[WKD之曼迷周記]－向前看（讀者投稿）
經過大半季嘅磨合，摩式踢法愈見清晰，球員對戰術了解度慢慢熟悉。新年過後嘅球賽，唔單止戰術劇情類近，連勝負關鍵都係取決於落場執行力同扭轉乾坤嘅能力，相信同一套踢法係黎緊嘅日子會遇到更多針對性部署。
人腳，足球哲學，教練都齊哂喇，曼聯爭啲咩先可以更上一層樓，重現冠軍球隊嘅風範呢?
首先要解決嘅係鋒線問題。一騎當千嘅伊巴今季免費加盟，完美演繹正宗九號中鋒嘅角色，佢以其世界級嘅射手本色帶領曼聯係四線比賽取得成績，但代價係馬素爾同拉舒福特。對年輕球員黎講，出場時間就係成長嘅絕對條件。過往不乏有潛力嘅新秀因為長期坐冷板凳而令實力停滯不前，近年就有戴菲同比拉希奴兩個典型例子。
摩連奴俾兩位超新星嘅訊息同對待遇一樣: 我就踢開單箭頭嘅，如果你地贏唔到伊巴嘅話就只可以同其他翼位球員爭邊路正選。於是佢地展開左競爭，輪流獲得上陣機會。話就話對佢地有正面影響，但兩者嘅狀態明顯比上季飄忽，原因係左/右中場嘅要求始終同前鋒有出入，而且因應對手而要執行嘅指令亦相對多元化同複雜。今年就有好幾場比賽會見到兩個球員好落力但硬係出現係錯嘅位置，或者做決定唔夠以前果斷。
馬素爾上半季陷入低迷，聖誕後開始重拾球感，掌握到由中場位置同禁區邊開始進行突破嘅不同之處，攻守嘅平衡亦見到有進展; 相比下拉舒福特就顯得好迷失，除左無以往咁有信心去單對單突破同做反越位之外，處理半單刀/單刀嘅時候都無左上季果種同年齡不符嘅冷靜。伊巴可以繼續統治英超嘅日子有限，與其浪費福仔嘅光陰去適應新位置，不如將呢位天生嘅射手琢磨成為英格蘭未來十年最強嘅前鋒，唔好辜負外星人朗拿度對佢嘅一番厚望。
中場球員大把選擇，但同樣有好多改善空間。未來幾年球隊肯定會圍繞住普巴去建立成個中場嘅踢法同鞏固陣容，但今日佢仲未展現到球王級嘅大賽表現同逆轉賽果嘅能力，穩定性更加係為人垢病。若果話施丹最恐怖嘅地方係能夠令隊友比平日踢高一班波，咁現階段嘅普巴只係群星拱照，有時更加會犧牲埋隊友嘅專長，俾佢係中場有絕對嘅自由度。我地知佢可以有幾好波，但我估佢要進步嘅話，必先會經歷一兩次大挫敗。低潮黎到嘅時候，我地做球迷最緊要就扶佢一把！
後防不穩問題雖然明顯（詳見舊文 - 黃色防線警告現正生效），但大部份比賽都踢得出戰術要求。除左經常換正選嘅左閘位，基本上所有後衛都好清楚自己要做啲咩，連我一直認為係失敗收購嘅洛荷都愈踢愈成熟，今季比史摩寧更加有大將之風。中堅人腳尚可，不過左右閘都有買人加強板凳深度嘅必要啦。須知道曼聯打陣地戰時入波嘅瓣數，同兩閘走動能唔能夠干擾對手定位防守有莫大嘅關係。
週記出街之時曼聯經已係足總盃八強俾車路士踢出局，但我地見到一隊有希望有鬥心嘅球隊，抬起頭準備好迎戰接今季餘下嘅挑戰。
We will come back stronger.
[WKD之曼迷周記]－當夢劇場變成了迷宮 （讀者投稿）
[當夢劇場變成了迷宮]
又一個失望既週末，我諗大家都無異議。
今年係奧脫福重演左好多次<一分詛咒>
一次兩次係偶爾、 係巧合。咁七次呢?
