[K11出品] 曼聯K角度 - 創世紀下的犧牲品
2018年12月18日，曼聯正式宣布時任領隊摩連奴離任，正式結束摩氏紅魔。首先我K11要利申一下我非撐摩或反摩，我最著眼的只有曼聯，而摩連奴所帶領嘅曼聯，曾經為沉寂咗3年嘅紅魔球迷帶來希望，因為摩連奴就是冠軍保證。摩連奴所執教第一季，引入世界級射手伊巴謙莫域，前曼聯青訓卻於祖雲達斯踢出身價嘅法國中場普巴，德甲MVP米希達恩及年輕有潛力嘅拜利。雖然聯賽成績談不上成功但卻成功奪取聯賽盃冠軍及歐霸盃冠軍，亦因歐霸盃冠軍而再度帶領球隊晉身歐聯賽場。
上一季因伊巴受重傷，季前摩連奴決定買入前鋒代替者盧卡古，後防則再購入年輕同樣有潛力嘅瑞典冰人連迪洛夫，結果球隊上半季表現穩定且慢慢穩佔聯賽第二位，可惜曼城嘅超班狀態令曼聯只能為保第二而戰，而聯賽盃未能衛冕加上歐聯於16強在劣評表現下被西維爾踢出局。餘下足總盃避免成為零冠賽季，可惜最終卻敗於冤家干地及仇家車路士腳下。其實季中山齊士加盟嘅一場賭博而埋下將帥加劇不和嘅伏線。
來到今季，本以為上季以防守強橫嘅後防加上金手套得主迪基亞坐鎮，只要改善前線入球力便嘗試衝擊聯賽冠軍。誰不知，摩連奴與普巴關係決裂，球隊進攻乏力，更甚嘅係球員士氣低落，信心不足，後防嚴重不濟，最終聯賽未到半季，摩連奴便要下馬。
以上摩連奴的曼聯回憶錄，其實只係曼聯由格拉沙家族入主，活禾特掌管曼聯大權後，為了將曼聯打造成世界第一商業球會下這個創世記的犧牲品之一。倒帶一想，由莫耶斯執教不足一季便因成績不濟而被炒，代領隊傑斯補上，卻最終由名帥雲高爾補上，傑斯只能成為助教，此一刻開始，曼聯便開始走上商業之路。
雲高爾第一季成績一般，但仍然保住了歐聯，可惜第二季即使拿下足總盃，卻因為失去了歐聯席位而要落鑊，需要明白曼聯這品牌是要爭冠軍，參加歐聯，參加歐洲最頂級賽事才能吸金，所以雲高爾嘅落鑊是預計之內。不過曼聯嘅處事方式卻受質疑，因為據雲高爾所說，佢於奪得足總盃後2日仍抱著慶祝心情下，卻非由活禾特口中得知自己被辭去，這做法的確欠缺尊重。為何會這樣呢？因為4日後即5月27日，曼聯正為當時話題十足，商業價值高昂嘅摩連奴空降來到而鋪路。
摩連奴到來，還帶來了伊巴及普巴，明顯就是要製造一個超級巨大嘅商業效應。在於商業上，活禾特成功了，即使曼聯該季只能參與歐霸盃，但聲勢比當時嘅曼城及利物浦更強大，於全世界嘅受歡迎程度只有增無減，而且摩連奴亦成功於首季帶領曼聯以歐霸冠軍重回歐聯。
不過上季開始，曼聯對於摩連奴開始缺乏支持，或多或少因為冬窗山齊士嘅失敗交易影響，但其實摩連奴一直想要嘅係國米嘅佩列錫，卻因幾M歐元而無疾而終，完成不了摩連奴心中嘅理想陣容。山齊士嘅收購看似摩連奴一意孤行，但需知道最後批核嘅仍然係活禾特，點解活禾特會批? 睇到山齊士加盟時嘅彈琴儀式就知道呢個都同商業價值有關係啦。到了今季開季，摩連奴一直希望收購一名可以即食嘅中堅但管理層拒絕再放水，這完全對於摩連奴組軍影響極大，結果今季曼聯後防大穿窿，印證摩連奴嘅需要。
或者不少球迷認為摩連奴帶來曼聯嘅收購均失敗居多，而且價值高昂，管理層拒絕再放水也合情合理，而且摩連奴嘅戰術太保守，令不少球迷反感，但回到初心，難度管理層一開始選擇摩連奴會認為摩連奴會大踢進攻足球? 難度認為摩連奴會放棄其擅長嘅低位防守再加以反擊這一套嗎？既然年初仍然相信摩連奴這一套，選擇續新約，卻半路停工，年中決定收水唔俾買人，此舉實在令人費解，亦肯定令摩連奴感心灰意冷。
其實細心留意摩連奴呢2年多的買人方針，亦看得出端倪。第一季帶來自己信賴嘅伊巴，而普巴嘅回歸，我認為商業因素不少，米希達恩嘅加盟更令人感到是同一經理人拉奧拿嘅拉攏。最後是拜利，亦係摩連奴第一個官宣帶到曼聯嘅球員，再看看上季收購嘅連迪洛夫，同樣是年青且具潛力，睇得出摩連奴有心想長教，否則，一開始便收購年若28歲以上嘅即食球員吧。可惜嘅係，曼聯作為上市公司，要成績支持商業價值，壓力自然回到摩連奴身上，所以季初才強烈要求收購一名即食嘅中堅穩定防線，卻被拒絕。
無可否認，摩連奴自身亦有不少問題，強悍率直嘅性格使其與球隊商業價值最高嘅普巴鬧翻並貶於後備。回想一下摩連奴最反對旗下球員所做嘅其中一件事就係參與商業活動，包括經常出現在社交平台，怕會影響場上表現。偏偏社交活動及商業活動卻是普巴的最愛，而且普巴於賽事嘅表現亦未能說服摩連奴，結果二人嘅裂痕由第一季嘅緊密合作變成陌路人。而且，曼聯近年於活禾特的商業手腕下大賺，更令旗下球員嘅商業價值不斷上升，亦令一眾球員認為多參與社交平台及商業活動是合理不過的事，但理智一點其實某部分球員嘅真正實力卻不及市場所估值般高，當中包括咗連加特及盧卡古等等，如果佢地去到其他一線球隊是否仍然穩佔必然正選呢？看官自有定斷吧，這就是商業因素的影響力了，亦是當年費Sir與碧咸交惡的重要因素之一。
當然，球隊成績始終最實際，曼聯選擇被利物浦擊倒後將摩連奴辭去，某程度看似合情合理，即使仍有機會重回前四(雖然機會不大)，即使歐聯晉級16強，管理層亦選擇不再給予耐性及時間，因為曼聯害怕再次失去商業價值極高的歐聯資格。不過回想雲高爾嘅第二季，難度比今季好嗎？雲高爾卻可以留到季尾並確定失去歐聯資格後才被落鑊，那為何摩連奴要於呢一刻就落鑊？誰知道摩連奴呢位曾經叱吒葡英意西聯賽嘅世界級領隊唔能夠起死回生? 可惜世事沒如果，呢一刻亦無人再會知道摩連奴教到季尾的話，曼聯可以去到邊度。
道不同，不相為謀，摩連奴亦已成為曼聯嘅過客，但如果曼聯繼續以商業價值行先去管理球隊，不給予足夠時間及支持，只會無限輪迴去更換領隊及球員班底，亦只會有更多創世紀下的犧牲品出現。曼聯終於宣布今季餘下時間由曼聯名宿蘇斯克查作為代領隊，再邀請費Sir以前副手費倫回歸加入教練團，希望真的可以撥亂反正，不再追求名牌，不再以商業行先，以重建球隊為首要目標吧。
[WKD手記] - 再見摩連奴
正當我懊惱緊點寫雙紅會嘅時候，曼聯就宣佈同摩連奴正式分手，對寫呢份球評嚟講可能係件好事，因為再從球賽中以狂人思維去思考能夠改善嘅地方已無意義，反而可以用呢場波為佢嘅足球哲學作一個總結。成王敗寇，主守戰術喺觀感上本來已經少啲娛樂性，而且愈來愈難執行得出色，輸波自然俾人批評得勁啲。上一場由後防開始組織攻擊有板有眼，難免令人諗起摩連奴季初求購幾個中堅都失敗，如果曼聯真係買到又會失少幾多分呢？離隊已成事實，一齊睇睇告別戰衰乜。
馬達對富咸踢得咁好，點解無得出？以摩帥打開BIG 6嘅作風，馬達就算幾好波都唔會做正選，因為佢作客嘅首要目標係永遠都消耗對手體力，哪怕踢得悶踢得肉酸。即使今年失波數字暴升，但摩連奴最擅長就係防守，要求同利記對攻幾乎係唔可能嘅事。相反，能夠當工兵咁洗嘅靴里拉就憑上場十一次攔截搶走我認為本來喺屬於普巴嘅正選位置。對摩帥嚟講，球員就係有功能上嘅先後之分。
同對曼城一樣，除咗頭幾分鐘有迫過下之外，上半場其餘時間都係任由對手中場組織，成個佈防都擺喺禁區頂度。失第一球之前，已經不下一次出現任人由中圈一路推進，到禁區外五碼先企返定啲位。如果對面淨係得沙拿、文尼同費明奴，咁樣踢或者有效，但利記只要見到傳球路線被堵塞，就會即刻將個波回收到中後場再組織過，呢個回收者就係法賓奴。因為無向法賓奴施壓，佢喺接波前後都有極多空間作出傳球判斷，加上曼聯條中場線再次縮得太後，絕大部份嘅第二點都俾利物浦搶返，頭廿五分鐘簡直喺踢緊半場咁。下半場利物浦有一段要焗住遠射，正正係迫返基達同法賓奴嘅成效，所以高普換入沙基利打多個攻中。摩連奴一大敗筆就係無為對方呢個調動作出應對方案，佢都係果種偏向認為守得住就都唔轉防守戰術嘅領隊，但賽果證明佢要為此付出代價。
第一個失波楊格雖然失神，但相對地更加感受到利記喺走、傳、控、射都執行得近乎完美，唔知觀眾席上嘅費格遜有咩感覺呢？呢邊曼聯靠連加特把握到艾利遜失誤追和，但大部份喺波都係由後面斬上去，而拉舒福特同盧卡古完全拎唔到甜頭，甚至有種被雲迪克教訓嘅感覺。費蘭尼入替後無論嚮高波地波都多返啲控球質素，相信更換領隊後佢仍然有一定存在價值。摩帥總係希望消耗完對手體力後先換入一啲技術型球員，但當場上球員都失去信心同球感時，靠一兩個人又點帶返起成隊波呢？
外界對摩連奴可以一千種負面評價，但只係因為佢失敗咗，足球世界就係咁殘酷。佢的確要球員去遷就自己最拿手嘅戰術，無將手上每個球員嘅個別潛力發揮到最好，但掉返轉班球員都配合唔到摩帥要求，踢到如斯田地，邊個能夠話只有領隊或球員有問題呢？我個人認為摩連奴喺同時代競賽緊，因為佢一直堅守自身嘅足球理念同時有嘗試作出改變，只係效果唔理想，而時代可能首先將佢套防守理論淘汰。有人歡喜有人愁，現代足球複雜嘅程度已經唔係話炒一個領隊就解決哂所有問題，球會上下都要作出改變先能夠渡過難關，可以參考加利佬一段電話訪問。
好來好去，Thank you Mourinho!
