[WKD手記] - 補時階段的蜜月期
七戰全勝，保得住三分但隱憂慢慢浮現，所以更加應該把握時間尋找改善空間。近兩仗尾段都陷入苦戰下得勝，但只靠士氣絕對唔足以跑完聯賽呢個馬拉松，最後都要考領隊功力。爭四份子各有問題，曼聯相對已經算齊整，中前場球員整體質素同狀態尚可彌補後防漏洞，不過臨場應變之差可能會被未來對手所針對。
曼聯近乎夫添出擊並維持前幾場嘅進攻套路，呢一點係值得欣賞嘅。球員即使理解戰術體系，都要透過不停練習同實踐先可以以接近完美嘅姿態執行職責，尤其對拉舒福特同普巴呢啲幾個位都踢得嘅球員，位置熟練度更為重要。當曼聯主導球賽，控球通常集中喺左路，除咗因為普巴同馬斯亞有默契、多位右腳球員切入中路能力強之外，右路進攻模式需要大量空間亦係原因之一。十二碼當然係憑普巴個人技術搏返嚟，但馬迪俾嘅轉向長傳同樣咁精彩。
(達洛特、楊格觸球對比圖)
唔單只呢個攻勢，曼聯好多時左路用波迫使對方要密集佈防，然後右路楊格就可以喺無波情況下衝上右翼位助攻，右翼連加特就會乘勢移入中路。此舉令楊格同靴里拉响進攻時無需經常上腳同長期留守前場，仲真正利用到球場闊度，加上個個都有返咁上下突破能力，對一般中下遊球隊會好易就造成後防混亂。
(普巴全埸五次失去控球，其中四次都發生在60分鐘後)
自蘇斯克查執掌後，曼聯球員無論上腳用波同第一時間俾波Pass and move都多返，而要
踢得富娛樂性、節奏明快除咗默契之外，體力一樣咁重要。好氣好力梗係可以繼續大舉進攻，體力下降就會誘發近兩仗下半場嘅現象：當隊友遲咗半拍現位而少咗交波選擇或推進空間、中場喪失一定機動性，馬迪同普巴就會多咗過度上腳俾人偷波嘅情況。兩位中場大腦好清楚知道要嘗試保持住控球嚟拖慢節奏，而對方當然知道呢個策略而施以更大壓力，正如白禮頓落後兩球後一直都保持住防守紀律，一心等曼聯失誤或者最後二十分鐘先全力反撲。
成功的話就會捱過迫搶階段，甚至再下一城提早結束球賽，但如果被人追返一粒局勢就會開始失控。為求加強防守，陣式會轉為451，偏偏中場問題最為嚴重：普巴防守效率較低經常處於波後，頂多從後追逼持球者而做唔到遮線封位嘅工作，但馬迪就成日向邊移位，痴心妄想佢會走返入嚟一齊守，導致佢同靴里拉中間穿咗個大窿兼少咗個人衝出嚟殺波。兩翼即使回防都唔覺得太有效率，有時係出現咗但一樣失位俾人走身後，前面果個單箭頭就更加被孤立。伊巴仲喺度嘅話可能Hold到一陣打埋反擊添，但現實係狂輸第一點同控唔到落嚟轉守為攻，感覺比泊大巴只係擴闊咗防守範圍同多啲主動性。麥湯美尼同受傷中嘅費蘭尼雖然同中場三子技術上有分別，但佢地絕對適合喺呢種情況下換入，搶奪三閘線嘅主權，否則就會任由對方進攻。要知道摩連奴都教唔識佢地點泊大巴，而家叫佢地齋守又點會次次都咁好彩丫？
[K11出品] 曼聯K角度 - 穩定地取得連勝
蘇斯克查執教曼聯開始未嘗一敗，而且更以各項賽事6連勝姿態來到今場主場迎戰白禮頓，本以為又可輕鬆過關，而且上半場已經由普巴嘅12碼及拉舒福特嘅妙射領先2球，誰不知下半場被白禮頓壓迫下追成1:2，結果最後15分鐘仍然受壓下以同樣比數全取3分。即便如此，曼聯已經追近第四位嘅車路士只餘3分之差，雖然今場贏得有驚無險，卻總算是穩定地勝利了。
今場陣容方面，門將為迪基亞，後防右至左為楊格，連迪洛夫，鍾斯及達洛特，三中場為靴里拉，馬迪及普巴，進攻三子分別為連加特，馬斯亞及拉舒福特。
白禮頓今場真正威脅迪基亞嘅攻門不多，中門框嘅攻門多屬省中人後無力彈向迪基亞或本身只是無力嘅攻門。可惜71分鐘哥斯伏兵門前近距離射網頂入令迪基亞再次失守。
右閘嘅楊格繼續正選，現年已經33歲嘅楊格今場帶點疲態，上半場初段曾有幾次解圍極不清脆，不過經過一輪入局後又再次投入比賽中而且亦有不少助攻包括19分鐘跑落底線傳中予拉舒福特嘅攻門。
左閘方面嘅達洛特，19歲嘅佢再次於英超上陣但今次係開波前一小時內代替因病最終未能上陣嘅梳爾。或者蘇斯克查有任務給予右閘的楊格所以達洛特的臨時拉夫繼續出現於左閘位置，否則達洛特於右路的表現相信會比在左閘時的他更好。今仗交失波或企錯位嘅情況出現不少，幸好年青有速度救回不少，當然即使是在波圖的時候，達洛特任左閘也只是替工而去到英超就更難適應，期待達洛特慢慢地上位。
中堅方面，連迪洛夫與鍾斯繼續拍檔，連迪洛夫繼續其上佳演出令白禮頓嘅梅利無啖好食，今場錄得5次爭贏高波及5次解圍，而且長傳嘅助攻亦有不俗效果，包括傳交馬斯亞入禁區攻門嘅長傳亦非常到位。另一中堅鍾斯，今仗表現尚算穩定而且亦維持其一向嘅拚勁，所失一球由於正與對方另一守將爭頂而漏後也可算情有可原。
三中場方面，靴里拉今仗表現繼續好，即使獲得蘇斯克查給予了自由但其戰局責任感關係，主要留在中場做搶截工作，也不時包回右路楊格助攻後嘅右閘位置，等到適當時候才上前助攻。
馬迪方面，由摩連奴時代已經長期正選而來到蘇斯克查軍下仍是重要一員，其實著實有道理，控制中場節奏，作為中堅前嘅屏障的確做得不俗，雖然明顯有些疲態但暫時球隊內未有人能成功代替到佢嘅位置，希望足總盃得以休息備戰瘋狂二月嘅來臨啦。
普巴方面，今仗其實腳風唔太順，多次做到攻門嘅攻勢但去到最後一步便高出或斜出或省中人出界，幸好24分鐘用其個人突破入禁區而搏得犯規下，親自操刀為球隊先開紀錄。賽事尾段明顯速率下降不少，相信足總盃也需要休息休息吧。
進攻方面，連加特今仗雖為右翼身份出現但其實較為自由，因為連加特除咗進攻工作幫助球隊做串連外，還需要做防務工作幫助倒塞空間令對手攻勢不能輕鬆進行。可惜52分鐘接應拉舒福特傳中卻未能命中，否則連加特嘅無名英雄角色會更為明顯，74分鐘由馬達入替。馬達於對手攻入1:2後入替，相信是希望用馬達嘅組織力及入攝增加對手防守壓力，不過今場效果一般。
