曼聯令人失望地喺主場以0:2落敗，堂堂一隊Big 6球隊究竟發生咩事呢？點解會被一隊榜中下游球隊零封呢？我哋可以探討以下三點：
一、曼聯整隊攻擊線點解好似咁易防呢？
二、曼聯失嘅兩球麥佳亞都責無旁貸，堂堂8,000萬中堅，點解會攪成咁？
三、傷兵同後備兵源不足對戰績嘅影響。
一、曼聯今場攻擊線上派出馬斯亞、占士、佩利亞、馬達同格連活特依個攻擊組合。依個攻擊組合最大弱點係响速度、組織、頭鎚同逼搶都唔夠鋭利，造成四不像嘅局面。喺速度上占士同馬斯亞佔優，但馬達、格連活特同佩利亞就唔夠快，令到曼聯最大進攻本錢快速反擊應用唔到。喺組織上蘇B上半場選擇用佩利亞做攻中，可惜佢成日hold死個波拖慢咗個節奏，加上佢做唔到啲小組入滲，成個中路組織都帶唔到威脅俾對手。此外，占士組織能力亦都係一般，馬斯亞可以做一啲小組但佢係打最前，冇理由要佢成日回後組織攻勢。而最有球賽閱讀能力嘅馬達反而被安排打右邊，間接影響佢嘅發揮。雖然下半場馬達被安排打番攻中，但由於對手領先下塞晒啲人落禁區頂同禁區，所以想打地面組織相當困難，咁就唯有打高空波。雖然馬達傳高空波都好拿手，但馬斯亞、占士、佩利亞同格連活特都唔係擅長頭鎚同埋對抗性亦都較弱，所以打高波佔唔到優勢。最後首循環對般尼射入第一球主要係打前場壓迫偷咗對手個球打反擊，但馬斯亞、占士、馬達同格連活特對攔截都唔係好擅長，咁就連前場壓迫都做唔到，試問咁嘅前鋒線點可以咁容易爭取到入球呢？
當然佢哋唔係一啲攻擊都冇，只不過係把握唔到。喺頭35分鐘，曼聯有4次有威脅嘅攻門，三次喺右邊雲拜沙卡發動，可惜馬斯亞、佩利亞同馬達都食唔應個波。而之後馬迪傳直線，馬達固意漏俾馬斯亞，可惜又把握唔到，連咁好機會都把握唔到，隊波想入波都難。
二、失嘅第一球係馬迪頂輸咗俾對手然後俾基斯活特射入，當時麥佳亞冇mark實佢。第二球又係麥佳亞俾咗少少空位積洛迪古斯勁射破網。兩球都同佢有關，依家就試吓搵個原因。
其實失高空波曼聯已經唔係第一次，點解會咁，首先麥佳亞其實路數唔錯，應付一啲正路嘅波係OK嘅，但當要佢去處理一啲混亂情況，例如高空轟炸，對方球員一齊過嚟湧嘅波就唔識得去應變。另外，隊中球員除咗馬迪、麥佳亞同鍾斯比較有身型同對抗性較高外，其他球員連埋龍門應付高空波都比較弱，作為中堅嘅麥佳亞面對壓力會好大。由於要兼顧其他隊友，所以唔可以集中應付面前嘅敵人，佢往往企死防線最後一格就係要睇清晒成個環境，但到佢附近敵人攞到個波想射門時，佢已經慢咗一步阻止。
其次就係默契。中堅同中堅之間個合作性係重要嘅因素睇吓個後防夠唔夠穩健。鍾斯同麥佳亞喺英超正選合作都唔夠三場，好多時大家真係要夾過先至真係了解得到拍擋嘅特性。其實第二球失最先係拋界外球俾人搶到然後對手做個撞牆，之後先至俾到積洛迪古斯。最重要係麥佳亞預計唔到鍾斯阻止唔到對手做撞牆，後防有甩漏係間唔中會有，重點係要有人補到位，因為做後防冇理由100%每球到攔截到。依球麥佳亞補唔到位就係因為默契不足。
三、傷兵令到某幾位球員長期正選上陣冇得休息，例如馬斯亞、福仔、費特同麥佳亞。長期征戰真係會令到球員有厭戰嘅感覺同埋會過度盡力。前者會令球員缺乏動力去拼搏，後者令到球員發揮唔到真正實力同埋保持唔到清醒頭腦。另外，持續用同一陣容亦都容易俾對手睇通路數，令對手可以做針對性部署。仲有球員過度疲累亦會令球員容易受傷，例如：麥湯文尼同埋福仔。不過，依樣嘢只有怪自己一早放走盧卡古、山齊士同史摩寧。
最後福仔嘅傷令事情變得複雜化，希望曼聯能夠喺轉會窗有正面嘅動作。