[讀者投稿] - 500中的29 - 伊巴謙莫域
日前, 前曼聯射手伊巴謙莫域在美職聯代表洛杉磯銀河作客多倫多FC並攻入一球, 可惜球隊最後仍然以5:3不敵主隊. 雖然球隊落敗, 但伊巴謙莫域的入球為自己個人的球員生涯建立了重要的里程碑, 因為這一個入球是他職業生涯的第500個入球, 當中球會賽事的入球佔了438個, 而他為瑞典國家隊亦攻入了62球. 在現役的足球員中, 職業生涯能夠攻入超過500個入球就只有美斯及C朗. 若然要將退役球員也計算在內 當然大家也比不上巴西球皇兼名宿比利, 他在整個職業生涯中曾經攻入1281個入球的驚人紀錄, 相信此紀錄將會是”前無古人, 後無來者”.
在國家隊, 伊巴謙莫域為瑞典國家隊攻入62個入球, 也是瑞典國家隊的入球紀錄保持者. 在球會的賽事當中, 伊巴謙莫域都可以話算是球壇浪人, 因為在他的職業生涯中一共效力了9間職業球會, 當中當然包括自己的愛隊曼聯, 而更早之前他還有效力7間歐洲球會, 包括馬模、阿積士、祖雲達斯、國際米蘭、巴塞隆拿、AC米蘭及巴黎聖日耳門. 當然身為曼聯球迷也想集中討論伊巴謙莫域在曼聯的表現.
2016年7月1日, 曼聯官方正式宣佈免費簽入瑞典前鋒伊巴謙莫域, 並與曼聯簽約一年, 與同年成為曼聯領隊的摩連奴再續前緣. 伊巴謙莫域更成為歷來第四位效力曼聯的瑞典球員. 伊巴謙莫域適應每一個新聯賽也有著比普通球員更強的能力, 他此前無論在瑞典甲、荷甲、歐聯、意甲及法甲的所有處子戰均取得入球, 加盟曼聯在英超後也不例外! 2016年8月7日, 曼聯在社區盾迎戰當年奇蹟地勇奪英超冠軍的李斯特城, 是曼聯當季首場正式賽事, 也是伊巴謙莫域在曼聯的處子戰, 當賽事進行到83分鐘兩隊仍然以1:1打和, 此時華蘭西亞在右路傳中, 伊巴謙莫域一招「泰山壓頂」成功壓過李斯特城中堅韋斯摩根頂入, 成為歷史上第107位為曼聯在處子戰上陣便入球的球員, 為曼聯最後以2:1取勝, 成功捧走加盟曼聯後的第一個錦標. 2016年8月14日, 完成社區盾後的一個星期, 英超正式揭幕, 曼聯在第一場英超賽事作客面對般尼茅夫, 伊巴謙莫域正選上陣, 並在64分鐘在30碼外以一記割草式射門取得入球, 令他達到在瑞典甲、荷甲、歐聯、意甲、法甲及英超的所有處子戰均取得入球的里程碑. 此外, 他亦成為歷史上第16位為曼聯英超處子戰上陣便入球的球員. 此後伊巴謙莫域在開季的時候還是一帆風順, 單單在8-9月期間已經為曼聯取得6個入球. 可惜當伊巴謙莫域在歐霸盃主場對烏克蘭球隊索爾亞一箭定江山後, 隨後7場為曼聯上陣的賽事中他均沒有取得入球, 在整個10月都未能取得入球, 陷入個人職業生涯最大的低潮.
2016年11月6日, 曼聯作客面對史雲斯, 伊巴謙莫域不單打破入球荒, 而且還梅開二度, 兩個入球均具有特別意義, 他在賽事中的第一個入球是英超歷史上第25000個入球, 而第二球更加是他球會生涯第400個入球, 最後協助曼聯以3:1勝出, 終止曼聯在10月聯賽不勝的頹態. 可惜這一場勝仗並未能完全帶領曼聯走出低谷, 雖然伊巴謙莫域不斷為曼聯繼續入波, 但曼聯其後再連和三場聯賽, 14場聯賽只得18分. 雖然曼聯在聯賽成績不佳, 但在盃賽卻表現出色, 歐霸盃第五輪分組賽曼聯主場以4:0大炒飛燕諾後已奪回出線主導權, 在最後一輪分組中曼聯以2:0擊敗索爾亞, 伊巴謙莫域當中亦取得一個入球, 帶領曼聯次名出線. 還有一場聯賽盃八強主場對韋斯咸, 伊巴謙莫域梅開二度, 帶領曼聯晉級四強.
踏入12月, 伊巴謙莫域在曼聯大發神威, 除了以上提及在歐霸盃最後一輪分組賽取得入球外, 在六場英超賽事中亦取得5個英超入球. 12月4日, 伊巴謙莫域在作客愛華頓的英超賽事中, 成功趁愛華頓門將史迪基倫堡出迎之際逗高皮球射門, 皮球中楣及中柱後慢溜入網, 即使有守衛趕及護空門但皮球已過白界, 這球是我認為伊巴謙莫域在曼聯期間最漂亮的入球, 可惜該場賽事最後被愛華頓逼和. 不過經歷完這場和波後, 曼聯開始走出低谷, 聯賽取得6連勝, 伊巴謙莫域一共取得5個英超入球, 當中除了對愛華頓的漂亮入球外, 還有絕殺水晶宮的入球、對西布朗梅開二度、以及對新特蘭的入球, 伊巴謙莫域更奪得12月份英超最佳球員.
踏入2017年1月, 曼聯成績又開始起伏不定, 聯賽三場只得一勝二和的平穩戰績, 不過盃賽成績卻有不同, 足總盃第三圈及第四圈均以4:0大炒對手晉級, 聯賽盃更加成功殺入決賽, 雖然過程中伊巴謙莫域並沒有取得入球, 但他卻扮演一個非常重要的角色. 2月份, 伊巴謙莫域重拾狀態, 2月5日作客李斯特城的英超賽事中他接應華蘭西亞右路地波傳中射穿卡斯柏舒米高的十指關, 助曼聯以3:0取勝. 2月16日, 曼聯在歐霸盃三十二強主場面對法甲球隊聖伊天, 這對伊巴謙莫域來說絕對是一大優勢, 因為伊巴謙莫域效力巴黎聖日耳門期間與聖伊天已經多次交手, 果然不負曼迷眾望, 伊巴謙莫域成功面對老對手大演帽子戲法, 也是伊巴謙莫域在曼聯的唯一一次連中三元. 2月19日, 曼聯在足總盃第五圈作客布力般流浪, 伊巴謙莫域和普巴也是在後備名單, 球隊是先落後的一隊, 但很快就靠華舒福扳平1:1, 不過球隊戰情仍然膠著, 摩連奴換入普巴及伊巴謙莫域加強攻力, 75分鐘普巴一次長傳, 伊巴謙莫域突破越位射遠柱入網, 而這一球亦令伊巴謙莫域成功在一個球季內在五項不同賽事(社區盾,英超,歐霸盃,聯賽盃及足總盃)均取得入球的球員, 是後費格遜時期第二位達到這項紀錄的球員(第一位為2015/16球季的馬斯亞), 最終曼聯險勝2:1, 能夠晉身足總盃第六圈. 二月份曼聯真正的戲肉是2月26日的聯賽盃決賽迎戰修咸頓, 是伊巴謙莫域加盟曼聯後首場盃賽決賽, 19分鐘伊巴謙莫域先射入靚罰球領先1:0, 打破修咸頓在該季聯賽盃的0失球紀錄, 而曼聯在38分鐘有連加特為曼聯再下一城領先2:0, 滿以為曼聯能夠輕輕鬆鬆渡過這場賽事, 豈知對方皇牌前鋒加比亞甸尼在臨完半場前及下半場48分鐘各入一球, 為修咸頓迅速追平2:2, 修咸頓氣勢如虹, 更一度令曼聯陷入苦戰, 伊巴謙莫域一度需要回後做防守, 防止曼聯被修咸頓反超前. 87分鐘, 伊巴謙莫域在後場策動攻勢, 經過幾腳傳送後, 輾轉之間落到靴里拉腳下, 靴里拉右路再傳中洽到好處, 伊巴謙莫域接應頭槌破網, 為曼聯劣勢下再度領先3:2, 最終曼聯亦以3:2擊敗修咸頓, 伊巴謙莫域奪得加盟曼聯後第一個盃賽冠軍, 而他亦順理成章地當選為決賽最佳球員. 而整場賽事中曼聯亦只有伊巴謙莫域表現稱得上對板, 難怪有球迷會覺得這個聯賽盃是由伊巴謙莫域一個奪取的冠軍. 總結整個二月份, 伊巴謙莫域在各項賽事中攻入7球, 是他加盟曼聯後為曼聯入球最多的月份.
