[K11出品] 曼聯K角度 - 不堪一擊

歐霸盃由格連活特一箭定江山後，蘇斯克查說道今季放走盧卡古及山齊士是正確的決定。誰不知幾日後的聯賽，馬斯亞繼續因病缺陣，格連活特則因病缺陣，餘下最近狀態一般的拉舒福特。結果球隊於進攻乏力下，被主場的韋斯咸由耶莫蘭高及基士維各入一球，以2:0擊敗曼聯。更甚的是拉舒福特因傷退下火線後，慘不忍睹地要用連加特及占士輪流接替前鋒一位，全場賽事曼聯的反擊力疲弱，組織力不足，把握力差勁下，足以用不堪一擊來形容。

正選陣容方面，門將為迪基亞，後防右至左為雲拜沙卡，連迪洛夫，麥佳亞及楊格，防中為馬迪及麥湯米尼，進攻中場右至左為佩利亞，馬達及占士，單箭頭為拉舒福特。

門將迪基亞今仗所失2球也是非戰之罪。上半場2隊多屬中場混戰而到了43分鐘，耶莫蘭高一控一射的動作比迪基亞落地的動作更快而且皮球向著網仔而入。下半場其實迪基亞已經救出了安達臣的近射延遲了球隊的死期，可惜球隊7分鐘於相若的危險位置連續輸掉2個罰球，結果基士維頭一次射高而第二次於83分鐘則射入死角，即使迪基亞用手撲到也難阻入網。

後防方面，雲拜沙卡今仗於防守方面維持攔截力，亦多次參與進攻但傳中質素欠佳，多數被封而未能造成威脅。而需要付上責任的一球則在82分鐘向自己三閘線中路的誤傳導致了楊格的犯規，最終亦被罰球射入而令球賽終結。不過這是年青人經驗累積的學費，為雲拜沙卡的話還是值得的。左閘的楊格，今仗於左路表現算是中規中矩，雖有助攻但同樣質素欠奉，還是等待梳爾回歸令左路恢復活力吧。

中堅方面，先說麥佳亞，所失第一球或者來不及反應，而其餘時間的防守算不俗。可惜助攻接應麥湯米尼的近門射波卻被門將法比安斯基救出成球場落敗的其中一個關鍵點。另一中堅連迪洛夫，今仗防守上似是沒有問題但在於我K11眼中，所失第一球其實對於橫向的他來說，若果洞悉力及鬥志強一點，應該在耶莫蘭高一控想射門之際便要橫身瞓下，結果無人能知是否可擋住對手射門但這是鬥志與決心的表現，想想維迪的話便可預想了吧，即使是前曼聯球員靴里拉或年青中場麥湯米尼，也極有可能作出此種瞓身的表現。

防中方面，麥湯米尼今仗繼續擔正，但相比上仗對李斯特城，明顯今仗便將麥湯米尼要負責進攻一環的能力不足顯示出來，多次可引球推進或是轉向也做得不好。雖然曾經殺入禁區近射或是用身體做二傳給麥佳亞攻門。防守上則沒有問題，或者還是作為普巴或費特的護航員較由他來做策劃者更適合。

馬迪方面，明顯地只負責做護航員的保護工作，算是合格但一旦需要他來引球上前，到了對方禁區頂便不知所措地最終失去球權，即使開賽初段來了一記不俗的遠射，71分鐘由費特入替。由於入替時曼聯已落後一球，因此對手的防線也縮後了一點，故令費特有更多時間與空間去發揮他的能力，免得被壓迫下便失去控制的弱點。結果出場廿多分鐘所創造的機會便已比其餘曼聯球員更多。

進攻中場方面，右路的佩利亞表現還是沒有亮點，當然下半場的地波傳中無論力度及位置也很好，只可惜馬達未能把握而已，但其餘時間也是平實不過的中場。左路的占士，由於剛剛傷癒，本已預料今仗表現會有所影響，結果無論威脅力，突破力及時機也做得不好，最有機會為換位到前鋒位置後於完場前一次接應直線後射網側出界。