左路嘅馬斯亞其實能用表現突出來形容，但卻又是一場無咩數據嘅賽事。腳風仍有點不順令馬斯亞即使能突破二人後也未能破門，幸好蘇斯克查仍給予耐性與信心，81分鐘才由盧卡古入替。盧卡古入替後因為對手加壓下，其觸球或能做進攻嘅時間不多，反而協防時則做出一次清脆嘅解圍。
正前鋒嘅拉舒福特，今仗繼續表現出色，控停傳送也有不俗效果。多次傳中也能成功只是未有隊友成功搵到破門方法包括52分鐘急勁傳俾連加特嘅傳中。不過42分鐘於禁區左路窄位下，最近狀態極佳嘅拉舒福特於幾乎沒有角度嘅情況下射入網仔成2:0，此入球極重要因為完半場前將白禮頓由落後一球變成兩球，給予曉頓於半場帶俾白禮頓嘅teamtalk及信心也會有所影響，92分鐘踢到差不多用盡氣力後由達米安入替。只有3分鐘嘅時間或者會成為達米安效力曼聯嘅最後時間，有傳冬窗將外借到祖雲達斯直到季尾再轉會。
戰術分析方面，經過一直連勝後，雖然蘇斯克查表示無壓力，但明顯今仗踢得較之前保守了一點，或者因為希望延續連勝又或者因為球員經過一連串力谷後開始有回調嘅情況，又或者認為白禮頓嘅韌力較強而戒心更大吧。下半場蘇斯克查嘅換人明顯較遲且來得穩陣，保留最近搏盡嘅拉舒福特及普巴便知道而兩者其實於賽事最後15分鐘明顯速率大減了。
當然亦要給予讚賞白禮頓不放棄嘅精神令曼聯今仗最後15分鐘極為受壓，幸好最終亦由普巴與拉舒福特兩個入球足以令曼聯繼續穩定地取得連勝。
鳴謝各位支持文字直播及即討區，下場再見。
[WKD手記] - 紅白大戰
99年卡爾遠射收死舒米高、01年曼聯落後三球下反勝到上年足總盃準決賽再次反勝，熱刺對曼聯從來不乏經典場面。近年兩隊有唔少定位、實力都類似嘅球員，每次遇上都係位對位嘅直接對決，甚至直接影響佢地喺國家隊嘅地位。今場波緊湊程度有如決賽一樣，除咗領隊，順便比較下兩隊球員表現。
上半場雙方水平之高比得上今屆任何一場英超，撇除曼聯球迷身份都覺得“我最期待的畫面出現了”。球賽精彩唔一定因為入波多，廿二位球員都盡力執行戰術先係重點，作為球迷完全感受到兩隊風格、進攻理念同重心。喺短短四十五分鐘內佢地嘗試攻擊對方弱點，同時又要考慮攻守協調，加上雙方都積極搶波令球員要喺極短時間作決定，極富博奕味道，從中窺探到領隊賽前做足功課，識得取長補短。相反，下半場觀察到兩者都無明確Plan B，靠嘅係球員鬥智多過戰術，情況有啲似今季熱刺輸俾利物浦果場波。單睇今場好難斷定邊個更適合教曼聯。
熱刺要贏就必須靠兩閘壓前，同一對中堅自然會有距離，當中以右閘查比亞比左閘戴維斯更為進取，中堅拎波果陣斯素高就會移去右閘位置；當查比亞喺三閘線拎到波，斯素高更加會疊瓦開路，等前者可以隨時斬波俾簡尼，可見斯素高對呢個戰術嘅攻守流暢度相當重要。馬斯亞回防效率唔高，梳爾少助攻算係明智之舉，而另一邊楊格相對進取，攻返戴維斯令對方唔敢亂上，雖然唔係由中場疊瓦，但三個前鋒輪流响右邊跑直線已經夠頭痕。
拉舒福特上季操到咁大隻就係為咗做中鋒，但好快就撞板：腳法無之前咁靈活、多咗格硬死扭獨食、踢中間又頂唔贏。佢一直都做唔到伊巴或者係盧卡古嘅嘢，但蘇斯克查用戰術嚟發揮佢獨有嘅過人能力同射門觸角。曼聯擺明打反擊，福仔不停喺四人防線之間嘅身後遊走，令熱刺兩閘每次壓前都係賭博，全場唯一入球就係來自查比亞失誤、戴維斯因戰術需要失位先誘發到福仔單對單用速度爆過維頓漢呢個局面。英格蘭有唔少翼鋒都有成為中鋒嘅情意結，只講近年都有韋碧克、禾確特呢啲例子。踢中間唔一定要做希斯基嘅，奧雲一樣得，唔知修夫基會唔會參考蘇斯克查，三月國際賽時將佢移入中路，代替韌帶受傷嘅簡尼踢中鋒呢？
另外兩對可比性高嘅球員就係連加特對阿里、普巴對艾歷臣。猶記得世界盃連加特同阿里踢法頗為重疊，而前者出色嘅表現令阿里喺國家隊中突然失去咗定位。返到球會，連加特雖然今場有份造成入球，走動都仲係咁高效，但新帥帶隊後觸球時間愈嚟愈少，對佢個人發展未必係好事；至於阿里作為影鋒嘅控傳能力的確值得成為熱刺進攻核心，佢同艾歷臣可以話係相輔相成，永遠都需要佢喺前面造成威脅，先能夠幫艾歷臣爭取空間做一個墜後型指揮官。相反，普巴愈踢愈前先搵返真正嘅自己，須知道佢唔單只視野好俾長傳叻，腳下功夫了得又射得，要守死一個全盛、有自由度上落嘅佢唔會係一個人做到嘅事，而佢仍然進步緊。
最後一對當然係門神之爭喇。兩人係英超打滾咗咁耐都有唔少神救，但洛里斯始終唔夠穩定，偶爾派膠而且大賽表現平平，喺我心目中稱唔上世界級門將。迪基亞由世界盃失準到而家又變返世界最強之一，多年嚟為曼聯保住過幾多次三分，最近身體語言仲愈嚟愈有信心、又識得激勵防線，已經成為普巴之後最不可劃缺嘅紅魔鬼。有趣嘅係，前熱刺球員贊拿斯比較兩者，認為迪基亞憑較佳企位擋走簡尼球半單刀而洛里斯做唔到。事實上九成門將教練都唔會叫你學迪基亞咁企，因為只要反應無佢咁快、用腳封波無佢咁勁就會輸哂遠近柱，仲未計佢救波果陣隻腳夠快夠力將個波踢去安全位置以防有人執雞。迪神做到人做唔到嘅嘢，所以先叫迪神，屋企嘅小門將千析唔好亂學呀。
[K11出品] 曼聯K角度 - 真.魔神英雄傳
自蘇斯克查上任以黎，曼聯全隊上下好似有翻靈魂一樣，普巴入波助攻齊晒，拉舒福特等等攻擊球員亦輪住入波，而靴里拉同馬迪組成嘅中場線亦極具效率，紅魔鬼精神重新湧現。而迪基亞亦於作客熱刺嘅呢場聯賽大戰甦醒過來，迪神重新歸位，為曼聯取得蘇斯克查執教後各項賽事6連勝，令拉舒福特嘅入球足以1球作客擊敗熱刺全取3分，賽後迪基亞表示呢隊係真嘅紅魔。明顯地，真.魔神英雄傳正式上演。
