[K11出品] 曼聯K角度 – 劣勢下踢出紅魔精神, 取得3年來第一個冠軍獎盃!

We’re United, 雲高爾終於成功帶領曼聯取得執教２年來首個冠軍，同時，都可能是佢旗下唯一一個冠軍了！雖然開心，興奮，但同時也要冷靜一下，這場決賽，其實踢來表現不算好，而個別球員也較沉或失準，幸好，也有個別球員於關鍵時挺身而出成為救世主，當中有直接的入球功臣，也有無名英雄！就等我Ｋ１１帶大家再次回味這場高山低谷後的足總盃決盃！

 決賽大軍於賽後有段小插曲，由於迪比未能進入１８人大軍，於練習後把自己的波boot送給護維員後離開，此子真難教！回到大軍當中，由於多名球隊主力也已經康復，餘下能進入此決賽的大軍當中的青年軍球員就只有拉舒福特，連加特！而正選方面龍門當然是迪基亞，後防由右至左分別為華倫西亞，史摩寧，白蘭特，洛荷，防中為卡域克，停賽復出嘅費蘭尼與朗尼握手中路！前線由右至左分別為馬達，拉舒福特及馬素爾。

龍門嘅迪基亞今場於９０分鐘法定時間內其實要作出撲救機會不多，可惜７７分鐘，水晶宮一次角球攻勢後突破越位，賓捷安窄位抽網頂入網一球，此射門的確精彩，迪基亞也無能為力！而於加時階段，迪基亞便顯示出為何今季能保持多場聯賽零失球的威力，１０１及１０６分鐘作出重要撲救！否則相信也不會出現１１０分鐘，連加特的世界波反勝球出現！

後防方面，先說華倫西亞，由於水晶宮的攻擊球員主要集中在２邊邊線進攻，令華倫西亞未能像上場聯賽般放肆助攻，其實也大大減慢了曼聯進攻的步伐！當然，仍然是有質素的，６０分鐘的傳中球便差點令馬素爾嘅頭鎚轉化成入球，可惜中柱不入！而８４分鐘的邊線硬射，楊格也差點於混戰中取得甜頭！最重要的助攻卻出現在１１０分鐘，全靠華倫西亞助攻傳中下，皮球才有機會落到連加特的火箭口中！

左閘嘅洛荷，其實今場表現一般，更不下一次被水晶客球員爆過，不知是福還是禍，６６分鐘因傷由達米安入替！入替後嘅達米安，其實之前也顯示出於左閘位置有點不穩，不過意大利球員始終於防守有一定質素，入替後未有如洛荷般讓水晶宮進攻球員任爆！未有奇功，卻無大錯！

中堅拍擋方面，先說白蘭特，似乎柏祖也做足功課，當白蘭特取得皮球後，水晶宮球員不讓其太多時間思考，馬上作出壓迫，此舉令白蘭特可以從後場放出穿越球的機會及能力大減！而同時也取得意外收獲，３４分鐘沙夏便於３閘線附近迫甩白蘭特皮球後成半單刀，白蘭特又拉又扯也未能得逞，幸好犯規不成，卻為今仗一名無名英雄建立了舞台！朗尼由中圈火箭般跑回，令沙夏完全沒有射門的機會下，將皮球解圍成功！白蘭特，你好彩了！其後白蘭特也未敢再冒險下，此等危機也沒有出現！不過水晶宮球員放長波的時候，也是尋找白蘭特的位置去，這是正常不過的！攻其弊是也！

另一中堅史摩寧，繼上仗意外烏龍令迪基亞失卻金手套獎項，今仗再來紅牌！不過此紅牌是有意義的，當時水晶宮球員正準備快速反擊，史摩寧因被保拿斯轉身後，拉跌保拿斯，後防當時只餘下白蘭特，以水晶宮的進攻球員速度，絕對大機會被水晶宮出現２打１情況！此時，史摩寧唯有職業犯規一拉，球証也作出相應動作，黃牌一張！２黃１紅離場了，此時加時上半場也完結！除此之外，今仗史摩寧雖未有一夫當關嘅感覺，卻踢得平穩！

防中方面，由於舒拉達連狀態未足，卡域克上陣了可能是其職業生涯最後一次足總盃決賽的賽事！此場賽事踢來穩定，未有因其年紀與速度下降而為曼聯帶來危險！相反於加時下半場，一次助攻接應馬素爾傳中，卻差點把皮球銅頭一頂應聲入網，可惜。。。。。。只是柱邊出界！

中場中方面，由於此場為決賽賽事，已可推測雲高爾會帶點一向的保守，加上要令水晶宮前線啞火，令其中場嘅卡巴耶也是關鍵，加上充分的休息，所以費蘭尼此仗重回正選陣容是預期之內！而且費蘭尼的出現，代表曼聯於高空有一定優勢下，也明買明賣地為費蘭尼提供機會，２４分鐘便有一次角球頭鎚攻門可惜不入！而５３分鐘一次後上接應拉舒福特巧妙傳球下狂抽可惜中柱彈出，今場表現絕對令季中轉會窗時，一眾認為費蘭尼要離隊他投的批評者收口！

另一中場的朗尼，３０萬鎊周薪卻換來不成正比的前鋒表現，可以說是今季朗尼的縮影，不過到了季尾，拉舒福特的極速彈起，馬素爾穩如泰山的正選！朗尼也只好面對現實，回中場中，按著前輩史高斯的道路！而季尾的多場賽事，也顯示出朗尼能勝任此位置！今仗更加踢出今季代表作！開賽15分鐘便放出一球斜直線予助攻的洛荷插入禁區可惜洛荷攻門無力! 34分鐘的火箭式回防，相信沙夏萬萬估不到今季的朗尼回防速度可以咁快! 而且落腳準繩，雖然鏡頭看起來有點灰色地帶！其後也多次於中場位置作出搶截，左右分波及引球推進，令曼聯中場可以維持生氣！

７７分鐘的時候，曼聯被水晶宮攻入一球，形勢真的危險了！３分鐘後，此時此刻，年輕時期的朗尼回來了，由三閘線開始推進，扭過３個敵方球員，似禁區邊看似尋找機會射門，不果，被封窄了角度，會笠射嗎？也不是，然後把皮球帶到底線後，盡力傳中，有腰力喎！皮球落在費曲尼處，心口一控，馬達一射！追平了！當大家也衝到馬達或費蘭尼處的時候，鏡頭也一轉到了他們處，可能忽略了無名英雄的朗尼，但眾人的眼光是雪亮的，朗尼你的功勞沒有白費！舉起獎盃的一刻，你是隊長，是實至名歸的曼聯隊長！！！！！

進攻球員方面，右路嘅馬達，由於今場華倫西亞被壓制下，馬達於右翼表現跟季初時曼聯自廢右翼的情況類似，幸好馬達也懂得自動波的周圍走去拎波踢，不過所造出的攻勢不多，幸好於關鍵的時候就能造出關鍵的作用！８０分鐘的他出現在對的位置，與費蘭尼沒有誤會下造出對的事，一射入網為球隊快速追成１：１。接近９０分鐘的時候，雲高爾將今場另一關鍵球員連加特入替馬達，入替後的連加特，說真的，沒有甚麼建樹可言，不過也估計到雲高爾換入連加特的用意便是於加時期間分高下！結果連加特也於１１０分鐘，也是其今場唯一射門便一支火箭般將皮球送入網！可能這只是一記幸運的射門，但好波不如好運是真理。。。。。。。各位反曼的球迷，葡萄不了的！

正前鋒的拉舒福特，７２分鐘便由楊格入替，沒有突出表現，沒有威脅攻門，表現差嗎？我Ｋ１１不這麼認為，於前場作為一個控球前鋒來說，最重要是把中後場的傳球停於前場，為後援作出時間助攻，而拉舒福特當接應傳球後，多能把皮球順利控定或傳交回隊友處，而且聰明的小伙子於５３分鐘一個簡單的二傳予費蘭尼射門，可惜中柱不入，這傳球不容易的。入替後的楊格，先任正前鋒的位置，尋找空位及等待傳球，不過始終不是現在的楊格最擅長的位置了！加時的時候踢右左翼，感覺好一點，好也勤力的於左後防處助守！

馬素爾呢？其實今場馬素爾也有不少機會，不過樹大自然招風，現在有誰不知道馬素爾是誰呢？結果被多人看管下，未能尋找具威脅攻門，不過仍然有突破及傳送的機會！差點便為卡域克提供一個靚絕助攻。

