佢實力同適應性如何，但怕且都唔係期望呢個上季踢得六場葡超嘅十九歲仔可以即刻勝任正選掛？左閘既然無買人就等於俾機會梳爾上位，撇除同領隊嘅關係，佢攻守決定做得差係不爭事實，做唔做到冧巴溫左閘就真係要靠佢自己喇。睇埋熱身賽可以預計到季初會先俾達米安同梳爾上陣，不過兩個明顯一個踢唔掂翼衛一個踢唔掂邊衛，仲未計班中堅識唔識踢三後衛添...
有盧卡古果陣就話佢波底差曬料，無果陣我地就更加無進攻瓣數，所謂嘅Plan B其實就係天才波。咁講唔係為魔獸護航，而家道出摩帥要踢柱躉先得嘅死穴。正當我以為買中鋒係夏天主要工作，熱身賽期間摩帥反而將山齊士推埋中間踢單前鋒都唔變陣，除咗人腳之外其實戰術上無乜郁動。新一季拉舒福特雖然著十號，但似乎進入咗撞板期，依照近況應該唔會踢得到單前鋒，可能回歸左路吧。至於馬斯亞就算吧喇，無論係關係同足球理念上佢同摩連奴都唔咬弦，是但一個走人似乎係時間問題。
睇過中前場就明白點解熱身賽無意思，淨係拎贏皇馬果場嚟講，呢種入波已經好低機率係英超度出現，因為全英超都覺得曼聯而家唔識攻、死球又唔集中，只要後面放九個人打穩守突擊就已經有勝算，又點會俾咁多空間你跑呢？而且摩連奴本身又有一套用人方針，面對英超球隊硬橋硬馬嘅踢法，真係好難想像佢會擺西甲回流嘅佩利亞踢墮後中場，尤其係中間已經有新入魔嘅費特、普巴、連加特、麥湯美尼等等一係勤力一係高大嘅球員，我就寧願佢踢兩邊向風格有啲似嘅馬達取經喇。
點解唔提馬迪？因為我大膽假設佢會慢慢兼任第三中堅。上季季尾已經從變陣中見到端倪：球隊落後焗攻時經常見到佢落一格踢中堅，等兩閘壓上前變352/361。現階段後防仍欠缺有視野同足球智慧高嘅統領者，加上麥湯美尼吸收得幾快上位有望，如果中場生性嘅話真係頗有機會見到佢轉型架。