陣容方面，迪基亞繼續把守最後一關，後防右至左為楊格，連迪洛夫，鍾斯及梳爾，三中場為靴里拉，馬迪及普巴，進攻三子為拉舒福特，馬斯亞及今場以中路為主嘅連加特攻堅。
迪基亞今場面對熱刺嘅進攻雖然忙碌，但忙得高興，上半場熱刺攻門多屬唔中框嘅外圍射門，不過下半場熱刺轉踢法後攻勢越黎越入肉，包括阿里嘅頭頂腳踢，哈利簡尼禁區內多次嘅射門及艾歷臣嘅罰球，可惜均被迪基亞救出，全場作出11次撲救而其中幾個撲救更是令人難以置信。今場零封相信令迪基亞續約幫助不少，希望快快動筆留下來吧。
左閘方面，梳爾表現繼續穩定而且防守意識亦見增加，仍記得施素高受傷一刻正是梳爾回身跑動的一刻而梳爾回身嘅反應相當唔錯。不過賽事期間亦曾見普巴對梳爾嘅防守位置有點不滿，或者溝通上要更多。助攻方面，與馬斯亞越見合拍亦可喜可賀。
右閘方面，楊格所面對嘅正是今季狀態巔峰嘅孫興姄不過今仗此名南韓球員連一D射門威脅都無，只能於邊路不斷嘗試卻未能越過楊格，下半場後段雖然有點體力不繼但有靴里拉與後備入替嘅達洛特相助下能力保右路。
中堅方面，鍾斯與連迪洛夫再度合作而今仗雖然被熱刺攻門達廿次之多但其實此對中堅成功令英格蘭射手哈利簡尼及其隊友阿里嘅威脅減至最低，當哈利簡尼出外圍迎波時，鍾斯亦都緊隨而連迪洛夫則於禁區內殺波，為迪基亞盡了最大程度嘅保護。特別係連迪洛夫，今仗無論身體對抗，速度與位置都未有佔下風，絕對要一讚。
三中場方面，靴里拉與馬迪回到正選陣容而且亦為後防提供咗好好嘅保護，不過受著熱刺嘅強攻，亦只能作最基本嘅防守而未能參與太多進攻，但由於馬迪能控制節奏而靴里拉則會不斷走位幫波，令球隊控球時中場嘅活力也有著適當嘅運行。另一中場普巴，由於對紐卡素時被舒爾維踩到而受輕傷，幸好經過休息後趕及此場大戰。今場普巴未能如之前數仗般大舉進攻，更能睇到普巴嘅投入感，控球時間不多，而且亦要參與防守下，普巴今場仍能保持超過8成傳球成功率，而且創造機會傳球亦有3次而其中一球便讓拉舒福特轉化成入球。下半場更曾有2次機會破門但均被法國隊友洛里斯救出而已，不過下半場中後段明顯睇到普巴體力不繼，最終於93分鐘由麥湯米尼入替，功成身退。麥湯米尼入場時間不多，主要幫手防務等工作。
進攻三子方面，左路嘅馬斯亞今場回到正選而表現屬合格而已，始終對手派出兩名球員黎防守佢而要讚嘅係馬斯亞除咗未有過多硬闖外，亦勤力幫手防務工作，多次見到馬斯亞做到左閘位置幫手包位，更曾差點助攻普巴取得入球，73分鐘由盧卡古入替。盧卡古入替後於前鋒位置出現而表現屬普通，亦能搵到射門機會但主要受制於其比利時隊友艾列達維特下難有突破機會。
今仗以正前鋒姿態現身嘅連加特，主要工作並非進攻而係限制熱刺防中榮斯嘅活動範圍，結果今場榮斯踢來患得患失，多次遠射亦偏離目標。除此之外，連加特勤奮嘅跑動亦為球隊於前場負責工兵嘅工作，搶到波後便傳波再走位，入球嘅出現正是連加特奪得皮球後回傳予普巴作出轉向嘅長傳而成。不過連加特於開波初段亦在禁區內浪費咗一次大好機會而射高咗，83分鐘由達洛特入替。約10分鐘嘅時間予達洛特而此名葡萄牙右路球員亦正在適應當中。
負責右路嘅10號球員拉舒福特，今仗再成球隊英雄，接應普巴長傳控入禁區後一箭定江山，此射門其實頗難處理而且維頓漢亦已包回中路位置所以拉舒福特也只有一條路可做，結果不負所托並顯示出信心下射遠柱入網成1:0，球隊亦以呢個上半場嘅入球獲勝。近9仗為球隊貢獻咗5入球5助攻，相信拉舒福特亦已成為球隊主力下，進步亦會跟隨而來。
戰術分析方面，今場蘇斯克查利用咗連加特於進攻中路做工兵嘅工作，令熱刺防中嘅榮斯同一對中堅不時要顧及位置嘅調整，而其實主力進攻在於左右兩邊嘅馬斯亞及拉舒福特，結果令熱刺右閘嘅查比亞及左閘嘅戴維斯未能放心助攻，若果有空間便由此切入中路挑戰艾列達維特及維頓漢，結果入球便正正出現在熱刺左閘空虛而拉舒福特向前切入中路面對維頓漢所致。
其實普捷天奴半場未夠已發現熱刺核心艾歷臣觸球太少，故施素高因傷離場後派出林美拉此名技術型球員黎幫艾歷臣製造空間，下半場熱刺多次嘅攻勢均由艾歷臣發動便可知其用意。幸好有迪基亞神勇嘅演出加上一眾後防嘅高度集中方能保住致勝球。但要留意上半場熱刺嘅攻勢多屬外圍且未能命中但下半場卻被對方壓住踢而且攻勢越見入肉，要知道唔係場場都可以靠迪神保住大門。我K11則對下半場用達洛特而非搶截型嘅費特黎入替連加特表示有點不認同，雖然費特攻擊性較多但由於中路已被熱刺佔優，靴里拉及馬迪已被壓至禁區頂，應該用費特於中路黎進行搶截而非達洛特，最終也未見達洛特能幫助太多。
不過最重要還是作客擊敗熱刺報回首輪主場被擊敗之仇，而且球隊亦見團結及士氣提升，最重要係眾多紅魔球員於賽後均表示開心包括咗今場返咗黎嘅迪神，更表達[真紅魔]嘅言論，期待真.魔神英雄傳繼續延續落去。唔好忘記，仲有一位山神未歸位，期待！
鳴謝各位支持文字直播及即討區，下場見！
[WKD手記] -費格遜模式
費格遜離開帥位已經五年有多，可能有好多年輕球迷都未睇過果陣時或再早期啲嘅曼聯。當蘇斯克查話會將費格遜嘅風格帶返入球會，我就非常好奇佢嘅真正意思。剛剛三日內連鬥紐卡素同雷丁都能夠淨勝而回，由輪換以至換人方式都見到佢嘅影子同背後哲學，比起入波更加俾到信心球迷佢有能力帶領我地重返前四。
上任未夠一個月，我見到最有費爵味道嘅地唔係領先後佢地會作出調整，尤其响下半場會根據情況調控節奏，即使喺球迷觀感上都能夠感受到紅魔球員有收有放咁保持優勢到完場。呢兩場波已經無之前踢得咁標青，球迷都要明白疲勞、傷停、狀態問題會逐漸响蜜月期過後浮現，到時就考驗到新帥功力。對紐卡素要不是艾素射術奇差，上半場應該早早就要落後，華倫西亞復出表現唔算太曳但已經反映到面對反擊時後防企位會比以前蝕底，兩閘回防速度稍慢條防線就會即刻穿哂窿，如果對住華迪呢啲反擊型前鋒都咪話唔驚！
