[WKD手記] - 洗腦後遺症

前言：本專欄一直多用白話文係想讀者睇緊果陣好似有把聲係隔離講波咁，因為用廣東話旁述係特別傳神嘅，希望透過文章令大家注意到多啲唔同運動、甚至乎電子競技嘅粵語旁述。

盧卡古上仗傷出意味住中鋒有空缺，拉舒福特操到咁大份，等足一季就係為咗有機會證明自己可以踢最前。馬素爾都一樣，自從山齊士加盟後就失去正選左翼，但係每次後備上陣都有一定表現，唔少曼迷一直想睇到佢地一齊踢自己嘅最佳位置。結果失望嘅又點只係球迷，連摩連奴都不記名咁話外界唔應該批評佢過份重用盧卡古，因為'其他人'擔大旗就會踢成咁。成場波咁失水準絕對係全隊(包括領隊)問題，佢地只係最明顯地不在狀態而成為兩隻代罪羔羊姐。歸根究底，咪就係打唔熟PLAN B囉。

記得上星期魔獸被換出後，曼聯轉踢福仔搭費蘭尼嘅一個半前鋒陣，最後仲靠後者補時入波贏三分。今場照辦煮碗，話就話433，實情個波去到兩邊禁區頂附近，爆炸頭已經入埋禁區同福仔平排咁滯，相反普巴就會逗返後一格。問題黎喇，兩翼同閘位完全失去聯繫，馬仔上半場甚少有掂波機會；右路更加運唔到波俾馬達，楊格同達米安搵唔到方法幫兩翼，自己又無機會出波，試問爆炸頭個頭又點發揮威力呢？

另一樣睇到無癮嘅係亂放高波。因為兩閘用唔到波，好多時由三中場喺中路傳地波上去，但係費蘭尼同馬迪橫傳失誤幾次之後開始無乜信心打幼細波。上半場中段開始，中後場受到少少威脅時就會斬個波上前場，拉舒福特同馬素爾十頂九輸，就算爭贏都做唔到有效嘅二傳。其實平時都係咁踢，只不過盧卡古喺呢個戰術體系下做到嘅野多好多。簡單而言，佢地根本無因應隊友而踢出第二套戰術，領隊要更大負責任，因為佢大可以即場指示球員走動，唔需要等到入更衣室先講。

加利佬話曉頓唔希望零比零完半場，因為下半場曼聯一定會唔同哂。為咗解放普巴，摩連奴換入連加特之餘，馬達變成另一個中場補位而唔再係一個硬生生嘅右翼，後者即時踢得生好多。普巴本來企定定，只要俾適當壓力就可以迫到佢得返傳波呢個選擇，其後佢又上又落就令對手好難捕捉到防守距離，甚至有幾次換人防守時出現失誤，俾佢有起腳機會。換邊後喺地波組織方面有所改善，梳爾入替後同馬素爾有更多交流、配合，呢半場表現我收貨，所以先更加嬲佢地點解頭四十五分鐘會踢成咁。失果球波有少少唔好彩，一對中堅尚算穩陣，唯獨達米安真係嚴重缺態，唔怪得離隊指數同白蘭特一樣係全隊之冠。

呢場最後入唔到波我覺得同決定力有關，而唔係組織上出現大問題。普巴、馬仔同福仔有幾球應該傳嘅波就走咗去射，有唔少機會可以再做得深入啲，好過下下喺禁區外起腳。普巴故然獨食，過少出場時間亦都直接影響咗兩個射手嘅信心以致決定。有一腳黃金機會福仔無傳中俾馬仔喺抵鬧，但有可能係因為佢想傳果陣發現人快波慢，想修正而錯過咗最佳時機。話二人有心病實在太陰謀論，不如當佢地正值樽頸位，球迷俾多啲時間喇！

[WKD手記] - 曼阿之戰-心不在焉

 

原本為觸目大戰，因為大家各自有盃賽要競逐，令到賽事可觀性大減，阿仙奴更加派遣唔少新丁上陣。不過一早抽籤買到飛入場嘅球迷都無蝕底，話曬都係雲加最後一次以阿仙奴領隊身分黎奧脫福，開賽前費格遜鮮有地落球場，拉埋摩連奴頒紀念品俾雲加。一對老友記就此隨我地嘅歲月離開愛隊，變成回憶。

 

講返場波先，陣容上留力都係其次，問題係落場果廿二個球員爭勝心非常一般。就算目標放喺盃賽上面，總有原因去盡力踢掛，正常黎講每個球員都要為下次正選上陣而爭取表現喇。不過現實係阿仙奴將星期四晚會踢第二回合嘅都收起哂，而摩連奴對外觀感更加係勝利十一人:踢到狀態跌watt都繼續用死固定十二、三個球員，其他人好難有機會踢正選。結果上半場行禮如儀，為踢而踢，最明顯不過嘅係兩邊啲五五波都唔會去哂、追波唔會追哂，避免受傷或過勞情況出現。

 

 

掉返轉睇，球場上無論進攻或者防守都多咗好多空間，無包袱下大家都踢得好爽。入波全憑三個最貴球星合作而成，普巴再次喺適當時候發揮佢引球推進嘅威力，中圈帶到去鵝眉月位置分俾盧卡古，魔獸雖然無足夠角度起腳但仍然斬咗一球恰到好處嘅傳中俾山齊士頂，最後由普巴喺小禁區輕鬆補中。整個攻勢令人諗起熱刺上星期入果腳快攻，但唔好忘記阿仙奴條中場線有幾差，沙加半場表演之差成為桑拿士、亨利恥笑對象，甚至乎第一個失波同佢有好大關係。阿仙奴除咗個別新星搏上位肯盡力踢之外，整體表現同鬥心都完全比下去，見唔到有任何翻身跡象。