踏入三月份, 伊巴謙莫域狀態有所回落. 3月4日, 曼聯在英超主場迎戰般尼茅夫, 下半場曼聯獲得十二碼機會, 可惜伊巴謙莫域射失, 令曼聯最終被般尼茅夫逼和1:1, 喪失全取三分的大好機會. 此外伊巴謙莫域更因一次與對方球員明斯碰撞, 而且向對方報復而被英足總抽後算帳罰停賽三場本土賽事. 這三場賽事曼聯取得一勝一和一負的戰績, 當中包括足總盃作客被車路士以1:0淘汰出局, 而且伊巴謙莫域在整個三月中都沒有取得任何入球. 雖然如此, 不過伊巴謙莫域在歐霸盃十六強兩回合都交出助攻, 協助曼聯總比數以2:1擊敗羅斯托夫, 晉身八強.
四月份, 伊巴謙莫域停賽期滿復出, 復出的首場賽事就是4月4日主場對愛華頓的英超賽事, 球隊不幸地上半場22分鐘被對方中堅球員積基卡先開紀錄而落後. 及後曼聯換入普巴加強攻力, 可惜曼聯的射門亦沒有辦法製造入球, 71分鐘伊巴謙莫域本應頭槌攻入為曼聯追平1:1, 可惜被旁證誤判越位, 令曼聯繼續落後0:1. 當以為曼聯即將落敗之際, 直到補時3分鐘, 後備入替的梳爾射門被對方另一名中堅艾殊利威廉斯在禁區內用手擋出, 曼聯搏到十二碼之餘, 艾殊利威廉斯被球證直紅趕出場, 十二碼由伊巴謙莫域順利抽射入網, 為曼聯驚險地扳平1:1取回一分. 4月9日, 曼聯作客包尾的新特蘭, 上半場30分鐘伊巴謙莫域接應靴里拉的傳送, 擺脫兩名守衛射遠柱入網, 下半場46分鐘曼聯已經靠米希達恩入球領先2:0. 尾段伊巴謙莫域再交出助攻給華舒福射入, 曼聯最終大勝3:0. 4月13日, 曼聯在歐霸盃八強首回合作客安德列治, 雖然曼聯靠米希達恩取得作客入球兼領先, 可惜仍被主隊在尾段追和1:1. 4月16日曼聯主場迎戰榜首車路士, 摩連奴罕有地將伊巴謙莫域先列後備, 代替伊巴謙莫域的是華舒福, 後者卻不負所望在上半場7分鐘已經先開紀錄, 下半場49分鐘曼聯再靠靴里拉擴大比數至2:0, 伊巴謙莫域在81分鐘才入替, 最後曼聯維持嬴2:0, 算是曼聯全季的代表作. 4月20日, 曼聯歐霸盃八強次回合主場迎戰安德列治, 卻是伊巴謙莫域惡夢的開始. 上半場10分鐘曼聯再一次靠米希達恩建功領先, 可惜曼聯未能維持領先優勢, 先有中堅洛荷受傷需由白連特入替, 而安德列治亦很快追平1:1, 曼聯及後加強攻力, 可惜90分鐘內曼聯亦無法取得入球, 更不幸的是伊巴謙莫域在尾段重傷需要提早收咧, 最終只能以1:1到90分鐘, 總比數以2:2打和, 由於作客入球數字兩隊均相同, 所以兩隊需要加時作賽. 伊巴謙莫域需由馬斯亞入替, 而曼聯終於在加時107分鐘由華舒福射入奠勝球, 最終曼聯以2:1(總比數3:2)險勝晉級四強. 可是伊巴謙莫域已經無法再參與餘下的賽事.
而伊巴謙莫域其後缺陣的賽事, 曼聯聯賽7場只能取得2勝3和2負的劣績, 不過歐霸盃四強有驚無險地淘汰切爾達殺入決賽, 最終曼聯決賽亦以2:0擊敗阿積士成功捧盃, 奪得2017/18球季的歐聯入場券, 伊巴謙莫域亦可首嚐奪得歐洲賽冠軍的滋味. 總結2016/17球季的伊巴謙莫域出場46次入28球, 作為一個35的老將來說已經是一個很誇張的數字.
及後伊巴謙莫域選擇不與曼聯續約, 可是8月中曼聯官方宣佈與伊巴謙莫域續約一年, 對曼迷來說也算是天大的喜訊. 11月18日, 曼聯英超主場迎戰紐卡素, 下半場尾段伊巴謙莫域後備入替, 相隔7個月後伊巴謙莫域首次重返球場, 雖然伊巴謙莫域沒有取得入球, 但曼聯最後亦以4:1大勝紐卡素. 其後, 伊巴謙莫域也少有地再為曼聯上陣. 11月22日, 曼聯在歐聯分組賽作客巴素利, 伊巴謙莫域後備入替, 為曼聯首次在歐聯上陣, 也是歷史上首位為7支球隊(阿積士、祖雲達斯、國際米蘭、巴塞隆拿、AC米蘭、巴黎聖日耳門、曼聯)在歐聯上陣的球員. 12月20日, 曼聯在聯賽盃8強作客英冠球隊布里斯托城, 雖然伊巴謙莫域正選上陣之餘亦在下半場為曼聯扳平1:1, 可惜球隊最後被主場絕殺8強止步, 而這個入球也是伊巴謙莫域為曼聯的最後一個入球. 12月26日, 曼聯在英超主場迎戰般尼, 伊巴謙莫域大傷後首度為曼聯在英超正選上陣, 可是球隊在上半場的表現非常不濟, 以0:2落後, 下半場摩連奴因戰術需要而換走伊巴謙莫域, 至此之後伊巴謙莫域再沒有為曼聯在任何賽事中上陣, 3月中的時候曼聯官方更宣佈與伊巴謙莫域提早解約, 其後伊巴謙莫域轉投美職聯洛杉磯銀河, 延續自己的職業生涯.
總結伊巴謙莫域在曼聯的整個生涯, 為曼聯上陣53場射入29個入球, 平均每場賽事射入0.55個入球, 作為當時已經36歲的老將來說, 已經是不錯的數字. 轉投美職聯後, 伊巴謙莫域為洛杉磯銀河上陣27場射入22個入球, 平均一場賽事射入0.81球. 雖則美職聯的整體質素也不算是太高, 可是伊巴謙莫域能夠維持良好的職業態度也是現時球員值得學習的對象. 現時美職聯正在休季, 未知伊巴謙莫域會否重返曼聯幫忙呢? 未必是為曼聯上陣, 但他的經驗或許能夠幫助現時曼聯的一眾年青球員, 以改善今季曼聯成績不濟的問題.
