[WKD手記] - 回應

曼聯由領隊到球員都不停強調「我地要反彈、作出回應」，佢地場上嘅表現同肢體語言就反映咗一切。車路士雖然狀態下滑，戰術用人都處處受到質疑，但眾人似乎已經忘記咗佢地季初曾經十八場不敗，對上一次交手亦只係不分勝負。今場我會形容為沉悶嘅勝利，原因係曼聯領先後守得好穩，沙利根本迫唔到蘇斯克查露多一手棋，情況有如曼聯輸俾巴黎果種輸完都唔知對方仲有幾多招未出嘅感覺。

賽前陣容一出我認為呢個433好合理但略嫌保守，因為每次都會犧牲拉舒福特踢中鋒嘅機會，到直播排陣先知原來踢鑽石型中場嘅41212，雙前鋒搭馬達踢攻中實在令人興奮！當下即刻聯想到此陣式就係Plan B，用嚟應付普巴因輪換或傷停而缺陣嘅戰術，並極有可能會為踢歐聯次回合而試陣。此舉仲有激勵士氣之處，首先表達到對拉舒福特同馬達踢中路嘅信任，尤其是前者需要更多喺呢個位置上嘅磨練同經驗。雖然佩利亞換入後無乜表現，但俾佢踢攻中位已經係一種認同，留隊與否取決好多因素，起碼領隊意識到攻中或者挨前中場中可能係佢更加在行嘅位置。獲得一定出場時間去感受、嘗試擔任攻中責職，到臨危受命嗰陣先容易發揮出應有水平，就呢點已經睇到蘇斯克查帶嚟嘅改變。

戰術上曼聯可謂食住哂車仔，觀感上車仔進攻時嘅無力感就好似阿仙奴輸俾我地咁，可能同佢地得夏薩特一個突破點（阿仙奴 - 伊禾比）有關。同之前對強隊一樣，頭段比較多迫搶，然後就進入穩守模式。車仔進攻時會將兩閘用到翼衛一樣，疉瓦頻率比曼聯高得多，目的不外乎為兩翼爭取進攻空間同增強轉邊嘅效率，而沙利指揮下中路球員會更主動入攝。曼聯應對方法好直接，就係不停轉換4人/5人防線。三閘線前維持四後衛+三平排防中，三閘線後就會有一個防中拍入去四人防線，令到對手無法拉走後衛之間嘅空位，對手回後就走返出嚟重整為4312/4411。要執行得漂亮係好難嘅事，防中要根據情況而決定拍入去邊兩個後衛中間/直頭做臨時兩閘，而後衛又要有默契同判斷到局勢先放心移位。佢地今場嘅執行力強得令人詫異，除咗有兩球直線走甩希古恩之外，陣地戰完全守死咗車路士嘅套路。

進攻上就唔多講喇，今場無機會睇曼聯主攻時嘅表現，球迷們好好回顧兩球快攻入面靴里拉同拉舒福特嘅無球跑動喇，無呢種起動觸覺就唔會有呢啲入波（正正攻擊到車仔兩閘壓得太上嘅缺點）。

今場個個都踢得好，但想特別讚下兩位球員，分別係史摩寧同普巴。希古恩嘅埋門質素同走位絕對幫到車路士，不過佢都係需要供應嗰種前鋒。史摩寧根據指示瘋狂將佢推離禁區，成功限制咗佢全場發揮，所以整體嚟講都踢得幾好，希望可以穩步上揚重拾狀態。普巴一入球一助攻梗係成為全場最佳球員喇，但令人驚喜嘅地方係佢防守紀律原來可以咁好，防守時同中場線夠緊密、回防時機準繩、無過度上腳，完全明白防中定位同埋點樣協助馬達呢位攻中。如果普巴保持到呢種穩定性同團隊心態，曼聯重返爭冠之路就輕易得多。

[WKD手記] - 首敗衝擊

蘇斯克查同一眾職球員齊齊經歷兩個月嚟首場敗仗，雖然抽籤之際各界都唔睇好紅魔鬼能夠出線，但眼見曼聯愈打愈有、巴黎傷患連連，球迷自然覺得首回合應該有一定勝算。最終我地坐擁天時地利人和，但喺主場俾巴黎聖日耳門擊敗，當中差距究竟有幾大？

作客富咸收起部份主力如楊格、連迪洛夫，正選球員亦因為優勢擴大提早被換走，最後贏波之餘又收到輪換之效，作為大賽前嘅準備已經安排同執行得不能再好。簡單總結呢場波就係曼聯發揮出正常水平，而前場個人能力實在比對手強太多所以三條線都無受到太大考驗，除咗入局有啲慢熱之外其餘時間都掌控住戰局。



奧脫福大戰巴黎，曼聯開賽初段非常進取，無論三前鋒同兩閘都壓前緊迫，希望趁對手未入局就搶到佢地失魂犯錯；巴黎亦都有備而戰，喺站穩陣腳前只求盡量封鎖普巴。基於兩隊都執行得幾到位，頭十分鐘麥巴比同普巴兩個重心球員都幾乎無波到腳咁滯，戰情應該幾合乎兩位領隊預期。曼聯始終唔係迫搶型球隊，上半場中段慢慢調整返企位，球賽進入拉鋸狀態，雙方多次交換控球權，但麥巴比同迪馬利亞兩次嘗試突破越位其實預告咗曼聯嘅危機。曼聯拉後兩閘嚟增強掩護，代價係削弱咗兩邊進攻板斧，加上連加特同馬斯亞單打獨鬥完全佔唔到上風，進攻模式就變成兩邊Early Cross，試問高波能夠做成啲咩威脅呢？