到了戰術分析，其實今場雲高爾可以說是我Ｋ１１看到雲高爾執教２季曼聯以黎，最快速作出對應的賽事！首先是賽前排陣，先不說執著的白蘭特中堅位置加開角球，用卡域克便可以減低一旦白蘭特被施壓而沒力放出穿越球的情況，而費蘭尼則能令曼聯中場變得硬淨，未致於玻璃般被攻破，當然這也是冒險的，差點便被沙夏致於死地！而洛荷的不穩定，也於洛荷有輕傷的６６分鐘便換入達米安！各位讀者可能覺得，受傷才有此換人，可以這樣說，但其實雲高爾也可以換入鐘斯（白蘭特轉到左閘處，以其速度，將會同樣被屈爆）甚至又黎玩野地換入楊格！最少，這是正常不過的換人！

而拉舒福特的傷出換入楊格，可能大家又認為玩野嗎？其實，加時的時候，馬素爾已經轉到正前鋒了，這樣一來，維持左翼的效能，馬素爾也重回前鋒位置！我Ｋ１１說的，不是雲高爾如何高招，而是，其實雲高爾也不是這麼硬執著的！其後於９０分鐘的時候換出馬達，換入連加特。。。。。。有無讀者害怕１２碼時怎麼辦？我Ｋ１１好像馬後炮的說出雲高爾就是要加時內決勝負，所以換走馬達，以楊格，馬素爾，連加特，希望於加時以左右２翼拉出水晶宮後防的空間，期望一招解決水晶宮！當然地，史摩寧的紅牌絕不在此預計之內，其實這也只是我Ｋ１１估計雲老頭子的戰術安排而已。。。。。。

我Ｋ１１不知道雲高爾是否仍有多久為曼聯領隊，但只知道，經歷了這２年的時間，雲高爾有著老頭子的執著，但同時也有其和藹的時候，如果真的是這麼難與人相處，何解可以與一眾年青球員有著不錯的關係呢？姑勿論雲高爾令曼聯下季沒有歐聯資格，但同時也為曼迷帶來了這３年間，一直沉寂的奪冠細胞，可以再一次興奮起來！

多謝各位支持小弟Ｋ１１今季為大家帶來的文章，與及支持文字直播及即討區的朋友！希望足總盃是後費ＳＩＲ年代的第一個新開始，獎盃繼續捧！

牛扒仔同你評一評：水晶宮 vs 曼聯

作為唯一一個能夠爭冠既機會，曼聯上下當然希望奪冠結束呢個吾愉快既賽季啦！120分鐘既比賽雖然係上半場係威係勢，但係都無功而還，反而仲被對方一次死球攻勢趁亂偷雞成功；曼聯一路隱藏住既魔性終於係呢一刻被激發岀黎，追平之餘，更係加時踢少1個既情況成功反勝。舊將新兵既齊心協力，為曼聯帶來費格遜退休後既首個，亦係12年來第1次攞到既足總盃錦標，曼迷們，感動嗎？

正選陣容 (4-1-4-1)：
                            迪基亞
華倫西亞     史摩寧      白蘭特     洛荷     
                           卡域克                                            
 馬達       費蘭尼       朗尼       馬素爾
                          拉舒福特

入球
水晶宮：賓捷安 78’
曼聯：馬達 81’  連加特 110’

扒仔心目中曼聯最佳球員：朗尼--8.5分

正選評分
迪基亞 (David De Gea)--6.5分：表現依舊屬於定海神針級數，扒仔見到佢幾次高空波都接得好穩，失波只因對方賓捷安射得太靚，加時下半場擋岀基爾既半單刀尤為關鍵。

華倫西亞 (Antonio Valencia)--6.5分：防守上被之前幾仗多瑕疵，對方保拿斯為佢帶來麻煩；而進攻上則延續上幾仗既強勢，多次與馬達配合落底岀波，反勝既一球亦係來自佢既傳中。

史摩寧 (Chris Smalling)--6分：今仗狀態的確有跌watt，亦吾夠冷靜，冇左之前大佬寧既感覺；加時既第二面黃牌尤其不智，根本冇必要係中場位置就攬跌對方保拿斯。如果曼聯吾係成功反cup，扒仔相信佢會成為千古罪人。

白蘭特 (Daley Blind)--6分：扒仔依然對雲高爾將佢擺係中堅有點不滿，今仗亦與預期一樣差點做左後防炸彈，上半場差點被對方沙夏成功偷雞，不過少踢1人後佢協助球隊穩住中路值得一讚！

洛荷 (Marcos Rojo)--5.5分：復岀後又再度傷岀真係吾好彩，但以佢今日既表現實在不敢恭維。對對方沙夏既發難佢完全冇辦法，令沙夏多次威脅到曼聯大門，進攻上既貢獻亦少之有少，傷岀後被達美安入替。

卡域克 (Michael Carrick)--6分：極有可能係佢為曼聯岀戰既最後一場比賽，表現吾算好突岀，甚至有點減慢左進攻節奏，有好多橫傳，但佢總可以係適當既時候係適當既位置岀現，為球隊化解搶斷危機，尾段亦成功靠意志挺住了曼聯既防線。

馬達 (Juan Mata)--7分：扒仔見到佢係右路非常活躍，經常持球組織並與華倫西亞組職，係隊長朗尼以外既進攻重心；追平既一球雖然吾係咩靚波，但亦顯示岀佢既進攻意識，適當地岀現係費蘭尼隔離，並將曼聯從輸波邊綠拉返黎，隨後被連加特入替。

費蘭尼 (Marouane Fellaini)--6.5分：停賽3場後復岀，曼聯整隊既制空能力立即提升左吾少，上半場佢其實有吾少機會可惜都未能把握；追平一球充分顯示岀佢上半身既控球能力。

朗尼 (Wayne Rooney)--8.5分：30萬鎊既周薪，終於係呢兩場打岀身價。除左分邊之外，扒仔見到佢多左中間既直傳球及射門，並且冇多餘動作；落後既隊長1個扭過對方3個並作岀傳中成功追平；此外，當後防失誤後佢永遠係第1個去補位，白蘭特上半場既失誤就係其中之一；咁樣既隊長叫人怎能夠吾愛佢呢？

馬素爾 (Anthony Martial)--6.5分：相比起其它隊友，佢既表現就相對沉寂，突破機會吾多，射門機會都未能把握，尤其是上半場拉舒福特突破後傳中既一球。不過這亦代表曼聯希望減少對佢既依賴性。

拉舒福特 (Marcus Rashford)--7分：扒仔非常滿意佢既表現，作為一個正前鋒，雖然冇爭取到入波，但佢為隊友鋪橋疊路，尤其下半場係右路多次突破為球隊爭取機會，隨後因傷被楊格入替。

替補評分
達美安 (Metteo Darmian)--6分：入替受傷既洛荷，明顯比洛荷既位置感好，對方沙夏再冇咁易落到底，轉踢中堅後亦頗穩陣。

楊格 (Ashley Young)--5分：入替受傷既拉舒福特，踢前鋒時有點碌碌無為，轉踢左翼後威脅增加左吾少。

連加特 (Jesse Lingard)--6.5分：入替馬達，係前場好氣好力係咁跑，半窩利奠定勝局既一球更令扒仔拍爛手掌。

今仗過後，曼聯完成今季所有賽事，雖然有點缺憾，但扒仔亦感謝曼聯上下既付岀，亦祝願所有將會離開既領隊球員好運。扒仔堅信下季曼聯一定會強勢回歸！

[K11出品] 曼聯K角度 – 勝利謝幕迎接足總盃

雲高爾的確喜歡給人驚喜，４日後便要進行足總盃決賽，加上今場英超賽果沒有特別的重要主義，估計會派上副選出場，可是卻仍然維持強陣出擊！幸好今仗未有球員受傷或因此停賽，而且成班球員踢落寓賽於操，當然對手也是風流波狀態！結果今場波，上半場全場悶戰，但下半場，昔日的曼聯感覺有點回來，多次組織下大勝３：１！為今季英超聯賽的主場謝幕戰以勝利作結，可惜嘅因為史摩寧完場前２０秒的烏龍球，令原先迪基亞與施治瓜分的金手套獎項失守，失望而回。無論如何，以勝利謝幕來迎接足總盃決賽都是美好的，等我Ｋ１１同大家一齊來作今季英超的結尾吧！

出場陣容為迪基亞，華倫西亞，史摩寧，白蘭特及波夫域積遜，卡域克，馬達，朗尼，連加特，拉舒福特及馬素爾。與周日原先賽事相同陣容出戰！

龍門嘅迪基亞，今場波出得場，就要保持不失，才能與施治共享今季英超金手套獎項，而且般利矛夫嘅攻勢非常疲弱，全場只有６次射門而且得１次中框。。。。。。。。。。偏偏，一次射門卻是由隊友史摩寧於完場前２０秘出現，般利矛夫最後進攻下，於曼聯後防左路傳入禁區，半傳半射下，說時遲，哪時快，史摩寧右腳一伸，迪基亞面時一黑，３：１，就這樣，迪基亞，下季再來吧！