進攻中場的馬達，當真歲月不留人，雖然有他在陣時，球隊的行軍的確較為流暢，而且也較為立體，他所交出的直線也會較其他球員更有威脅。可惜今仗多次做串連時的傳送也被封阻，變成反令球隊行軍速度受阻。其實心思及路線也是正路但無奈差一點便是傳不到。而且接應佩利亞的傳中球也未能好好把握，間接令球隊失去追平機會，81分鐘由高美斯入替。高美斯入替後轉往左路但表現不突出，也未有任何建樹。

前鋒方面，拉舒福特繼續出任單箭頭而表現繼續沉寂，無論走位，與隊友配合等等都做得不好，上半場曾有一次半單刀機會卻來漫步人生下，被對手回防解圍成功，到了下半場也是有跑動但卻是無謂的跑動，結果更因而拉傷，61分鐘由連加特入替。連加特入替後先任前鋒，及後再退到進攻中場，但表現均未突出，曾經有機會射半空門卻被回防的耶莫蘭高封出。

戰術分析方面，既然蘇斯克查期望球隊的戰術為快速而直接，但卻依舊是馬達與佩利亞同場令球隊行軍速度變得不夠直接及快速，變相自己破解了自己的戰術。其實二人選其一於進攻中場便可以，為的便是於中場做串連或傳出關鍵傳球，而佩利亞更有遠射腳頭，馬達則強於入攝禁區內，那便按不同戰術模式出場吧。

拉舒福特的沉態，細心留意一下，其實自普巴表現不好或缺陣時，連帶拉舒福特的表現也會隨著下滑，因為踢法上便是由中後場直傳予前場走空位的拉舒福特去接應，球隊內能交出此類有質素的傳送，便是普巴及馬達，而前者的缺陣便直接影響了拉舒福特的表現，後者於近仗則表現出有心無力之感。那麼到底應該繼續此戰術還是讓拉舒福特現位停波呢？如果此非福仔強項是否需要轉人(不計算今仗無鋒可用)或改變踢法呢？可是卻看似沒有plan B的部署。

其實這些問題已經不是新鮮事，可惜卻看不到有對症下藥去解決。蘇斯克查是否在等待球迷呼喊他親自復出救此隊不堪一擊的曼聯呢？鳴謝各位支持文字直播及即討區，下場再見。

[多奇出品] - 韋斯咸對曼聯賽後檢討

今場曼聯作客輸0:2，現在就分析一下曼聯嘅表現。

攻擊線：福仔今場表現不濟，佢好少掂波，主要原因係福仔經常都要一對二。另外，當有人在邊路出波佢都做唔到第一點攻門。係有一次有機會爆入禁區，可惜帶近龍門時可能睇到有對方守衞追緊佢，分咗心就帶甩咗個波被人解圍。占士嘅表現尤其係上半場都想做啲突破但就真係被人睇通咗，成日被兩個人一齊睇住。直到下半場打正前鋒後開始有以速度爆落禁區射門嘅機會。佩利亞開波初段踢得好賣力，亦都好努力去搶逼，但單對單好少過到對方守衞，係上、下半場各有一球右邊出波，其他都係做啲橫傳。馬達就打得麻麻地除咗有球近射柱邊嘅機會，其他就控波都好易被對方逼甩，傳波又俾對方攔截同埋係回傳多過俾直線。連加特啱啱後備入替時打前鋒，之後轉打左翼，除咗有球直線，其餘時間表現都乏善足陳。另外，今場做前場壓逼都係形同虛設，對方幾吓短傳就破解咗佢。

我睇咗今場波發現正選攻擊線除咗馬達外，其他隊員（福仔、占士同佩利亞）都唔識以地波去組織小組攻勢，占士同佩利亞都只係爆落底出波，前者都話速度快，但後者就速度同技術都未足夠可以單對單過對方守衛，其實咁樣守衛好容易適應兩邊攻勢，作出調整。福仔就好少背對守衛而做一啲二傳，只係一味向前跑，咁對方淨係用兩個中堅一齊守佢就已經搞掂。馬達佢攻擊同組織思路係靈活，但佢身體條件對住啲又快又強壯嘅守衛係輸晒，仲有佢唔擅長背對敵方，加上馬達同其他攻擊球員嘅默契係未完全建立到，所以今場作用唔大。我覺得馬達應該多入禁區，因為佢嘅強項係處理罰球同埋在禁區入面無論係射門、做二傳同都帶俾對方係好大威脅，就好似下半場嗰腳走位射門。