無人會知道如果曼聯守得住果腳角球會點，但下半場形勢慢慢向巴黎傾斜︰紅魔進攻套路唔湊效但又無乜改動，於是攻勢愈嚟愈唔入肉，得返斬中同浪射；巴黎就更加敢於用波，反壓中場。以泰亞高施華同華拉堤為首嘅中後場控制節奏有一手，時快時慢，得閒搏下犯規等你更加亂，本來已經老鼠拉龜嘅曼聯就喺不知不覺間由主動變為被動，想急都急唔嚟。呢種微妙嘅形勢轉移喺英超少見，或者就係我地成日講嘅歐洲賽經驗。曼聯陣中唔少球員踢過歐聯，但拍埋去艾維斯、施華又有幾多個稱得上老練淡定？

巴黎鋒線缺少咗卡雲尼同尼馬本來鬆一口氣，點知只靠最年輕嘅麥巴比已經令曼聯條防線雞手鴨腳，不時要用超技術整跌佢。喺無任何藉口嘅情況下，呢場波令紅魔球員同球迷認清現實：我地可能係迅速進步當中，但同論實力、經驗同世界頂級仲有好一段距離。上年馬斯亞落選世界盃大軍或多或少同摩連奴有關，但麥巴比用表現證明自己擁有嘅質素比佢多元化同勁得多，速度、搶點、射術、拉邊Cut In樣樣有，簡直可以用恐怖嚟形容。我地拉舒福特同樣係金童，今場面對住甘佩比最多叫做五五波，但連正面挑戰泰亞高斯華嘅機會都無，咁就明白巴黎其實防守壓力唔太大，仲有位好多走盞。

同時不得不提普巴呢場被馬昆奴斯一個防中就封死咗全場，其實係一件好事，因為喺球隊圍住佢嚟建立戰術呢個咁容易自我膨脹嘅情況下，佢需要知道自己有排都未係球皇，仲有大把進步空間，而我相信佢已經夠成熟去從打擊中迅速成長。

之前加利佬講過曼聯比曼城落後咗幾年，放係呢場波去睇可以理解成︰曼聯某啲球員可能有世界級潛力，但近幾年球隊成績反覆，佢地無乜同頂級球會正面交鋒，成長同經驗累積自然比預期慢。分組賽首循環面對祖雲達斯已經感受到人地用波比起曼聯有層次、由後場到前場去演繹佢地對「控制節奏」嘅理解，今場亦然。曼聯近年比較鐘意擅於快速反擊，要重拾主攻之道就必須喺強強對決中採取主動，至少要加強控球時組織質素，著重Recycling possession，咁先能夠培養出高壓下嘅鎮定(Composure)。十年前我地可能笑緊PSG法甲山寨王，今日呢？

[WKD手記] - 蘇斯克查的433

先係熱血迫和般尼，後有僅勝李城。當初重獲自由梗係有無窮無盡嘅活力大踢進攻足球，但球員難免會遇上狀態起伏，比賽嘅娛樂性亦唔會場場都咁高。蘇斯克查深明輪換嘅重要性，所以對般尼作出少量調動，等個別球員儲力戰李城非常合理，換轉係費格遜都會咁做。單純以表現計曼聯唔算趺得太勁，但觀感上就愈嚟愈吃力，唔通係對手已經開始搵到方法令曼聯套433行唔通？

般尼守得咁好要歸功於紀律，相信領隊戴治賽前要求中場平排兼盡量推出去，防守時保持中場線高度，然後由兩雙前鋒向中堅施壓。此舉令中堅用波變得困難，要依靠中場中回後拎波，兩閘自然唔敢壓得太前，成功限制咗曼聯進攻控球嘅範圍喺三閘線而非禁區頂/邊線畸角位。佢地毫無死守嘅心態，反擊時中場照衝埋上禁區令防線大失位，造成第二個入波，八十分鐘超水準嘅發揮只係拎得一分算係有啲唔好彩。

般尼發揮得好，但曼聯啲攻勢依然係咁凌厲，只係最後果腳硬係處理得唔夠好，再加上舊將希頓屨救險球，般尼先有機會射入第一球。佩利亞後場失誤導致球隊落後當然難辭其咎，但論全場表現其實算係稱職。其實佩利亞處境相當尷尬：此子青訓出身獲蘇斯克查力讚、實力不俗吸引到唔少中遊球隊注意，年齡開始脫離小將行列但出場時間欠奉，今次上陣又扣哂印象分。最重要係防中以至墮後中場都唔係佢嘅自然位置，意識、風格、身體質素又似西甲果種中場中多過工兵中場，呢一刻真係見唔到佢有能力同靴里拉、甚至費特爭長短。橫掂都係做後備，點解唔用佢嚟做普巴或者左右中場嘅替工呢？

曼聯夫添出擊，李斯特城又點應付? 佩爾就用咗第二套方法牽制三中場。華迪故然擅於執行迫搶戰術，但今仗佢同麥迪遜以及換入嘅岡崎慎司主要對防中前後夾擊而非向中堅施壓。一對中堅有一定空間用波，但同防中條傳球線就長期被封阻住，到佢地交俾兩閘時，防中仍然處於被夾擊狀態，仲有文迪同尼迪迪兩個硬淨防中擋住中間，結果又要局住回返俾中堅。防中想拎波就要跑到去中堅範圍，中路進攻自然就少咗一個人，就連普巴都要回到中圈附近攞波，最後達到接近嘅結果：曼聯進攻控球嘅範圍保持喺三閘線，拉邊大轉向嘅次數都大大減少。