因為曼聯開賽慢熱，對手往往會嘗試一開波就盡量施壓，但球員似乎識得搵方法入局。其實提升傳球速度同埋增加進攻走位嘅自由度可以踢返生一個攻勢，球員亦會從中拎到信心同球感，而家大概用十五分鐘就會慢慢掌握返球賽主導權，同以前成個上半場雜亂無章咁踢已經有進步。老實講，採取得主攻自然要冒上相對風險，就算先失一球我都覺得會追得返，球員對於一啲失誤後嘅反應說明咗佢地有相同想法，呢啲態度球迷係感受得到嘅。
去到雷丁果場作出咗九個調動，效果麻麻但又晉到級就真係有費格遜味道喇。由麥湯美尼、佩利亞同費特組成嘅三人中場欠缺明確隊形，甚少逗住各人企位嚟踢，中路空間太闊搞到進攻唔夠流暢又不時斷纜，默契就認真欠奉。麥湯美尼算係踢得最好果個，淡定、出腳準、位置感唔錯，相信有馬迪同卡域克教路可以成為下一個成功嘅青訓球員。雷丁的確同曼聯爭兩班波，尤其喺把握力同攻勢處理方面都非常差，所以曼聯即使踢得平庸都無陷入太大危險。正如蘇斯克查所講，呢十一個無點喺比賽環境下夾過，贏到波又吸收埋經濟已經收貨。如果摩佬仲教緊，可能馬迪仍然每場踢足90分鐘添，呢個就係兩者排陣理念嘅分別。
踏入2019年將會面對好多強敵，熱刺會係第一個大考驗，普捷天奴套戰術在於兩邊疊瓦快、攻擊力高，對我地兩閘做成衝擊之餘，對方就會乘機從中路利用艾歷臣、阿里嘅創造力去製造機會。聽落好似好難踢，但掉返轉曼聯而家嘅攻力何嘗唔係令人聞風喪膽？況且我地兩閘又係咁攻得，戰術上其實類同，採取主動可能先係上策！
[K11出品] 曼聯K角度 - 全勝的聖誕快車
聖誕快車前換帥，由名宿蘇斯克查作為看守領隊去進行一連四場聯賽，頭三場已獲口碑而且亦獲得球迷與球員支持，黎到最後一場作客面對賓尼迪斯執教嘅紐卡素，硬朗嘅攔截加上嚴密嘅防守，半場只能0:0，當下半場仍然老鼠拉龜嘅情況下，蘇斯克查作出盧卡古與山齊士雙雙入替嘅換人調動，結果由盧卡古先開紀錄，再由山齊士助攻拉舒福特射入奠勝球，以2:0取得自1946年畢士比爵士創下執教即取得4連勝嘅紀錄，更係聖誕快車取得全勝姿態，目前與前四嘅車路士只有6分距離，後上不是夢。
陣容方面，門將為迪基亞，後防右至左為隊長華倫西亞，連迪洛夫，鍾斯及梳爾，三中場為靴里拉馬迪及普巴，前場三子為馬達，馬斯亞及拉舒福特。
門將嘅迪基亞今仗終於可以再零封對手，而對手嘅紐卡素雖有11次攻門但只有3次中框，全部均被迪基亞一一接實。
右閘方面，華倫西亞繼上次歐聯作客華倫西亞後再次正選上陣，但明顯華倫西亞未在狀態，完全跟不上曼聯目前嘅節奏，因此右路只有防守而缺少助攻，今場對手打密集防守下令曼聯缺少拉散對手後防嘅機會。左閘方面，梳爾繼續正選而表現也算不俗，而且與馬斯亞亦有不俗配合，可惜74分鐘拉跌堅尼地領黃。
中堅方面，鍾斯休息一場後再度上，今場於上半場出現一次危機，被對手迫搶下造成對手一次半單刀機會，幸得自己追回後防剷走皮球解圍成功，其餘時間表現還算合格。另一中堅連迪洛夫，今仗成功將衝撞型嘅前鋒朗當壓制住，全場朗當只有一次接應傳中頂高，即使其餘時間也被連迪洛夫緊緊追纏。除非之外，面對速度型嘅亞素亦能阻止，更有2次創造機會嘅傳球出現，更錄得全場100%攔截成功嘅數據，冰真正冰人嘅實力展現喇。
中場方面，馬迪今場繼續正選，但開波初段幾次直接交失波，而且今場對手硬朗程度且速率較之前幾場對手為高下，即時看到馬迪的問題，幸好慢慢地與靴里拉作出調整，馬迪再調深一點只做駁腳工作而讓靴里拉多作一點掃蕩與串連，情況得以改善。
正是靴里拉，今場另一位中場，靴里拉今場繼續踢得精彩，雖然只係做駁腳，掃蕩及串連，不過由於要協助馬迪，今場以防守比進攻嘅工作較多，因此較少上前助攻，而靴里拉今場攔截成功嘅數據足足有5次之多，比在場任何一位曼聯多兩次，可見靴里拉於中場起了舉足輕重嘅作用。
普巴方面，今場表現算是近四仗較平凡的一仗，不過亦可以理解，始終聖誕快車期間佢場場踢足而且應該算是近年最落力嘅幾場比賽，今場其實都落足力跑動。失咗球權都見到普巴回防但礙於對手硬朗嘅防守亦令普巴有所影響。下半場更被舒爾維從後踩大腿對尾段體力也有所影響，預計將獲得休息以便備戰對熱刺嘅大戰。
攻擊線方面，馬達再次獲得正選位置但今場因為對手嘅嚴密後防令馬達嘅發揮亦有所影響。不過馬達擅於俾波同入攝確能為對手後防製造不少麻煩。62分鐘由盧卡古入替，盧卡古入替後一分鐘便乘對手門將杜巴卡甩手補射先開紀錄，其後79分鐘再間接做出助攻，而其實盧卡古今場嘅場上表現亦再有提升，期待上一季入超過20球嘅渣古醒來。
左路嘅馬斯亞方面，只得24分鐘嘅門前射高較為顯眼外，便剩下被對手省中面嘅場景出現，始終紐卡素也著重看管馬斯亞，每次左路觸球便要應付兩個守將之多，62分鐘由山齊士入替。山齊士入替後睇得出極之勤力，但狀態似乎仍有待提升表現，不過視野便是級數，79分鐘一個致命嘅傳送造就拉舒福特射入奠勝球。
正前鋒嘅拉舒福特，經過多場不停奔跑，今仗明顯看到有一點疲態了。但拉舒福特射罰球嘅威力日漸成熟，急勁且命中率高成對手極大威脅，盧卡古嘅入球便因杜巴卡嘗試接拉舒福特嘅罰球甩手後出現。而今仗雖然面對硬淨嘅中堅令其無啖好食，最後要到78分鐘一次快速突擊接應山齊士嘅傳送後冷靜射入成2:0奠勝。此入球處理之冷靜屬蘇斯克查到來後慢慢出現，賽後拉舒福特亦有感謝蘇斯克查傳授嘅埋門秘訣。賽後成為MOTM但真的要休戰一下了，留待大戰熱刺時再次奔跑吧！87分鐘由連加特入替亦只是早點給予拉舒福特休息的時間。