Konan King
[K11出品] 曼聯K角度 - 原.敗與再會
一場本已有心理準備嘅雙紅會，一開波已被壓著半場黎踢嘅雙紅會，一比一嘅比數維持到七十多分鐘嘅雙紅會，因為高普一次針對性調動而摩連奴卻選擇等待下，最終球隊以三比一完敗，不過完敗不如說是原.敗，原先的排陣已經令球隊致成今場落敗的因素，現時距離利物浦已有19分之多，距離第四位的車路士亦有11分，唯有寄望下周及時反彈勿再被拋離吧。
今場陣容為門將嘅迪基亞，三中堅由右至左為達米安，拜利及連迪洛夫，左右翼衛分別為達洛特及楊格，雙防中有靴里拉與馬迪，進攻中場有連加特，雙箭頭有盧卡古及拉舒福特。
迪基亞今場雖然失掉三球，但也並非迪基亞問題所在，第一球面對文尼近射也只能搏一搏，而第二及第三球均因為改變方向而令迪基亞失守。其實利物浦所謂三十六次射門也只有11次射門中框，除3個入球外，其餘8個攻門均可以說成在迪基亞控制之內，不過可惜也救不了球隊。
三中堅方面，右中堅嘅達米安再次回到正選陣容內，而今仗達米安再次顯示其高度防守意識，應解圍時解圍，應遮線時遮線，半場後轉任右後防也表現穩定，到底冬窗過後仲會唔會留於奧脫福仍是個謎。左中堅方面，極速康復嘅連迪洛夫正選上陣而由佢看管沙拿嘅時候表現稱職，基本上未有一次放過沙拿，只可惜第一個失球便正正在他頭頂飛過來說明了為何史摩寧會穩佔中堅位置其中一員。
正中堅方面，由賽前公佈嘅史摩寧突然改為拜利，因為前者似乎仍未準備好下，拜利今仗嘅表現卻繼續是相當突出，多次成功搶截利物浦嘅進攻組織，而且冷靜得宜，希望拜利可以重回正選之列啦。
左翼衛方面，由於梳爾仍受傷，楊格繼續受重用而其拚搏精神繼續，只可惜第一個失球的危機意識不足眼白白看著文尼走甩再接應射入迪基亞大門，不幸嘅係，第二個失球由於沙基利射門省中人改變方向而楊格正是該不幸者。
右翼衛方面，達洛特再次擔任正選但19歲小將於首次雙紅會下，相信心理壓力影響發揮，基本上令右路失去了支援，經驗也不足下，半場由費蘭尼入替。費蘭尼入替後，球隊轉回四後防而費蘭尼亦將上半場活躍嘅法賓奴壓下，不過當球隊有控球時要費蘭尼快速作出決定則有點勉強，球隊亦未能成功將皮球傳到費蘭尼最強的部分去製造威脅。
防中方面，馬迪是今仗較為令人失望嘅其中一位曼聯球員，面對利物浦快速壓迫嘅中場，馬迪明顯未能適應，多次被迫甩而且感覺也有點越踢越縮，而為何利物浦今仗能有多次遠射亦是防中之責任，所以第二及三球均是沙基利於禁區邊位置空晒黎射。另一防中靴里拉，今仗再次表現出佢有力成為紅魔隊長嘅人選，鬥志十足，而且其捉路嘅搶截真有一手，多次於中場成功攔截利物浦嘅傳送，只可惜缺乏下一步去轉守為攻，79分鐘時由於當時落後2:1，摩連奴用馬斯亞入替靴里拉。馬斯亞傷癒復出但今仗入替時已要救球隊，可惜屋漏兼逢連夜雨，入替1分鐘便被利物浦射成3:1，基本上賽事已被殺死了。即使今季回勇嘅馬斯亞也無力去成為今仗嘅救世主了。
進攻中場嘅連加特，今仗再度獲得摩連奴信任成為正選，而相信用連加特棄馬達於此位置主因是希望連加特不斷跑動嘅踢法將球隊行軍速度能提高之餘再有力去做一定防守工作。今仗連加特曾於33分鐘出現在正確位置入攝禁區把握艾利臣犯錯為球隊追平1:1，可惜今仗球隊始終被動嘅踢法令連加特跑多過掂波，即使多努力，最終也在85分鐘由馬達入替。馬達入替此動作相信只作為讓連加特休息及搏一搏有奇蹟罰球嘅出現，整體上對賽事起不了作用。
雙箭頭嘅拉舒福特及盧卡古，前者繼續是延續近仗拚命嘅鬥志，上半場亦曾經嘗試遠射但被艾利臣輕鬆接實，而下半場開始明顯見到體力有點不繼下，今仗未能為球隊帶來希望。
盧卡古方面，雖然主要以他與利物浦兩名中堅包括露夫雲及雲迪克對抗，但實話實說，其實利物浦只需其中一人便足以令盧卡古沉寂下來，搶位，停波等等工作未能令利物浦後防帶來吃力之感。幸好球隊追平一球來自盧卡古左路傳中，也算是為自己增加信心與球隊帶來一點貢獻。
戰術分析方面，為何我K11認為今場是一場原.敗的賽事? 其實正選名單上以馬迪配靴里拉作為防中已經是一種錯誤，還記得曼徹斯特打比戰也是以馬迪配靴里拉作為防中，結果被曼城緊迫嘅中場迫得透不過氣來，人類總要重複犯錯。更甚嘅係面對比曼城更大迫搶力嘅利物浦竟然重蹈覆轍，此原先的排陣便種下敗仗嘅結果。既然明知要同利物浦搶中場是玩火行為，我K11則會選擇用費特配靴里拉，最多鬥搶，靴里拉搶完會懂得將皮球傳結隊友而費特搶完則喜歡引球推進，因為馬迪最擅長的控制節奏根本於這類對抗中用不上，除非有信心己隊嘅控球力在對方之上吧。結果法賓奴嘅活躍亦創造了第一個入球嘅出現。
其實曾經有機會讓摩連奴修正過來，半場只是1:1嘅比數，雖然摩連奴馬上用費蘭尼作為前半格嘅搶截令利物浦中場組織力減低，亦使對手只能於禁區頂附近起腳，但正正因為馬迪越縮越後才出現對方極多遠射嘅出現。當然費特未有入選大軍之中，而後備名單根本未有相類似防中，既然如此，不如直接了當用費蘭尼換走馬迪。只可惜在摩連奴的盤算中，用馬迪來控制節奏還是最重要，即使換入馬斯亞時也期望追平後仍有馬迪在陣中去控制節奏，結果未能再次追平更被拋開比數了。
再者，摩連奴一向擅於臨場調動改變絕不拖泥帶水，但明顯今季摩連奴已經亂了陣腳，或者覺得根本唔識用手上兵源。今仗摩連奴雖然半場即時針對法賓奴換入費蘭尼應對，但高普於賽事膠著情況下換入沙基利，摩連奴卻未有即時反應卻是希望等賽果改變才調動，結果最終便由後備入替嘅沙基利連入兩球終結賽事，明顯地敗給了高普。
最後，昨晚曼聯已官方確認摩連奴已離開球會，此做法是否正確，各界自有評價，但只知道一切要重頭再來，暫時仍未知會由誰接任但即使如此，仍要對摩連奴這2季半為曼聯曾經帶來了遠大的希望，祝願摩連奴未來有順利發展，感謝你，再會了。
鳴謝各位支持文字直播及即討區，下場再見。
[WKD手記] - 最好的進攻由防守開始
經過周中同阿仙奴嘅激戰，曼聯用表現嚟回應球迷要求，莫非呢隊就係摩連奴所講嘅積極性？主場面對英超失波王兼榜尾球隊富咸，拎三分係基本盤，更希望嘅見到係贏得夠說服力。由後場到前場都有新氣象，轉守為攻嘅過程甚為流暢，對手實力低固然係原因之一，但如果呢種戰術重點執行得宜，至少可以用嚟打中下遊球隊。
上半場富咸基本上犯哂曼聯近半季嘅錯，所以睇落一啲都唔陌生：兩邊太容易俾人帶到禁區邊先防守，大大增加出腳風險；唔俾壓力兩閘令達洛特同楊格雙閘齊飛；中路太禮讓俾馬迪同靴里拉分波上腳。呢啲問題全部喺下半場得到改善，曼聯雖有收韁之勢但事實上都踢得辛苦。
轉個角度，曼聯大勝全賴三個防守球員，分別係靴里拉、楊格同達洛特，尤以前者重要。靴里拉瘋狂參與攻防，跑動範圍大到令人忘記今場馬迪踢緊單防中，但真正出色之處在於解放右閘。佢成場波活動範圍主要喺右後方，上半場完美示範如何轉守為攻。相對往時用馬迪墮後去兩個中堅之間，今場曼聯喺後場組織嘅時候偏向用靴里拉做右中堅，利用佢走動多同傳球視野嘅優勢，等達洛特可以留守前場等波。另外要讚佢總會早過其他隊友起動，所以先會不停見到佢殺出嚟助攻攔截等，今場成隊踢得咁生都要多得佢嘅無球意識加勤力。
細心留意的話，曼聯今場兩閘早段壓得非常之高，佢地唔使格硬帶波上去，反而多由中場創造到一定空間後先分俾兩邊﹐兩閘自然可以專注於突破同傳中。說易行難，要嚮無球狀態下企得咁前就必須對中堅同中場有信心，否則往往會因為驚輸反擊而逗住嚟踢。楊格先開紀錄為隊友打咗枝強心針，我認為佢展現出嚟果種野心不時都幫到拉舒福特繼續嘗試突破同射門︰縱使佢已經三十三歲又唔算一流左閘，踢得差果陣仲要俾自己球迷噓，但佢份爭勝心真係對得住個隊長臂章。
至於達洛特拎到最佳球員全因佢敢上腳，出啲波弧度同落點又靚，雖然無交出助攻，但瘋狂傳中已經令到盧卡古喺前場俾到極大壓力對方。華倫西亞近兩年狀態有所下滑，如果今年呢位葡萄牙新仔能夠上位的確係好事。防守能力嚟講，相信佢都仲有幾多進步空間，後生仔年輕力壯始終會偏好出腳標波，希望更多出場時間會幫佢發展出更成熟嘅判斷能力，當然都要讚佢今場幾次單對單都守得住施斯隆喇。