從呢兩場波見到唔同領隊已經針隊曼聯嘅陣式嚟部署踢法，目的就係要減弱我地三人中場嘅參與度，甚至係用盡方法唔俾佢地接近禁區頂。曼聯班前鋒入攝射波都叻，但俾波果腳嘅穩定性始終要靠中場球員去做。英超已經無乜邊隊波會下下死守，反而會嘗試從唔同角度瓦解進攻源頭，若然要突破前四甚至喺將來角逐聯賽冠軍，除咗反擊要高效之外，對住中下遊球隊都要有幾種進攻模式，如果唔係好快俾人睇通哂。

[WKD手記] - 是殺手，不是傀儡領隊

曼聯同阿仙奴合演咗一場比惡鬥熱刺更高水準嘅比賽，如果蘇卡達斯同高斯尼無傷出，球賽尾段或者會出現更多變化。作為歐聯席位嘅競爭對手，兩位領隊唔單只要檢討今仗戰術成功與否，仲要諗下兩個月後場六分波點踢。兩隊戰術指令頗為明確，而且大部份球員都執行得幾精準，證明兩位今屆先接手嘅領隊都摸熟雙方實力同風格，絕對有真材實料。

成功非僥倖。前幾仗拉舒福特同連加特經常互換位置我會理解為兩者風格類近，交叉走位容易引起混亂。今場早段只要無波在腳就見到非常有系統咁連加特踢中間、盧卡古踢右翼，當時我只觀察到連加特喺中間施壓的確好過任何球員，但就好似犧牲咗進攻效率，因為中場拎到控球權會搓住等佢地換返位先攻上去。直到盧卡古僅僅越位已經響起警號，當時我覺得“呢球阿仙奴都幾炆水喎”，再連入兩球先明白蘇帥就係要用呢個企位嚟發動反擊。盧卡古未必夠福仔快，但佢企喺邊線接應完有能力護波甚至撞開對手，亦因為逗得比平常深而有機會突破越位。


個人好欣賞蘇斯克查俾佢用波呢個做法，因為盧卡古制空權本身就唔算超班，淨係用頭根本唔會令佢構成太大威脅。腳下功夫一般，但考慮埋速度同身型其實單對單情況下佢一啲都唔易對付。喺某個種意義下，淨係掉高波俾佢或者費蘭尼其實係一種侮辱，因為佢地踢愛華頓嘅時候就係憑住幾瓣能力都唔錯先會被曼聯收購。至於山齊士仲係一拎到波就會因為心急而影響咗判斷同執行水平，但處理球單刀由推過門將到望埋龍門擺靚個身先射入，就知佢只係太餓波同未搵返狀態而擾亂咗冷靜嘅頭腦。呢一下入攝更加係擁有射手觸覺先會起動到，遲一剎已經唔會有突破越位嘅時機，所以我仍然相信佢係頂級球員，對曼聯爭四有益無害。



阿仙奴雖有拿卡錫迪同奧巴美羊兩位高質射手，但主要供應來只伊禾比同藍斯，後者更加係隊中發揮得最好嘅球員。伊禾比被換出前不停嘗試擊毀右路防守，雖然唔算處於上風但楊格都會有所忌諱。藍斯就非常聰明地遊走於防中、右閘、中堅之間，盡量擾亂越位線、後衛企位。曼聯呢幾仗防中由禁區頂殺出去嘅時機好準，後衛又高警覺性，限制咗艾馬利套Plan A嘅同時可以放心盧卡古同山齊士留守中圈線打反擊。上半場末段鬆懈咗少少就差啲俾阿仙奴全面收復失地，可見防守系統只要有一兩個球員隻中力下降就會令成套戰術崩潰。今次進步之處就係下半場都仲保持到防守活力，除咗將中場線推出去之外，普巴亦早咗回防，真正成為反擊第一點，策動快攻兼交出助攻。

兩隊財政背景有別，但無可否認曼聯三線板凳實力同質素都比阿仙奴深，呢個因素無論喺今場波或者聯賽發展都有決定性影響。當我見到馬斯亞同拉舒福特喺場邊準備入替就由心底裡笑咗出嚟，幻想下一個後衛要守七十分鐘盧卡古同山齊士已經好難受，之後仲要換兩個又快又扭得嘅前鋒出嚟，簡直就係一個災難。相反，阿仙奴即使無人傷出都只得奧斯爾屬於真正攻擊手，而且用嚟換出唯一突破點伊禾比，呢個調動令人費解。論狀態我認為紅魔四鋒都仲有唔少向上空間，尤其係一啲反擊可以處理得更好，但最至少全部都因為良性競爭而在進步當中，喺嚟緊二三月連場激戰下就變得好重要。

[WKD手記] - 補時階段的蜜月期

七戰全勝，保得住三分但隱憂慢慢浮現，所以更加應該把握時間尋找改善空間。近兩仗尾段都陷入苦戰下得勝，但只靠士氣絕對唔足以跑完聯賽呢個馬拉松，最後都要考領隊功力。爭四份子各有問題，曼聯相對已經算齊整，中前場球員整體質素同狀態尚可彌補後防漏洞，不過臨場應變之差可能會被未來對手所針對。

曼聯近乎夫添出擊並維持前幾場嘅進攻套路，呢一點係值得欣賞嘅。球員即使理解戰術體系，都要透過不停練習同實踐先可以以接近完美嘅姿態執行職責，尤其對拉舒福特同普巴呢啲幾個位都踢得嘅球員，位置熟練度更為重要。當曼聯主導球賽，控球通常集中喺左路，除咗因為普巴同馬斯亞有默契、多位右腳球員切入中路能力強之外，右路進攻模式需要大量空間亦係原因之一。十二碼當然係憑普巴個人技術搏返嚟，但馬迪俾嘅轉向長傳同樣咁精彩。