戰術分析方面，蘇斯克查今仗最值得讚賞就係62分鐘嘅調動，當時將盧卡古與山齊士同時入替馬斯亞與馬達。雖然盧卡古換入後1分鐘便執雞建功應屬意料之外嘅部署但其後可以見到盧卡古與拉舒福特是接近雙箭頭嘅效果。這安排亦為後者找到更多空間來，而山齊士嘅入替亦可以增加效率以便幫助慢慢體力不繼嘅普巴。當然馬斯亞與馬達不是表現不佳但此調動是將整個form改變，換言之紐卡素嘅後防亦需要作出適應。改變便有機會帶來機會，機會出現便只看把握與否了。
聖誕快車期嘅四場聯賽，曼聯已多年未試過取得全勝，亦是今季唯一一隊英超球隊做到。雖然四場對手都屬於中下游，但亦需要球隊有此能力，耐力與鬥志才能達成，希望球隊能繼續連勝，助球隊取得佳績及令蘇斯克查因而取得一份長約吧！
鳴謝各位支持文字直播及即討區，下場見。
[WKD手記] -中場的微妙變化
蘇斯克查上任三戰入十二球，球迷終於大飽眼福，除咗迪基亞會有啲失望之外其他球員都踢得相當開心。相較頭五列強份子，曼聯嘅聖誕快車算係易踢，全部都係中下游隊伍。般尼矛夫本身實力不俗，但十二月先後有兩位球員傷出最少半年、再俾熱刺大炒完五粒，作客奧脫福都預咗會係入球嘉年華。因為時間有限，蘇帥穩陣地用死一個陣式，務求短期內重建球員默契同信心，當中又有邊啲球員值得我地注意呢？
想知道邊個啱踢，首先要解構下呢套451戰術嘅執行模式。眾所周知普巴再次成為球隊核心，攻擊中場之位必然交咗俾佢，協防變成額外、唔做足都唔會俾人罵嘅職責，雙防中就有返明確目標：先確保防守位置同人手，再向中前場提供適當入攝同傳球。此舉最大得益者當然係馬迪同靴里拉喇：前者防守時多一個拍擋，唔洗再保護中堅同時又要搶截咁mission impossible；後者可以充分發揮自己最強嘅足球智慧，喺適當嘅時候同位置出現。比起舊時，兩者持球時會更注意有無過份上腳同拖慢咗進攻節奏，一察覺到就會盡快甩波轉變等隊友再鑽空間，而另一人就會逗住嚟踢，所以甚少見到兩者同時冚上去，要做到攻守平衡其實對閱讀球賽能力非常講究。
兩個就夾得唔錯喇，問題係輪換時邊個可以頂上呢？對哈迪斯菲爾德果陣費特就踢過防中，不過表現就非常麻麻。呢位巴西中場本身就進攻慾過強，只要拎到波就想自己做上去，
傳球選擇又往往捨易取難，結果多次帶甩、傳失，下半場就被本來可以休息多陣嘅靴里拉入替。
佢意識上近普巴多過靴里拉，而且都幾有巴西人果種防守意識、集中力薄弱嘅特性，與其將佢推落半格不如推前半格？小將佩利亞都有類似問題，喺呢個陣式下佢都好難爭取到中路嘅席位，唯有寄望嚟緊有多啲比賽早早就擴大領先優勢，俾佢兩個適應英超節奏同增強位置感。
另一個正面臨衝擊嘅球員就係連加特。摩連奴時代其中一個困局在於中前場缺乏機動性，當時最能夠簡單直接咁將個波運向前場，甚至做影子前鋒嘅就係佢（同馬達）。而家曼聯慢慢習慣返主導球賽，中前場各球員都擁有極高走動自由，傳球支援唔再係問題，連加特喺電視螢幕上嘅作用似乎只剩下跑動。其實佢喺普巴、馬斯亞同拉舒福特之間嘅空間仍然係咁重要，不過有更多時間處於無球狀態，更難獲得球感，所以佢要適應職責上嘅改變，同埋都睇得出體力消耗都幾影響到佢近仗表現。
改變緊嘅又點止中場丫？嚟緊會再同大家分享下唔同位置上嘅觀察，你地又睇到啲咩呢？
[K11出品] 曼聯K角度 - 信心.喜悅.享受
蘇斯克查執教後取得二連勝且大勝而回，雖然所面對只是一眾下游球隊但最重要還是表現令人滿意而且睇得出眾將開始展現了信心。而今仗除了繼續展現出信心，更睇到一眾球員有相當嘅喜悅表現出來，相信主場壓力繼放仗後亦已順利克服，最後更睇到一眾攻擊球員於今仗踢得甚為享受，順利以4:1主場大勝般利茅夫而回，目前已經追至距離第五位嘅阿仙奴只有3分之差。
陣容方面，門將繼續為迪基亞，後防右至左分別為楊格，拜利，連迪洛夫及梳爾，三中場有靴里拉，馬迪及普巴，前場三子為連加特，拉舒福特及馬斯亞。
門將嘅迪基亞今仗繼續所受壓力不多，對手只有5次攻門而中門框只得3次，均出現於上半場，而京治嘅窄位射門被迪基亞擋出，其餘兩個攻門均來自艾基嘅頭鎚，第一次被迪基亞擋出後再由靴里拉及馬迪解圍但第二次則被艾基搶贏馬迪一頂入網，再一次不能零封而非迪基亞之責任。
後防方面，右路嘅楊格今仗表現亦算稱職但上半場卻嫌過勇下魯莽於底線領黃。不過楊格嘅在陣代表會有極多急勁嘅傳中球出現。左閘方面，梳爾繼續穩佔正選而今仗再睇到與馬斯亞有更多嘅配合，防守方面面對速度已經算高嘅佐敦艾比亦應付有餘，不過賽事尾段疑似受傷令人有點擔心。
中堅方面，連迪洛夫於適應英超踢法後已成為摩連奴及蘇斯克查中堅之選，因為其用波能力不俗，能由後防開始策動攻勢，而且即使擔任左中堅或右中堅亦看似影響不大，只是過頭波方面亦是其弱點。另一中堅拜利，難得獲得正選表現自己，本以為可用穩定表現搶走中堅一位，78分鐘前亦算穩陣且表現冷靜可惜一次落腳太狠便被球証用紅牌趕離場，將要面對三場停賽嘅懲罰，亦將會錯過作客熱刺嘅大戰。
三中場方面，先講講馬迪，上仗近門攻入開齋波而今仗亦繼續正選上陣，始終蘇斯克查不能睇小中場能力不俗嘅客軍，不過馬迪表現亦交到貨更於14分鐘一次靚交造就攻勢嘅出現。下仗面對紐卡素或者係馬迪休息嘅時候了。
靴里拉方面，蘇斯克查上任後已算係企穩常規正選嘅陣容內，而今仗亦起咗舉足輕重嘅作用，24分鐘一次重要嘅回防補位於前柱化險為夷，呢個意識算係傳奇堅尼所講聞到危險嘅氣味而作出相應嘅動作吧，而靴里拉依家除咗防守可以幫到球隊外，助攻亦有一手，32分鐘傳中交出漂亮嘅一球予普巴頂入成2:0。不過50分鐘因一次跣腳而要職業犯規下拉衫領黃，75分鐘由佩利亞入替。佩利亞入替後表現與費特有點相似，節奏上仍與曼聯有點不配，希望多一點機會可以讓佩利亞與球隊配合吧。