之前曾經提過，輪換係摩連奴最唔敢面對嘅其中一個課題。
賽程極頻密嘅二月本來就係呢科嘅考牌戰，不過佢照樣用十四五個主力踢哂咁多場波，亦換到成績翻黎。
考試延期到三月，但難度就大大增加喇。岩岩呢場波曼聯雖然由主守變返做主攻，其實球隊嘅演出大致一樣。可能你會話邊度似呀。咁你地覺得上半場定下半場打得好啲？點解呢？
係體力！
上半場嘅進攻有目共睹，如非屢屢門前失機，45分鐘內就已經可以完結比賽。
而下半場攻勢唔夠入肉，某程度係因為十人應戰嘅般尼茅夫已經決定死守，但更明顯嘅係曼聯嘅傳球速度開始慢落黎。球員走動亦相對少左，好多時見到一邊塞車，隔離線先開始搵位入楔，但人地一做已經做好轉邊嘅防守。陣地戰就好似捉棋咁，領先半步可以令對手跟唔上節奏只能捱打，大有失誤嘅可能。相反，人地比你更早準備好防守設置嘅時候，你就只能靠個人技術去打破彊局。係米希達恩缺陣嘅情況下，就得翻馬素爾有咁嘅能力，而佢只屬中規中矩嘅表現都改寫唔到今場嘅結局。
早段伊巴未把握到黃金機會，反而被對方球員嘅舉動擾亂左自己嘅專注力，差少少仲做埋紅牌阿姑 (執筆之時佢已被罰停賽三場，筆者覺得非常合理)，所謂嘅Trash Talk其實就係想見到咁嘅成效。下半場佢的確少說話多做事，集中返幫球隊拎三分嘅目標上面，但對方已經泊曬大巴，迫佢做高點二傳而盡量挾制佢用腳控波嘅機會。至於宴客嘅果球十二碼，其實伊巴嘅處理尚算合格，只係Man of the Match嘅保路斯落地太快，救得太好。
輪換嘅球員又點呢?
鐘斯上半場輸果球十二其實由幾個問題組成: 轉身慢而失位，令對方有個半餐士機會，自己陷入兩難局面。而佢落左腳而非右腳閘波都係比較魯莽嘅決定，雖然佢盡快收腳，但個動作已經變得難睇，所以佢都無點投訴球證嘅判決。下半場亦都見到有一兩球彈地波判斷失誤，除左證明佢未夠弗之外，亦都係一個警號: 廿五歲嘅佢要急起直追喇，否則以咁防守意識同技術，最後嘅級數可能比已經離隊嘅伊雲斯更差.
梳爾終於等到正選機會，表現都算合理，但控球在腳時嘅決定就仲有改善空間，尤其係有幾次係中場交失波，好客易就送左個反擊機會俾對方。下半場見到佢體力下降得幾勁，換走都係正確嘅決定。希望佢修身之後可以踢返出上季表現出黎嘅潛力。
朗尼今場交足功課，攻守都見到佢蹤影，傳波走位亦都到位. 而且由佢做策動或者駁腳嘅時候亦都無左以往既納懦. 感覺上佢係追緊摩連奴要求嘅速度，配合返球隊嘅節奏. 我就覺得唔應該同時換走佢同卡域克，唔單只令中場既分工出現混亂，亦變相無人克制普巴做出心急嘅決定，譬如拎住個波橫衝直撞. 點都好，既然決定左要留係曼聯，就同班後生一齊努力爭正選啦!
"踢太多會殘，唔踢又會無態"，輪換成功與否其實好馬後炮，但足球本身都係。
摩連奴仲未將手上既球員用盡，呢一關佢遲早都要面對，但只要有繼續有小豬呢種球員嘅話，我相信曼聯可以令佢對後備球隊更加有信心，係輪換呢方面更上一層樓!
[讀者投稿] – WKD之曼迷周記
[讀者投稿] – WKD之曼迷周記
[挺身而出]
當一個三十五歲嘅球員跑足九十分鐘，其他人仲有咩藉口偷懶？伊巴帶俾球隊嘅影響力，遠超呢場勝利呢個獎盃！
曼聯同修咸頓合演左一場高潮迭起，絕無冷場嘅決賽。賽前睇低一線嘅修咸頓，踢出比曼聯高一班嘅團體足球，但冠軍只有一個，今晚係屬於有幸運之神眷顧嘅紅魔鬼。
曼聯踢出慣常戰術，由翼鋒向兩閘施壓，盡量拉闊空間同創造單對單機會，三中場就以控球為主，輪流後上造波。十九分鐘，無名英雄靴里拉係前場博到罰球，伊巴三十碼一射中鵠。幾分鐘後洛荷突然跑入中路令對手失左方寸，連加特燙個遠柱地波將領先優勢擴闊到兩球。
比數上係贏緊兩粒，其實行軍速度緩慢之餘，中後場更加屢屢交失波。表面上無咩異樣，但曼聯球員嘅舉動就等於直接話比對手知：「我地好攰！」