(達洛特、楊格觸球對比圖)

唔單只呢個攻勢，曼聯好多時左路用波迫使對方要密集佈防，然後右路楊格就可以喺無波情況下衝上右翼位助攻，右翼連加特就會乘勢移入中路。此舉令楊格同靴里拉响進攻時無需經常上腳同長期留守前場，仲真正利用到球場闊度，加上個個都有返咁上下突破能力，對一般中下遊球隊會好易就造成後防混亂。

(普巴全埸五次失去控球，其中四次都發生在60分鐘後)

自蘇斯克查執掌後，曼聯球員無論上腳用波同第一時間俾波Pass and move都多返，而要

踢得富娛樂性、節奏明快除咗默契之外，體力一樣咁重要。好氣好力梗係可以繼續大舉進攻，體力下降就會誘發近兩仗下半場嘅現象：當隊友遲咗半拍現位而少咗交波選擇或推進空間、中場喪失一定機動性，馬迪同普巴就會多咗過度上腳俾人偷波嘅情況。兩位中場大腦好清楚知道要嘗試保持住控球嚟拖慢節奏，而對方當然知道呢個策略而施以更大壓力，正如白禮頓落後兩球後一直都保持住防守紀律，一心等曼聯失誤或者最後二十分鐘先全力反撲。

成功的話就會捱過迫搶階段，甚至再下一城提早結束球賽，但如果被人追返一粒局勢就會開始失控。為求加強防守，陣式會轉為451，偏偏中場問題最為嚴重：普巴防守效率較低經常處於波後，頂多從後追逼持球者而做唔到遮線封位嘅工作，但馬迪就成日向邊移位，痴心妄想佢會走返入嚟一齊守，導致佢同靴里拉中間穿咗個大窿兼少咗個人衝出嚟殺波。兩翼即使回防都唔覺得太有效率，有時係出現咗但一樣失位俾人走身後，前面果個單箭頭就更加被孤立。伊巴仲喺度嘅話可能Hold到一陣打埋反擊添，但現實係狂輸第一點同控唔到落嚟轉守為攻，感覺比泊大巴只係擴闊咗防守範圍同多啲主動性。麥湯美尼同受傷中嘅費蘭尼雖然同中場三子技術上有分別，但佢地絕對適合喺呢種情況下換入，搶奪三閘線嘅主權，否則就會任由對方進攻。要知道摩連奴都教唔識佢地點泊大巴，而家叫佢地齋守又點會次次都咁好彩丫？

[WKD手記] - 紅白大戰

99年卡爾遠射收死舒米高、01年曼聯落後三球下反勝到上年足總盃準決賽再次反勝，熱刺對曼聯從來不乏經典場面。近年兩隊有唔少定位、實力都類似嘅球員，每次遇上都係位對位嘅直接對決，甚至直接影響佢地喺國家隊嘅地位。今場波緊湊程度有如決賽一樣，除咗領隊，順便比較下兩隊球員表現。

上半場雙方水平之高比得上今屆任何一場英超，撇除曼聯球迷身份都覺得“我最期待的畫面出現了”。球賽精彩唔一定因為入波多，廿二位球員都盡力執行戰術先係重點，作為球迷完全感受到兩隊風格、進攻理念同重心。喺短短四十五分鐘內佢地嘗試攻擊對方弱點，同時又要考慮攻守協調，加上雙方都積極搶波令球員要喺極短時間作決定，極富博奕味道，從中窺探到領隊賽前做足功課，識得取長補短。相反，下半場觀察到兩者都無明確Plan B，靠嘅係球員鬥智多過戰術，情況有啲似今季熱刺輸俾利物浦果場波。單睇今場好難斷定邊個更適合教曼聯。

熱刺要贏就必須靠兩閘壓前，同一對中堅自然會有距離，當中以右閘查比亞比左閘戴維斯更為進取，中堅拎波果陣斯素高就會移去右閘位置；當查比亞喺三閘線拎到波，斯素高更加會疊瓦開路，等前者可以隨時斬波俾簡尼，可見斯素高對呢個戰術嘅攻守流暢度相當重要。馬斯亞回防效率唔高，梳爾少助攻算係明智之舉，而另一邊楊格相對進取，攻返戴維斯令對方唔敢亂上，雖然唔係由中場疊瓦，但三個前鋒輪流响右邊跑直線已經夠頭痕。

拉舒福特上季操到咁大隻就係為咗做中鋒，但好快就撞板：腳法無之前咁靈活、多咗格硬死扭獨食、踢中間又頂唔贏。佢一直都做唔到伊巴或者係盧卡古嘅嘢，但蘇斯克查用戰術嚟發揮佢獨有嘅過人能力同射門觸角。曼聯擺明打反擊，福仔不停喺四人防線之間嘅身後遊走，令熱刺兩閘每次壓前都係賭博，全場唯一入球就係來自查比亞失誤、戴維斯因戰術需要失位先誘發到福仔單對單用速度爆過維頓漢呢個局面。英格蘭有唔少翼鋒都有成為中鋒嘅情意結，只講近年都有韋碧克、禾確特呢啲例子。踢中間唔一定要做希斯基嘅，奧雲一樣得，唔知修夫基會唔會參考蘇斯克查，三月國際賽時將佢移入中路，代替韌帶受傷嘅簡尼踢中鋒呢？