後防方面，先說左路嘅波夫域積遜，今仗頂替洛荷下，表現正常，助攻一般，防守平穩，只是這樣，５６分鐘嘅傳中急勁而且落點極具威脅，可惜無人衝門而已！不過始終經驗及走位未夠靈活，其實今場般利矛夫右閘已經相當多空位出現，我Ｋ１１睇直播時，看到馬達或朗尼於左路控球搵人交時，等著等著波夫域質遜會走入右閘盲眼位，等了又等，畫面再看，原來佢卻仍然企定定的在左邊邊線等接應！如果可以多作此類直接劏穿後防嘅傳送及走位，威脅會好大，要記得朗尼以往也不時交這類波給艾夫拿，而馬達也擅長交此類直線，所以不是傳送者的問題，而是走位者的反應！

右閘嘅華倫西亞，經歷上仗敗於韋斯咸一仗的低沉表現後，今場表現極速反彈，多次於右路爆破成功，而且５９分鐘禁區外嘅遠射直飛死角，可惜被對方門將飛身救出而已，但助攻力強橫嘅佢，於７３分鐘接應朗尼吊入禁區嘅傳送後二傳拉舒福特射入成２：０！今仗表現非常神勇，但願此狀態能帶到足總盃決賽！

中堅拍擋方面，其實今場受壓不大，偶有嘅攻勢都輕易瓦解，就是除了史摩寧最後的烏龍球！不過我Ｋ１１想特別講講的是白蘭特於今仗對手前鋒壓力不大下，其實佢相當冷靜，而且繼續交出不少穿越球來串連中後場，甚至前場！如果下季白蘭特有幸重返曼聯防中位置，相信會有一番大作為。。。。。。。。。。。。

防中位置由於舒拉達連病了，卡域克是不二之選了，而且今仗由於對手壓力不大，其所用體力也不多！當然最為亮點自然是５４分鐘於禁區外嘅遠射中楣，此腳射門有著年輕時卡域克的風範，可惜未能全功！看情況，決賽似乎仍然是由卡域克出任防中的了。

雙人中場中方面，先說馬達，剛剛落選西班牙歐國盃陣容嘅佢似乎未受影響，表現搶鏡，多次做出致命組織嘅傳送，４２分鐘與馬素爾撞牆後造出第一個入球，而下半場初段馬達便於禁區內漂亮控定傳送再轉身被跌踢，可惜球証無表示！英超球証。。。。而５８分鐘再於進攻右路，飛盡落底線傳中，６１分鐘於禁區頂一ＣＵＰ後，可惜右腳射門被救！及後於６５分鐘犯規領黃，今次雲高爾醒目了，７５分鐘由靴里拉入替馬達！入替後嘅靴里拉表現繼續沉寂，只以今場比較，馬達於場上嘅作用比靴里拉更大，未知是否受落選歐國盃陣營影響，靴里拉少了季初時進取及充滿射門慾的鬥心了。

另一中場中嘅朗尼，不知是否因已入選英格蘭大軍，放下心頭大石，今場表現超級搶眼，充滿著史高斯的影子！第一個入球後上入禁區時間剛剛好，處理也恰當！而第二個入球便由朗尼放波入禁區予華倫西亞二傳拉舒福特，到了最後一個入球便直接把皮球吊入禁區讓楊格入球！除了這３個入球，其實朗尼今場波可說是滿場飛，不時見到於己隊防守線出現，助守，又再長傳分波！希望朗尼你都能維持此狀態到足總盃決賽及歐國盃吧！

前場３子了，先說右路嘅連加特，還記得季初時雲高爾重用他的時候，一面新鮮感，可惜到了現在，此感覺減退了！不得不直說，感覺簡直就像新相識的女朋友，拍拖一段時間後，新鮮感大減了的感覺，如何解決呢？似乎要連加特自己作出一定的突破了，否則，下季有一位新的青訓右翼上位或買進新右翼後，連加特的作用便變得相當雞肋了！最大亮點可能是５８分鐘接應馬素爾傳送後射門省中人出界！

左翼方面，馬素爾今場繼續維持其威脅力，不過看得到他小心翼翼，防止自己受傷而回，多以左路突破為主，甚少切入中路於人堆中硬碰！而第一個入球便是由馬素爾作起點而且傳交朗尼射入！留下力，周六晚再爆吧！８２分鐘由楊格入替！入替後嘅楊格，時間不多，由於拉舒福特已被換走，楊格也直接替換於正前鋒馬素爾的位置！似乎楊格為雲高爾証明了為何熱剌一場，楊格會被派於正前鋒出現，多次峴後衛身旁及身後嘗試走位突破，而８６分鐘接應朗尼傳送直接射入網，令楊格鬆一口氣！可惜嘅係，有楊格的走位，也要有漂亮的傳送！而對熱剌一場，對不起，找不到！雲高爾的如意算盤也被一腳踢爛了！

正前鋒的拉舒福特，先恭喜暫時入選英格蘭歐國盃大軍的初選！而今場表現也令選他入伍的鶴臣鬆一口氣，今場表現亮麗！如果各位讀者記得，我Ｋ１１曾經極力盛讚此子踢波非常用腦，是一名正宗前鋒的材料，第一個入球，他的故意一漏，讓般利矛夫後衛得個睇字！此舉動又不需要令自己與對手硬碰，又可以讓隊友有更好的機會！現今有多少２０歲也沒有的進攻球員有此頭腦呢？而７０分鐘的一個卸身走位非常漂亮，可惜龍門出迎封位，令拉舒福特未能完成整個攻門！但７３分鐘接應華倫西亞的二傳，第一時間撞射的觸角非常敏銳！其實其起腳變成入球的比率一直很高，雖然這數據很好，但日後如果再多一點射門可能更好呢，不要把自己的武器收得太埋！７７分鐘也同樣由迪比入替被收起作休息！

入替後嘅迪比，其實都講到無野好講了，一成不變的個人突破踢法，重點是未能真的突破成功，雖然已經多了一點傳送！不過。。。。。。。迪比，如果你仍然希望於曼聯取得成功，要加把勁衝過此樽頸位了！Ｃ朗還是蘭尼還是比比。。。。。。。看造化了！

到了戰術分析，如以上所說，白蘭特於沒有受壓下，其防中能力，冷靜程度，其實真的不錯，或者雲高爾一開始便輕視了英超球隊的攻力及衝擊力！讓白蘭特整整一季蒙受炸彈人之名！當然地，如果白蘭特能應付得宜，其實可以令中後場多一人能交出穿越球是非常好，不過到現在，我Ｋ１１仍然覺得雲高爾於排陣或臨場變陣上的能力很弱！其理念或許正確，但應變力不夠。。。。。。。。。。而下半場的組織，是曼聯球員勇於嘗試的成果，其實，多作此類嘗試又有咩好怕呢，今仗控球率同樣高，但也能做到這些組織！似乎，重點在朗尼的中場中位置，不計算放長波的話，其實各位曼迷，是否已經忘記了我Ｋ１１之前說高杉和也的小豬嗎？同樣能於中場中帶出強勁機動力的他，今季因傷多次缺陣，如果曼聯今季不是缺少了他穩定的上陣，或許。。。。。只是或許，成績可以好一點吧！

完美謝幕戰，雖然擺脫不了沒有歐聯的命運，也總算踢出一場精彩的下半場讓支持的球迷開心一下吧！雖然上半場於１：０前仍然是非常沉悶，但１：０及整個下半場，曼聯似乎放開了踢法，很多的小組組織都非常悅目，未致於次次以射門作終結，但過程便是球迷需要的，當然地，理性一點，般利矛夫於風流波下，未見太肉緊，曼聯自然多了空位可以進攻。不過朗尼今仗的亮麗表現，令各位球迷更有信心，足總盃可以舉回曼市吧！

感覺各位不棄不離地支持文字直播及即討區的朋友仔，足總盃決賽夜再見！

牛扒仔同你評一評：曼聯 vs 般尼茅夫

英超以獨腳戲收尾，睇怕都好少見。今季英超係奧脫福揭幕，又係奧脫福閉幕，彩就真係攞晒啦！係呢場接近例行公事既賽事上，曼聯依然精銳盡岀，實力上高於對方，贏波係非常合理，但扒仔係上半場差點就訓着，好彩入波之後開始改善，亦鮮有地攻入3球。不過相信令球迷同扒仔最憤慨既係臨完場前失既烏龍波，令迪基亞失去左本來到手既金手套。

正選陣容 (4-1-4-1)：
                                   迪基亞
華倫西亞     史摩寧      白蘭特     波夫域積遜     
                                   卡域克                                            
        馬達       連加特       朗尼       馬素爾
                                 拉舒福特
入球
曼聯：朗尼 43’  拉舒福特 74’  楊格 87’
般尼茅夫：史摩寧(OG) 90’+3