中場線：在進攻方面麥湯米尼同馬迪勤於做駁腳，橫傳分波都叫做得稱職。馬迪仲有一腳遠射中門，麥湯米尼於下半場角球攻勢回傳俾麥佳亞近射，可惜射地波被龍門沒收。不過兩者都缺乏一啲隱蔽式貼地長短傳球，咁間接令到馬達同其他攻擊球員一迎接佢哋嘅傳球就即刻有對方球員逼埋去做搶截，組織攻勢就相對困難。費特之後換入嚟，佢就攻強守弱，跑動力比馬迪強好多，傳波嘅侵略性亦大，仲間接令到連加特傳個靚直線俾占士。

在防守方面，無論企位，默契、回防速度都做得唔錯。可惜到38分鐘後，對方攻擊球員開始適應佢哋兩個嘅企位防守，開始多咗在中路組織攻勢同埋做一啲入涉走位，當防守第一道屏障被人破咗，後防未完全建立默契依個問題就浮現出嚟。下半場換咗費特之後，個防守穩定性都係冇改善，論防守始終馬迪經驗豐富啲。

後衛方面：右邊雲拜沙卡單對單嘅攔截做得非常準確，佢直情係一個犯規都冇。助攻亦都見到佢越嚟越夠膽上前出波。左邊楊格上半場前段都可以沉着應戰，有兩吓鏟波都幾清脆，不過後段開始失去冷靜，因為中場防守屏障俾對方攻破，所以對手針對佢防守力相對較弱，就攻佢嗰邊，就好似失第二球都係因為佢魯莽出腳而犯規輸罰球。中堅就連迪洛夫同麥佳亞當防中屏障失去效用之後，就露出默契未完全建立嘅弱點，第一球之失就係當對方球員制造到起腳機會，兩者就我以為你，你以為我上次做攔截，結果兩個都企咗喺度，俾人起腳射入。

龍門方面：迪基亞雖然失兩球，但係唔可以完全怪晒佢，第一球在禁區內射門其實射中有角度都應該會入網。第二球更加唔可以怪佢，因為俾對方有射兩次罰球機會，如果第二次都唔中龍門就真係好難踢到英超。

總結：我係對賽果感到失望，對前鋒線入唔到波亦都感到不是味兒。我亦都唔明白蘇B點樣對馬達嘅定位，因為我覺得馬達應該可以更常入禁區制造威脅。但我知道對方教練係柏歷堅尼，係一個帶過曼城攞過英超聯賽冠軍嘅教練，對住咁強嘅對手，蘇B真係要好好偷師。我真係希望蘇B可以吸收更多臨場經驗，重整番條攻擊線，同埋希望普巴，馬仔等傷兵可以早日康復。

[多奇出品] - 福馬誰來定錯對

在2019-2020年球季，曼聯正選而又有經驗前鋒現在只餘下兩位 - 拉舒福特與馬斯亞，佢哋兩個曾經交出過亮麗嘅表現，但現在狀態俾人感覺發揮唔出以前嘅水準。今季打咗5場波，馬仔嘅表現還算唔錯，但福仔表現未能說服到球迷點解要俾你打正箭頭。現在就等我分析佢哋兩個嘅打法。

首先，福仔同馬仔前鋒嘅速度都係快，以地波推進為自己制造有利位置而射門得分。不過佢哋以速度引球嘅方式其實係有好大嘅分別：福仔係擺明同守衛鬥速度，佢响準備帶波一刻個身體語言已經話俾對方知我要跑得快過你，直到跑咗一段路後，守衛係因為跑得唔夠快所以就追唔到佢。而馬仔嘅快係當佢起步引球時，守衛係完全察覺唔到，到佢差唔多就快過對方時，守衛先至察覺到，啲人俗稱「無影腳」。

同樣地，佢哋雖然都係攻勢嘅終結者，但其實骨子裏都係有分別。福仔主要係靠優良身體條件，起腳射啲速度同力量兼備嘅波，當佢起腳時龍門係會察覺到。這個擺到明係學C朗啦！而馬仔係靠佢優質嘅天賦，起腳時龍門未必即時可以察覺，都知道時個波已經飛緊向龍門。這個好似一個冷面殺手，在你面前插你一刀你都察覺到。