 

經過半場休息後，雙方先認真對待呢場球賽，應該去嘅波就去曬，不論攻守、機動性同戰術紀律都加強返。球迷可能會認為場波節奏慢咗，曼聯又泊到條中場線好後(阿仙奴進攻亦變得規律)令娛樂性大減，但高水平嘅足球比賽就喺將自己最耍家果瓣波踢出黎﹐更加唔係鬥攻棄守、放棄節奏控制就代表兩隊狀態好實力高。

 

把握曼聯中後場溝通失誤，米希達恩倒戈入波一刻，兩邊先醒覺呢場士氣波根本就唔輸得。失波前盧卡古因為一次攔截拗親腳腕而退下火線，久違嘅Plan B又再出現。可惜拉舒福特踢單箭頭仲係有好大進步空間，即使唔計佢身型問題，始終佢屬於入攝型前鋒，背向龍門時做嘅決定同能力都唔係好幫到球隊。摩連奴見佢獨力難支就收起埋靴里拉，換入黎嘅費蘭尼名義上同前者位換位，其實個波一搓到去兩邊禁區頂時佢就會變成中鋒，幫福仔完成盧卡古嘅頭槌任務。

 

 

呢場可以絕殺當然可以讚摩連奴調動得宜喇，因為阿仙奴應付高波真係差丫嘛，不過我覺得其實無論對邊隊佢都係會出呢招，因為佢深信擺個高佬係前面啲問題就會迎刃而解，你地又點睇呢？

[WKD手記] - 殺入決賽

 

 

足總盃近年喺球迷心目中略減，對唔少爭標份子黎講呢個錦標最多係半個護符，贏唔到英超嘅話一樣大條道理炒領隊。正因為咁，得返呢個杯可以爭嘅曼聯同熱刺就夫添上陣，兩個領隊都絕無留力之意。因為長毛真路拿嘅關係以前就有留意熱刺波，而佢同紐卡素一樣，每次對曼聯都咁刺激，充滿娛樂性。呢場見證住熱刺咁多年都係踢一段好波而出局嘅命運，摩連奴亦都打咗我一巴，因為佢今仗臨場微調非常成功，直接導致曼聯反勝成功。

 

上次對決我地有一個極差嘅開局而由頭輸到落尾，所以開賽初段曼聯基本上唔敢用波，希望用高Q大棍黎爭取時間入局，總之控球權係邊個度都唔緊要﹐最重係唔俾個波落係危險區域。呢招變成曼聯下半季作客/打強隊嘅開局方針，不過最近就將架大巴一分為二，前面用三箭頭向防線施壓，其他球員就係較後位置佈防。戰術執行難在中場會留有極大空間，兩翼要不停來回跑，配合埋中場要適當地做破壞工作拖慢對方進攻先可以填返中場個窿。

 

今場失波無乜邊個犯嚴重錯誤，反而係熱刺快攻處理得好，造就一個教科書式入波。楊格配合山齊士迫搶戰術壓咗上去；普巴雖然係要盯住艾歷臣，但當後者變速跑去邊線時佢遲疑半步係可以接受的，因為佢同時要擔心俾人拉走嘅問題。艾歷臣一攞波已經形成四打三局面，史摩寧早早已經指示華倫西亞要追佢身後嘅阿里，自己就守簡尼。最終隊長都係俾孫興民分咗心而走漏阿里，一切都係點五步之差。

 

十分鐘後曼聯憑普巴妙絕傳中、山齊士聰明入攝追成平手，但中路空虛嘅問題完全無改善過，主要原因出在中場線太容易失位。初段靴里拉為咗協助迫搶工作，不時走到前場標波，標唔中就要落腳犯規，馬迪亦因為咁樣而越踢越前。本來部署為前面嘅斷層演變成後防毫無掩護，最大受害者非華倫西亞莫屬。孫興民上半場三番四次單挑華倫西亞雖然只係各有甜頭，但後者因為拎咗黃牌而被迫踢得更保守，熱刺就更加將反擊專注喺左路。

 

 

摩連奴上半場已經係場邊大動肝火，情況當下有所改善，經過半場休息就真係踢出原有部署。三中場縮後防守，唔單只令到兩閘踢得輕鬆少少，仲成功將熱刺喺中路嘅推進減弱。丹比利中場派牌獨力難支，艾歷臣同換入嘅盧卡斯摩拉都周不時要落黎攞波，華倫西亞更加食返住孫興民黎踢。球賽慢慢進入咗摩連奴節奏︰控球權可以讓俾對方，但塞住中路嘅同時兩邊隨時準備快攻，致勝球就係咁贏返黎。

 

 

呢場波雙方好早就扯到盡，上半場最後階段已經有個別球員回唔切氣，下半場節奏亦明顯放慢，可見場波體力消耗幾大。正因為咁，山齊士同連加特就更加值得讚賞。佢地掂波時間唔多，但鏡頭外就跑多人地好多步，仲憑個人技術搏到唔少罰球。另外史摩寧整體表演都合格有餘，淨係成功封印到簡尼已經抵讚，決賽再戰車路士，無論對住基奧特或者莫拉達都係最後一次入選英軍嘅考核。五月十九日，紅魔必須贏！