扒仔心目中曼聯最佳球員：朗尼--8分

正選評分
迪基亞 (David De Gea)--6分：的確冇乜好做，因為對方並冇任何中龍射門，扒仔對佢最後一刻失去金手套既果份無助感感到惋惜。

華倫西亞 (Antonio Valencia)--7分：係右路依然非常活躍，再次扛起整隊既右路進攻，更有少量平時見吾到既突破，最後成功助攻拉舒福特既入波，當然這亦有賴於對方既反擊打吾起佢先可以咁輕鬆。

史摩寧 (Chris Smalling)--6.5分：繼續延續佢一貫穩定作風，面對對方零聲既高空波完全冇問題，更不時引球推進上前助攻，亦有威脅攻門；至於完場前既烏龍波，雖然有點可惜，但扒仔相信冇人會怪佢。

白蘭特 (Daley Blind)--6.5分：防守表現算中規中矩，身形雖然不及對方但卡位反搶能力吾錯，幫波夫域積遜補左吾少位，亦幫卡域克、朗尼等擔當分波工作，惟佢分波方向有點單一，多數都分去左路落底。

波夫域積遜 (Cameron Borthwick-Jackson)--5.5分：狀態明顯欠佳，尤其係上半場，扒仔見佢經常企係死位又做吾到任何野；下半場有些微改善，完場前一次突破頗令扒仔深刻，但傳中質素仍需加強。

卡域克 (Michael Carrick)--6.5分：有效控制住比賽節奏，限制對方進攻重心高斯寧既發揮，分波方面雖然朗尼今仗比佢更突岀，但至少佢傳波既速度同選擇上都十分正確，尤其是下半場需要加快進攻速度既時候。

馬達 (Juan Mata)--6分：今仗佢既傳球比較保守，以後轉與橫傳為主；扒仔覺得佢可能已經到左一個樽頸位，吾知係戰術問題定係個人狀態影響，佢始終攞吾番係車路士果陣既狀態岀黎；拎左一面黃牌後被靴里拉入替。

連加特 (Jesse Lingard)--5.5分：扒仔有點睇吾透雲高爾畀佢既進攻指令係乜，係前場中路鮮有做文章既機會；反而佢補位反右路打反擊時既突破就打得幾好，如果一早擺佢係右路會否更好？

朗尼 (Wayne Rooney)--8分：相信球迷們都好滿意隊長既表現，3個入波佢都有份參與：先係射入佢係奧脫福既第100球，跟住長傳準確搵到華倫西亞協助攻入第2球，最後一個過頭波助攻楊格。綜觀全場佢既傳球準繩度非常高，長傳方面尤其突岀，如果佢既傳球速度再提高一點，佢絕對可以係中場位置上搵到職業生涯既第二春。

馬素爾 (Anthony Martial)--6.5分：扒仔成日覺得如果冇左佢既突破，曼聯既進攻係幾咁災難。係球迷們就快訓着既時候挺身而出，協助曼聯打破疆局。下半場佢比較靜，完場前被楊格入替。

拉舒福特 (Marcus Rashford)--7.5分：實而不華既踢法令佢成為繼馬素爾後既令一新寵兒，不但有作為「偽9號」既走位意識，亦有作為前鋒既射門觸覺，今仗佢既半窩利入波已證明呢一點，更可怕既係佢既邊路突破能力更令扒仔拍案叫絕。無論點佢絕對係雲高爾係曼聯挖到既一塊寶玉。

替補評分
靴里拉 (Ander Herrera)--5分：入替馬達，係前場繼續做分波工作，但完場前防守突然無故跌倒導致失波。

迪比 (Memphis Depay)--5分：入替拉舒福特，有嘗試突破但吾夠，有一次遠射但高岀。

楊格 (Ashley Young)--N/A：入替馬素爾，扒仔好開心佢可以突破越位取得入波，希望佢可以從此重拾狀態。

以贏波開始，以贏波作結，都算係好頭好尾啦！曼聯最終以第5名完成今季所有英超賽事，不過這依然未係完結，經歷完一個吾太成功既英超球季，扒仔希望曼聯可以以一個盃賽冠軍完成球季，對球迷，對自己有個好好既交代。

[K11出品] 曼聯K角度 – 擦身而過的勝利!

曾經有一次反超前嘅機會放响我嘅眼前，但我無去珍惜，等到再被反超前嘅時候才後悔莫及， 塵世間最痛苦嘅事莫過於此。如果上天可以俾我機會再嚟一次的話，我會對曼聯班球員講句＂集中Ｄ＂，如果非要在這場波加上一個終點， 我希望係７５分鐘！就這樣，最聯作客韋斯咸，曾經反超前，最後再被反超前下敗仗而回，最後一仗主場面對般利矛夫即使贏波，甚至大炒而回，只要曼城一贏波，歐聯入場卷就此幻滅！為何如此擦身而過？等我Ｋ１１同大家一齊追思一下。

正選陣容包括龍門為迪基亞，防線由右至左分別為華倫西亞，史摩寧，白蘭特，洛荷，防中為我Ｋ１１期待以久卻失望而回的舒拉達連，進攻中場分別為靴里拉及朗尼，前線由右至左分別為馬達，拉舒福特及馬素爾。

龍門嘅迪基亞，今仗失了３球，算少了，迪基亞已經於１８分鐘救出卡路爾嘅單刀波！否則，曼聯要落後２球下去踢，相信呢場波即使結果可能一樣，但絕不會哪麼精彩。不過３：２嘅一球，可能是列特嘅攻門太有力，令迪基亞拍到都要失球。。。。。。。。。。。

 後防方面，先講講左閘嘅洛荷，今仗表現比起上仗對陣諾域治時已有改善，但並未出現大錯，可能洛荷已全面習慣左閘呢個位置了，但助攻質素仍有待改善，疏爾一旦復出，加上波夫域積遜，似乎左閘位置有排爭！。右閘方面，華倫西亞今仗並沒有之前的搶鏡，而且助攻質素也下滑了，其實都係曼聯今仗進攻唔夠流暢及致命嘅其中一個原因，而且６９分鐘更犯規領黃！８５分鐘由贊奴沙入替。入替後嘅贊奴沙，由於時間有限，加上此時落後中，其實。。。。直播中，我Ｋ１１並沒有對其拎波嘅畫面出現過。

中堅拍擋方面，今仗史摩寧沒有搶眼，但也算平實，所失３球基本上與他無關，不過１９分鐘與白蘭特之誤會卻造成卡路爾之單刀。另一中堅白蘭特，休息一場後，今仗表現反而更差，似乎跟不上節奏，加上韋斯咸知道其交穿越球之能力，並未如其他球隊般讓他慢慢發板！呢個都係半場卡域克要入替嘅原因之一。而防守方面，好可惜，３個失球都與他有關，第一球沙高射門省中白蘭特後入網，第二球包了越位，第三球因壓唔住列特被其直接頂入。。。。。。。。。。

防中方面，今仗正選終於看到舒拉達連了，不過其表現卻令我Ｋ１１相當失望，並未能於後防線前建立一條屏障下，令韋斯咸所施加嘅壓力落在後防線，到底係因為佢已被雪太耐還是其狀態一直都操唔起呢？！真的不知道，希望唔好影響其信心吧！半場卡域克入替舒拉達連，原因除了舒拉達連有點隱形外，其實最主要似乎是分擔白蘭特被韋斯咸集中施壓的情況吧！卡域克出場後，多了一個點交出穿越球，其實都係下半場曼聯表現（７５分鐘前）有所改善嘅原因之一。

中場中２名球員分別為朗尼及頂替費蘭尼停賽嘅靴里拉！先說說靴里拉，今仗表現好像有點失色，其實靴里拉一向以勤力，熱血聞名，但在我Ｋ１１眼中，今仗嘅馬達比靴里拉更加勤力，似乎靴里拉是未跟到比賽節奏，可能被韋斯咸的壓迫踢法所影響吧，７５分鐘領黃犯規，更加造成７６分鐘被追平嘅一球，馬後炮一下吧，費蘭尼呢場嘅停賽，影響都幾大，假設費蘭尼在陣，可能令朗尼沒有這麼辛苦吧，不是靴里拉不好，而是靴里拉似乎不懂應付韋斯咸今仗嘅戰術部署。８２分鐘連加特入替靴里拉，不過入替後，其實跟贊奴沙情況相若，太短時間，作用不大。

 另一中場朗尼，今仗踢回中場，其實相當勤力的了，反超前嘅一球正是其於中場奮力搶回來嘅成果，而３３分鐘吊入禁區予拉舒福特搶點嘅一球都非常漂亮，只是安東尼奧奮力解圍而已！不過今仗分左右長傳嘅傳送就失色了一點點，可能是韋斯咸的防守球員今仗集中力極夠吧，多次能截下朗尼的長傳。