企翻好陣腳後，修咸頓撕下被動嘅面具，開始踢出早已盤算過嘅戰術。佢地今場嘅兩翼側擊簡直就係教材嘅水平，由協防到反擊，疊瓦落底到切入中路嘅配合都一流。
列蒙同貝查特非常搶鏡，不斷嘗試突破我方右路。馬達係攻守上都跟唔切以上兩人，華倫西亞獨力難撐，有好幾次都靠中堅或者防中僅僅包到。
另一邊嘅梳亞雷斯同禾特包斯雖然唔係扭波同速度型球員，但一樣俾到好大威脅，利用禾特包斯斬波準嘅特點，多次係禁區前右路傳中，史摩寧同拜利對住有腳法有身高有意識嘅基比亞甸尼就顯得非常吃力。洛荷更加嗌哂救命，眼見馬素爾, 連加特都唔回防，由得對手係兩邊企定定較炮，真係欲哭無淚。唔係旁證錯判詐糊嘅話，呢場波可能係修咸頓由頭帶到尾。
戰況逆轉，修咸頓開始連控球權都搶埋，本來佢地仲有中前場迫搶嘅，但曼聯踢踢下都無力爭中場，結果戴維斯同羅美奧係中路愈踢愈輕鬆，慢慢變成聖人帶住節奏黎踢嘅局面。信心同狀態都十足嘅基比亞甸亞開始食住史摩寧，其射手觸覺兩次打破大門，下半場三分鐘就追成二比二。之後戰局基本不變，曼聯嘅後場仍然係腥風血雨，幸得門神迪基亞同佢個最佳朋友門柱先唔洗輸到第三球。
七十分鐘後修咸頓體力下降，曼聯係完場前有一個人數唔多嘅攻勢，成場都踢得好好嘅雙中堅吉田麻也同史提芬斯一次失位，就眼白白睇住伊巴頂入致勝球。
伊巴唔單只以個人之力幫曼聯捧走獎盃，仲以身作則向隊友展示左要點樣將爭勝心轉化為動力。佢除左兩個入波之外，仲多次係門前清波，中場塞車時幫手造波。甚至乎係入完波之後果最後幾分鐘，佢用埋超越左極限嘅奶力都要去協防，完左場連身都企唔直。 相比之下，其他球員嘅心理質素就好似小朋友咁脆弱，真係需要向佢好好學習。
經過呢場波，我相信對成隊波嘅士氣有好大幫助，因為伊巴用行動感染左佢地: 要贏就要付出一切，落到球場無人會在意你最近踢得有幾密有無傷患傳媒點寫你，總之要心無雜念，幫球隊拿下勝仗。
以前佢脾氣古怪，有時係球場上會獨行獨斷，信唔過隊友，其實都係源自於好勝。伯樂摩連奴同年齡令佢學識將好勝心轉化成動力，亦會將球隊利益放係最前，甚至乎愈黎愈多見佢係場上鼓勵隊友。以前有拿臣以三十五歲之齡做短暫救兵，今年有伊巴做拯救者.十年前有三十五歲拿臣做短暫救兵，今年有三十五歲伊巴拯救曼民
He is a fine wine.
[讀者投稿] – WKD之曼迷周記
[讀者投稿] – WKD之曼迷周記
[黃色防線警號現正生效]
久違左既曼聯平安鐘, 係呢個星期再次大派用場。
我地係主場大勝聖伊天三比零, 可以話係半隻腳踩左入十六強, 但表現係咪咁有信服力呢?
縱使係控球權絕對地壓倒對手, 但睇翻上半場精華, 真係以為著綠衫既先至係曼聯.
開波兩分鐘拜利已經同靴里拉溝通不足而交左球醫院波俾羅美路, 甚至造成失誤後兩人企係原地一秒先醒覺, 後者即刻返入小禁區防守, 而拜利仲係施施然咁回防。
仲有好多次欠缺集中力嘅情況出現, 例如對方快開罰球, 輕鬆甩開拜利亦突破越位/ 左閘白蘭特係人手足夠嘅情形下魯莽出腳, 球證睇得清楚少少已經判左十二碼. 旁述形容曼聯上半場嘅防守球員訓緊覺, 真係唔算過份。
唔知摩連奴係咪都有用風筒黎同球員訓話, 下半場嘅防守效率有所提升. 戰術上亦可觀察到中場同防線之間嘅距離收窄左, 令傳球路線更難之餘, 敵軍嘅攻擊手都無咁多空間可以隨意遊走。 對方唯一一次機會亦係黎自普巴望波唔望人, 白蘭特回唔切防而令前鋒路斯有個半單刀機會, 最後靠羅美路準確嘅出迎化險為夷。又一次證明防守統領同進攻指揮一樣咁重要, 否則就算人多守人少都係會失波。
接住星期日反勝布力般嘅足總盃十六強賽事，後防亦多次受到考驗。格拉咸把握一次機會捉到史摩寧未擺好防守姿勢，一個箭步已經兜到史摩寧背脊兼突破越位，係十八碼點射入遠柱網仔。另一前鋒Emnes外型踢法都酷似以前效力史雲斯嘅高美斯，一樣以速度同走動為曼聯帶黎唔少麻煩。曼聯雖然其後控制大局，但對面完全無放棄過晉級嘅慾望，只要一有死球就會大腳掘上去禁區爭頂。可能係好典型英冠英甲嘅踢法，但對布力般黎講呢個係最低成本而有可能成功嘅戰術。考慮到賽程問題，摩連奴寧願俾三十分鐘雙巴去博，都唔想返主場重賽。從結果睇，佢又一次做啱決定。
