般奴嘅加盟激活咗曼聯攻擊線，同樣都係打攻中嘅連加特同佩利亞對屈福特正選連後備都冇，咁係咪即係可以放棄佢哋呢？我嘅答案就話唔係，球隊仲有足總杯、歐霸同聯賽前四之爭，相信佢哋仲係蘇B計劃嘅一部份。不過連加特喺般奴加盟之下所發揮嘅即時作用應該比佩利亞為高，而般奴對佩利亞嘅作用係全面提升佢技術。
首先簡略地講翻般奴踢法上一啲特點。佢係一個攻擊意識好強同有創造性嘅球員，只要佢一有波到腳就會作出令對方守衛難以防備嘅傳送，無論係一啲短傳入涉定係過頭波。另外，佢有一股推動力俾隊友，佢會為隊友提供源源不絕嘅機會，就算最後個攻勢係唔成功，佢都會拍手鼓勵番隊友，好似俾隊友一個指示只要你走到靚位就會不斷做波俾你。仲有佢唔單止控球在腳發揮到威力，佢無球走動亦都做得非常出色。佢除咗係中場外，仲會經常企喺邊線接應同俾波隊友帶波上中路，佢係屬於一個可以自己搵食球員員外仲係一個可以提升隊友實力。
就因為般奴嘅靈活多變嘅踢法對於連加特嚟講就非常配合。因為連加特屬於擅長冇球走動嘅球員同埋佢唔會控球在腳太耐，佢有波就會交然後走位。般奴可以交啲隱蔽式嘅短傳首先撕破對方第一道防線，之後連加特就可以有空間組織攻勢。又或者連加特帶波般奴走空位，然後前者做傳送都得。連加特之前嘅缺點係做唔到一啲致命傳送，只係橫傳然後就走位，加上尤其對中下游球隊時對手主要打密集，所以減低咗連加特嘅威脅。當然佢把握力差亦都令球迷對佢不滿。不過一旦球隊破到對方密集防線就會容易製造缺口，令連加特再次有機會入波，所以般奴對連加特要做嘅工作只係引發出佢已經有嘅能力，相對嚟講比較易。
對於佩利亞嚟講佢傾向鍾意控球在腳組織攻勢，亦都鍾意作關鍵傳送同埋主理罰球角球，加上佢唔擅長無球走動同埋做有威脅性傳送。佢嘅踢法跟本就同般奴重叠，所以我相信般奴同佩利亞嘅合作所產生嘅化學作用會冇咁大。不過換轉角度嚟睇，由於佢哋擅長嘅特點係相近，佩利亞可以從暫時放低自己固有一套足球理念，然後從般奴身上學習佢嘅罰球、長短傳、走位配合同射門，再融合到自己身上，建立一套新嘅風格，就好似當年普巴喺祖雲達斯跟派路學嘢咁，不過，重新建立自己係辛苦，所以般奴對佩利亞影響係在於技術層次嘅提升，相對嚟講比較難，要用時間都會比較耐。
總括嚟講，我見到連加特同佩利亞都有團火去比賽，只不過限於佢哋嘅實力令到佢哋喺球場上貢獻唔大。現在有新兵般奴帶嚟衝擊，睇吓佢哋兩個實力會唔會得到提升。