有球迷表示馬達先係中路核心，我就認為佢只適合踢摩連奴嘅部份戰術，而且好需要有人幫佢掩護。下半場當靴里拉受壓時，馬達嘅觸球次數同創造能力就大幅下降，面對強隊時以守為先，好多時就會犧牲呢位防守一般嘅攻中。現代足球變化多端，加上進攻端無乜邊個球員特別穩定，相信聖誕快車都會繼續輪換上陣。
[K11出品] 曼聯K角度 - 改變
聯賽四場不勝，主場成績差劣，包括2場面對榜下游球隊均和波終結，今場面對榜尾球隊富咸，又是主場，令人認為今場又是一大失分危險嘅出現，結果摩連奴再次收起普巴，但球隊踢出摩連奴所講嘅癲狗論，全場跑動，鬥志十足，踢出咗多年無見嘅紅魔精神，半場領先3球下，最終以4:1取勝全取3分。雖然今仗對手係較弱嘅富咸，但相信球迷睇到嘅係- 改變，包括咗鬥心，走位及戰意。
正選陣容方面，迪基亞繼續為正選門將，後防右至左為達洛特，史摩寧，鍾斯及楊格，雙防中為靴里拉與馬迪，進攻中場右至左分別為馬達，連加特及拉舒福特，正前鋒為盧卡古。
迪基亞方面，今場所面對嘅挑戰可謂今季最少一場聯賽，8次射門只有4球中框但除咗所失嘅12碼外，其餘3球都只係隔靴搔癢嘅攻門，不過可惜嘅係，因為12碼，迪基亞今場又保唔住零封。
左閘方面，今仗由停賽期滿復出嘅楊格代替受傷初癒嘅梳爾，呢名隊長今場踢出今季其中一場代表作。13分鐘於左路突破入禁區再射網仔入網成1:0，而其餘時間亦助攻頻頻，走位不斷，令對手右後防嘅奧度疲於奔命，最後拉舒福特嘅入球亦來自其助攻。
右閘方面，被摩連奴譽為曼聯未來10年右閘之人嘅達洛特繼續正選，今仗更一戰成名，全場助攻力強，而且傳中質素極高，其急勁傳中令我K11憶起咸爺碧咸嘅急勁，當然力度與角度仍然要磨練下火候。加上勇於迎波，去波及幫波，令曼聯右路進攻力大增，當然防守上仍需要留意被人劏穿直線嘅情況，但對於只有19歲嘅年青人黎講絕對係超班右閘，賽後被選為MOTM。
中堅方面，今仗以史摩寧及鍾斯合作，史摩寧一度令富咸威脅球員米杜域變得沉寂，更令對手半場便被換出，可惜史摩寧於59分鐘疑似因傷離場由洛荷入替。洛荷入替後其實連提佢嘅名都少之又少，其實都証明咗富咸嘅反擊力亦不見太大威脅，洛荷今仗可以輕鬆度過。鍾斯方面，仍然以其拼命踢法為曼聯後防帶來一定嘅硬朗而近仗更顯得較上季有準確嘅預判，不過65分鐘因其於禁區內被卡馬夏撞開後，靴里拉被判12碼而守唔住零封較為失色一點。
防中方面，先講講靴里拉，今場再次於中場負責搶截及轉守為攻嘅任務，再次表現出眾，全數共錄得10次截擊，而且亦有後上插入攻門嘅能力只可惜接應馬達傳中一球竟然柱邊出柱而已，不過靴里拉於場上感染隊友嘅能力的確好好，希望繼續有上陣機會同埋續約曼聯。
另一防中馬迪，今仗表現非常搶鏡而且更有兩次漂亮嘅後踭成功傳俾隊友，而其實馬迪嘅任務一如既往地去控制節奏與分波，不過由於有靴里拉在場負責標波嘅工作令馬迪更得心應手去做佢本身嘅任務，雖然場場都有佢但今場嘅馬迪絕無疲態出現，而且所需體力亦不多，與其一直說如何解放普巴，今場摩連奴嘅排陣似乎更能解放馬迪吧。
進攻中場方面，右路嘅馬達今仗亦一如既往般經常走到中路去做策劃，而由於右閘嘅達洛特已接近玩晒整條右邊，馬達可以用更多時間於中路幫忙做派牌，28分鐘更自己入攝禁區內接應拉舒福特傳中撞射尾柱成2:0，而42分鐘嘅一次角球戰術中，馬達接應連加特直線於底線傳中予盧卡古撞射成3:0，結果一入球一助攻令馬達今仗達成個人英超50入球加50助攻紀錄，如果唔係靴里拉一次門前失機，馬達嘅助攻數字可以再添一次。
進攻正中場嘅連加特，今仗繼續其勤力跑動，而雖然未有直嘅入球或助攻數字，但經常能迫搶成功，或自行引球推進，甚至交出直線波，第三個入球便是連加特直傳馬達使其可以底線傳俾盧卡古近門射入。73分鐘費特入替連加特，摩連奴曾經講過希望球隊中後場防守力增加以便費特嘅工作能更集中應付串連進攻方面，今仗的確係唔錯嘅機會，可惜睇到佢同隊友嘅默契仍然不足，令下半場尾段進攻節奏唔夠順暢。
左翼嘅拉舒福特，今仗維持之前數仗嘅拼勁與跑動，而最重要嘅係，今仗連場上決定都做得好好。28分鐘於左路突破後傳中予馬達撞射入網，而其後雖然仍有一兩球處理得唔夠好，但其實表現不俗，39及47分鐘嘅射門亦相當有威脅，更於82分鐘於左路K角位附近來個冷箭入網成4:1，亦將球隊狠狠殺死。84分鐘由麥湯米尼入替似乎係俾拉舒福特休息及接受主場球迷嘅掌聲吧。
正前鋒嘅盧卡古方面，今仗復任正選而亦都跟著球隊嘅拼勁去追波，雖然一直好努力但仍然好似唔順咁，好彩嘅係42分鐘終於接應馬達傳中近門撞射入網成3:0，而今仗都慢慢見到盧卡古有改變，係好嘅改善包括控球及停球。你踢得掂就最好啦，渣古。
戰術分析方面，其實今場只是再次運用對阿仙奴一役嘅戰術而中後場稍為調整一下。不過最重要係連續兩場賽事中，曼聯球員似乎作出了改變，只要佢地團結，一齊盡全力，原來所帶出來嘅能力係可以達到此程度，明顯看到戰意，拼勁與鬥心均與季初明顯不同。而此改變，卻是普巴並不在陣中也能發揮出來，應該話更能發揮出來。
或者曼聯球員一直認為，普巴在陣能改變戰局，所以當普巴在場時，會經常圍繞普巴來傳球，其餘時間便可以企定定等，但呢兩場波發現，沒有普巴也能做到，只要大家多跑一步。最明顯嘅影響其實係馬迪，雖然今場波對手富咸實力不高，但要留意如果馬迪有疲態或唔識走位郁動，會跟今季多場賽事一樣只懂企定定，即使持球球員在身邊也不懂走位拉空位，但今場嘅馬迪覆蓋範圍其實好大，而且走位也更"生"，當然拍擋嘅靴里拉幫忙分擔防守工作有關但就今場賽事，馬迪應該踢得幾輕鬆及開心吧。
餘下嘅問題，其實係要睇普巴經過兩場賽事於後備席上，看到隊友的積極性，想法到底會係"如果我都咁踢，會比佢地更勁"還是"我根本唔洗咁樣踢"，若是後者，真的救不了，但若是前者想法而積極去表現自己，試想想以普巴的技術與身體質素有著靴里拉嘅鬥心，會有多恐怖呢？改變與否及如何改變，留給普巴自己思考吧，而摩連奴亦打開口牌表明周三歐聯正選上陣而且希望普巴今場能用今場曼聯球員嘅鬥心一樣去表現自己，機會已在眼前，改變與否，拭目以待吧。
鳴謝各位支持文字直播及即討區，下場雙紅會再見。
[K11出品] 曼聯K角度 - 誠意搭夠的仙魔大戰
賽前不少曼聯球迷均睇淡主隊因為要面對剛反助熱刺4:2勝出北倫敦打比戰嘅阿仙奴，而且亦傳出將帥再度不和嘅消息，結果摩連奴的確將普巴收起，而後防亦用上周末全部因傷缺陣的拜利，史摩寧及洛荷，前場則用上三位快速的年青球員，最終與阿仙奴踢出一場精彩緊張的2:2和波賽事，雖然技術層面只屬一般，但兩隊均戰意十足，算是一場誠意搭夠的仙魔大戰。
出場陣容方面，門將為迪基亞，三中堅由右至左為拜利，史摩寧及洛荷，左右翼衛為達米安及達洛特，雙防中為靴里拉與馬迪，前線三子為左路嘅馬斯亞，右邊嘅連右加特及正前鋒拉舒福特。
迪基亞今場竟然因一次失誤而令球隊先落後，當時梅斯達菲壓贏史摩寧接應角球頂中龍而迪基亞竟然接波甩手，皮球向門框飛去而靴里拉嘗試救空門可惜皮球而入白界。不過除此球外，迪基亞其後救出杜里拉嘅近射，奧巴美揚近射及燙遠柱等等極具威脅嘅攻門，否則曼聯亦不止兩個失球，總算補救了第一個失球嘅責任。
後場三中堅方面，拜利是久休復出的一員而其實佢今場嘅水準與狀態卻是出奇地好，多次快狠準嘅攔截，而且相當冷靜，不過卻有時有一點輕挑，或者呢點會是摩連奴對拜利有保留的地方。
另一中堅史摩寧，今仗第一個失球被梅斯達菲壓贏可算是給比下去，幸好及後見到信心未有失去，表現漸見穩定下來。左中堅嘅洛荷，比起拜利是更加好久不見，今場為洛荷今季第一場賽事加上上周末才剛復操，今仗踢來穩定而且信心十足，而助攻角球魯莽拿下黃牌也見怪不怪，更主射角球與力度也不俗嘅罰球間接為球隊追平1:1，但無諗到嘅係，今場表現比一次後場傳失波所破壞，即使自己追回亦難阻拿卡錫迪射入2:1，幸好69分鐘一次長傳令連加特得以極速追平2:2，73分鐘由費蘭尼入替。費蘭尼入替後，位置處於中場與前場附近，但今仗所帶來效果唔夠明顯，亦欠缺直接嘅傳送到費蘭尼以便直接攻門。