球隊開波入唔到局或者站唔穩陣腳可以有好多原因, 摩連奴賽後表示開波前已經發現球員精神未做好準備, 更衣室氣氛有啲散漫。我就認為同唔熟悉其他聯賽嘅踢法有關，即使點睇重播同分析都好，始終唔係每季對陣兩次嘅老對手。一隊球隊幾時最需要老大哥坐陣? 就係要面對未知因素既時候, 年輕球員的確係好有拼勁, 但老將就知道係球場上要點做先可以維持球隊嘅風格, 踢出賽前部署. 係呢一方面, 擔當到呢個職責而又有爭取到正選嘅就得番卡域克, 無佢控制節奏(當普巴踢指揮官時尤甚) 嘅時候會好容易愈踢愈急, 攻唔入之餘又容易失誤輸反擊. 朗尼雖有經驗但狀態反覆, 短期內都未必會出現係正選名單之中. 剩底嘅史摩寧實力唔錯, 只係慣於係後面單打獨鬥, 未俾到維迪果種挺身而出嘅感覺我地。
其實, 有咩好得過俾對手搵到弱點嘅同時又順利晉級呢? 呢種水平嘅防守如果一黎就踢決賽或者惡鬥車路士, 分分鐘俾人大炒出局. 而家用左兩場去了解後防問題, 相信防守專家摩連奴一定搵到辦法去解決. 下星期, 我地可能揸住個聯賽盃出週記!
[讀者投稿] – WKD之曼迷周記
[讀者投稿] – WKD之曼迷周記
[漸入佳境]
因為有各項盃賽要踢嘅關係，係岩岩呢個禮拜曼聯已經踢埋二月份最後一場英超。經過今季多次主場失分嘅經驗同影響，曼聯已經再無半力出擊嘅條件，一於夫添上陣，獅子撲兔！
今場對屈福特用翻慣常嘅451，伊巴繼續搭任中鋒制對面一對中堅，令左路嘅馬素爾有更多空間突破。右路華倫西亞保持住一月份拎最佳紅魔嘅表現，成條右邊打哂咁滯。
由於馬仔俾到唔少壓力對手，馬達同米希達恩係中前場幾乎係兩個自由人，不停交換傳球者同突破者嘅角色。屈福特上半場淨係防守已經非常吃力，莫講話要策動一個有效嘅反擊。
踢後一格嘅普巴同埋靴里拉就因此踢得好輕鬆，見球隊已經夠哂攻力，索性將個波盡快傳去前場，其餘時間就做無球走動。較少帶波出擊可以加快進攻節奏之餘，亦減少左失誤俾人偷波打反擊嘅機會。
後防越打越勇嘅拜利及史摩寧成場波都無受到太大威脅，反而左閘呢個位置嘅最佳人選仍然需要時間去觀察，始終白蘭特係攻守嘅走動同決定都唔太自然，我就認為防守中場先會係佢發揮得最好嘅地方.
就算摩連奴唔講，我地都睇得出呢個半場係近年曼聯進攻最華麗最到肉嘅45分鐘，另一幕比較深刻嘅有歐聯狂攻禾夫斯堡。
第一球嘅組織經過埋米希達恩同埋伊巴嘅傳送走動，馬達再接應馬素爾底線傳中，門前射入。下半場馬素爾就靠個人技術同冷靜嘅頭腦,呃過對方後衛同門將，乖巧地射入一個近柱波。其實曼聯值得一場更大嘅勝利，亦睇得出佢地有積極嘗試過，只不過未能將比數拉開之下，摩奴連就轉為保住勝果，換入費蘭尼增加中場嘅對抗性。賽事亦以二比零結束。
值得注意嘅係，屈福特係下半場曾經製造過一個驚險鏡頭，佢地憑住一次反擊機會嘗試係右路傳中，四五個防守球員都只係望住個波跑，無留意到後上嘅真馬特，佢係六碼點無人看管下射高。呢次防守充分顯示左後防溝通不足，史摩寧雖然穩陣，但去到緊張關頭往往會忽略左指揮防線呢一環。唔係次次都咁好彩架！
今場嘅攻勢浪接浪，難得嘅係攻唔入嘅時候，下一波就會更加兇猛，球迷嘅喊聲不繼推動場中球員嘅信心。呢個情況係下半場更為明顯，每當馬素爾或者拉舒福特係左邊拎波嘅時間，球迷都會嗌得更響亮，意指要求佢地直接持球推進，直接挑戰對方防線。
對於信心動搖同狀態反覆嘅馬仔福仔，無野比球迷係身後支持黎得更加直接。馬仔就以本場最佳球員嘅身份去回應摩連奴嘅期望，近排頭耷耷嘅福仔又會唔會企返起身去證明自己呢?