前線三名球員方面，先說右邊馬達，馬達的而且確非常勤力，前仆後繼，而且到目前為止的曼聯陣容內，馬達嘅傳送係最致命的，質素即是質素。而追平１：１嘅一球，便是馬達於右路底線扭過一個後傳到空門前嘅馬素爾射入。即使下季係邊個領隊都好，都希望馬達能留隊。。。。。。。。。。。。。

正箭頭嘅拉舒福特，今仗數據上又是一場白果吧？！但可以留意，其實拉舒福特於前線嘅作用甚大，５０分鐘全靠拉舒福特巧妙傳交馬達才引致入球，而６４分鐘，拉舒福特又黎後踭傳中，可惜靴里拉來遲一步而已。最直接應是７１分鐘，拉舒福特接應朗尼奮力追回來的皮球， 再傳交馬素爾個人表演嘅助攻了！可見拉舒福特於前線作用，不一定是入球，卻已非常有用了。

左路嘅馬素爾，再次成為曼聯紅人，不過今次卻未能帶領球隊勝出賽事，但表現已經叫人信服！賽前還以為未能上陣下，卻於正選名單出現，是雲高爾戰略嗎？上半場馬素爾表現其實相對沉寂，３１分鐘更於後場控失被盧保偷走腳下球，幸好及後皮耶射門炒高而已。

不過下半場卻好似變回正常的馬素爾了，５０分鐘走位恰當，接應馬達傳送射入空門！６７分鐘守空門救出卡路爾嘅頭鎚攻門，再於７１分鐘由左路三閘線開始，單人匹馬扭入禁區再射近柱反超前，此球功架十足，而且臨門一腳嘅處理極妙！可惜嘅係，最終都要敗陣而回，馬素爾已經相當盡力的了！俾點掌聲吧！

戰術分析到了，明顯今仗韋斯咸戰意好強好強，於烏普頓最後一戰，加上球迷熱烈打氣，直播時段可以看到，即使球隊被曼聯反超前２：１時，部分韋斯咸球迷仍然相當高興地跳舞，球迷嘅支持令球隊都能踢高一線，提高了佢地嘅戰意！加上皮耶維持今季嘅超靚傳球水準，多次罰球，角球都能交出極有威脅嘅傳送！還記得有一段３－５分鐘嘅攻勢，曼聯於右路向韋斯咸施壓，韋斯咸球員嘅奮力防守，全力去盡，令曼聯雖然能維持控球但卻無從入手，士氣波就是這樣的了！

曼聯自身方面，失了３球，防守上當然有極大責任，但全隊球員嘅積極性明顯不足夠，缺少了前幾場嘅主動，雖然入了２球，但上半場其實只有一次不中龍射門，而且中場完全被韋斯咸壓著！就正如我Ｋ１１於靴里拉一段所講，呢場波如果有費蘭尼，曼聯可能會頂得住韋斯咸嘅壓迫，可惜沒如果！而且，全憑馬素爾２個入球，曾經有４分鐘反超前嘅時間，曼聯卻沒有好好把握！

這場賽事，要說雲高爾排陣調動嘅不是，似乎有點針對的了！上半場白蘭特被韋斯咸封殺下，加上舒拉達連表現失準，半場即換入卡域克，其實已經有著正確嘅調動，而７１分鐘反超前，雲高爾是否應該快快作出保守嘅調動呢？客觀一點，如果他馬上換入鐘斯，加強防守，睇怕會被人罵太過保守，久守必失了吧！而且７６分鐘便出現被追平嘅１球，８０分鐘再出現被反超前嘅１球，勉強說，便應該是一被反超前，便應該馬上調動，沒有思考多幾分鐘的餘地了。這場敗仗，要怪，就怪場上球員把曾經擦身而過的勝利，再送給對手了！

無論如何，事實始終是事實，場波完了，輸了，改變不了！餘下一仗，主場面對般利矛夫，作為今季主場謝幕戰，先做好自己吧！等，就再等奇蹟的發生！鳴謝各位支持文字直播及即討區嘅朋友！星期日晚，奧脫福再見吧！

牛扒仔同你評一評：韋斯咸 vs 曼聯

純粹以一個球迷角度，呢場比賽係非常精彩，而韋斯咸係烏普頓公園最後一場波以勝利作結絕對係完美結局。但回到扒仔曼迷既點評，扒仔徹徹底底咁坐左一次過山車。本來曼聯係有機會贏波既，點知對方一岀絕紹咁就輸番轉頭，顯然曼聯冇左費蘭尼既高空優勢十分不利；而且明知對方高空波有優勢，曼聯依然三番四次犯規為對方搏得罰球，扒仔對此非常無語。只能話，畢竟烏普頓既最後晚上，始終吾係屬於曼聯既。

正選陣容 (4-2-3-1)：
                            迪基亞
華倫西亞     史摩寧      白蘭特     洛荷     
              靴里拉          舒拉達連                                      
       馬達           朗尼           馬素爾
                          拉舒福特
入球
韋斯咸：迪法沙高 10’  安東尼奧 76’  列特 80’
曼聯：馬素爾 51’ 72’

扒仔心目中曼聯最佳球員：馬素爾--8分

正選評分
迪基亞 (David De Gea)--5.5分：扒仔吾係話想幫後防推卸責任，但失3球門將點都有點責任。今仗佢明顯狀態有所下滑，第1個失波佢明顯反應慢左，第3球波既力量太大擋吾住；不過佢亦救過靚波，擋岀對方卡路爾既單刀係其中之一。

華倫西亞 (Antonio Valencia)--6分：再次成為右路既進攻重心，前場多次突破及岀波，奈何今仗對方高大既身軀吾可以令佢搵到目標，防守上佢已經算係冇乜大錯果個；完場前被贊路沙入替。

史摩寧 (Chris Smalling)--6.5分：扒仔睇得岀佢已經好努力，幾乎只有佢對住防對方既罰球攻勢，高空波只有佢頂到，並總算叫成功守住卡路爾；佢亦不時引球上前進攻，希望增加進攻優勢。

白蘭特 (Daley Blind)--4分：矮吾係錯，但矮依然畀佢踢中堅先係大錯特錯。今仗3個失波全部直接同佢有關，其中2球仲係因為輸高空波，佢自己亦因此陣腳大亂。既然今仗明知要守高空波而又冇費蘭尼，點解吾起用科素文沙搭擋史摩寧呢？

洛荷 (Marcos Rojo)--5分：踢得好沉，當對方安東尼奧攻到三閘線時佢就好驚青，冇壓力下都可以將波交岀界，攞黃牌既一次攔截更加係判斷明顯失誤導致。

靴里拉 (Ander Herrera)--5.5分：好努力嘗試組職有效攻勢，但好多時受制於對方高大既身軀，佢好難將波傳入三閘線，吾知係咪咁佢因此心情煩燥，導致輸好多罰球畀對方，完場前被連加特入替。

舒拉達連 (Morgan Schneiderlin)--5分：佢重新番到正選位置扒仔本來好雀躍，但佢狀態頗差，第1個失球佢大意走甩對方蘭仙尼，之後對方排山倒海既攻勢佢都有點招架吾住，制空能力亦吾夠；半場被卡域克入替。

馬達 (Juan Mata)--6.5分：進攻表現算吾錯，助攻馬素爾攻入一球，扒仔覺得佢攞波時既威脅其實好大，尤其是下半場中段既一段時間既傳波令對防防線非常狼狽。

朗尼 (Wayne Rooney)--7分：除左馬素爾之外，扒仔覺得隊中仲有火既非隊長莫屬，以box to box中場岀現，東奔西走，轉邊技術日益進步，第2球入波亦係由佢開始策動；再次落後之時雖然有點有心無力，但依然身先士卒盡力反撲，呢d係真隊長既風範。

馬素爾 (Anthony Martial)--8分：扒仔諗如果今日佢趕吾切復岀，曼聯應該會由惜敗變成慘敗，球隊僅餘既2次反擊機會都畀佢把握到，第2球近乎零角度射門更顯示岀佢既射手觸覺，又再次成為曼聯進攻唯一具威脅既人；當然始終對方右閘係踢翼岀身既安東尼奧，防守高效翼鋒並冇心得。

拉舒福特 (Marcus Rashford)--6.5分：扒仔之前都有提過陣地戰面對高大中堅吾會嘗到d咩甜頭，但佢有參與2個反擊入波，第2球更加係一個助攻，亦有一次接應馬達傳送後腳將波送去門前，可惜冇人接應。

替補評分
卡域克 (Michael Carrick)--6分：入替舒拉達連，加快左進攻節奏，比上場多左好多直傳，亦令佢冇疲態既顯現出來。

連加特 (Jesse Lingard)--N/A：入替靴里拉，嘗試尋求邊路突破但吾太成功。

贊路沙 (Adnan Januzaj)--N/A：入替華倫西亞，上陣時間太少，扒仔數過佢只掂過波2次 (有錯見諒)。

同樣失3球，輪快不如阿仙奴熱刺，輪高又不如韋斯咸，吾通呢支又慢又矮既曼聯窮得只剩下錢？點都好，自己既吾爭氣，再次將主動權拱手相讓畀鄰居，相信球迷同扒仔一樣非常難受，惟有寄望周末我地可以順利贏波之餘，黑天鵝可以幫幫手纖滅鄰居啦。

[K11出品] 曼聯K角度 – 打出主場氣勢, 卻失了寶貴2分!