普巴方面，自從摩連奴下台後，普巴連續3場交出極佳表現，入球助攻停不了。今場再交出兩個入球一個助攻，除此之外更有一球中柱波可以連中三元。場上表現亦越黎越好，爽快之餘亦無再於中後場賣弄腳法，而且兩個入球均屬後上入攝完成足証只要普巴能踢出具侵略性嘅足球便極具殺傷力，賽後獲選為MOTM，連續兩場，期待第三場吧！
前場方面，右路嘅連加特繼續受蘇斯克查重用但今場表現顯得有點遲緩，不過仍有不停跑動帶出空位亦因此成為蘇斯克查重用嘅原因，應該話係受曼聯多位領隊重用嘅原因而且上季開始表現大躍進，控球及推進均越黎越成熟，場上決定亦越黎越好。
左路嘅馬斯亞方面，今仗復出後狀態似乎未完全回到十足，不過已足以交出一球漂亮嘅腳面助攻予拉舒福特埋門破網。81分鐘由於拜利嘅紅牌要換入鍾斯而提早離場休息。鍾斯入替後當然踢回中堅位置但由於當時大局已定下，未有受任何考驗至完場。
前鋒嘅拉舒福特，今場光芒四射，5分鐘嘅個人突破令艾基得個追字再傳中助攻普巴入球。而個人方面亦於45分鐘接應馬斯亞嘅傳中剷射入網成3:0鎖定勝局。重要嘅係近幾仗拉舒福特於場上決定越見進步而且本身有速度與技術，只差埋門需要多加練習便能再進化，70分鐘由盧卡古入替。盧卡古經過缺陣兩場後回來，而72分鐘便接應普巴用右腳射入一球，雖然此入球於越位位置下入球但總算為盧卡古取回不少信心。賽後蘇斯克查亦對如何將盧卡古解放有著一套心中有數嘅方案，即管等待成效吧！
戰術分析方面，明顯蘇斯克查有著費Sir嘅影子，期望以最佳陣容出擊盡快鎖定勝局便開始作出換輪，因此下半場盧卡古能於70分鐘入替拉舒福特，以便前者取回狀態而後者得以休息，76分鐘亦有佩利亞入替靴里拉嘅決定。只可惜拜利嘅紅牌打亂了最後嘅換人幸好不致影響賽果。
另外，因為蘇斯克查亦係球員出身，自然更能有效地理解球員嘅感受，經歷及所想。此方面有助蘇斯克查幫忙球員渡過樽頸位置，近日訪問已見蘇斯克查對於拉舒福特有著針對性嘅訓練而今仗亦見成效。而且亦因其後備次數眾多更能明白後備席上嘅球員心中所想，如何去安撫球員心理令佢地保持信心與士氣亦事關重要。目前黎講仍是成功的。
蘇斯克查曾提到自己希望讓進攻球員能盡情享受足球，此話亦由普巴近三仗嘅表現反映出黎，入球，助攻，傳球成功率及創造機會次數等等都得到震撼性嘅反彈。當然一名球員最重要有信心，才能將自己心中所想嘅能力展現，而且睇到除普巴外，其他球員包括拉舒福特及連迪洛夫等等亦越出信心來。有信心變繼而能有喜悅之情，呢一點亦從普巴所帶領嘅球員展現出黎，睇到普巴或連加特入球後嘅喜悅，慢慢再進一步地睇到，一眾進攻球員正在享受著足球。當然，曼聯已經連續多場失球，而且對手亦只是榜下游球隊足証後防亦有改善嘅空間。否則去到強強對碰下便極有危機。
鳴謝各位支持文字直播即討區，下場見。
[K11出品] 曼聯K角度 - 進攻粉底下的防守
粉底大家都知道係一眾女士用黎掩蓋臉上瑕疵嘅化妝品了，而曼聯由蘇斯克查執教後第一場主場賽事，雖然順利以3:1擊敗作客到來嘅榜下游球隊哈特斯菲，但實情蘇斯克查是把球隊壓前，利用了進攻來遮蓋著防守的漏洞，就好似粉底一樣，將防守危險與機會盡量減低。幸好能全取3分，繼續將與前列距離進一步縮窄，迎接下周繼續嘅緊密賽程。
陣容方面，門將繼續由迪基亞把守最後一關，後防右至左分別為達洛特，連迪洛夫，鍾斯及梳爾，三中場為費特，馬迪及普巴，前場右至左為馬達，拉舒福特及連加特。
迪基亞雖然再一次，係再一次保唔住零封，不過責任不在他身上，所失一球為後防頂唔住對手嘅攻勢被近門射入。而迪基亞今場60分鐘嘅撲救再次展示其迪神之功架，將迪保治接應角球嘅妙射如同攞籃板一板將皮球擒下來，賽後蘇斯克查亦盛讚此為佢見過其中一個最美妙嘅撲救。
後防方面，右閘嘅年青19歲新人達洛特獲機會上場，雖然佢屬於摩連奴嘅遺產但此子的確擁有極大潛力。不過今仗似乎面對充滿英超味道嘅哈特斯菲顯得未能適應，攻守也未算稱職，39分鐘浪費了拉舒福特恰到好處嘅傳中球射斜出界，防守更曾差點被梅賓沙爆過，54分鐘由楊格入替。楊格入替後，明顯用經驗彌補此位置的漏洞，多次由右路入中路包位，而且楊格亦為曼聯提供了較高質嘅自由球處理。
左閘嘅梳爾，今仗繼續成為正選而左路拍擋變成了連加特，拉舒福特，甚至普巴，感覺有點塞車結果今仗梳爾助攻不多但仍有乘空檔時上前達至射門嘅威脅。
中堅方面繼續為上仗拍檔鍾斯配連迪洛夫，位置相同且踢法亦一樣，第一個入球正是連迪洛夫角球助攻衝前柱下造成馬迪門前執雞成功。不過連迪洛夫今仗要為所失一球負點責任，雖然普巴爭頂失敗但皮球於其頭頂越過再忽視了後上嘅辛卡被近門射入，始終制空力弱屬這對中堅組合最大弱點。
防中方面，先說馬迪，馬迪今仗繼續正選而表現繼續可人，要知道馬迪的工作簡單而重要，控制節奏，轉邊或將皮球傳俾重心球員，雖然最近多了一項後防拍揮者的工作但勝任有餘，而今仗更於角球助攻下近門射入今季第一球，更是今仗為曼聯打破悶局重要的一球。
另一防中費特，鮮有上陣機會但今仗仍然顯得有點節奏不合，太快及太急了一點，29分鐘更領下黃牌。不過如果費特適應了英超而且捉摸到節奏，的確係一位重要嘅B2B，54分鐘由靴里拉入替。靴里拉入替後明顯將經驗與穩定帶到場上，由後場嘅搶截工作至前場助攻也參與在內，63分鐘便瞓身將皮球傳俾普巴射入2:0的一球，為曼聯打下強心針。
左中場嘅普巴，今仗獲選MOTM，因為其表現真的越來越好，後場減少咗無謂嘅盤扭而於中前場增加咗參與度且節奏明快，射入2:0嘅入球雖然難度不高但卻重要，需要冷靜嘅處理。而第三個入球於禁區外嘅快射，有角度且力度十足，屬於祖雲達斯時期嘅遠射。雖然3:1嘅失球為普巴與穆尼爾爭頂失敗，但近兩仗交出兩入球兩助攻，似乎普巴於蘇斯克查帶領下既開心又交到表現。