黎緊嘅盃賽相信會有更多機會見到老大哥如朗尼卡域克落場，希望繼續發揮到以老帶新嘅作用。
[讀者投稿] – WKD之曼迷周記
[讀者投稿] – WKD之曼迷周記
[正式挑戰前四席位]
當利物浦同阿仙奴相繼失分比車路士同屈福特之際，係追貼前列份子嘅大好良機，但曼聯唔單只贏唔到榜尾候城，仲差啲比呢舊肥豬肉啃親添。
睇翻全場精華，場波係劇本式嘅久攻不下，尾段候城更加有利物浦借將馬高域一射中柱，如果唔係運氣嘅話可能主場連一分都不保！摩連奴一貫火氣十足，賽後訪問做到一半就嬲爆離場，相信或多或少都係因為球隊再一次主場失利嘅關係啦。
星期日晚對李斯特城，開波前想著筆寫拉舒福特嘅沉寂同埋妄想下踢雙前鋒嘅可能性。點知從來唔踢442嘅摩連奴彷彿識讀心術，用平排中場配上福仔伊巴嘅鋒線。
球賽未開始我已經萬分期待，甚至對摩連奴刮目相看。佢一直比人嘅感覺係只需要適合佢套戰術嘅球員，甚少改動戰術去配合球員嘅踢法。
敢於求變係其中一樣唔顯眼，但令費格遜多年黎稱霸球壇嘅原因。由傳統442到為朗尼度身訂做嘅4411，再演變成攻無不克嘅無鋒460陣式，不論一套戰術有幾成功，都會有被破解嘅一日，西班牙TIKI TAKA如是，李斯特城快速反擊亦不例外; 球員要與時並進，領隊更加要比其他人有前瞻性同膽色。
當然，有睇場波嘅球迷都知道，佢地係完全發揮唔到呢個陣色嘅任何威力，事關貼住條邊線盤扭突破並唔係馬達同米希達恩嘅專長。
結果我相信係摩連奴嘅指示下，曼聯未踢夠半個鐘已經轉翻做慣常嘅451: 拉舒福特返回左路，馬達同米希達恩除左輪流支援一個踢哂右路嘅華倫西亞，其餘時間就留係中路組織攻勢。 延續近期嘅發展，只要能夠打破缺口，曼聯就會控制全場局面，相比以前領先一球就消極死守，總算有翻些少皇者風範。
曼聯輕取狐狸仔，對手無論戰術發揮同團隊士氣都非常差，基本上曼聯入到第三球嘅一刻，球賽就結束喇。
遺憾地講句，李斯特城嘅表現完全解釋左點解佢地今季會淪落到為護級奮鬥，希望佢地可以慢慢踢翻上黎，因為佢地係好多人追夢嘅動力。
話說李斯特城主場氣勢迫人，每個主場球迷都獲派一個扇型嘅打氣道具，開波初段球迷都非常齊心打氣，嘈到拆天咁滯。但係自曼聯領先，紅魔迷就開始反客為主，唱歌，吶喊 ”UNITED!”，甚至開始唱起 “Wembley, Wembley, Wembley”，意指球隊已經準備好去溫布萊球場踢聯賽盃決賽。唔知以為曼聯踢緊主場波！摩連奴賽後都有拍掌多謝球迷遠道而來幫球隊取得三分。
身處最激嘅聯賽，無論你隊波有幾超班都好，只要稍有不慎，三分就會送俾對手。作為球迷千祈唔好吝嗇你對球隊嘅支持。 領先時當然要為球隊歡呼，但面對困境時，先係球迷發揮最大功效嘅時候!
一場波嘅比數可能不變，但若果球隊能夠保持信心，抬起頭離開球場，賽季完結時就會見到重大嘅分野。 今日嘅曼聯，仲係經常面對老鼠拉龜嘅問題，但佢地落到場就會忘記上一次失分嘅陰影，專注係九十分鐘內去執行教練嘅戰術，而每一仗都比以前積極。 黎到二月，我地終於追上歐聯席位嘅車尾，準備好上車喇!
[讀者投稿] – WKD之曼迷周記
[讀者投稿] – WKD之曼迷周記
[準備迎接真正嘅考驗]
今週無英超波睇，不過曼聯仍然踢左兩場本土盃賽。
帶住二比零嘅優勢，星期四去到侯城進行聯賽盃四強第二回合。
排陣上除左兩閘同翼位以外，主要用番對史篤城嘅正選，顯得出摩連奴唔敢掉以輕心.
賽果證明佢擔心得合理嘅。
上半場洛荷係禁區內推跌馬古尼令侯城獲得十二碼，赫度史東成功將呢個爭議性嘅判決轉化成入球
下半場普巴把握到對手解圍犯錯，快腳篤入追和。但黎到八十四分鐘，尼亞斯係門前無人看管下輕鬆射成二比一.