今場賽事別具意義，為了阻止李斯特城於奧脫福主場捧走英超冠軍，同時也為自己爭取打入前四而努力下！今場曼聯踢出佔優局勢，但李斯特城於今季能站立於巔峰，不是浪得虛名，而且絕不是與對手搶控球，而是要求一擊即中嘅效率！結果２隊最後重演首回合賽果，以１：１言和，紅魔保住主場被搶風頭，卻未能全取３分，打出主場氣勢，卻失了２分而回，對繼續爭取前４再次受打擊！不如等我Ｋ１１同大家一齊分析一下今場的得與失。

正選陣容包括龍門為迪基亞，防線由右至左分別為華倫西亞，史摩寧，白蘭特，洛荷，防中為卡域克，進中場分別為費蘭尼及朗尼，前線由右至左分別為連加特，拉舒福特及馬素爾。我Ｋ１１對正選陣容最反對為舒拉達連未能重番正選應付今場重要賽事！

龍門嘅迪基亞，未到１６分鐘，即係被摩根頭鎚追平１：１嘅時候，其實都唔太覺迪基亞嘅出現，而其實被追平嘅入球，都不能怪迪基亞！及後李斯特城其實只餘２次攻門中龍，一次同樣來自摩根嘅頭鎚攻門，但力度不夠下，迪基亞輕鬆接實！另一次便是馬列斯連過３關後禁區邊射門太正中被迪基亞救出！ 

後防方面，先講講左閘嘅洛荷，今仗表現其實在水準之下，助攻不銳，防守不穩！２次防守摩根同樣被壓贏或走甩，第一次便已成失球，第二次幸好能施加一點壓力但仍被頂中龍！而助攻方面，其出波質素與右閘嘅華倫西亞形成強烈對比，線路，力度，高度，落點也均未合格，突然想起波夫域積遜嘅傳中球比洛荷更勝一籌！

右閘嘅華倫西亞，今仗繼續顯出其大師兄嘅上佳演出，７分鐘便送上一記傳中球，腳面一彈，皮球落到遠柱嘅馬素爾腳下一射入網為球隊打開紀錄！其後不時也作出有威脅嘅助攻，包括４２分鐘於禁區Ｋ角位嘅硬射！而且防守也作出一定貢獻，２９分鐘舒立普於曼聯禁區邊有絕佳起腳射門機會卻被華倫西亞訓身將皮球擋出解除即時威脅！

中堅拍擋方面，其實今仗史摩寧於後防出鏡機會不多，反而７７分鐘嘅助攻，接應朗尼傳中球一頂中柱卻成其今場亮點！另一中堅白蘭特，其表現真的一場比一場好，而且其助攻度也相當高，除角球外，其不時走過半場及交出穿越球令球隊由後場連接到中前場。

防中方面，雲高爾今仗選用年事已高，卻具經驗嘅卡域克上場，雖然我Ｋ１１仍是較為喜歡舒拉達連，但我們即管看看卡域克嘅表現！客觀說句，算不俗，但卻有不少弱點，５６分鐘一次中場判斷錯誤及速度慢因而要犯規領黃，但這球也看得到其經驗，懂得職業犯規，否則李斯特城有絕大機會快速突擊！而卡域克最大賣點當然是其位置感及交出穿越球能力！其實白蘭特慢慢也能代替卡域克交穿越球嘅能力，而防守上嘅位置感，舒拉達連絕對沒有問題，所以結論我Ｋ１１仍然覺得雲高爾應派上舒拉達連上場較為適合！

中場中２名球員包括朗尼及費蘭尼！先說說費蘭尼，相信大家對其今仗最大亮點可能是與侯夫爭位後嘅批踭，但我Ｋ１１卻看到費蘭尼已於近仗慢慢適應此位置，而且也全憑其身型於中場作出攔截及控球也相當不俗，而且也一如以往的在２邊禁區作出適當嘅二傳或防守！進攻上１３分鐘便能於對方禁區內控定後二傳予連加特射門，而３５及６９分鐘也能接應角球作出攻門可惜只是被救出及斜出，但其高空優勢相當明顯！７４分鐘入替費曲尼嘅靴里拉，今仗未有太多表現機會，入場後只作出一般的連繫後場與前場，但作用並不明顯。

另一中場朗尼，今仗表現不及此前２仗於此位置嘅發揮，雖有射門但卻無太大威脅，而且分邊嘅長傳準繩也較前２仗低，但協防方面，依舊勤力，似乎朗尼真的慢慢接受其位置轉換了，希望繼續可以發揮穩定，順利入選英格蘭出戰歐國盃大軍吧。

前線三名球員方面，先說右邊連加特，由於曼聯其他前線主力球員已經由狀態低沉，傷患中回來，朗尼也慢慢尋找到其新位置，連加特當初嘅賣點，活力，新鮮感，開始未能對曼聯帶黎新動力，始終連加特要進步便要靠自身能力之增加！其中一項便是體格及經驗嘅提昇，雖然１３分鐘接應費蘭尼嘅射門已經算合格不過被舒米高救出，但３０分鐘一次單刀機會，明顯其經驗及體格未夠，其實當時是森遜一次犯錯被連加特搶得皮球，作出單刀！但連加特向前一推卻偏偏將皮球推回森遜回防嘅路線，但卻未有足夠速度及身型體格完全食到身位下，結果森遜合法撞跌連加特，加上舒米高及時出迎解圍！

就此球，容許我Ｋ１１作個小分享，其實連加特向前一推時，只要純直線，或少許向左邊推前！以連加特嘅速度，森遜要追回只有犯規，這樣一來，森遜領紅牌機會極高！假如森遜未能追回，餘下便是挑戰舒米高，可惜最後卻未到此步便已被森遜追回！其實按此球情況，最少要做到２個效果其中一球才算合格！１是引致森遜犯規領紅離場，２便是與舒米高來一次對決！下半場初段開始，連加特嘅速率開始下降，５２分鐘更領黃後，６０分鐘由馬達入替。

入替後嘅馬達，其位置相當自由，可惜面對李斯特城嘅密集防守加上勤力補位，馬達只要慢一拍便被防守下，今仗馬達發揮機會便不多，只於中場作出跑動及普通傳球，基本上一次致命傳送也未有出現！其實雲高爾不如讓連加特休息一下，下仗改由馬達出場吧！

正箭頭嘅拉舒福特，今仗表現只是正常，始終面對李斯特城一對身體強壯嘅中堅候夫及摩根未能佔有任何優勢，而且曼聯能供應到其腳下嘅機會也不多，８１分鐘由迪比入替。題外話，迪比今日於其ＩＧ把所有曼聯相片下架，引來不少負面傳聞，但８１分鐘嘅入替似乎打破初步傳聞，而且５分鐘後一次突破便引來真禾達嘅犯規２黃１紅出場！不過迪比其餘表現勤力有餘，威脅未見！

左路嘅馬素爾，再次成為曼聯最有威脅球員及直接單分球員，７分鐘接應華倫西亞傳中第一次時間撞射入網為球隊領先，不過其風頭之大，李斯特城球員也對其作出嚴密看管，及後雖不時有突破但直接威脅不多！雖然曾經於不同位置出現但結果一樣，幸好入球嘅處理相當果斷，未有如之前拖慢來食嘅情況，進步，繼續進步吧！

到了賽後分析，首先雲高爾好似已經搵到佢與現時曼聯最適合嘅＂相處之道＂，排陣也開始穩定，雖然已經是第二季嘅季尾，遲係遲了一點，但餘下仍有前四爭奪戰及足總盃決賽，我Ｋ１１當然希望遲到無過無到下，今季餘下賽事能順利勝出，繼續其歐聯資格及贏得足總盃冠軍！

但我們來仔細分析一下嘅時候，首先係卡域克與舒拉達連嘅問題，我Ｋ１１一向喜歡舒拉達連已是明顯，其防守力於曼聯有重大影響，但偏偏雲高爾仍希望以卡域克嘅經驗帶領球隊！或者雲高爾認為卡域克嘅防守力已足夠應付沒有華迪嘅狐狸軍！

其次便是後備人選，看到後備人選，其實只得迪比一名突破型球員可選，其實李斯特城出名防反為主，假設今仗曼聯一直落後，迫著要曼聯多作突破時，調動便只得迪比一個了，可能雲高爾認為可將華倫西亞移前也可以！但我Ｋ１１認為楊格如果沒有受傷，似乎都係一位不錯嘅選擇讓調動空間增加吧！