另外兩對可比性高嘅球員就係連加特對阿里、普巴對艾歷臣。猶記得世界盃連加特同阿里踢法頗為重疊，而前者出色嘅表現令阿里喺國家隊中突然失去咗定位。返到球會，連加特雖然今場有份造成入球，走動都仲係咁高效，但新帥帶隊後觸球時間愈嚟愈少，對佢個人發展未必係好事；至於阿里作為影鋒嘅控傳能力的確值得成為熱刺進攻核心，佢同艾歷臣可以話係相輔相成，永遠都需要佢喺前面造成威脅，先能夠幫艾歷臣爭取空間做一個墜後型指揮官。相反，普巴愈踢愈前先搵返真正嘅自己，須知道佢唔單只視野好俾長傳叻，腳下功夫了得又射得，要守死一個全盛、有自由度上落嘅佢唔會係一個人做到嘅事，而佢仍然進步緊。

最後一對當然係門神之爭喇。兩人係英超打滾咗咁耐都有唔少神救，但洛里斯始終唔夠穩定，偶爾派膠而且大賽表現平平，喺我心目中稱唔上世界級門將。迪基亞由世界盃失準到而家又變返世界最強之一，多年嚟為曼聯保住過幾多次三分，最近身體語言仲愈嚟愈有信心、又識得激勵防線，已經成為普巴之後最不可劃缺嘅紅魔鬼。有趣嘅係，前熱刺球員贊拿斯比較兩者，認為迪基亞憑較佳企位擋走簡尼球半單刀而洛里斯做唔到。事實上九成門將教練都唔會叫你學迪基亞咁企，因為只要反應無佢咁快、用腳封波無佢咁勁就會輸哂遠近柱，仲未計佢救波果陣隻腳夠快夠力將個波踢去安全位置以防有人執雞。迪神做到人做唔到嘅嘢，所以先叫迪神，屋企嘅小門將千析唔好亂學呀。

[WKD手記] -費格遜模式

費格遜離開帥位已經五年有多，可能有好多年輕球迷都未睇過果陣時或再早期啲嘅曼聯。當蘇斯克查話會將費格遜嘅風格帶返入球會，我就非常好奇佢嘅真正意思。剛剛三日內連鬥紐卡素同雷丁都能夠淨勝而回，由輪換以至換人方式都見到佢嘅影子同背後哲學，比起入波更加俾到信心球迷佢有能力帶領我地重返前四。

上任未夠一個月，我見到最有費爵味道嘅地唔係領先後佢地會作出調整，尤其响下半場會根據情況調控節奏，即使喺球迷觀感上都能夠感受到紅魔球員有收有放咁保持優勢到完場。呢兩場波已經無之前踢得咁標青，球迷都要明白疲勞、傷停、狀態問題會逐漸响蜜月期過後浮現，到時就考驗到新帥功力。對紐卡素要不是艾素射術奇差，上半場應該早早就要落後，華倫西亞復出表現唔算太曳但已經反映到面對反擊時後防企位會比以前蝕底，兩閘回防速度稍慢條防線就會即刻穿哂窿，如果對住華迪呢啲反擊型前鋒都咪話唔驚！

因為曼聯開賽慢熱，對手往往會嘗試一開波就盡量施壓，但球員似乎識得搵方法入局。其實提升傳球速度同埋增加進攻走位嘅自由度可以踢返生一個攻勢，球員亦會從中拎到信心同球感，而家大概用十五分鐘就會慢慢掌握返球賽主導權，同以前成個上半場雜亂無章咁踢已經有進步。老實講，採取得主攻自然要冒上相對風險，就算先失一球我都覺得會追得返，球員對於一啲失誤後嘅反應說明咗佢地有相同想法，呢啲態度球迷係感受得到嘅。

去到雷丁果場作出咗九個調動，效果麻麻但又晉到級就真係有費格遜味道喇。由麥湯美尼、佩利亞同費特組成嘅三人中場欠缺明確隊形，甚少逗住各人企位嚟踢，中路空間太闊搞到進攻唔夠流暢又不時斷纜，默契就認真欠奉。麥湯美尼算係踢得最好果個，淡定、出腳準、位置感唔錯，相信有馬迪同卡域克教路可以成為下一個成功嘅青訓球員。雷丁的確同曼聯爭兩班波，尤其喺把握力同攻勢處理方面都非常差，所以曼聯即使踢得平庸都無陷入太大危險。正如蘇斯克查所講，呢十一個無點喺比賽環境下夾過，贏到波又吸收埋經濟已經收貨。如果摩佬仲教緊，可能馬迪仍然每場踢足90分鐘添，呢個就係兩者排陣理念嘅分別。

踏入2019年將會面對好多強敵，熱刺會係第一個大考驗，普捷天奴套戰術在於兩邊疊瓦快、攻擊力高，對我地兩閘做成衝擊之餘，對方就會乘機從中路利用艾歷臣、阿里嘅創造力去製造機會。聽落好似好難踢，但掉返轉曼聯而家嘅攻力何嘗唔係令人聞風喪膽？況且我地兩閘又係咁攻得，戰術上其實類同，採取主動可能先係上策！

[WKD手記] -中場的微妙變化

蘇斯克查上任三戰入十二球，球迷終於大飽眼福，除咗迪基亞會有啲失望之外其他球員都踢得相當開心。相較頭五列強份子，曼聯嘅聖誕快車算係易踢，全部都係中下游隊伍。般尼矛夫本身實力不俗，但十二月先後有兩位球員傷出最少半年、再俾熱刺大炒完五粒，作客奧脫福都預咗會係入球嘉年華。因為時間有限，蘇帥穩陣地用死一個陣式，務求短期內重建球員默契同信心，當中又有邊啲球員值得我地注意呢？