曼聯以總比數三比二打入決賽，但呢仗嘅防守水平同集中力明顯唔合格，希望只係體力問題。
十七場不敗以最少嘅影響下結束，算係不幸中之大幸。
相隔三日，返翻黎奧脫福踢足總盃第四圈，今仗嘅對手係剛剛升返上英冠嘅韋根。佢地嘅前教頭，現家教緊比利時國家隊嘅馬天尼斯都有入場睇波，唔知係幫韋根打氣定觀察費蘭尼嘅表演呢?
今場摩連奴係出場陣容上作出左九個調動，焦點當然落係舒韋恩史迪加身上啦.
小豬有超過一年無為曼聯正選上陣，多次傳出會被掛牌嘅消息。而佢一直以黎都無講過任何關於球會嘅壞話，只係專注於操練。一年之後終於憑住佢嘅狀態回升而打動到摩連奴。佢嘅專業精神唔單只令球迷更加尊重佢，仲為一班年輕球員樹立左良好榜樣。出名嬌生慣養，意志薄弱嘅英格蘭球員就真係要學下野啦.
你以為領隊只係為左拎道德光環而比小豬踢一場容易少少嘅賽事?
呢位前德國隊長就全場助攻助守，以一入球一助攻成為今場最佳球員.
雖然今仗佢受到嘅壓迫同威脅未算大，但起碼證明左三十二歲嘅佢仍然可以為球隊繼續貢獻.
由前曼聯預備組主帥華倫祖斯領軍嘅韋根，防守方面雖然勤力，但自費蘭尼頭鎚建功打破困局之後，幾乎無還擊之力。
其後由史摩寧，米希達恩同小豬錦上添花，曼聯以四比零大勝以回。
另外值得一提嘅係，正選右閘嘅科素文沙，係雲高爾年代發掘出黎嘅一粒新星，可以踢上左右閘同防守中場。今場表演平穩，心理質素算係幾啖定，雖然我認為防守中場會更加適合佢，但作為閘位後備都係一個唔錯嘅選擇，畢竟呢個位置算係我地比較弱同多傷兵嘅一環。同場加映亦有首次為一隊上陣嘅門將佩雷拉同後衛杜安沙比。其中杜安沙比係今季熱身賽曾經亮相，屬於用波型中堅，不過換入前得到伊巴嘅建議'Just keep it simple'，所以只係做返最簡單嘅防守同傳送。加上佩雷拉一次嘅撲救，總算為曼聯保住清白之身.
今週開始嘅輪換制度，並唔係摩連奴最擅長嘅一瓣。但好嘅領隊必須識得善用球隊嘅板凳深度，用正式賽事去保持大部份球員嘅狀態，同時平衡球隊實力，爭取每一場勝利。今個月就係關於呢個課題嘅大考驗，因為曼聯要係廿八日內踢七場波。但同時，如果把握得好嘅話我地就可以重返前四，捧埋聯賽盃!
Are you ready?
[讀者投稿] – WKD之曼迷周記
[讀者投稿] – WKD之曼迷周記
[失分於史篤城後的樂與怒]
以為對利物浦果場已經夠辛苦，點知作客史篤城一樣係吃盡苦頭。
賽前有傳史篤城會派上爭取第100個英超入球既長人高治作前鋒，一向以防守為先既摩連奴當然作出針對性部署，除左一對中堅史摩寧同鐘斯之外，防中由費蘭尼取代上仗正選既卡域克，為既就係應付對方高空波戰術。
馬達一球烏龍波令曼聯既部署大失預算，史篤城恃住有領先優勢，索性連反擊都懶得打，下半場早早就全軍退守，只係有死球既時候先將球員推上前場爭頂，下半場曼聯攻勢凌厲，但前線球員屢次失機，未能將'半CHANCE'轉化為入球，老實講，係朗尼踢出果腳罰球之前，平時魔性澎湃嘅我都已經打定輸數，準備迎接另一次表演合格但全失三分既結局，但場上場下嘅曼聯球員都堅守信念，最後，朗尼係九十四分鐘射入世界級罰球，成為球隊史上入波最多球員，更重要嘅係佢為曼聯攞返一分，我諗無人會諗到佢選擇直射，而佢身為隊長係關鍵時刻挺身而出，佢做到了。
我地經歷左開季嘅慢熱，以為球隊仍然未能擺脫贏形勢輸波嘅陰影，到呢一刻我地雖然仲排緊第六，但最近九連勝，十七場不敗已經係曼聯復甦嘅最佳證明，正如費格遜係近日訪問講到，曼聯今季已經有六場一比一和波收場，而表演都係值得全取三分嘅，如果好彩少少嘅話我地已經可以直接威脅車路士嘅地位。
另一樣令球迷愈黎愈有信心嘅係，每次球隊遇上難題，摩連奴都好果斷咁換人，佢嘅調動多數都能夠幫球隊突破困局，換人後亦可以見到明顯嘅戰術改動，而單純地增加攻擊球員，球隊比以前更敢於冒險，踢法更加正面，就係源自球員同領隊之間嘅信任。
落筆之際，修咸頓已經打入聯賽盃決賽，希望此文出街之時，曼聯亦躋身決賽!