[WKD手記] - 靴里拉

 

與其又花三分一篇幅解釋第N次輸死球，不如研究下今場點解微調失敗，順便研究下今集主角靴里拉。黎到季尾大家都知爭冠無望，但踢到毫無鬥志就一定係愧對球迷。賽果最多叫做失望，過程同埋球員頭耷耷嘅神態先至令人嬲啊。早兩日睇U18曼市打毗，班後生仔嘅眼神仲堅定仲有鬥志，其中有一兩個腳法同視野都好成熟，抵佢地成為北區聯賽冠軍。

 

靴里拉上場完美演繹BOX-TO-BOX，如果唔係普巴救世，佢就係我心目中嘅最佳球員。對西布朗半場休息果陣，例牌同波友討論半場表現、預計調動，我就認為靴里拉唔會踢得耐，結果摩連奴一分鐘都無俾多佢。論表現普巴有牌在身又踢到一塌糊塗，論走動串連馬達都只屬平庸，相反靴里拉走上走落，甚至上半場漏判果球十二碼都係得佢入攝先會出現，點解唔睇好佢？

 

因為靴里拉太多走動。上半場創造唔到機會不外乎幾個耳熟能詳嘅原因，山齊士普巴馬達三人太鐘意埋中間造波，朋友用『必須佔中』形容呢個現象實在貼切。响後面觀察嘅靴里拉同馬迪梗係睇得出傳波慢走位少嘅問題，於是前者決定做更多揣擾工作，簡單黎講就係用跑動去打亂對方中後場嘅默契同溝通。佢的確喺娥眉月頂出現多咗，但問題似乎無解決到，仲帶黎一啲反效果添。首先當然係佔中份子又多一人，中路塞上加塞。其次離開防中崗位等於要馬迪一個人頂曬，靴里拉有一球想帶上去，點知甩咗就爭啲釀成危機。佢對球賽嘅閱讀同積極性其賽非常正確，但今次可能用錯方法去解決問題，所以上半場佢嘅存在有種違和感。

 

要睇曼聯一場波入面嘅組織力有幾好，數下盧卡古接應過幾多腳地波就知。呢個講法唔係基於盧卡古造波叻，而係因為魔獸作為柱躉好少會落黎掂波，佢拎波嘅頻密度直接反映咗中前場控球質素、 多唔多運用地波攻入危險區域。呢個理論亦反證到兩翼盡量靠近中鋒嘅重要性，因為一遠魔獸佢就變相得返高波有機會參與攻勢，其餘時間好似打少個咁。作為防中如果想改變呢個狀況，摩連奴期待嘅可能係做好本分︰加快用波﹐主導中後場控球權，唔好俾前面果三個成日落黎帶個波上去；穩住防守迫攻擊手同兩閘壓前啲打，而唔係自己上埋去。當然喇，領隊無即時落到指令去調整同提醒球員應該承擔最大責任。唔講心態，山齊士、普巴同上場最大分別係今場佢地落到三閘線攞波之後下下都要帶到無哂先搵位傳，而唔係用傳球同無球走動黎帶動組織，結果拖慢哂行軍速度，仲有現場觀眾悶到訓著咗添。

 

呢個調動我係估啱一半，因為我以為會換入以簡單見稱嘅麥湯美尼拍住馬迪，原來又係將普巴擺返落去，而結果就由賽果反映出黎。靴里拉功能夠哂全面，係球隊老鼠拉龜果陣想分擔多啲職責好正常，但摩連奴就係鐘意分工清晰、謹守崗位嘅防守球員﹐更何況摩佬已經將所有自由度容忍度都分配哂俾普巴呢？鐘意靴里拉嘅曼迷，要有心理準備啊！

 

 

[WKD手記] - No-Team-Is-Perfect

 

喺曼城主場全取三分對聯賽排名影響唔大，最緊要係摩連奴為曼聯、球員同自己挽回面子，省返靚塊招牌。二比三呢個賽果可能包含咗主隊留力、爭議性判決、門柱打救等等因素，但足球就係咁戲劇性，我地都唔好忘記班球員係絕境之中都無放棄過，保持呢種精神先會有所謂奇蹟發生。上半場完結前，加利仔強調呢場波仲未完，我以為佢想表達有無限可能但無辦法相信時嘅紅魔鬼會做到，原來我都係未夠信仰—佢係認真架。Martin Tyler話無球隊係無敵嘅，曼城今季長期處於極佳狀態，曾經踢到無堅不摧，季尾終於漸露破綻，曼聯憑個勢打贏同市死敵，分分鐘要多謝利物浦。

 

原本預計普巴會推返上三中場嘅進攻端，結果因為靴里拉搶返麥湯美尼個正選位而令中場線比較平排，呢個排陣係為左執行一個出人意料嘅戰術：迫搶。頭廿分鐘曼聯講唔上高防線壓迫，但前場球員比平常壓迫得前好多，務求令曼城後衛甚至係艾達臣受壓下犯錯。防守尚算成功，但組織同進攻就一塌糊塗。盧卡古今場唔知發生咩事，高波落點判斷極差所以做唔到反擊嘅第一點，連加特同山齊士花盡氣力迫得到兩閘，反而就拉遠咗互相之間嘅距離，每次拎到波都要單打獨鬥，進攻瓣數乏善足陳。