想知道邊個啱踢，首先要解構下呢套451戰術嘅執行模式。眾所周知普巴再次成為球隊核心，攻擊中場之位必然交咗俾佢，協防變成額外、唔做足都唔會俾人罵嘅職責，雙防中就有返明確目標：先確保防守位置同人手，再向中前場提供適當入攝同傳球。此舉最大得益者當然係馬迪同靴里拉喇：前者防守時多一個拍擋，唔洗再保護中堅同時又要搶截咁mission impossible；後者可以充分發揮自己最強嘅足球智慧，喺適當嘅時候同位置出現。比起舊時，兩者持球時會更注意有無過份上腳同拖慢咗進攻節奏，一察覺到就會盡快甩波轉變等隊友再鑽空間，而另一人就會逗住嚟踢，所以甚少見到兩者同時冚上去，要做到攻守平衡其實對閱讀球賽能力非常講究。

兩個就夾得唔錯喇，問題係輪換時邊個可以頂上呢？對哈迪斯菲爾德果陣費特就踢過防中，不過表現就非常麻麻。呢位巴西中場本身就進攻慾過強，只要拎到波就想自己做上去，

傳球選擇又往往捨易取難，結果多次帶甩、傳失，下半場就被本來可以休息多陣嘅靴里拉入替。

佢意識上近普巴多過靴里拉，而且都幾有巴西人果種防守意識、集中力薄弱嘅特性，與其將佢推落半格不如推前半格？小將佩利亞都有類似問題，喺呢個陣式下佢都好難爭取到中路嘅席位，唯有寄望嚟緊有多啲比賽早早就擴大領先優勢，俾佢兩個適應英超節奏同增強位置感。

另一個正面臨衝擊嘅球員就係連加特。摩連奴時代其中一個困局在於中前場缺乏機動性，當時最能夠簡單直接咁將個波運向前場，甚至做影子前鋒嘅就係佢（同馬達）。而家曼聯慢慢習慣返主導球賽，中前場各球員都擁有極高走動自由，傳球支援唔再係問題，連加特喺電視螢幕上嘅作用似乎只剩下跑動。其實佢喺普巴、馬斯亞同拉舒福特之間嘅空間仍然係咁重要，不過有更多時間處於無球狀態，更難獲得球感，所以佢要適應職責上嘅改變，同埋都睇得出體力消耗都幾影響到佢近仗表現。

改變緊嘅又點止中場丫？嚟緊會再同大家分享下唔同位置上嘅觀察，你地又睇到啲咩呢？

[WKD手記] - 見面禮

以為自己追咗曼聯咁多年有咩未見過，但原來踢得精彩嘅時候都難掩興趣嘅心情，好耐未試過睇完一場波會想走去踢波。相信蘇斯克查喺幾日內帶唔到咩精密戰術俾球員，從呢場嚟觀察除咗有部署到鋒線三人組嘅配合之外，球員走動更加似出於自由發揮。球員相對地能夠憑個人判斷去參與攻防當然加把勁喇，其實球迷見到佢地都踢得咁有個性仲開心，呢場波彷彿喺俾球員用表現向新帥自我介紹。



蘇斯克查首個訪問就講到自己教波風格受費格遜影響，所以會帶返落曼聯到，即刻令我諗到踢442嘅可能性，因為幾年以嚟進攻比防守表現得更差，最直觀睇到嘅問題就係邊個都踢掂唔柱躉單前鋒（伊巴除外）。呢場433陣式、人腳都同摩佬時期相似，但踢落完全係第二隊波。

拉舒福特作為單前鋒嘅弱點當然係背龍、制空力低，要求佢喺危險地帶控定個波等中場支援係強人所難，所以戰術上安排咗連加特、普巴同馬斯亞輪流跑向福仔用傳跑方式突破防線。連加特名義上踢右翼，進攻果時幾乎係一個攻中，務求福仔喺任何時刻拎波都可以彈返俾佢，當中場線壓到上嚟佢就會同福仔平排做雙前鋒。

呢個鋒線組合最後包辦咗四個入波，進攻成效不容置疑，但針無兩頭利，代就係跑動距離大增同埋右路缺乏攻勢。連加特體力消耗固然大，其實楊格一樣吃力，後者不下一次拉到上右翼位等波，靴里拉同及後換入嘅費得間唔中就會去包右閘位，但唔代表佢地能夠完美補位。卡迪夫城後期針對性地喺左路做波，靴里拉出腳失敗，爭啲就俾對手複製上場文尼嘅助攻方式。對強隊嘅話無乜可能咁冒險地踢，長遠嚟講都係需要解決右路組織同埋前鋒供應問題。



防守方面今場就顯得非常輕鬆，要不是有少少爭議性地輸咗個十二碼，迪基亞應該可以保持不失。後衛唔多機會去展示防守實力，但從組織中都見到各人擅長之處。連迪洛夫愈嚟愈有大丈之風同佢成日帶波助攻嘅踢法無關，而係因為佢開始擔起指揮防線嘅責任，中堅當中以佢最有閱讀球賽能力，將來能成大器；梳爾防守力唔算一線，不過同馬斯亞、普巴建立出嘅默契就值得繼續重用；右閘人選眾多，楊格、達洛特、華倫西亞甚至達米安踢得，前者咁後生或者可以踢哂成條邊線添。