[讀者投稿] – WKD之曼迷周記
[普巴上-兩度成魔的前世今生]
上星期同利物浦踢成一比一嘅大戰，大家肯定無錯過啦!
既然雙方都未能踢出最佳水平，火藥味亦唔係太濃，報道焦點自然又落係普巴身上｡
成場賽事佢無論無論係攻守方面都患得患失，屢次係中後場交失傳波，
更加係禁區內犯下天條，令曼聯失左一球十二碼｡其後由伊巴扳平為球隊保住一分｡
佢嘅表現難免再一次受到質疑，但我頗有信心佢可以克服壓力｡
因為係未成為職業球員之前，佢已經係聚光燈下踢波｡
普巴十六歲係法國踢緊本地青少年聯賽嘅時候，已經吸引到曼聯同阿仙奴注意｡
佢同所屬球會Le Havre (夏華)原本有一份潛在嘅合約，
最後係一遍爭議聲下選擇成為曼聯青年軍球員，同家人移居英倫｡
成魔後佢嘅表現穩步上揚，用左三年已經由青年軍，走過U18，升上一隊｡
係足球遊戲Football Manager入面早已係明日之星，成為紅魔新竉似乎只係時間問題｡
不過唔出人意料又點算係普巴丫?
2011年史高斯第一次退休，中後場傷患連連，相信大家對卡域克踢中堅嘅情景仍然歷歷在目｡
聖誕快車期間，中場中位置出缺｡
主場對布力般一役，朗尼､吉遜､費查都缺陣，普巴以為自己終於可以係奧脫福正選彼甲｡
可惜嘅係，費格遜竟然寧願起用拉菲爾踢中場中，都無比佢一個上陣嘅機會｡
曼聯最終以二比三落敗，費爵爺七十大壽未能盡興之餘，普巴更加係心深傷透｡
呢件事影響左兩者嘅關係，賽季後普巴離開曼聯，以自由身身份轉投祖雲達斯｡
可能你會覺得呢個係理所當然嘅決定，
但19歲已經有膽量放棄等待出場時間，決心去一個新地方由零開始，
重新證明自己，就可以知道佢有幾強嘅意志，同埋自尊心｡
去到意甲後，佢嘅發展可以講得上一帆風順，
第一季已經為老婦人上陣三十七場射入五球，其後更成為球隊四奪意甲聯賽冠軍嘅重心球員｡
年僅廿三歲已經踢過歐聯同歐國盃決賽，雖然分別輸比巴塞同葡萄牙，但總算累積左難能可貴嘅大賽經驗｡
歐國盃完結後，普巴以一億五百萬歐元轉會費重返曼聯｡ 為球壇上演左最貴嘅一集愛回家｡
若果當年佢選擇留係曼聯發展，等做中場接班人，佢好可能會變成四不像甚至係工兵型中場，典型例子就有師兄卡華利｡ 畢竟費格遜嘅哲學入面，驚人嘅創造力並唔係中場中嘅首要條件，太勇於中路突破反而會令中場線攻守失衡｡
相反，正值足球員吸收能力最強嘅階段，佢去左一個球員風格､戰術､閱讀球賽方式都大不同嘅球隊｡ 身邊可以學習嘅前輩係大師級球員如派路，馬治斯奧，維度爾等｡
加上一定嘅出場機會，令佢實力突飛猛進｡
正正因為呢次轉會，先令球會同國家隊領隊都遇上"幸福的煩惱"，因為佢嘅能力同視野絕對可以勝任進攻中場，box-to-box，又或者墮後較炮嘅防守中場｡
傳媒同球評家普遍認為放走普巴係費格遜執教生涯中最大嘅錯誤｡
事實係，普巴當日唔走，今日就無可能成為全球身價最高嘅球員｡
[讀者投稿] – WKD之曼迷周記
[序]
二零一三年五月八日, 費格遜宣佈賽季完結後退休.
係人都知道呢一日會黎臨, 只係無諗過會發生得咁突然.
我同好多曼迷一樣, 流左一兩滴眼淚, 出一篇Facebook status, 訓醒依舊要返工
除左傷感之外, 更加困擾我嘅係驚惶.
因為我唔知自己其實係鐘意費格遜定係曼聯.
由球賽閱讀到管理思維, 我嘅足球哲學全部來自佢:
側重兩翼出擊;中堅同中場既距離調整, 三線壓迫;球員永不大於球隊;球場上絕對的戰術紀律
如果無左佢既風格, 曼聯仲有咩特別呢?