 

曼聯自從失咗波嘅表現直線插水，當中以後防尤甚，要不是史達寧埋門處理極差，上半場已經輸夠四五球。我認為楊格已經係四個後衛之中踢得最好果個，作為後衛年資最少嘅球員，佢真係混身解數﹐哪怕係用埋超技術都要阻止邊路球員殺入中路。華倫西亞再犯咗上一輪嘅錯誤，俾辛尼太多空間推進，往往去到禁區邊先焗住出腳。面對根度簡、B施華同史達寧輪流後上，兩個中堅甩位甩到穿曬窿，唯有自求多福。半場果陣我已經有心理準備接受一場同歐聯決賽輸比巴塞三粒差唔多嘅大屠殺。

 

換邊後中場線拉後，防守嚴密返好多。Box-to-box嘅靴里拉唔再參與太多策動，普巴踢返十號位就開始爆發，令兩翼進攻時可以更貼近對面龍門，前場成功製造到一定混亂同空間，為反勝埋下伏筆。普巴嘅入波反映左兩個關鍵：觸覺同埋門。第一球如果佢望到靴里拉有動作先反應就已經把握唔到一瞬即逝嘅入攝機會，其後亦係果份觸覺驅使佢係中圈附近開始跑入去，進而閱讀到後衛之間有機可乘先入埋第二球。另外就係佢射門都叫做冷靜，而且身材有絕對優勢，某啲情況下可以好似費蘭尼咁幫到盧卡古唔少，總好過佢係後場玩身位玩腳法丫。

 

 

 

五年後史摩寧仍然守唔住甘賓尼，力量上仲係有好大分野，但今次佢將功補過仲射入埋致勝波，希望係心理上有所成長。隊內現役後衛黎講佢算係最平均﹐經歷過多個朝代嘅防守體系﹐就算季尾清洗佢都應該會安然度過，入唔入得返世界盃大軍就要睇餘下幾場比賽。

 

呢場波係過往一季嘅縮影，前段普巴墜後、箭頭同翼鋒距離太遠，難以發揮團隊精神；擺返靚啲位、解放前場自由度就即刻見到各師兄歸位。如果普巴當初踢防中只係為左中場硬度同高度，而家已經有麥湯美尼、費蘭尼做到呢個效果。正式攻中人選唔多，極其量仲有連加特同馬達，將普巴放返係十號位應該係對全隊波最有利嘅做法。

[WKD手記] - 國際賽後打吡戰前

 

筆者自細就同好多香港球迷一樣捧英格蘭，但長大後就覺得香港隊先係歸宿，所以國際賽好多時都無乜波想睇。餓左成個禮拜無曼聯波踢，主場出擊天鵝梗係以食硬嘅心態睇喇！呢個星期有好多球員為國家隊出戰，對摩連奴選人排陣有多少啟發，而贏完史雲斯之後可以為打吡作最後準備。入正題之前，係度多謝已離隊嘅伊巴為曼聯貢獻左咁多，見到佢係新球會已經有個好開始實在係令人雀躍。一個球員嘅成就唔受制於佢效力咗幾耐，當年拿臣只係踢左幾個月已經征服曼聯球迷嘅心。

 

曼聯係聯賽失波第二少，但陣中兩個中堅鐘斯同史摩寧都落選國家隊，當中涉及傷病因素，但證明修夫基都唔太睇好紅魔條後防。廿七人名單入面閘仲多過中堅，只要餘下賽事佢地踢返正常水準的話應該可以去到俄羅斯嘅。英軍開始加快改革步伐，無踢大球會就必然入選呢支歌仔唱，一年前又有邊個諗到連加特會搶咗上年大勇嘅阿里個正選位？法國方面，迪甘斯先為普巴講說話，再係第二場友賽俾佢正選上陣，一入球一助攻後即刻踢翻出信心，最大得益肯定係曼聯同摩連奴。而麥湯美尼嘅輕傷再一次俾機會普巴重奪正選。

 

輕取史雲斯又係踢左半場好波，五十分鐘打後就收油。上半場表現絕對收貨，尤其係山齊士、連加特同盧卡古係前場嘅配合令人眼前一亮。山齊士啱啱加盟時被要求盡量靠近盧卡古，佢好似漸漸做到，更加驚喜嘅係連加特催化埋前場化學作用。好多第一時間短傳，走位自由度非常高，馬達同連加特係左中右都有交替出現。因為大家都踢得好生，場上無邊個被盯得好緊，山齊士一走入中路，史雲斯就即刻亂曬。盧卡古射入個人英超第一百球，亦係今季第三十二球，最近連短傳長傳都有進步，相信佢份心態已經得到球迷肯定。未來就可以提升對佢嘅要求，就係控波射波要再清脆啲，咁樣先可以提升轉化半機會嘅能力。普巴今場再次企防中位放咗幾腳靚波仲差啲有助攻添，睇得出佢有嘗試克制過度上腳嘅習慣，就算帶上去攻都會見到前面有人落返黎填位，成個中場演繹到機動性出黎。當然喇，史雲斯完全無針對性部署，令到局面非常一面倒。進入下半場佢地先識將條中場線壓上去普巴附近，雖然曼聯開始多咗失誤，但揸住兩球同埋神龍優勢己經係睇住黎食。