卡迪夫城屬於護級球隊，但曼聯打到對方落花流水都反映到今場表現高於合格水平。卡迪夫城僅餘嘅攻勢都來至手榴彈戰術，運動戰中真係創造唔到咩攻勢，紅魔鬼從中應該搵得返主動用波嘅信心喇掛。老實講，摩連奴喺曼聯複製唔到大巴戰術嘅其中一個原因就係班球員一無控球權就會好慌，到難得有波到嘅時候心急亂做，啲反擊質素比佢教過嘅隊都要差，比人炒可以話係天時地利人和都輸哂嘅結果。

[WKD手記] - 再見摩連奴

正當我懊惱緊點寫雙紅會嘅時候，曼聯就宣佈同摩連奴正式分手，對寫呢份球評嚟講可能係件好事，因為再從球賽中以狂人思維去思考能夠改善嘅地方已無意義，反而可以用呢場波為佢嘅足球哲學作一個總結。成王敗寇，主守戰術喺觀感上本來已經少啲娛樂性，而且愈來愈難執行得出色，輸波自然俾人批評得勁啲。上一場由後防開始組織攻擊有板有眼，難免令人諗起摩連奴季初求購幾個中堅都失敗，如果曼聯真係買到又會失少幾多分呢？離隊已成事實，一齊睇睇告別戰衰乜。

馬達對富咸踢得咁好，點解無得出？以摩帥打開BIG 6嘅作風，馬達就算幾好波都唔會做正選，因為佢作客嘅首要目標係永遠都消耗對手體力，哪怕踢得悶踢得肉酸。即使今年失波數字暴升，但摩連奴最擅長就係防守，要求同利記對攻幾乎係唔可能嘅事。相反，能夠當工兵咁洗嘅靴里拉就憑上場十一次攔截搶走我認為本來喺屬於普巴嘅正選位置。對摩帥嚟講，球員就係有功能上嘅先後之分。

同對曼城一樣，除咗頭幾分鐘有迫過下之外，上半場其餘時間都係任由對手中場組織，成個佈防都擺喺禁區頂度。失第一球之前，已經不下一次出現任人由中圈一路推進，到禁區外五碼先企返定啲位。如果對面淨係得沙拿、文尼同費明奴，咁樣踢或者有效，但利記只要見到傳球路線被堵塞，就會即刻將個波回收到中後場再組織過，呢個回收者就係法賓奴。因為無向法賓奴施壓，佢喺接波前後都有極多空間作出傳球判斷，加上曼聯條中場線再次縮得太後，絕大部份嘅第二點都俾利物浦搶返，頭廿五分鐘簡直喺踢緊半場咁。下半場利物浦有一段要焗住遠射，正正係迫返基達同法賓奴嘅成效，所以高普換入沙基利打多個攻中。摩連奴一大敗筆就係無為對方呢個調動作出應對方案，佢都係果種偏向認為守得住就都唔轉防守戰術嘅領隊，但賽果證明佢要為此付出代價。

第一個失波楊格雖然失神，但相對地更加感受到利記喺走、傳、控、射都執行得近乎完美，唔知觀眾席上嘅費格遜有咩感覺呢？呢邊曼聯靠連加特把握到艾利遜失誤追和，但大部份喺波都係由後面斬上去，而拉舒福特同盧卡古完全拎唔到甜頭，甚至有種被雲迪克教訓嘅感覺。費蘭尼入替後無論嚮高波地波都多返啲控球質素，相信更換領隊後佢仍然有一定存在價值。摩帥總係希望消耗完對手體力後先換入一啲技術型球員，但當場上球員都失去信心同球感時，靠一兩個人又點帶返起成隊波呢？

外界對摩連奴可以一千種負面評價，但只係因為佢失敗咗，足球世界就係咁殘酷。佢的確要球員去遷就自己最拿手嘅戰術，無將手上每個球員嘅個別潛力發揮到最好，但掉返轉班球員都配合唔到摩帥要求，踢到如斯田地，邊個能夠話只有領隊或球員有問題呢？我個人認為摩連奴喺同時代競賽緊，因為佢一直堅守自身嘅足球理念同時有嘗試作出改變，只係效果唔理想，而時代可能首先將佢套防守理論淘汰。有人歡喜有人愁，現代足球複雜嘅程度已經唔係話炒一個領隊就解決哂所有問題，球會上下都要作出改變先能夠渡過難關，可以參考加利佬一段電話訪問。

好來好去，Thank you Mourinho!

[WKD手記] - 最好的進攻由防守開始

經過周中同阿仙奴嘅激戰，曼聯用表現嚟回應球迷要求，莫非呢隊就係摩連奴所講嘅積極性？主場面對英超失波王兼榜尾球隊富咸，拎三分係基本盤，更希望嘅見到係贏得夠說服力。由後場到前場都有新氣象，轉守為攻嘅過程甚為流暢，對手實力低固然係原因之一，但如果呢種戰術重點執行得宜，至少可以用嚟打中下遊球隊。

上半場富咸基本上犯哂曼聯近半季嘅錯，所以睇落一啲都唔陌生：兩邊太容易俾人帶到禁區邊先防守，大大增加出腳風險；唔俾壓力兩閘令達洛特同楊格雙閘齊飛；中路太禮讓俾馬迪同靴里拉分波上腳。呢啲問題全部喺下半場得到改善，曼聯雖有收韁之勢但事實上都踢得辛苦。