左翼衛方面為季初以為已經離隊嘅達米安，今仗於左路雖然助攻力仍然一般但防守力卻做得相當不俗，多次以經驗及位置感彌補速度嘅不足。右翼衛方面，達洛特助攻力強而且傳中球有一定水準，以英超地標戰黎講算是非常不錯，但防守上今仗多次被阿仙奴集中進攻達至多次傳中造成中路嘅危險卻要多加注意。賽後摩連奴表示未來10年曼聯嘅右後衛都係達洛特嘅世界，我地拭目以待。
雙防中方面，今仗用上靴里拉與馬迪，馬迪方面，其實今仗以馬迪作為中堅前的屏障外，還為球隊作為控制節奏嘅中樞，而且其富有經驗為球隊亦帶來安全感，領下黃牌便因靴里拉傳失波後防止阿仙奴突襲下拉停對手領下。慢慢感覺馬迪有點像TVB嘅林峯，本身唔係差，但見得太多下，令人有唔想再見嘅感覺，其實適得其所，馬迪係幾好用嘅。
另一防中嘅靴里拉，今仗有不俗嘅演出，攔截，搶截，傳球成功率等等都非常亮麗，而且更重要嘅係交出一球及時且重要嘅助攻，當時洛荷射罰球被里奴救出後，靴里拉唔放棄並於底線前傳中予馬斯亞射入，雖然曾經一次致命傳失予阿仙奴球員幸得馬迪捨命拿黃牌相救，亦無阻今仗靴里拉嘅出色演出。
前線方面，連加特今仗主要於右路發難，而且走動頻頻，雖然唔顯眼亦未見有任何威脅，但卻於69分鐘出現在最適合的地方於阿仙奴小禁區附近近門射入網追成2:2，亦打破自己於奧脫福長達半年以上嘅入球荒，76分鐘由普巴入替。普巴與摩連奴嘅關係就好似傳統婆媳關係一樣，成日面阻阻但又會成日見，普巴又要睇摩連奴頭而摩連奴又唔可以將普巴全面棄用，摩連奴今仗大戰決定棄用普巴，賽前解釋為戰術平衡嘅原因而明眼人都知咩事啦，不過亦贊成摩連奴今次嘅決定，因為近幾仗又見普巴於場上顯得有點懶散，而普巴雖然曾解釋缺乏傳球目標所致但相比今仗中前場球員嘅積極，的確睇到普巴嘅落差，不過始終有普巴能令曼聯整個中場線級數提升，且看普巴幾時真的成熟了。今仗後備入替後表現繼續沉寂但未見有懶散情況，算好事吧。
正前鋒嘅拉舒福特，上仗被摩連奴以癲狗黎形容其戰意而今仗亦繼續如此，亦係摩連奴最想現時曼聯球員能表現出黎嘅鬥志，而拉舒福特今仗表現亦不俗，走位再接應再停波也做得不錯，當然仍有進步空間但最少能牽引對手後防嘅視線，而其射門亦曾考驗里奴只可惜射得太正中被沒收。
左路嘅馬斯亞，經過上仗小休後今仗重回正選，亦有積極演出，更於30分鐘接應靴里拉傳中射入空門成1:1，慶祝其正日23歲生日，而球隊於下半場亦圍繞著馬斯亞來進攻，可惜62分鐘一次由前場緊貼對手回防嘅攔截令其因傷退場，需要由盧卡古入替，不過馬斯亞已經足以拿下今場曼聯嘅MOTM。盧卡古63分鐘入替後，表現仍然有待改善包括其因體型有變而下降嘅速度，不過2:2嘅入球正是盧卡古以其身型迫令對手後防解圍失敗所致，始終禁區內才是渣古的最佳活動範圍。
戰術分析方面，摩連奴今仗可謂一場賭博，賭博包括了後防陣容，包括了棄用普巴，包括了正選陣容的排陣與進攻模式。後防方面採用了拜利與洛荷兩名今季絕少出場嘅球員而採用三中堅必須要相互默契做得好，否則更會變成多人就讓位而失誤嘅情況出現，但今仗此三人出奇地合拍，基本上未有因默契而出現防守錯誤，所失嘅波都因為個別球員所造成。
第二個賭博便是棄用普巴，以質素論，普巴確係目前曼聯陣中最強之人但論心態與穩定性，普巴自上季開始便一直未能達到摩連奴嘅要求而普巴卻不服，當然佢嘅論點係球隊戰術唔夠侵略性及搵唔到人交，但始終普巴於球場嘅積極性真的不夠，今仗於一場大戰下收起普巴，起用了馬迪及靴里拉，純於中場作為搶截再運用前場三名高速嘅球員，結果摩連奴亦搏成功了。曼市打比戰以靴里拉代替普巴做中場傳送者是完全失敗的，但如果靴里拉的角色由中場主角變為配角者，佢嘅能力則做得好好，今場成功令曼聯中場得以保護而且還交出助攻。
當然，排陣的賭博便是明買明賣地放棄中場控球而改為更直接了當地向前場三位球員作進攻，此舉若被針對性部署將非常危險，而阿仙奴其實踢至下半場已慢慢向此位置進行部署，控球指數亦被佔上風，幸好曼聯以戰意補救。雖然今場唔算得上太高技術層面嘅仙魔大戰，但亦相當緊張刺激，誠意搭夠啦。
鳴謝各位支持文字直播及即討區，下場見。
愛華士戰術板：又......改朝換代 (下 )
（Source: wallpaperlepi）
雖然幾經辛苦，歐聯總算又一次有驚無險地出線，可是志切要追分趕上頭四名的曼聯，主場面對水晶宮及作客勢頹的修咸頓依然是和波而回。諷刺的是，領先兩球之下被追和的修咸頓賽後炒掉曾經是曼聯經典前鋒的曉士，但狼狽追平的曼聯，摩連奴暫時還保得住帥位一會。
睇到曼聯死氣沉沉，嬲到搵嘢掟都好正常嘅……（Source: Metro Newspaper UK）
至於續約方面，球隊低潮，人心惶惶，待續約的球員觀望球會是否繼續留住摩連奴實屬正常。迪基亞續約雖然沒有進展，但依然不斷有新聞報導他要全隊最高薪之餘，球隊亦必須維持有爭標的實力他才會留下。同時間曾經看似離隊危機不太大的馬達，有傳會與以前的恩師艾馬利在阿仙奴重聚。球隊要有成績，留住主力固然重要，但以下六位同樣進入合約最後一年的球員，他們的去留也左右了下年曼聯的組軍情況。
重災區 - 華倫西亞、楊格、史摩寧、鐘斯
能夠從斷腳及長期當中復元兼成功轉型，華倫西亞值得成為隊長。（Source: The Independent）
以摩連奴一貫的帶隊標準，以及前兩年球隊都是聯賽其中失球最少的頭幾隊球隊，今季曼聯的失球數字的確令人搖頭嘆息。即使陣中已經有五名球員可以打中堅，閘位亦有充裕人手使用，摩連奴自暑假開始便一直嚷著要買入後衛，他依然無法找到一個讓自己可以放心的後防組合。而今季後防的表現，他的怒吼又似乎未必只是無病呻吟。
楊格：你班細同我爭氣啲啦！（Source: Bleacher Report）
華倫西亞和楊格兩名老將都是打翼鋒出身，由雲高爾年代開始慢慢移後打閘位。摩連奴到來之後，兩位費 sir 年代已經加入球隊的老臣，便一直壓倒陣中一眾較年青的閘位球員，在二閘位置繼續「左羊右華」。二人的專業態度的確值得一讚，尤其楊格那種「來之將戰」，不問位置全力以付的作戰心態，令他在清洗邊緣一直贏回信任，甚至差點迫走本來當打又被球會寄予厚望的梳爾。奈何二人始終都年過三十，難免傷病漸多及速度下降，而半途出家成二閘的兩位縱使防守力一路進步，但他們擔任二閘頂多只能算稱識，而難以成為一個可以令摩連奴及一眾曼聯球迷安心的長期正選。留住二人或許不是件太困難或者太出奇的事，可是若果來年二閘位置梳爾、達洛特甚至外借中的科素文沙及杜安沙比還接不了班，繼續只靠兩老支撐的話，邊路的攻守死怕只會比今年更差。
𠰝（Source: ITV News）
早在維迪與李奧費甸南當打的時候，費 sir 早就為二人尋找接班人，兩名本土的年輕中堅分別在 2010 及 2011 年加盟，藉與兩名經典後衛同隊的機會，寄望二人與當時青訓提昇的伊雲斯，一起成為曼聯後防的中流砥柱，他們就是史摩寧及菲爾鍾斯。奈何七年過去，伊雲斯早已離開曼聯，而史摩寧及菲爾鍾斯在費 sir 退休之後，並沒法成功接過維迪與李奧費甸南的棒，二人幾年來的進步並不明顯。當中以菲爾鍾斯最令人惋惜，本來在加盟之初以勇猛的攔截，加上有如坦克車般有帶球從後場出擊的能力，一度被認為是曼聯及英格蘭未來隊長之選，可是一次又一次的大傷，令他活動能力明顯大減，昔日招牌的帶球推進不再出現之餘，偶爾見他面對如夏薩特等靈活前鋒更顯得手忙腳亂。
你有覺得史摩寧在陣時穩陣過嗎？（Source: Metro Newspaper UK）