 

下星期曼城只要係主場贏到曼聯就可以即時封王，我地係聯賽就算已經無乜野爭都會全力阻止。相信摩連奴唔會排出咁進取嘅陣容，433/451下普巴可能拎返個十號位黎踢，防守曼城雙核大衛施華、迪布尼係成條中場線首要任務。上一循環雙方差距比相像中少，經過咗大半季之後曼城建立到一套好有紀律嘅踢法，單睇領先愛華頓三球都無放軟手腳就明白，而曼聯兜兜轉轉之下仲未摸索到條方程式。排面上爭咁啲，但曼聯有成個星期休息，下星期當決賽咁踢！記得留意連迪洛夫，佢漸漸搵到自己定位同風格，可能下星期會正選上陣添！

[WKD手記] - 原罪缺點

 

民怨儲左咁耐，終於係今個星期引爆。贏咗雙紅會當然開心，但好波只係維持左四十五分鐘，下半場踢得太龜縮簡直就好似第二隊波咁。當時仲可以話為咗留力踢歐聯而放慢手腳，但輸埋俾西維爾就負評大爆發。入魔至今，摩連奴第一次經歷下台危機。先旨聲明，今日主力講摩帥，唔代表我認同球員心態懶散、季尾都未修到身係合理嘅。

 

現代足球講求嘅係成績，忠誠、風格、陣容雖然重要但通通唔夠成績緊要。對曼聯迷黎講，只要可以重拾冠軍，哪怕賣走朗尼、雪起上季踢得好嘅靴里拉，有必要嘅賣多次普巴走都仲得！曼聯請得摩連奴返黎，唔通係因為佢教嘅進攻好悅目咩？我地心底裡好清楚防守先係佢拿手把戲，季初進攻有板有眼當然係Bonus，但沉悶嘅三分都尚可接受。相對於普捷天奴、高普、哥迪奧拿等教頭，佢少左華麗足球呢個防衛網，所以輸波果陣佢係球迷心目中就一文不值，更何況佢已經浪費左好幾個有天份嘅攻擊手呢？面對現實，佢黎就係為左勝利，如果聯賽領先十幾分嘅係曼聯，就算幾保守我地都會默默接受。即使佢有提及球員係進攻上未達到佢要求，但亦唔好再幻想佢會忽然踢得好具侵略喇。

 

 

除左足球風格，公關手腕同人事處理亦係佢經常俾人批評嘅原因。語不驚人誓不休令佢得到狂人嘅花名，以往有人將佢呢種性格解釋為轉移傳媒焦點，等班球員唔使承受咁大壓力。係當年黎講又真係湊效嘅，但同一招用得太密就無用架喇，何況佢近年最大轉變就係開始強調自己係冠軍教頭、拎過幾多獎盃，一副阿Sir做野唔洗你教嘅口吻，想唔得罪傳媒都難喇。

 

過往同摩連奴不歡而散嘅球員多不勝數，多半係因為心態同防守達唔到前者要求，但更大原因係溝通方式出現問題。鐘意得佢通常都係啲心理質素、好勝心最強嘅球員，泰利、林柏特、馬達拉斯同伊巴就係好例子，因為佢期望球員就算點批評都可以頂得住，最後係表現上有突破，但一套方法總唔會啱哂所有人口味。曼聯防守進行改革，我地睇到米希達恩係足球風格雖然係唔夾，但後期表現根本係完全係因為信心低迷所致，已經唔關個人實力問題。一個廿零歲嘅英超球員要面對各方批評本來就唔係易事，有啲需要時間消化﹐有啲需要人地扶持，而摩帥就堅持佢呢種處事手腕。

 

米希達恩人已走，黎緊最大可能離隊嘅就係梳爾，佢被領隊稱讚為最強左閘之後就一路無踢過正選，你話迷唔迷惘？史高斯退役後成日鬧呢樣鬧果樣，俾人觀感麻麻，但對梳爾嘅分析真係無得你唔認。『當教練席係佢果邊時，佢完全無辦法專心踢，因為摩連奴俾左好大壓力佢』梳爾嘅身體語言反映咗一個訊息︰佢係場上做嘅每一個決定都會俾領隊昅到實，結果所有行動都好避忌，就好似米希達恩咁失左對咗足球嘅直覺。

 

要解決既球員關係何其多，普巴性格多變就話難處理姐，連靴里拉都由最佳球員變到無哂定位，陣中又無好似當年保羅費拉拿呢啲溝通橋樑，呢條路唔通得返馬迪、盧卡古會陪摩連奴行過去？

 

[WKD手記] - 雙紅會半場好波

 

係打吡戰勝出比起反CUP水晶宮仲更奮到全隊士氣，因為對住英超攻力第二強嘅鋒線，可以守到佢地無乜符弗，上半場仲入左兩球靚波。話就不能說得太盡，因為文章出街之時曼聯已經被西維爾踢出歐聯，但從呢場波真係見得返前中後三線應有級數。

倒轉咁講，如果對西維爾我地夠膽踢到好似雙紅會上半場咁有紀律同效率，贏嘅可能係我地。

 

