在FB Live時預測過球隊會因為世盃主力未操返弗而用上一班新兵同後備兵，點估世界盃踢到最後、贏埋冠軍嘅普巴會正選上陣，仲做埋隊長呢？捱夜睇波唔係易事，所以會更加期望球隊全取三分，從結果論曼聯算係成功嘅。觀賞性當然同利物浦或者曼城比下去，但我認為摩連奴最少喺用人方面已經算勇敢，亦成為咗值得我睇埋場波先訓嘅原因。
曼聯高層同摩連奴嘅關係未稱得上決裂，但大不如前已經係一個公開嘅秘密。自費格遜退休後，總裁活華特一路都咁支持在任領隊，尤其喺買人方面盡量滿足領隊要求，收購行動以迅速見稱，反格拉沙家族嘅聲音都比以往大幅減少。今個夏天除咗費特之外，曼聯就無再買任何即食型球員。現有人腳實力唔差，但睇埋熱身賽就好難認同咁嘅板凳深度可以競逐英超，想贏就起
碼起碼買多一兩個大名球員。摩連奴係公開場合呻買唔到人，但球隊最後都無用行動回應，好可能代表最後通諜，要求佢以此陣容拎到成績出嚟。
佩利亞用熱身賽嘅表現爭取到正選係一件令人鼓舞嘅事，即使我唔太睇佢會係呢個位置取得成巧﹐但至少佢有證明自己嘅機會。搭上費特同普巴，佢繼續緊守崗位擔任防中，等另外兩個中場有更多進攻自由度。相比佢以往幾季嘅態度我認為佢有效率咗，保持到靈氣得嚟又唔屬於懶惰型天才，亦表現出佢戰術適應性好高，踢呢個新位置都好快上手。作為新手當然有啲進步空間，例如因為企位問題佢對拜利同達米安嘅掩護做得好麻麻，導致兩者好多時要冒險出腳；偏好用180度轉身嚟呃對手重心腳，但好少留意或者伸手去檢查身後有無第二個人埋嚟拍，作為防中做呢啲動作好易出事。但整體而言佢今仗絕對合格有餘、保持心態專注足球必定令佢成為下一個連加特。
我對於普巴係世界盃嘅表現有好大改觀，佢忽然開竅明白自己一直缺乏嘅係沉著應戰同紀律，法國固然有超人干堤防守、基沙文同麥巴比進攻﹐但重點係佢無論入波定助攻都唔會流露太多情感，唔再係果個要搶鏡頭嘅普巴﹐只有將目標定喺冠軍嘅人先能夠將情緒壓抑到捧盃一刻。返嚟曼聯佢可能又要揹起返更多擔子，但佢已經俾我地睇到一個outspoken嘅未來隊長。國際賽從來都係讓人成長嘅地方，又睇下盧卡古同連加特呢啲出場時間多嘅球員會唔會再進步？
作為揭幕戰，無論曼聯定李斯特城都完全未上力，所以唔對個別球員做過多評論。雙方都踢返最擅長果家波，要不是艾馬迪早早犯下天條令曼聯揸住一球優勢嚟踢，反而有機會見到摩連奴㩒掣狂攻。前面福仔同山神真係踢得好差，但同戰術有關係，希望之後有改進再評價都唔遲。後防整體都算穩健同有條理，補位出腳溝通都唔錯，不過要留意七十分鐘後集中力明顯下降，尤其係後段被華迪多番攻擊盲眼位。下場作客白禮頓應該會更加保守，但「你地揀咗呢個領隊，就要接受佢贏到波嘅踢法」╴死敵利物浦名宿加力查講嘅。