第三是臨場調動，其實此項一直是今季雲高爾弱項，但眼見洛荷根本守唔住摩根，失第一球後，便應該傳達球內，如再有第二次危機，便要作出改變，可惜並沒有，有幸最終沒有重覆犯錯而已。（其實已犯，只是沒有死）

幸好嘅係，今仗曼聯一直主壓，打出紅魔主場壓力，可惜最終仍然失了２分，要追前四仍要付出百分之二百嘅努力了！也慶幸未有敗仗，令特意打氣嘅大帝失望而回，在此感謝各位支持文字直播及即討區嘅朋友仔！

牛扒仔同你評一評：打比郡 vs 曼聯

英超主場不敵修咸頓後，曼聯於足總盃面對英冠前列分子打比郡，強陣岀擊下踼得頗為輕鬆。除左控球佔盡優勢外，兩邊側擊亦令對方不知所措，令曼聯成功輕取對方，但入果三球有兩球可能有越位嫌疑。失球則因為後防與防中默契欠佳，你眼望我眼之後先追已經太遲，呢樣亦已經係長年累月既毛病。

正選陣容 (4-2-3-1)：
                        迪基亞
華利拿   史摩寧   白蘭特   波夫域積遜
           費蘭尼            舒拉達連
    連加特          馬達            馬迪爾
                         朗尼

曼聯最佳球員：馬迪爾--7分

正選評分
迪基亞 (David De Gea)--5.5分：對失球毫無反應，但其它時間從容不迫，冇乜太大考驗。

華利拿 (Guillermo Varela)--5.5分：在達美安受傷下成功取得正選，表現不過不失，偶有失位，但亦敢於上前助攻，希望佢係英超都可以有咁既表現。

史摩寧 (Chris Smalling)--6.5分：無愧於"新里奧"既稱函，隊友失位後包位包得很到，落腳亦頗為清脆，只是失球佢可能可以做得更好。

白蘭特 (Daley Blind)--6分：礙於身形矮小下，高空波仍然顯得狼狽，但包位意識進步了，下半場一次對方三打二的反擊亦被他搶會了控球權。前場亦上前助攻，成功接應傳中搶點破網再次為曼聯領先。今場應是他近幾場踼得較為夢幻的一場。

波夫域積遜 (Cameron Borthwick-Jackson)--5.5分：十分輕鬆，防守上沒有太大壓力。但傳球路線較單調，只跟馬迪爾配合，亦不太敢底線岀波，這令曼聯少左一個進攻套路。

費蘭尼 (Marouane Fellaini)--6分：表現越來越岀色，少左犯規，單對單同角球防守很到位，更多次帶球上前，可能佢已經係陣中搵到佢最好既位置。

舒拉達連 (Morgan Schneiderlin)--5.5分：發揮應有既水平，多左向前傳球，但失球佢有一定責任，掛住睇波冇留意中間入楔。

連加特 (Jesse Lingard)--5分：上半場再次隱形，顯然陣地戰並吾適合佢，下半場得到隊友幫助開始有空間跑，亦成功助攻白蘭特入波。

馬達 (Juan Mata)--5.5分：覆蓋面很廣，box-to-box，分波入楔亦吾錯，亦攻入奠定勝局既一球。但傳球吾夠果斷，攞波亦有些微緊張，希望只係未習慣重獲正選既短期毛病。

馬迪爾 (Anthony Martial)--7分：於左路如入無人之境，特别係下半場，話爆過就爆過，這令筆者諗起歐聯附加賽對布魯日既迪比，希望吾係曇花一現。但與此同時亦浪費左好多機會，未能係適當既時刻傳球或射門，好彩最後成功助攻朗尼同馬達入波。

朗尼 (Wayne Rooney)--6分：非常精彩既香蕉射球為曼聯領先，其餘時間表現不過不失，前場左中右路都見到佢，但狀態顯然未到最佳。

替補評分
卡域克 (Michael Carrick)--5.5分：入替舒拉達連，很好地控制戰局，佢既復岀對曼聯絕對係好消息。

靴里拉 (Ander Herrera)--N/A：入替馬達，主要作輪換之用，冇太多表現機會。

牛扒仔同你評一評：曼聯 vs 修咸頓

今場曼聯係岀場陣式上做左一d變化，由4-2-3-1改為3-4-1-2，希望釋放白蘭特和波夫域積遜的防守壓力，並將重任放於史摩寧身上。可惜換湯不換藥，防守有了進步，進攻又重新番到一貫作風，去到三閘先又猜猜猜，連控球都吾係話佔憂，真係睇到打晒喊路。下半場初段好似見到些微希望，但總係雷聲大雨點小。尾段更因死球失守，一分都攞吾到。雲高爾會吾會因此再次面對下台既壓力呢？

正選陣容 (3-4-1-2)
                            迪基亞
            達美安     史摩寧     白蘭特
連加特    舒拉達連     費蘭尼    波夫域積遜
                            靴里拉         
                    馬迪爾       朗尼

曼聯最佳球員：達美安--6分

正選評分
迪基亞 (David De Gea)--5.5分：對失球毫無辦法，責任不在於佢，其餘時間並冇太多考驗。

達美安 (Matteo Darmian)--6分：今場改打三中堅既右中堅位置，將佢定點防守能力發揮得淋漓盡致，受傷亦係因為一次關鍵頭鎚攔截成功阻止沙恩朗的單刀機會，但另一方面又再多一名後防球員傷岀，被麥尼亞入替，筆者衷心希望冇乜大礙。

史摩寧 (Chris Smalling)--5分：作為後防重心，可能因體力問題，今仗顯得有d吃力，面對對方既快速反擊難以適應，未段更走漏查理柯士甸導致失球。

白蘭特 (Daley Blind)--5.5分：今仗佢既防守壓力因陣式改變減少左，失誤亦因此減少，可能呢個係雲高爾為佢既防守打造既陣式。但佢斬角球認真麻麻，想入波真係咪搵佢斬啦。

連加特 (Jesse Lingard)--4.5分：繼上場後再一次令人失望既演岀，冇突破，冇速度，岀波經常畀去無人地帶，希望只係佢既"技術性調整"…

舒拉達連 (Morgan Schmeiderlin)--6分：表現不過不失，做好自己既本分，如果佢能夠更多參與進攻咁就更好。

費蘭尼 (Marouane Fellaini)--5.5分：防守表現不俗，趨向成熟，經常於單對單下取得優勢，可惜進攻並未有機會利用佢高佬既優勢，半場被馬達入替。

波夫域積遜 (Cameron Borthwick-Jackson)--5分：再次獲得正選上陣機會，但係防守上顯得有d狼狽，面對泰迪治同文尼既進攻處於下風，尾段更因與贊路沙聯合夾擊下犯規間接導致失球。

靴里拉 (Ander Herrera)--5分：今場佢有隱形既跡象，鮮有見佢係對方三閘線附近觸球，下半場踼後半格亦吾知如何面對對方的反擊。這亦開始令我地聯想起小豬同卡域克兩老…

馬迪爾 (Anthony Martial)--5.5分：於前場好努力，希望靠個人能力突破，可惜面對對方既密集防守只能事與願違，令佢覺得十分無助，亦開始顯然疲態，奈何並冇太多前鋒可用，各位係咪又開始掛住係利華古遜踼得有聲有色既小豆呢？

朗尼 (Wayne Rooney)--5.5分：睇得岀心中仍有果團火，又好幾次帶波向前亦畀到希望咁多位球迷，但力不從心，隊友又吾爭氣，佢團火燒得幾旺都冇用。

替補評分
馬達 (Juan Mata)-- 5.5分：半場入替費蘭尼，表現算不錯，成功串連中前場，亦有一次接應朗尼傳送差d形成半單刀。

麥尼亞 (Paddy Mcnair)--5分 ：入替受傷既達美安，臨危受命下並冇慌失失，更多次上前助攻，只希望佢吾好成為下一個大衞雷斯。

贊路沙 (Adnan Januzaj)--5分 : 入替波夫域積遜，佢既上陣絕對係久違了，今場未有太多發揮機會。對佢有印象只係導致失球既犯規同埋完場前既一次射門。

牛扒仔同你評一評：利物浦 vs 曼聯

今場曼聯受制於對方既前場緊逼同快速反擊，較難做到流暢既攻勢，但俗語有云：好波不如好運，一次既角球戰術，第一次中龍射門就入波，加上聖基亞又多次神救，最終保住勝果。不過明顯地曼聯中後場硬到吾夠，成日畀人輕鬆三兩腳就踼到禁區頂，若非對手太多浪射，聖基亞再神亦難以保持不失。

正選陣容
                    迪基亞
楊格   史摩寧   白蘭特   達美安
       舒拉達連         費蘭尼
連加特         靴里拉       馬迪爾
                      朗尼