排陣方面摩連奴今次技高一籌，透過左翼壓制對方右閘，係邊路完全食住利物浦。賽前以為高普會一貫地推高條防線，靠體力化足球搶中場得天下。開賽初段利記的確拎到唔少控球權，但個波其實好少去到曼聯禁區附近，呢樣野要歸功於球隊防守時紀律同默契好，知道去到咩位要開始迫出去。利記其實唔少人係中路走位﹐又嘗試快速轉邊希望拉走雙防中同中堅嘅距離，但今仗見到佢地四個補位意識相當好，而且仲有盡力溝通，當對面開始overload時更加會見到山齊士回防填返啲空隙。用另一場大戰黎比較就可以知道紅魔鬼係防守上嘅進步︰仲記得十二月輸俾曼城嗎？當時曼城放高波入危險區域，史達寧同捷西斯竟然係禁區可以三番四次控低個波再修正埋先有人埋黎迫，而今場沙拿想入禁區都難關重重。

 

簡單黎講，曼聯反擊太有效率令阿諾特完全唔敢疊瓦助攻，沙拿一個人係右路俾好醒神嘅楊格封印足全場，戰術上已經成功左大半。相反，曼聯係自己右路控球嘅時候會放慢黎踢，可能知道馬達容易俾人夾死之餘，又唔適宜快上快落喇。不得不提麥湯美尼成長速度驚人，唔講真係以為踢緊果個係卡域克黎，仲高咗幾吋添！再次成為迫搶目標，但佢完全唔怯場，係中場做交波轉物都夠哂快捷，亦學識左利用重心去應付身體對抗，對手好快就無再刻意去拍佢。咁快已經不被大賽氣氛影響表現，真係令人非常期待﹐呢個PLAN B已經直接俾緊壓力一眾中場球星了。唔好忘記佢對車路士果陣因為大意而令球隊先失一球，簡單工作佢似乎掌握得遊刃有餘，黎緊應該俾佢作更多嘗試同埋增加出場時間。

 

拉舒福特難得重奪正選就梅開二度，入選世界盃廿三人嘅機會大增，對曼聯固然係一件好事，但同時令仲未融入球隊嘅山齊士更大壓力。山齊士前場大部份位置都踢過，即使夠哂勤力但繼續瘋交失波，尤其下半場形勢開始被逆轉，佢就算拎到波都會心急交返個波俾對面﹐一係就格硬盤扭。我唔認同佢已經開始回塘，反而係被心理壓力影響發揮，如果佢仲俾最高薪英超球員呢啲名綁住自己，硬係想將阿仙奴嘅球味帶入黎，其實好難預見到佢會啱摩連奴用。

 

[WKD手記] - 攪攪陣最後一個彎位

“轉埋個彎就入大直路喇！”過埋呢一兩星期嘅調整，往後兩個月直到球季完結都唔會再有喘息機會。襯住呢個彎位不如回顧下兩個位置對球隊嘅轉變。

盧卡古係本專欄出現次數應該最多，因為佢係必然正選、首席箭頭之餘，仲係球迷批同恥笑得最多嘅對象，而我偏偏認為佢值得更多尊重。主觀願望梗係想佢完全取代伊巴，客觀事實就大家都知佢腳下功夫差，尤其係控波呢瓣。無可否認佢對強隊真係無乜入球同助攻，尚未擺脫弱旅殺手呢個花名，甚至因為佢嘅存在而剝削左馬仔同福仔兩個踢正前鋒嘅機會。計我話佢對住頂級防線仲有大把進步空間，但鬥志同心態足夠佢再上一層樓。以前踢拖肥同西布朗成日俾人話佢獨食又罵隊友，今年見到最常激勵隊友嘅就係佢，一個成功或者失敗嘅進攻佢都會拍掌鼓勵，亦交左好多次killer pass俾隊友。球場外嘅評價佢好少回應，但就非常信任教練團嘅分析。一個球員如果謙虛，勤力，用鬥志去面對批評，佢差極都有個譜。英格蘭班國腳成日俾人話得心理質素差到好似小朋友咁，不如向呢個廿四歲魔獸學習下。

麥湯美尼今季彈起為中場帶黎咗一次改革。馬迪一加盟就場場踢足咁滯;普巴就梗加唔洗講，本來買馬迪就係為左彌補佢防守不足，條中場線又點少得佢呢？咁樣一來條中路已經有兩個鐵膽，仲有費蘭尼、靴里拉、米希達恩、馬達，幾個球員爭剩餘一席，連加特後期都加入競爭行列，有邊個會諗到呢個無名小子會上位，同馬迪拍檔緊雙防中呢？從頭幾場表現應該唔難察覺佢踢法有好重卡域克影子：著重傳球、少上腳、無球時尤其見到其閱讀球賽能力。不過佢鐘意企前半格，結果令馬迪防守時同之前一樣咁孤單。聯賽對哈迪斯菲爾德，摩連奴第一次委派佢踢純防中，佢唔算得心應手，但就嚴格執行到穩陣為先。明知自己作為英超新仔未建立到信心就會被對方盯上，於是踢得好簡單，搏到唔少罰球。就係呢場波示範左俾坐係後備席嘅普巴睇，摩連奴對防守嘅要求。我地明白普巴唔會踢死一世防中，呢個亦唔係佢最佳位置，但作為一個全能中場如果無紀律去執行每個中場位置嘅主要職責，又點稱得上全能呢？

