曼聯經歷四場不勝加上將帥不和嘅消息越傳越熱，而且更傳出摩連奴將帥位不保下，主場迎戰榜尾球隊紐卡素的確令人帶著謎團出發。開波10分鐘內即失2球更將球隊如同打進地獄一樣，其後摩連奴連續變陣圖收失地但半場卻仍看不到轉機。已打定輸數嘅球迷卻於七十多分鐘開始迎來大逆轉，最終由馬達，馬斯亞嘅入球追平而且更於完場前由近況跟球隊同樣低迷嘅山齊士一鎚定音絕殺反超前紐卡素全取3分，面對紐卡素贏波或者不甚出奇但過程卻是估你唔到，到底曼聯能否借今仗成為今季轉捩點呢？！拭目以待。
今場陣容為迪基亞繼續把守最後一關，後防右至左為楊格，拜利，史摩寧及梳爾，防中由麥湯米尼及馬迪負責，普巴為攻中而前場三子為拉舒福特及馬斯亞搭上單箭頭嘅盧卡古。
門將迪基亞算是最無辜的一位，開賽10分鐘便被堅尼地及武騰嘉紀一球禁邊一球禁區內近射抽爆，相信當時迪基亞的心情相當難受，但及後全因迪基亞救出舒爾維嘅遠射及武騰嘉紀小禁區內嘅近門頭鎚令曼聯未致斷氣，所以迪基亞對於今場曼聯之逆轉勝利也有一定的功勞。
後防方面，接替華倫西亞成為今仗右閘及隊長嘅楊格，或多或少要為兩個失球負點責任，堅尼地嘅射門雖然漂亮但楊格也未免太輕鬆地讓其起腳了，而第二個失球亦讓武騰嘉紀太輕鬆地轉身抽射了吧。其後楊格於右路出波相當積極，多次嘗試傳中不過成功次數不多或是質素不夠，幸好最重要的一次傳中於90分鐘出現，於右路底線傳中正好讓山齊士黎個絕殺反勝。
左閘方面，梳爾繼續坐擁正選之位，而今場波梳爾發揮正常水平，但助攻時始終跟左翼嘅馬斯亞有貌合神離之感，經常疊瓦走落底線卻未得到馬斯亞的傳送，亦未能成功拉開對手後防反而把對手右翼帶回助守，這點真的要邊線球員多多配合才能產生默契。
中堅方面，史摩寧繼續正選而表現亦能維持，亦曾有一次禁區內近射差點入球可惜被對手門將杜巴卡救出，不過所失兩球亦因後防佈陣及企位不佳所致，史摩寧算是目前有最穩定正選嘅中堅因此若想更進一步便要擔起後防領軍之責任。另一中堅為上仗回歸正選嘅拜利，今仗兩個失球也與整條防線有關，因佈陣與企位的失誤令後防變得鬆散，結果落後2:0的情況下，因要馬上變陣而由馬達於19分鐘入替。
入替後的馬達主要於中前場作為自由人的角色出現，不過上半場球隊均未能入局下，馬達也變得沉寂。但從來努力也會有回報，曼聯於下半場慢慢上力且控球戰局，馬達亦有一球禁區外窩利柱邊出界，只是遲遲未能追回一球令球隊信心不足，不過馬達於70分鐘用一球罰球將比數追成1:2，而球隊亦因而信心大增達成最後的反勝。此罰球的質素極高亦入得及時，可見馬達的質素，除此之外，馬達亦為球隊搏到盡，完場前其中一球可見馬達由半場左右跑至底線為的只是令對手只有界外球而非可一腳長傳的龍門球，這就是鬥心。
防守中場方面，麥湯米尼拍馬迪，不過由於球隊10分鐘已失2球，19分鐘於馬達入替拜利後，麥湯米尼退落中堅位置不過明顯此年青人未能抵住壓力加新位置，感覺仍然似在踢防中一樣，此調動令麥湯米尼表現患得患失，最終半場由費蘭尼入替。費蘭尼入替後位置並非防中而是接近與盧卡古成雙箭頭的陣式，目的明顯就是要搶高點而費蘭尼既能控定高空球，亦能幫忙引開對手令紐卡素後防變得鬆散，而且亦曾於禁區邊出現有威脅射門但被杜巴卡擋出而已。
另一防中的馬迪，今仗表現以其級數其實並不算好，所失第一球亦因其失位及遮線不佳所致，而於下半場一次助攻於禁區內射空門高出，明顯今場賽事狀態不足，而其實最近馬迪的表現也若有所失的感覺。不過下半場因戰術調動而轉移到中堅位置卻反而表現淡定，未有給予對手任何攻門威脅。
進攻中場的普巴，今仗上半場的表演未算出色，加上對手初段已領先兩球下，屯重兵於後防更令喜歡上腳嘅普巴更難發揮。反而下半場再退一格至防中位置，雖然不時也要回到中堅位包抄但控球向前時由於空間更多卻得到更好的發揮，得以用其實力演繹B2B此位置，馬迪射空門便因為普巴禁區邊的射門被杜巴卡撲出後出現。而馬斯亞的入球便是普巴走到對方禁區內的配合，傳送得宜地讓馬斯亞追成平手。反超前一球亦由普巴傳交助攻的楊格傳中而出現。賽後獲選為今場MOTM，其實只要普巴專心一意去踢波，真係世界級架。