最佳球員：迪基亞--8.5分

正選評分
迪基亞--8.5分：再一次發揮聖基亞本色，多次瓦解對方遠射近笠。盛傳會羅致佢既皇馬被國際足協禁止球員轉會兩年，曼迷們理應放下心頭大石。

楊格--5.5分：受制於對方既壓逼，冇太多上前助攻既機會，上半場更被占士米拿絆倒受傷離場，被積遜入替，希望冇乜大礙。

史摩寧--7分：表現穩健，多次瓦解對方既高空波，算係今場曼聯後防表現較好既球員。

白蘭特--5分：再次證明佢吾係一個踼中堅既好人選，防守硬度較差。但佢不嬲傳球有一番心得，今仗亦有幾球長傳傳得吾錯，可能方丈要為佢搵個更適合既位置。

達美安--6分：主要係防守上交足功課，雖然上半場中段顯得較為狼狽，但番到最熟悉既右閘之後就冇已經冇畀對手太多機會了。

舒拉達連--6分：冇左小豬或者卡域克做搭擋，加重左佢既負擔，但佢活力搭夠，為曼聯後防線增添多一道屏障。

費蘭尼--6分：其實睇左佢踼防中咁多場，都吾係好知佢既定位係咩，其實好擔心佢有邊場會突然攔截粗暴過度被趕岀場，不過今日佢防守做得吾錯，亦係佢既頭鎚間接幫曼聯贏波。

連加特--5分：表現平平，右路被摩蘭奴mark到實一實，下半場被馬達入替。

靴里拉--6分：身材較單薄既佢多次希望係中間同隊友多做配合，但亦令佢消耗太多，下半場被迪比入替。

馬迪爾--6.5分：今場多於左路嘗試突破，被佳尼同軒達臣聯合夾擊下仍有一兩腳似樣既射門。不過有時佢太自我中心，太想表現，希望更多比賽經驗可以幫佢改變呢種諗法。

朗尼--6.5分：2016年既隊長畀人一種脫胎換骨既感覺，更敢於向前，敢於射門，門前一腳窩利成功為曼聯係晏菲路全身而退，如果佢帶波可以再增添一份果斷咁就更好。在此亦要恭喜佢破左亨利為單一英超球會入最多波既紀錄。

替補評分
積遜--6分：入替受傷既楊格，表現稱職，下半場一次左路底線突破尤為深刻。

馬達--5.5分：入替連加特，增添中前場既活力，入球亦來自佢既傳中。

迪比--4.5分：入替靴里拉，幾乎隱影，每次提起佢個名就係佢畀對方搶波既時候。

[K11出品] – 曼聯點將錄 – 費SIR年代最後的左後衛.艾夫拿

我K11繼傑斯後, 第二個想同大家分享既係費SIR年代最後的左後衛 – 艾夫拿, 篇幅會集中以K11角度分析其踢法, 對曼聯既重要性, 效力曼聯時成功或失敗既原因, 艾夫拿於2014年7月21日被賣到祖雲達斯, 到底佢於曼聯是取得成功? 還是失敗? 全盛時於曼聯又有幾重要? 一齊黎睇下!!

Patrice Evra艾夫拿, 法國人, 出生於1981年5月15日, 出生地為塞內加爾, 前曼聯正選左後衛, 法國國家隊, 司職左後衛, 左中場, 現效力於意甲勁旅祖雲達斯, 對於我K11黎講, 2006年既時候, 對艾夫拿並不熟識, 從FM遊戲中, 他仍是一名左中場/左翼, 但看到於曼聯的賽事, 他是一名左後衛, 但處子戰既佢表現並不好, 面對曼城輸波而回, 由於當時陣中仍有軒斯同達哥, 我對艾夫拿仍然無太深印象, 而其實佢於曼聯前既足球生涯也不是太如意, 雖然於法甲勁旅巴黎聖日耳門 ( 但當時巴黎聖日耳門並不及現時的強大 )開始青訓隊, 但輾轉間去到意大利丙組球隊馬沙拉效力, 期間曾轉會意乙球會巴利薩, 直到2000年重返法乙尼斯效力, 2002年, 有幸得到當時法甲摩納哥教練迪甘斯邀請加盟, 於2003年球季便助球隊贏得法甲聯賽盃冠軍, 翌年再帶領球隊打入歐冠盃決賽, 可惜大敗於當時由摩連奴執教既波圖成為亞軍, 因該球季表現出色而入選法國國家隊。

2006年冬季轉會窗, 費SIR以5.5M鎊將艾夫拿帶到奧脫福, 簽約3年半, 但要等到2006/7球季, 艾夫拿先可以借住當時球隊主力左後衛軒斯的受傷, 把握機會上位, 藉住其速度快及好體能既特質, 更加令施維斯達慢慢退為後備, 不過其最大缺點就係身高只有5尺8吋 ( 亞洲人黎講其實唔矮 ), 其制空力不強, 令不少對手都針對其弱點佈署, 不過於費SIR退休前既球季, 莫名奇妙地, 艾夫拿助攻的頭鎚搶點竟然成為曼聯該季其中一個殺著, 該季有4個入球, 次季由莫耶斯帶領下仍有3個入球, 2個賽季已經攻入到目前為止有紀錄下職業生涯既50%入球, 而7球中有4球為頭鎗, 我地一齊黎欣賞下艾夫拿於曼聯既10個入球:

當2014年5月27日, 曼聯與艾夫拿繼約1年, 但雲高爾上任後, 於同年暑假已被賣到意甲球會祖雲達斯, 正式結束其8年半的紅魔生涯。

艾夫拿掌管曼聯左後衛達6年多之久, 當然有著其一定既重要性及貢獻, 其高速度, 快狠準既攔截, 令不少前鋒及翼鋒望而生畏, 不過講到最可怕, 相信係佢與C朗於06/07至08/09所組成既左路攻擊線, 其準確既疊瓦式助攻, 落底傳中既技巧, 與及其一般後衛無既腳下功夫, 為曼聯達成英超3連冠既神話, 而其實艾夫拿與朗尼既默契都好好, 艾夫拿與C朗及與朗尼合作既分別, 在於C朗會不時用艾夫拿引開對手後衛, 之後自行爆破, 而朗尼則會借著艾夫拿落底既準確時間, 好多時都交出穿越球到艾夫拿落底出波或直插禁區攻門, 數據說明一切, 艾夫拿於曼聯的10個入球中, 有5球便是朗尼助攻的, 可見2人之默契吧。

而講到艾夫拿, 除了曼聯既隊友, 不得不提, 相信便是蘇亞雷斯, 一場種族歧視的風波, 一個不握手的畫面, 相信都成為當時大家球迷茶餘飯後既話題, 2011/2012年球季的小風波, 10月份既賽事, 蘇亞雷斯於比賽期間多次以種族歧視既說話侮辱艾夫拿, 最後蘇亞雷斯被英格蘭足總於12月停賽8場之久及罰款4萬鎊, 艾夫拿於該球季既2月11日主場對利物浦, 打出爭氣波, 勝出2:1, 以下為賽後艾夫拿帶點挑釁既慶祝。

艾夫拿好過份嗎? 各有前因莫善人, 大家睇埋呢段賽前雙手球員握手既片段先啦。

時間過去, 這些時刻都只係球壇既小風波, 雙方於其後既賽事都有握手:

又等我K11同大家一齊分析下艾夫拿於曼聯踢法既重要性, 艾夫拿於冬季空降奧脫福, 但首場賽事其實表現並不好, 但由於當時球隊攻擊線主力為朗尼, C朗及入球機器尹利斯杜萊, 此入球機器最擅長於禁區內找尋機會, 所以如果戰術上, 多點令皮球早點進入對手禁區地帶, 對尹佬有一定優勢, 而艾夫拿正正係助攻力強既後衛, 不俗既腳下功夫, 經常既疊瓦式出波或殺入禁區, 令曼聯當時既攻擊力有所增加, 從而令經常受傷及表現不穩定既軒斯與不擅助攻既施維斯達成為後備, 及後既英超3連冠更成一時佳話, 雖然其制空力弱已是其出道後不久被公認既事實, 但於曼聯最後既2個球季, 其實彈跳力不俗既佢, 掌握時間更有一手既情況下, 令一眾看輕佢既對手, 教練齊跌眼鏡, 可惜年華老去, 加上景物依舊, 人面全非, 雲高爾接掌曼聯後, 未曾於其執教下出賽便結束曼聯生涯, 畢竟雲高爾有其獨特一套既戰術理念, 不是計劃中, 勉強留下, 對於當時33歲既佢, 都未必係好事, 加上意甲勁旅祖雲達斯既邀請有望繼續其職業生涯, 有何不好呢? 向呢度, 我地為艾夫拿對曼聯8年半所作出既貢獻給予掌聲, 及一齊欣賞下其曼聯生涯既光輝歲月及精彩圖片。