史摩寧雖然沒有像鍾斯般受傷患困擾，甚至慢慢成為曼聯其中一位隊長人選，可是他在陣時，始終沒有帶給球迷足夠的信心。論高波及速度史摩寧不算差，但不論位置感，釘人及包抄方面，甚至在防線的領導能力都算不上頂級，甚至修夫基選世界杯大軍時，因為他在後場出球能力未令他滿意，寧願放棄長期有正選的他而選擇出場時間更少的菲爾鍾斯及車路士的卡希爾。今季曼聯後防總是給人一種分工不清，雜亂無章的感覺，而不論陣中五名中堅之中誰人出場，都沒有改善後防混亂的狀況。預計來季即使不是摩連奴執教，中堅位置有新球員加入機會非常大，史摩寧及菲爾鍾斯兩位漸漸見底的中堅即使不被清洗，也不能保證二人可以長期有正選。留住兩名留隊有一段日子，又是英格蘭藉的中堅，對球隊管理會是一件好事，但留住二人對曼聯重新開始，或者在來年是否可以有一個穩定後防的作用，個人只能夠觀望。
暴殄天物 – 達米安、佩尼亞
我們還有多少次看到達米安穿上曼聯球衣出場？（Source: ESPN.com）
當今季首場聯賽主場對李斯特城，達米安及佩尼亞都出現在正選當中，並且打足了九十分鐘。可是之後二人多數都只能出現在後備席當中。達米安在雲高爾第二年收購回來之後，一度是右閘不二之選，而收購這名意國俊男只花了曼聯一千六萬歐元，一度被認為是一筆相宜的買賣，奈何自摩連奴上任後，他的出場時間一直被擠壓。摩連奴寧願信任兩個半途出家打閘位的「左羊右華」，也不願讓這位正宗左右二閘上陣的機會。在摩連奴口中，他認同達米安的專業，但他沒說出口的，或許就是嫌棄他速度慢，出場時有守冇攻的表現，所以能給他的機會只是今季三場聯賽正選。對一個有能力入選意大利國家隊大軍打歐洲國家杯的當打球員，又怎會滿足這種待遇？相信今季季後，甚至聖誕後的轉會窗，都有可能見到他離開曼聯。但當見到已經續約的梳爾，依然在閘位位置偶爾發夢走甩對手，或者當後防天殘地缺時見「左羊右華」兩老跑到上氣不接下氣，達洛特初來埗到還是新嫩不敢亂派出場的時候，摩連奴可會想想是否忽略了這位防守路數其實不俗，並且可左可右的他太久呢？他是否連被輪換的機會都不值得呢？
等出場等到愁晒……（Source: ESPN.com）
相比起達米安，佩尼亞漸漸少正選或許更為合理，因為至少他真的在作客白禮頓時被對方迫搶得亂七八糟，而且之後他和普巴在聯賽杯對打吡郡期間爆出了「Instagram」嬉皮笑臉事件，摩連奴的確有足夠理由對他的印象分大減。可是摩連奴對他的使用，實在有太多令人質疑的地方。摩連奴自從他在兩季前在西甲格林納達回收他回來之後，一直都希望他可以轉型，由翼鋒或攻擊中場變成派路式隋後防守中場，負責後場派牌及控球在腳。本來卡域克退伇，可以給予上季外借華倫西亞的他在這個位置上有發揮的空間，奈何在陣中有摩連奴最信任的馬迪擔任此工作，並且對他的使用是「用到盡」式，完全沒有給予機會讓他發揮，試問這種狀態下對一名未定型的年青球員，如何有空間去習慣這個位置，成長及進歩至可以稱職地擔任這個重要的位置呢？當見到馬迪累得腳也提不起，速率明顯減慢的情況下，對五千多萬鎊收購回來的費特和佩尼亞卻置之不顧，依然要馬迪在場上捱，試問佩尼亞怎會有足夠實戰經驗？最有趣的是，之後摩連奴後備換他出場時，還是要他在邊路側擊，或者在攻擊中場位置後備出場，如果摩連奴還是信任他打中場後上攻擊的工作，為何又要試他作 Deep lying midfield？是否摩連奴又一次否定自己對佩尼亞的改造？接連的在後備候命而沒有機會上場，令佩尼亞在失去了季初得到的巴西國家隊位置。若佩尼亞最後決定離開曼聯，說不定這位有一定攻擊力，死球亦有威脅的進攻中場，會像今季的迪比在另外的球隊大放異彩，這時候曼聯上下真的又一次顏面何存？
總結 – 風雨飄搖
今季曼聯要談甚麼爭標或爭來年歐洲賽的席位，除了在偶然性較高的杯賽比賽外，就只有等一眾列強戲劇性齊齊失分才有機會，或許這不是一個奇蹟，但要這個情況出現並不比抽獎中頭獎容易。在這個風兩飄搖的時刻，再看到雲格離去後的的阿仙奴，在艾馬利領導下踢來煥然一新，而曼聯在費 sir 退休後一次又一次換領隊，大把大把金錢揮霍出去收購球員，但球隊總是找不到方法重拾昔日的輝煌，心中難免感到一陣戚然。
球隊成績欠佳，打法亦不能吸引，摩連奴責無旁貸，個人亦對他沒有善用全隊球員，只是把個別正選用殘，然後呼天搶地大叫沒有足夠質素球員的管理方式嗤之以鼻。可是曼聯的管理層經過今季糟透的開季，與摩連奴鬧至滿城風雨之後，是否該反省自己是太放任理念與曼聯不太配合的摩連奴以自己方式帶領球隊，以致球隊不順時往往像摩連奴的球隊醜聞鬧劇一大堆而難以複甦，還是經過兩季之後並沒有足夠支援及長遠的計劃配合摩連奴去繼續改善球隊，令他的改革往往受到制肘？十個球員同時進入合約年，續約球員，尤其以迪基亞為主的主力，對曼聯的未來影響可能比來季是否還有歐洲比賽打更為重要。而是否留住一堆邊緣球員令球隊來季有足夠球員調動，還是趁這個機會換逴部份不合用或實力見底的球員，騰出空位引入新血，亦會是球會管理的另一大挑戰。曼聯是否繼續 AC 米蘭、芝加哥公牛或者麥拿倫或威廉士車隊式的沉淪，還是經過六個球季的錯誤之後，能夠痛定思痛重新上路，就看一眾領導層是否有吾日三省吾身的能力了。
（Source: wallpapercave）
[WKD手記] - 無睇?唔緊要喇!
國際賽期後三場波都踢得好差，而且觀賞性低到作為一個球迷無咩原因要揀呢場波嚟睇。如果你最近無睇曼聯踢波的話，基本上你無錯過任何嘢。唯一要繼續睇落去嘅動力就係同球隊一齊捱過呢個難關，與其踩多幾腳不如幫下眼搵出問題所在。最近摩連奴多次提到球員執行唔到自己進取積極嘅賽前部署，反而係佢地自己踢得保守。假設佢無講大話，究竟係咩導致呢種情況重覆出現呢？
首先球員無信心同狀態嘅話，俾咩戰術佢地都唔會踢到。摩連奴今場盛讚嘅拉舒福特，上陣咁耐啲走位都咁靚同高效率，又拉空位又開路又補位，但頭二十分鐘大家又會點評價佢呢？幾乎所有波都可以交得好啲、控得好啲，仲要間接令球隊失第二球波，根據佢嘅水平用踢得差嚟形容絕對唔過份。就算出現喺啱嘅位置都要處理得好先構成到一個高質攻勢甚至入球，用福仔做例子係因為佢由無信心無球感踢到交出兩個助攻，當中變化夠哂明顯，事實上其他球員頭段同佢一樣咁慢熱，啲球感同決定水皮到令人以為佢地無熱身就落場，自己都未顧掂仲講咩戰術執行？就呢一點我認為教練團隊必須負上責任同埋正視問題，遲入局已經唔係一場半場嘅事。即使唔係數據流嘅我都忍唔住翻查紀錄，開季至今踢咗二十場比賽竟然有一半係先失波嘅，咁就梗係踢得辛苦喇。
攻守矛盾亦有可能係踢得咁保守嘅原因之一。記得薩巴列達喺節目分享過佢替韋斯咸上陣迎戰曼聯，馬斯亞要追住佢呢個三十三歲嘅右閘嚟防守好慘，我會解讀份潛台詞係佢覺得馬仔係前場發揮到嘅能力遠比回防多，何必將大部份體力消耗於一個老將身上？當然唔係叫佢唔返嚟守喇，不過回防同協防都分唔同程度唔同範圍。摩連奴偏好防守球員企得好深，每次起碼有七八個人喺個波後面，進攻時除咗大腳就係用兩邊，唔難想像邊路球員體力消耗有幾大。另一個情境題就係當你知道壓前迫搶失敗時要比其他球隊走多幾步先做到泊大巴嘅防守模式，衰多幾次都唔敢積極壓前喇，高防線已經難掌握，仲要搶唔到就變返大巴，除非班紅魔係體能超人喇。印象最深刻果次係曼市打呲，曼聯一開波想用三個前場俾壓力對手，但同時自己條防線又好深，中間啲空間任人傳咁滯，幾分鐘已經明白迫完等於無迫索性死守，仲點積極落去呢？
我都幾認同加利佬話而家唔係炒一個領隊就改變到成個問題，但當曉士賽和到曼聯都唔足以將帥位保多一場嘅時候，你又好難怪球迷開始想像新領隊會為紅魔鬼帶嚟新景象嘅。呢刻我只希望曼聯可以踢好一種陣式先，睇得出有啲球員因為成日轉位置而踢到越嚟越迷茫。
[K11出品] 曼聯K角度 - 失咗2分?執到1分乍
上周主場賽和水晶宮，周中險勝年青人，今場作客修咸頓當然希望能全取3分但卻口中有數存有暗湧，結果嚇死人地開波20分鐘已失2:0，還以為絕望來了卻於上半場追平2:2。可惜下半場無以為繼下，最終又失2分，但與其講失咗2分，以今場曼聯嘅表現，執到1分實是比較合適。