曼聯陣中不乏頂級球員，但從部份球員同球賽中感受到佢地對摩連奴設定嘅職責有所懷疑，曾經有一段時間見到球員係場上士氣低落，球迷亦唔知自己睇緊乜。莫耶斯同雲高爾捱唔過呢一段，愈搞愈衰最後都係要同紅魔分手。摩連奴雖然手段好硬，但賞罰分明令佢地保持競爭力同鬥心，當球隊贏波時自然會理解領隊初衷，近排仲反勝埋水晶宮，應該會再團結起黎嘅。中前場就見到唔少正能量喇，條防線呢？迪基亞近仗失兩球近映柱波反映到神有時都係平凡人，前面果四個唔幫手嘅話救得一時救唔得一世。山齊士就話一月先加盟姐﹐班後衛磨合咗成季喇﹐究竟係佢地質素有限定摩連奴教得唔好？

[WKD手記] - 攪攪陣

守和西維爾後，我諗無乜人會話踢得好好掛，頂多係零比零呢個賽果唔算太劣勢。另一邊車路士係歐洲戰線都只能打和收場，但人地係欠運先贏唔到西甲榜首，就算曼聯有主場之利都預左會踢得好辛苦。呢兩場防守都唔少低級錯誤，係人地啲前鋒識攪攪陣定我地自亂陣腳？

外界成日揶揄摩連奴對強隊淨係識泊大巴，同佢以前教過嘅球隊比，曼聯好似最唔穩陣。往日見識過真正車仔同國米嘅銅牆鐵壁，而紅魔最近不失球幾乎都係因為迪基亞多番神救，而唔係後衛限制到對方埋門機會。

自從係奧脫福睇過畢爾包踢曼聯出局後，一直都覺西甲隊好難踢。西維爾有好多次零壓力頭槌都頂唔穿迪基亞十指關，但點解會有咁多球空哂任頂呢？臨完上半場前，西維爾右路一次傳中，馬迪因為補位而唔敢向華斯基斯施壓，華斯基斯企係佢同史摩寧之間就拑制哂兩人企位，梅利爾就入左無人之境。華倫西亞應該觀察到完整情況，但都犯左同樣企位錯誤，可見西班牙式入攝拉空對靈活性甚低嘅曼聯非常有效。

回到英超，車路士先開紀錄，又係一記BB式防守失誤。當韋利安係中場交波俾夏薩特時，曼聯其實有足夠人手應付三人反擊，絕對唔應該有任射龍門嘅情況出現。最大責任當然係麥湯米尼喇，佢好明顯掛住望波而將防守目標轉左做已經有連迪洛夫招呼嘅夏薩特，韋利安就係咁樣食左全季最大塊叉燒。咁其他人呢？淨係講果球攻勢，佢同連迪洛夫、楊格三人之間毫無交流，只能斷估隊友企位同判斷整個防守形勢。就算唔能夠預判韋利安前插、只要簡單用言語或者肢體動作表示夏薩特由佢黎盯實就已經有可能提醒到隊友。咁講可能馬後炮，但對於中堅黎講，每一次防守時手口並用咁溝通、指揮同協調防線係基本技巧，等到有危機先咁做就已經比本能反應慢。現時陣中仲有邊個會指手劃腳？比盡都係守死球果陣史摩寧會指揮多啲。唔改善呢個問題嘅話攞幾多人係後面都係會走甩啲走位型前鋒。

掉返轉睇，我地又有邊個用跑動黎擾亂對方防線，增加佢地離開崗位同溝通失誤嘅機會？當然係連加特喇，佢換入後無時無刻都搵機會係擺脫後衛視線範圍，就算最後唔交波俾佢都已經分散左防線注意力。由米希達恩到福、馬、山，始終係連加特最踢得出”盧卡古身後自由人”呢個角色。佢同前面講果幾個人最大嘅在於用波簡單直接，縱使有時會玩下腳法，佢俾嘅波走嘅位永遠都最容易令隊友理解；佢亦唔會強求攞到波先突破，成日無球反越位入攝之餘，縱向橫向跑動都做到足。入波非僥倖，佢唔夠其他新星出名，但絕對係曼聯嘅一粒寶石。
 

[WKD手記] - 領先一球永遠很危險

 

足總盃第五圈再遇哈特斯菲，無論賽前賽後都有討論話題，不過最重要都係成功出線。可能聯賽已經無行，上一場落後時好似唔太肉緊咁，感覺上黎到盃賽就少啲包袱，多啲鬥志。莫耶斯講過領先一球永遠很危險，用黎形容呢隊曼聯都仲係咁貼切，係巧合定事出有因？

 

 

上星期分析過後防過少參與組織會限制咗進攻能力，呢個問題上半場再一次表露無遺。開波早段就靠盧卡古一己之力先開紀錄，其後三十五分鐘幾乎俾對面猜住黎攻。今季我地早早領先嘅情況唔多，即使有都好少提前鎖定勝局，通常都係六十分鐘打後先入到保險球。有踢開業餘隊/聯賽嘅讀者，入完一粒隊友最鐘意講咩？“未贏架，當零比零咁踢！”

 

 

 

曼聯球員偏偏唔係咁諗，贏緊一比零反而愈踢愈縮。唔係要同曼城做比較咁極端，但見到哈特斯菲控球時條防線都企得比我地積極就知有問題。

 