攻擊組合方面，連加特，馬達及拉舒福特於前場沒有被安排特定位置但卻有目標路線，馬達中前場自由走動，連加特於左邊走至中路入滲，拉舒福特由正中位置不時走到左路突破。不過上半場左路卻有點塞車，因為此三位球員加上普巴曾有一段時間集中在左路進攻，加上對手球員便變得密密麻麻，而在此情況不改的話，最大可能的換人會是犧牲馬達。幸好球隊下半場開始重新定位，馬達亦增加在右路嘅活動，結果63分鐘便由馬達於右路突破落底線再傳中下造成入球，79分鐘由高美斯入替馬達。高美斯嘅入替証明了曼聯重視青訓而且青訓有質素嘅肯定，當下一刻同場嘅曼聯青訓便有普巴，連加特，拉舒福特及高美斯。而高美斯亦非刷數據之輩，雖然矮小但靈活且有腳法，90分鐘於禁區嘅射門雖然不入但整套動作流暢，期待今季有更多一隊嘅上陣機會吧。
連加特方面，有佢在陣嘅話，能令球隊行軍速度變得流暢因為連加特喜歡跑動及向前引球推進而且亦有一定嘅遠射能力，今仗於77分鐘亦助攻予普巴射成3:0。
拉舒福特方面，的確仍有不少地方可以進步但見此名曼聯新10號近仗亦有不少進步，當中包括一些場上嘅決定，而39分鐘左路突破後傳中亦做得非常不俗。而上半場亦有兩次左路起腳射門勁度十足只是欠缺角度而已。
戰術分析方面，明顯地蘇斯克查於進攻上花了不少心思去佈陣，今仗上半場期望以拉舒福特拉左邊後多用連加特後上入滲中路搵空間。而下半場則由於楊格出場後，球隊進攻上左右比例取回一定平衡令對方後防空間增加，只要球員維持跑動及皮球運送便會有空間再次出現，2:0嘅入球亦因此出現。
不過，進攻雖然係蘇斯克查目前帶到俾曼聯嘅元素，但防守仍然係目前曼聯最大嘅問題，上半場初段曾出現險象幸好干高奴小禁區炒高，下半場迪保治嘅門前接應妙射亦因為完全走漏下出現，結果3:1也在防守不夠穩陣下被近門射入。其實目前蘇斯克查只是將球隊整條線路推前，令後防受壓減低但要知道其實其防守力仍然不足。只是在著重進攻希望以己隊進攻去減少對方進攻嘅機會從而彌補防守薄弱嘅問題，純粹是用進攻此粉底去遮蓋防守的瑕疵，到底曼聯一月是否仍要購入中堅還是蘇斯克查可以令史摩寧及拜利等等去成為領袖級後防大將? 仍有未來三仗(兩場聯賽加一場足總盃)可以俾蘇斯克查去尋找此答案，及後便要迎來與熱刺搏擊嘅賽事。
鳴謝各位支持文字直播及即討區，下場見。
[WKD手記] - 見面禮
以為自己追咗曼聯咁多年有咩未見過，但原來踢得精彩嘅時候都難掩興趣嘅心情，好耐未試過睇完一場波會想走去踢波。相信蘇斯克查喺幾日內帶唔到咩精密戰術俾球員，從呢場嚟觀察除咗有部署到鋒線三人組嘅配合之外，球員走動更加似出於自由發揮。球員相對地能夠憑個人判斷去參與攻防當然加把勁喇，其實球迷見到佢地都踢得咁有個性仲開心，呢場波彷彿喺俾球員用表現向新帥自我介紹。
蘇斯克查首個訪問就講到自己教波風格受費格遜影響，所以會帶返落曼聯到，即刻令我諗到踢442嘅可能性，因為幾年以嚟進攻比防守表現得更差，最直觀睇到嘅問題就係邊個都踢掂唔柱躉單前鋒（伊巴除外）。呢場433陣式、人腳都同摩佬時期相似，但踢落完全係第二隊波。
拉舒福特作為單前鋒嘅弱點當然係背龍、制空力低，要求佢喺危險地帶控定個波等中場支援係強人所難，所以戰術上安排咗連加特、普巴同馬斯亞輪流跑向福仔用傳跑方式突破防線。連加特名義上踢右翼，進攻果時幾乎係一個攻中，務求福仔喺任何時刻拎波都可以彈返俾佢，當中場線壓到上嚟佢就會同福仔平排做雙前鋒。
呢個鋒線組合最後包辦咗四個入波，進攻成效不容置疑，但針無兩頭利，代就係跑動距離大增同埋右路缺乏攻勢。連加特體力消耗固然大，其實楊格一樣吃力，後者不下一次拉到上右翼位等波，靴里拉同及後換入嘅費得間唔中就會去包右閘位，但唔代表佢地能夠完美補位。卡迪夫城後期針對性地喺左路做波，靴里拉出腳失敗，爭啲就俾對手複製上場文尼嘅助攻方式。對強隊嘅話無乜可能咁冒險地踢，長遠嚟講都係需要解決右路組織同埋前鋒供應問題。
防守方面今場就顯得非常輕鬆，要不是有少少爭議性地輸咗個十二碼，迪基亞應該可以保持不失。後衛唔多機會去展示防守實力，但從組織中都見到各人擅長之處。連迪洛夫愈嚟愈有大丈之風同佢成日帶波助攻嘅踢法無關，而係因為佢開始擔起指揮防線嘅責任，中堅當中以佢最有閱讀球賽能力，將來能成大器；梳爾防守力唔算一線，不過同馬斯亞、普巴建立出嘅默契就值得繼續重用；右閘人選眾多，楊格、達洛特、華倫西亞甚至達米安踢得，前者咁後生或者可以踢哂成條邊線添。
卡迪夫城屬於護級球隊，但曼聯打到對方落花流水都反映到今場表現高於合格水平。卡迪夫城僅餘嘅攻勢都來至手榴彈戰術，運動戰中真係創造唔到咩攻勢，紅魔鬼從中應該搵得返主動用波嘅信心喇掛。老實講，摩連奴喺曼聯複製唔到大巴戰術嘅其中一個原因就係班球員一無控球權就會好慌，到難得有波到嘅時候心急亂做，啲反擊質素比佢教過嘅隊都要差，比人炒可以話係天時地利人和都輸哂嘅結果。
[K11出品] 曼聯K角度 - 歡樂今宵
首先預祝各位聖誕快樂，摩式曼聯成為過去，蘇斯克查走馬上任成為今季餘下賽季嘅代領隊，除咗帶來了一眾紅魔久違了的大勝，全場以5:1作客大破卡迪夫城，為蘇斯克查打嚮成為曼聯領隊之頭炮，最重要還是重現了一眾紅魔久違了的歡笑，歡樂今宵再會，各位觀眾晚安，好好地甜睡了一晚。
陣容方面，門將繼續為迪基亞，後防由右至左為楊格，連迪洛夫，鍾斯及梳爾，防中由馬迪配靴里拉加上普巴，前場由右至左為連加特，拉舒福特及馬斯亞。
門將嘅迪基亞今仗又再一次保唔住零封，所失一球卻是來自12碼，而除此之外，其實迪基亞曾經以一次水準撲救將梅菲禁區內嘅燙射撲出界。
