[讀者投稿] – WKD之曼迷周記
[正式挑戰前四席位]
當利物浦同阿仙奴相繼失分比車路士同屈福特之際，係追貼前列份子嘅大好良機，但曼聯唔單只贏唔到榜尾候城，仲差啲比呢舊肥豬肉啃親添。
睇翻全場精華，場波係劇本式嘅久攻不下，尾段候城更加有利物浦借將馬高域一射中柱，如果唔係運氣嘅話可能主場連一分都不保！摩連奴一貫火氣十足，賽後訪問做到一半就嬲爆離場，相信或多或少都係因為球隊再一次主場失利嘅關係啦。
星期日晚對李斯特城，開波前想著筆寫拉舒福特嘅沉寂同埋妄想下踢雙前鋒嘅可能性。點知從來唔踢442嘅摩連奴彷彿識讀心術，用平排中場配上福仔伊巴嘅鋒線。
球賽未開始我已經萬分期待，甚至對摩連奴刮目相看。佢一直比人嘅感覺係只需要適合佢套戰術嘅球員，甚少改動戰術去配合球員嘅踢法。
敢於求變係其中一樣唔顯眼，但令費格遜多年黎稱霸球壇嘅原因。由傳統442到為朗尼度身訂做嘅4411，再演變成攻無不克嘅無鋒460陣式，不論一套戰術有幾成功，都會有被破解嘅一日，西班牙TIKI TAKA如是，李斯特城快速反擊亦不例外; 球員要與時並進，領隊更加要比其他人有前瞻性同膽色。
當然，有睇場波嘅球迷都知道，佢地係完全發揮唔到呢個陣色嘅任何威力，事關貼住條邊線盤扭突破並唔係馬達同米希達恩嘅專長。
結果我相信係摩連奴嘅指示下，曼聯未踢夠半個鐘已經轉翻做慣常嘅451: 拉舒福特返回左路，馬達同米希達恩除左輪流支援一個踢哂右路嘅華倫西亞，其餘時間就留係中路組織攻勢。 延續近期嘅發展，只要能夠打破缺口，曼聯就會控制全場局面，相比以前領先一球就消極死守，總算有翻些少皇者風範。
曼聯輕取狐狸仔，對手無論戰術發揮同團隊士氣都非常差，基本上曼聯入到第三球嘅一刻，球賽就結束喇。
遺憾地講句，李斯特城嘅表現完全解釋左點解佢地今季會淪落到為護級奮鬥，希望佢地可以慢慢踢翻上黎，因為佢地係好多人追夢嘅動力。
話說李斯特城主場氣勢迫人，每個主場球迷都獲派一個扇型嘅打氣道具，開波初段球迷都非常齊心打氣，嘈到拆天咁滯。但係自曼聯領先，紅魔迷就開始反客為主，唱歌，吶喊 ”UNITED!”，甚至開始唱起 “Wembley, Wembley, Wembley”，意指球隊已經準備好去溫布萊球場踢聯賽盃決賽。唔知以為曼聯踢緊主場波！摩連奴賽後都有拍掌多謝球迷遠道而來幫球隊取得三分。
身處最激嘅聯賽，無論你隊波有幾超班都好，只要稍有不慎，三分就會送俾對手。作為球迷千祈唔好吝嗇你對球隊嘅支持。 領先時當然要為球隊歡呼，但面對困境時，先係球迷發揮最大功效嘅時候!
一場波嘅比數可能不變，但若果球隊能夠保持信心，抬起頭離開球場，賽季完結時就會見到重大嘅分野。 今日嘅曼聯，仲係經常面對老鼠拉龜嘅問題，但佢地落到場就會忘記上一次失分嘅陰影，專注係九十分鐘內去執行教練嘅戰術，而每一仗都比以前積極。 黎到二月，我地終於追上歐聯席位嘅車尾，準備好上車喇!