然後, 莫耶斯上任. 當時我覺得邊個做領隊都無所謂, 因為我唔知自己係咪仲支持曼聯
我決定抽離些少, 用輕鬆, 而唔係好著緊嘅心態去睇每一場波
事情發展大家都知道, 英超曼聯又輸一仗. 簽約六年, 帶隊十個月就遭炒魷.
我好怕曼聯變成一年一領隊, 只求成績而失去個性嘅球隊.
不過我仍然有時間就睇波.
雲高爾接手後, 風格甚至成績都未見起色, 但我漸漸搵到答案.
每次直播主場賽事, 攝影師總會捕捉到費格遜嘅身影,
球員入波佢唔會再高舉兩臂, 展露出返老還童嘅笑容, 而係流露出老球迷式既喜悅
同卜比查爾頓一樣, 費SIR永遠同曼聯不可分割
亦因為咁, 我知道曼聯幾勁幾渣我都會繼續睇, FIFA都係會繼續用佢地
因為，我係費格遜迷，亦係曼聯迷
[讀者投稿] - 聯賽盃四強 - 賽後評分
曼聯在聯賽盃四強首回合主場打贏老虎，以2:0姿態取下各項賽事九連勝。賽前摩帥講過會復出足總盃沒有上陣的四子，但最後只有華倫西亞、靴里拉及「柱男」普巴(笑)，因為伊巴因病缺席，不知是不是幾日後對利物浦戰術之一，而前鋒位置由福仔擔任正選。
曼聯正選名單
迪基亞
華倫西亞、鐘斯、史摩寧、達米安
靴里拉、普巴
馬達、朗尼、米希達恩
拉舒福特
後備: 羅美路、白蘭特、科素文沙、卡域克、費蘭尼、連加特、馬素爾
賽前筆者估計會以陣地戰打法，今場摩連奴排出全進攻中場球員，陣容像4-1-4-1，只有靴里拉作防中工作，希望在傷兵嚴重的候城取得更多的入球，而候城最後的大軍名單亦只有17人。
10分為滿分
迪基亞: 7分
在候城6射3中的情況下迪基亞壓力並不大，唯一出現在30分鐘驚險情況，對方有頭槌中柱彈出，但球証判罰越位在先，其他時間都是接應回傳或簡單撲救。
華倫西亞: 7.5分
以高速及身材強大再右路不斷出擊，今仗像擔當右翼位置，而對手也甚少在左路進攻，令防守工作威脅不大。今仗也多用左腳出球效果不錯。
鐘斯: 7分
是迪基亞及靴里拉之間橋樑，接應回傳轉方向等，保持狀態大勇，與史摩寧分工仔細，默契不錯。
史摩寧: 6.5分
以高大身材防止對方高空攻勢，其他時間與鐘斯配合。
達米安: 7.5分
今仗有一球助攻，而長傳也不錯，不過可再作改善，走上走落，雖然候城進攻大多在這方面進攻，但防守壓力也不大。
靴里拉: 8分
曼聯隊中重要一員，向前分波，處理節奏也不錯，是中場核心，勤力迫搶，但始終身材缺點令防守時有點吃力。
普巴: 8分
上面説到是「柱男」，因為他73分鐘罰球中柱，其實不只是今場，今季也有不少中柱數字。他頂上表現控制中場，分波及關鍵傳球也非常好，雖然沒有入球，但只要繼續有這種表現，入球不是難度！
馬達: 8.5分
是球隊另一核心，而入球表現出強大狀態及爭勝心！是前場表現最好的一員。
朗尼: 7.5分
與之前幾場比較狀態最好的一場，但遺憾入不到波，埋門把握力一般，希望下場可以入波破紀錄！
米希達恩: 7分
是曼聯隊中表現一般的球員，多次埋門射高，浪費很多機會，太想表現自己了。當時普巴的位置一定比他好，而下半場有一個「無心」傳給馬達，獲得一個助攻。
拉舒福特: 7分
作為前鋒要好好向伊巴學習，埋門機會不少，但浪費了，以頭槌及身位要好好鍛鍊。今仗過後小編覺得福仔打翼鋒位置更好。
費蘭尼 : 7.5分
79分鐘入替馬達
小編之前説出候城有中堅荒，加上強攻之下候城在比賽後段出現疲態，而高空轟炸令他取得一個入球，是曼聯換轉另一種攻勢。
馬素爾 : 7分
59分鐘入替朗尼
連加特 : 7分
71分鐘入替米希達恩
分別在左、右路作突破工作，有良好個人能力及速度，但兩位都是狀態飄忽，要好好把握上陣時間。
總結 : 小編覺得現時曼聯只是正常發揮，未去到最好狀態，而九連勝係值得開心，但未算最好，下場就是真正考驗曼聯對近況不錯的利物浦，一直小編不想單單在輸波或和波之後就大寫文章，指指點點，而贏波就只放飛機片給大家，小編希望曼聯不要被勝利沖昏頭腦，保持爭勝心和決心再下一城，一直到季尾！
Bevis