後防方面，楊格由摩連奴軍下轉至蘇斯克查仍然獲得信任，今仗繼續成為隊長加右閘正選，不斷嘅助攻加上落力指揮球隊，事實上比華倫西亞更有隊長風範，而其實最重要嘅係本身翼鋒出身嘅楊格，配合蘇斯克查勇於向前嘅戰術，感覺越黎越年輕一樣。而球隊較遠嘅罰球及角球都主要由楊格負責，可見楊格將會繼續受蘇斯克查之重用。
左閘方面，梳爾傷癒復出，而其表現仍然維持今季高水準，亦曾有助攻至對方禁區嘅情況出現。不過值得高興嘅係，梳爾今仗開始與左翼嘅馬斯亞產生多一點默契。
中堅方面，連迪洛夫配上鍾斯，前者今仗有別摩佬時代以左中堅出現而是以右中堅現身，而且經常用波，更有兩次殺上對手三閘線甚至禁區去助攻，比摩佬時代更具侵略性。不過公道一點講，防守上經過摩連奴旗下嘅訓練，亦已見能應付英超節奏了。但要留意一點，連迪洛夫應付對手從後長傳過頭波回防呢一點明顯較弱，著實要針對性解決呢個問題。鍾斯方面，今仗負責左中堅一職，而主要負責防守工作且相當稱職。更曾有一次角球助攻下起腳射門嘅機會。
防中方面，馬迪配上靴里拉，先講講馬迪，其實馬迪嘅工作無變，一樣主要做控制節奏及作為一對中堅嘅屏障。其實以馬迪嘅角色，如果球隊攻守平衡得宜，馬迪於比賽中在精神方面嘅消耗比體力方面大，87分鐘由費蘭尼入替。費蘭尼入替後基本上觸球次數不多。靴里拉方面，其實以鬥志方面及使球隊攻守平衡，靴里拉理應早早獲得正選。今仗靴里拉亦表現出作為球隊攻守串連嘅重要角色，B2B嘅功能其實比普巴更明顯，防守上經常於自己禁區邊做搶截，中場亦會與隊友做短傳嘅串連工作，更會後上到對手禁區邊助攻，29分鐘便正正於離門三十多碼接應普巴橫傳後遠射入網成2:0，雖然皮球因省中人改變方向入網，但敢於起腳射門亦係靴里拉嘅優點，加上佢由後場至中場再到前場也有參與球隊工作，咪就係B2B囉，我K11已經講咗好多次！不過亦要提醒一點，靴里拉做綠葉比做球隊主角嘅表現更優異。
重回正選而位置處於偏左中場嘅普巴，今仗表現其實來個先苦後甜，或者太耐無比賽，開波初段幾腳轉方向嘅力度與位置都好差，但慢慢地重掌節奏而且表現成熟穩重，簡單而且絕不花巧，69分鐘嘅遠射亦有一定水準只可惜被門將撲出。今仗更交出兩球助攻包括橫傳轉方向予靴里拉遠射入波及完場前直線傳俾轉為前鋒嘅連加特單刀入球。明顯地，今場普巴為咗踢爭氣波及希望重新取悅曼聯球迷，好多波都以大局為重，而且連加特搏得12碼後亦睇到普巴讓出機會予連加特入波，賽後亦講咗佢與摩連奴嘅關係與結論，希望佢可以乖乖集中精力繼續踢好波啦。
前場三子方面，先說說左路嘅馬斯亞，其實今季已明顯看到馬斯亞於攻守上都再有進步，而今場波於上半場被追成2:1後，見到馬斯亞勇於成為球隊進攻策劃者，走到中路迎波及做波，結果只需3分鐘便為曼聯再次拉開比數，而且與普巴及連加特更來一次漂亮組織入滲後射地波遠柱成3:1。而且最值得高興嘅係與梳爾開始多一點配合，如果日漸成熟的話將會令曼聯左路威脅倍增，86分鐘由佩利亞入替。佩利亞入替後過於集中中路組織，反而令進攻變得緩慢，睇到佩利亞好希望表現自己但似乎有點心急了，放心吧！相信蘇斯克查會繼續俾機會你証明自己於曼聯嘅將來。
正前鋒嘅拉舒福特，今仗3分鐘便用漂亮罰球來為曼聯先開紀錄，而其後踢法跟以往擔任正前鋒時相若，可惜一次由連迪洛夫後場開始策動嘅進攻卻有點操之過急，結果半單刀下失機了而其實還可選擇回傳後上跟進嘅連迪洛夫。而且一次不小心嘅手球曾經令曼聯被卡迪夫城以12碼追近至2:1，亦令迪基亞失去了今場零封，下半場79分鐘由費特入替。費特入替後於防中位置出現不過睇到仍然與隊友欠缺一點默契，但其勇於由中場開始推進嘅特點或會於將來成為蘇斯克查重要嘅武器，繼續適應吧。
右路嘅連加特，上半場其實表現只是平平，不過勤力嘅走動加上勇於推進已經影響卡迪夫城後防佈陣，而41分鐘接應普巴直傳再回傳予馬斯亞射入3:1一球為佢拎回一定分數，不過當時蘇斯克查若要選擇半場換人則會是熱門人選。下半場再來個爆發，先有56分鐘於左路禁區頂開始盤球直闖引來對手犯規獲得12碼，更親自操刀射入成4:1，其後當福馬齊齊換走後，連加特轉為正前鋒，正是等待著獲得直線奔跑嘅機會而普巴正好於完場前一個靚直線予連加特推過門將後梅開二度，賽後更成為MOTM。
戰術分析方面，明顯地，蘇斯克查雖然仍舊以接近摩連奴嘅排陣出擊但細節方面已加入自己嘅元素，亦係師承費Sir嘅元素。節奏明快，將後防與中場推前，要求個別球員盡量以一兩腳波來使行軍速度加快，特別係令普巴於中場踢得更爽朗直接。
另外，連迪洛夫於摩連奴時代會以左中堅出現但今仗則重回右中堅，而且亦勇於上前助攻至對方禁區頂。摩連奴曾解釋連迪洛夫是目前最能勝任左中堅一職嘅曼聯球員但蘇斯克查則將連迪洛夫嘅自由度增加而由或者不擅長此位置但只需專注防守便足夠嘅鍾斯擔任左中堅，此舉可令連迪洛夫嘅優點放大，而當連迪洛夫上前助攻時便由馬迪負責留後助守，而摩連奴則較注重平衡與穩陣嘅排位，明顯看到蘇斯克查較摩連奴大膽佈陣。
再者，明顯地目前曼聯後防未有領袖級球員而蘇斯克查看似委任馬迪作為後防拍揮者，包括龍門球是否開長或短，需要壓前還是後退，當然用防中馬迪來做後防指揮只屬緩衝之計，一旦面對組織力更強嘅球隊仍然會有大危機出現，所以也要重點解決此問題。
還有蘇斯克查今仗於賽事末段安排連加特任正前鋒便再次運用到球員優點，因為連加特踢法直接簡單，有速度，只要有機會便向前走位及接應，造就了5:1嘅入球出現。當然也得有普巴嘅美妙傳送才可成事。
雖然作客大破卡迪夫城不算甚麼，但總算係蘇斯克查作為代領隊上任後第一場就打開勝利之門，為其信心做好根基。而且曼聯於英超攻入對手5球呢個數字亦係自費Sir於12/13球季退休後等了6年再次出現。加上球員臉上嘅笑容重現，球迷亦終於可於曼聯比賽日晚上來個歡樂今宵了。
鳴謝各位支持文字直播及即討區，Boxing Day再會。