控球在腳果陣，中堅無拉開距離等防中落黎當第三中堅咁踢，一個死實實嘅442，兩閘自然上唔到去，人地邊路四個人盯馬達同山齊士就緊係容易喇。短傳目標同路線都太易估到，跑多兩步已經令史摩寧同連迪洛夫，甚至係迪基亞局放長波，落點一般之餘，對手亦好少走甩哂第一二點。反觀人地做到哂上述踢法，一個對角直線放去右路會見到閘翼湧上去接應，好在佢地係中路真係無乜邊個有破門能力，我地班後衛頂得住啲高空攻勢，守得住領先優勢。

 

 

因為縮得入而逐漸放棄控球權，成個過程可以見到山齊士同其他球員嘅思維有別。作為翼鋒佢希望直接俾壓力對面中堅，迫右閘返黎幫波而唔敢壓得太前，但要成功執行就需要隊友配合。防線深得滯令到梳爾同山神距離太遠，對手變相有更多空間入攝，所以山齊士最後都跟返梳爾黎企位同協防。係呢種決策上無話邊個啱哂，最重要係成個團隊一齊執行。佢爭勝心強而且敢於表達諗法所以一加盟就指手劃腳，但如果咁樣可以激發到隊友同加快融入速度，又點會係壞事呢？

下半場曼聯就真係踢返自己瓣波，畢竟要卡域克同馬達呢類球員發揮作用，前提係要攞到控球權。結果就係要當零比零咁先入到第二粒，先贏得夠說服力。從半場出黎嘅表現黎睇，摩連奴係觀察到呢個問題所以指示佢地要踢得積極啲。外界經常質疑佢太保守，有時可能係球員自身信心不足所以先踢得龜縮，將所有批評推向領隊實有欠公平。而領隊嘅職責就係要令球隊係呢種高半班波嘅比賽晉級之餘，同時提升士氣同累積信心，咁先能夠贏到之後嘅勁敵。呢場只屬僅僅收貨！

 

黎緊兩三個星期大戰連場，又係一系列嘅考牌戰！

[WKD手記] - 回帶

 

 

摩連奴賽前從未係聖占士球場贏過波，面對今時今日要為護級而努力嘅紐卡素，就算點無信心都無諗過真係會一分都拎唔到掛。事實係由車仔年代就開始同佢鬥嘅賓尼迪斯，今場激發到班球員去搏命，呢隊喜鵲真係對親曼聯都咁醒神 (當然唔少得前利記球員舒爾維喇)。撇開對手表現，我地今場波嘅表現如果放係全季黎講已經唔算係太差，前場有攻勢欠運、後場失死球已經係老生常談。睇完半場令我諗通左起以前隊曼聯係某一環比而家優勝之處，你又知唔知係咩呢？

 

 

 

呢場波只講兩個事件，首先山齊士扭過門將後面對空門，佢無直接起腳反而修正左一下先射波，最後被勤力嘅利祖尼護空門清走。呢球只可以話佢唔夠信心，但未達恥笑級別，事關過完人之後的確有啲人快波慢嘅情況，心急起腳又可能射唔中龍呢。山齊士加盟後攻勢已經入肉左，今場又屬於少有踢得好嘅紅魔鬼，真係怪佢唔落。第二球波好多人怪史摩寧控甩左腳波，插水失敗輸個死球俾人結果入埋。史摩寧當然錯在技術差，否則都唔洗情急之下插水，但呢個失誤何嘗唔係由鐘斯交球醫院波先呢，再者附近隊友都企定定睇住佢自己去，如果華倫西亞提一提場結果可能已經唔同。至於死球盯漏人相信大家都知道有咩問題，而家應該要俾返啲空間普巴調整心理同狀態，睇多幾場先再談論普巴喇。

 

上半場傳波慢到嚇死人，我開始思考點解以前曼聯無咁易老鼠拉龜。中前場分析就多喇，但今場有走位有交靚波又不乏埋門機會，問題係個波係中後場悶傳太多，好耐先做到一腳組織出黎。

 

係後防。當里奧同史高斯效力緊曼聯時，即時高峰已過，仲可以利用簡單短傳黎拉空對手。史摩寧腳下功夫麻麻，不過踢法同視野比起鐘斯同伊雲斯更似里奧，費爵爺退休前明顯想佢接班。我認為佢仍然擁有上述長處，不過之後三任領隊唔鐘意後衛上腳太多，於是我地而家見到馬迪拎波位置愈黎愈深，希望帶上去再交波。事實係佢同其他中場球員斷橋，只要搵專人壓迫馬迪就可以令攻勢減緩，甚至要放長波。

 

 

 

以前兩老又會點踢？佢地好興一路面對面互傳俾對方一路將防線推到中圈附近，過程無甚風險，因為一個望住後場一個望住前場，隻鬼未到就已經傳走左個波。熒幕上好似無意義嘅傳球﹐實際上對組織進攻有幫助，而呢場即使做左好多下轉邊，都因為傳控速度慢而變得低效。史摩寧同鐘斯絕對識亦都做到One touch交俾簡單目標，但保守令佢地習慣正面控波仲要黐腳，修正多腳先再傳走，到真係有人埋黎拍就出事。呢種惡性循環令到佢地自己信心下滑之餘，中場負擔都增加左唔少，睇下季中隊隊都識得迫搶馬迪就知喇。

 

 

 

好多人批到史摩寧一文不值，其實佢有一啲傳統英人中堅無嘅質素，至於用唔用得著就要睇下摩連奴喇。踢得唔順究竟係咪純粹人腳問題呢？係咪大清洗就得呢？