轉個角度，曼聯大勝全賴三個防守球員，分別係靴里拉、楊格同達洛特，尤以前者重要。靴里拉瘋狂參與攻防，跑動範圍大到令人忘記今場馬迪踢緊單防中，但真正出色之處在於解放右閘。佢成場波活動範圍主要喺右後方，上半場完美示範如何轉守為攻。相對往時用馬迪墮後去兩個中堅之間，今場曼聯喺後場組織嘅時候偏向用靴里拉做右中堅，利用佢走動多同傳球視野嘅優勢，等達洛特可以留守前場等波。另外要讚佢總會早過其他隊友起動，所以先會不停見到佢殺出嚟助攻攔截等，今場成隊踢得咁生都要多得佢嘅無球意識加勤力。



細心留意的話，曼聯今場兩閘早段壓得非常之高，佢地唔使格硬帶波上去，反而多由中場創造到一定空間後先分俾兩邊﹐兩閘自然可以專注於突破同傳中。說易行難，要嚮無球狀態下企得咁前就必須對中堅同中場有信心，否則往往會因為驚輸反擊而逗住嚟踢。楊格先開紀錄為隊友打咗枝強心針，我認為佢展現出嚟果種野心不時都幫到拉舒福特繼續嘗試突破同射門︰縱使佢已經三十三歲又唔算一流左閘，踢得差果陣仲要俾自己球迷噓，但佢份爭勝心真係對得住個隊長臂章。

至於達洛特拎到最佳球員全因佢敢上腳，出啲波弧度同落點又靚，雖然無交出助攻，但瘋狂傳中已經令到盧卡古喺前場俾到極大壓力對方。華倫西亞近兩年狀態有所下滑，如果今年呢位葡萄牙新仔能夠上位的確係好事。防守能力嚟講，相信佢都仲有幾多進步空間，後生仔年輕力壯始終會偏好出腳標波，希望更多出場時間會幫佢發展出更成熟嘅判斷能力，當然都要讚佢今場幾次單對單都守得住施斯隆喇。

有球迷表示馬達先係中路核心，我就認為佢只適合踢摩連奴嘅部份戰術，而且好需要有人幫佢掩護。下半場當靴里拉受壓時，馬達嘅觸球次數同創造能力就大幅下降，面對強隊時以守為先，好多時就會犧牲呢位防守一般嘅攻中。現代足球變化多端，加上進攻端無乜邊個球員特別穩定，相信聖誕快車都會繼續輪換上陣。

[WKD手記] - 無睇?唔緊要喇!

國際賽期後三場波都踢得好差，而且觀賞性低到作為一個球迷無咩原因要揀呢場波嚟睇。如果你最近無睇曼聯踢波的話，基本上你無錯過任何嘢。唯一要繼續睇落去嘅動力就係同球隊一齊捱過呢個難關，與其踩多幾腳不如幫下眼搵出問題所在。最近摩連奴多次提到球員執行唔到自己進取積極嘅賽前部署，反而係佢地自己踢得保守。假設佢無講大話，究竟係咩導致呢種情況重覆出現呢？

首先球員無信心同狀態嘅話，俾咩戰術佢地都唔會踢到。摩連奴今場盛讚嘅拉舒福特，上陣咁耐啲走位都咁靚同高效率，又拉空位又開路又補位，但頭二十分鐘大家又會點評價佢呢？幾乎所有波都可以交得好啲、控得好啲，仲要間接令球隊失第二球波，根據佢嘅水平用踢得差嚟形容絕對唔過份。就算出現喺啱嘅位置都要處理得好先構成到一個高質攻勢甚至入球，用福仔做例子係因為佢由無信心無球感踢到交出兩個助攻，當中變化夠哂明顯，事實上其他球員頭段同佢一樣咁慢熱，啲球感同決定水皮到令人以為佢地無熱身就落場，自己都未顧掂仲講咩戰術執行？就呢一點我認為教練團隊必須負上責任同埋正視問題，遲入局已經唔係一場半場嘅事。即使唔係數據流嘅我都忍唔住翻查紀錄，開季至今踢咗二十場比賽竟然有一半係先失波嘅，咁就梗係踢得辛苦喇。



攻守矛盾亦有可能係踢得咁保守嘅原因之一。記得薩巴列達喺節目分享過佢替韋斯咸上陣迎戰曼聯，馬斯亞要追住佢呢個三十三歲嘅右閘嚟防守好慘，我會解讀份潛台詞係佢覺得馬仔係前場發揮到嘅能力遠比回防多，何必將大部份體力消耗於一個老將身上？當然唔係叫佢唔返嚟守喇，不過回防同協防都分唔同程度唔同範圍。摩連奴偏好防守球員企得好深，每次起碼有七八個人喺個波後面，進攻時除咗大腳就係用兩邊，唔難想像邊路球員體力消耗有幾大。另一個情境題就係當你知道壓前迫搶失敗時要比其他球隊走多幾步先做到泊大巴嘅防守模式，衰多幾次都唔敢積極壓前喇，高防線已經難掌握，仲要搶唔到就變返大巴，除非班紅魔係體能超人喇。印象最深刻果次係曼市打呲，曼聯一開波想用三個前場俾壓力對手，但同時自己條防線又好深，中間啲空間任人傳咁滯，幾分鐘已經明白迫完等於無迫索性死守，仲點積極落去呢？



我都幾認同加利佬話而家唔係炒一個領隊就改變到成個問題，但當曉士賽和到曼聯都唔足以將帥位保多一場嘅時候，你又好難怪球迷開始想像新領隊會為紅魔鬼帶嚟新景象嘅。呢刻我只希望曼聯可以踢好一種陣式先，睇得出有啲球員因為成日轉位置而踢到越嚟越迷茫。