正選陣容為門將嘅迪基亞，三中堅由右至左為麥湯米尼，鍾斯及馬迪，左右翼衛為梳爾及楊格，三中場為靴里拉，費蘭尼及普巴，雙箭頭為拉舒福特及盧卡古。
迪基亞方面，20分鐘便失2球是否迪基亞之責任? 岩士唐嘅入球再一次為曼聯後防線失誤下讓其可以控定狂抽，第二個失球便因蘇亞雷斯罰球的確漂亮下失守。其後迪基亞將列蒙嘅罰球，加比亞甸尼嘅遠射及靴爾保嘅射門都能接實。其實迪基亞遲遲未肯續長約亦盡是可理解的，講真呢條咁嘅後防線都唔好意思迫迪神啦。
由於拜利與史摩寧亦有傷在身，洛荷只係剛剛復操，今仗轉陣3-5-2出擊下，麥湯米尼及馬迪要串演中堅顆拍鍾斯。其實麥湯米尼繼季初曾擔任中堅後，今仗似乎已經習慣，踢來淡定，亦曾經有帶波上前的情況出現，甚至嘗試直接攻門，表現的確越黎越好。
另一中堅鍾斯，作為中堅中位，主要作用為指揮後防線壓前與否而除咗第一個失球後，其餘時間表現亦稱職。左中堅嘅馬迪，其實上仗因連迪洛夫受傷而無換人名額後，曾經也要串演中堅一職，也已經看到不擅此位置，今仗再次串演下，明顯看到其患得患失嘅演出，亦不時走漏對手於其盲眼位，面對新人奧巴菲美更具明顯。
今仗作為左翼衛嘅梳爾，表現算是合格但明顯不太適應3-5-2踢法，所失第一球雖然為球隊整體防守結構問題但岩士唐最終正是在左路空晒下射入，當時梳爾跟隨對手被引到中路來，而其他後防球員則企定定睇波，所以此失球也絕非梳爾一人失位之過，其後梳爾也有嘗試助攻但效果好一般，71分鐘更有點傷下由達洛特入替。達洛特入替後位置於右翼衛而作為地標戰，也在適應英超的節奏吧。
右翼衛兼隊長的楊格，今仗經常助攻及包辦罰球嘅處理，傳球質素算是不俗，而達洛特入替後轉往左路，其擅長嘅扯急勁斜線傳中嘅落點反而唔到位，結果未能為曼聯帶來再一次的反勝。
防中方面，費蘭尼今仗表現較為沉寂，只有一次助攻入禁區的頭鎚攻門頂斜，而其餘時間主要在中場作屏障。另一防中為靴里拉，今仗算是表現較為出色嘅一員，對比曼徹斯特打比一役，今仗靴里拉可以做回其綠葉工作反而更加出色，中場攔截，傳送再入攝也做得不錯，39分鐘便後上接應拉舒福特傳中用後踭射入追平2:2的一球。其實摩連奴希望的B2B，真的一早在陣中了。
今仗作為中場中至進攻中場嘅普巴，表現算是差勁，心不在焉嘅演出，不下數次自己於中場位置失去控球權，但之後並未有補救去搶回皮球的感覺，令人覺得其爭勝心。此外，作為中場傳送中樞，雖然曾經傳出一至兩球關鍵傳球但其餘時間均顯得漫不經心，到底是不適應今場的戰術轉變還是爭勝心問題呢？不曉得。
作為雙箭頭之一嘅拉舒福特，今仗經歷過山車嘅演出，雖然開波已顯示其爭勝心但一次不夠經歷嘅後踭浪費了曼聯可領先嘅機會，更於18分鐘在自己禁區頂一次過勇且魯莽嘅犯規，令自己拿下黃牌及輸掉罰球，結果蘇亞雷斯就此將罰球轉化成入球領先2:0，一度令曼聯陷入絕境，但其後卻因拉舒福特一次瞓身嘅傳送予後上入禁區嘅盧卡古一射破網追成1:2，幾分鐘後，一次過人突破落底線傳中予後上嘅靴里拉追成2:2，可惜其後未再有貢獻但其勤力與鬥心實令人讚賞，盡晒力嘅拉舒福特，於77分鐘由馬斯亞入替。之前有傷在身，摩連奴已表示馬斯亞未必能一周踢足三場，今仗先列後備以留力周中要與阿仙奴一拚，不過球隊遲遲未能領先下，今次換人便用上馬斯亞，但明顯未太入局，亦不夠時間讓其入局，還是周中惡鬥阿仙奴時上陣吧。
另一前鋒嘅盧卡古，經歷咗入球荒，今仗終於在禁區內接應拉舒福特一射破網為球隊追成1:2，其餘時間望到其嘗試但似乎仍然唔太上力吧，86分鐘由連加特入替。連加特入替後由於時間不足，看不到其出場所帶來嘅效果。
戰術分析方面，雖然賽前摩連奴解釋拜利及史摩寧均有傷未能上陣，結果正選陣容只有鍾斯這名正宗中堅，而後備席上也要派上洛荷這名剛復操嘅球員以備不時之需。不過陣式上轉踢3-5-2，我K11認為係敗北(雖然最終只係和波)之作，摩連奴擔心馬迪及麥湯米尼不適應中堅，便打算用鍾斯用中央中堅去指揮兩邊中堅去防守，結果令馬迪踢得患得患失，鍾斯嘅作用亦唔明顯，反而麥湯米尼較為突出，其實已經浪費咗一名球員。
3-5-2陣式要求兩翼衛助攻助守之效率要明顯，但整場賽事曼聯明顯無運用兩翼助攻，更多時間集中於中路與對手混戰。當然普巴於中場之失準為一重要原因，但整隊球隊均踢來好虛幻無定，最終主要看到拉舒福特不斷走，球隊得到控球後便試一腳向前或自己於中場搓失，最好嘅效果便是保持到控球但只能在中後場作無謂嘅傳球。
為何球隊總在開波初段失波? 集中力問題? 球隊爭勝心問題? 記得加利佬曾經講過，佢開波前會高度集中，因為佢要佢嘅第一次防守便令對手失敗，增加自己果場波嘅信心及減低對手嘅氣焰，目前嘅曼聯球員，似乎於開波初段俾先讓對手三拳，再黎開波。之前多次嘅反勝除咗鬥心之外，亦包括咗運氣，但運氣唔係次次有，連續兩場面對榜下游球隊失分，距離前四亦越黎越遠。不過以今場曼聯嘅表現黎講，執得翻1分已經係好彩。
鳴謝各位支持文字直播及即討區，下場見。
[K11出品] 曼聯K角度 - 不認不認還須認
連場的反勝，結果於國際賽前被曼城打破，國際賽後主場迎戰榜下游嘅水晶宮，還以為可以延續之前氣勢，結果又是一場沒有把握的賽事，更曾經差點失波，結果主場悶和水晶宮0:0，再失2分，與榜首曼城相距14分之多。不認不認，還須認目前曼聯的實力包括攻力，守力，球隊穩定度，控制球賽能力只是中上游分子，要重回前列行列必須踢出足夠嘅穩定性，否則，每場都要搏命。
出場陣容方面，迪基亞繼續正選，後防右至左分別為達米安，史摩寧，連迪洛夫及楊格，防中為普巴與馬迪，進攻中場右至左為連加特，馬達及馬斯亞，單箭頭為盧卡古。
今場賽事為門將嘅迪基亞代表曼聯各項賽事第250場，雖然最終能守住零封但卻是失掉了兩分，而迪基亞今場所做撲救不算太多，但62分鐘救出高耶迪禁區頂嘅射門後再救出雲安賀治嘅補射，盡力了。
右閘嘅達米安，自季初登場後便一直以後備姿態出現，其實以其萬能球員嘅身份，理應是摩連奴杯茶但卻不受重用。即使如此，今仗有機會登場下卻表現出不錯嘅狀態，防守上未有失誤之餘亦有助攻，不過傳中始終為其弱項，所造的傳中質素也不足以助球隊獲勝，即使其中一球傳到盧卡古頭上更頂至死角也被軒尼斯救出。
左閘嘅楊格，因梳爾停賽而再次出任此位置，防守上未有太大問題但助攻方面，多次左邊以右腳傳中都唔夠力，皮球根本未去到隊友位置便被解圍，今仗與馬斯亞嘅配合仍然不多。
中堅方面，史摩寧維持一定水平而且今仗比以往較為集中，更有一次助攻近門頂斜嘅黃金機會。不過作為球隊老大哥加中堅主將，仍然欠缺了把防線壓前的領導能力。另一中堅連迪洛夫，今仗繼續有好表現，幾乎沒有任何失誤的他今場成功壓制進行其防守範圍後嘅水晶宮球員，而且更多次作出成功搶截，除了一次因馬迪被唐辛推過後意外地再推過連迪洛夫。可惜嘅係完場前連迪洛夫拉傷了，不過由於換人名額已用完，連迪洛夫亦馬上通知馬迪作出位置互換防止球隊被突擊，而且完場前更拐著搶贏剛後備入替的佐敦阿休，完場後獲摩連奴步出現時給予鼓勵。希望連迪洛夫傷勢不重吧！
防守中場方面，馬迪繼續連環正選，不過今場波馬迪表現算是合格，由於水晶宮未有太多後上入攝類型嘅中場，也不致於令馬迪有太多需要即時轉身嘅弱點曝露出來，除了給唐辛一次正面擺脫差點造成大錯而已。另一防中普巴，今仗繼缺席曼徹斯特打比後復出，即時令曼聯中場控球力增加，不過也可看到普巴未在狀態，長傳雖有，但力度角度可再提升，射門也有但卻稍稍高出，特別是上半場接應連加特回傳的射門便知其狀態一般，中段看到體力稍為下降便由山齊士於68分鐘入替。山齊士入替後變成了進攻中場，而他亦表現積極，曾經傳交出一至兩球能製造射門的機會，雖然也浪費了拉舒福特一次精彩的二連攔截下搶到的控球權。未回到最好但已有改善來形容山齊士今場的表現吧。