然後，硏究吓佢哋心理方面，究竟點樣影響佢哋技術嘅發展。由於佢哋好後生時已經為曼聯一隊上陣兼做主力，佢哋在觀眾、球迷、教練同隊友嘅壓力低下表現係唔可以經常有偏差，所以佢哋大多數只會做一啲自己最擅長嘅動作。例如：以速度制造空位射門。其他自己唔擅長嘅動作就好少做。例如：頭搥攻門。大家都知，如果將自己學過嘅嘢唔用一段時間就會退化。所以佢哋嘅進攻套路都係較單調。例如：佢哋在無球走動，做二傳、頭搥攻門、窩利抽射、執雞同引開守衛都唔係經常做，長此下去佢哋這些技能都會退化。（講笑咁講，我所舉嘅咁多例子，每樣都可以寫一篇文。）

咁我抽兩樣對攻擊球員最重要嗰兩樣講：就係引開守衛同做二傳。引開守衛係指當球員無球在腳時，做引開敵人注意嘅走動，使到己隊球員更容易組織攻勢同射門。而二傳就係當己隊球員迎接來球可以即時或第二時間傳球，藉此制造機會俾隊友直接攻門。由於福仔同馬仔習慣引球進攻，所以佢哋走嘅位多數係令佢哋進成單刀狀態，直接攻門。要佢哋引開守衛制造空位俾隊友唔係完全無，但少囉。而二傳就更少，因為佢哋攞到個波就已經諗點射門，射唔到波扭唔到人先俾番自己友咁就唔係二傳啦。

另外，佢哋防守力極差都係一個大問題。唔係！在前鋒身上唔應該用防守力形容，係應該用「壓場感」，「壓場感」即係指當敵方守衛控球時，前線攻擊球員壓前，令對方在有壓力底下出現失誤。現在英超球隊嘅防守都做得好好，正面攻佢哋其實唔易攻入，所以要靠前場壓迫令佢哋出現失誤先至可以增加入球率，曼城同利記都係用這招。

講開又講，容許我用少少篇幅談論盧卡古，原因係我上一段所講嘅技術，佢係做得唔錯。尤其係曼聯2017-2018年攞亞軍嗰季，點樣做得唔錯我唔多講，我要指出一點就點解盧卡古技術可以咁全面（雖然控球經常控甩腳）？因為佢曾經在中游球隊磨練技術，在一個可以容許佢有失誤嘅環境下成長，使到佢在技術同心理上作出調整。除咗佢，曼聯有啲出名球員都係之前在中游隊浸淫。例如：貝碧托夫（2006-2008熱刺）同卡域克（2004-2006熱刺）等。

其實要講福仔同馬仔，仲有好多嘢可以講，不過我希望自己唔係為寫而寫。最後，我覺得有一個人係可以在技術同心態上引導佢哋，嗰個人就係「朗尼」。如果我係蘇B，我在冬季轉會窗第一個就買翻朗尼，因為朗尼嘅成長過程同福仔、，馬仔相似。以朗尼嘅經驗同能力，應該可以幫到佢哋。

[K11出品] 曼聯K角度 - 3分背後

國際賽後曼聯主場迎戰李斯特城，開賽前有多位正選球員因傷避戰包括普巴，梳爾，連加特及馬斯亞等等，還在擔心會否失分下，曼聯開賽以一球12碼開紀錄。其後客隊不斷反客為主，而曼聯多屬中場運作而欠缺攻門，直到下半場表現才有改善不過仍然受壓下，尾段慢慢控制戰局而險勝1:0全取3分，不過3分背後卻是有多個問題存在。

正選陣容方面，門將為迪基亞，後防右至左為雲拜沙卡，連迪洛夫，麥佳亞及隊長楊格。防守中場為馬迪及麥湯米尼，進攻線為佩利亞，馬達及占士，加上單箭頭的拉舒福特。

迪基亞方面，今仗2次撲救表現出其神勇表現，先於禁區內救出麥迪臣擺脫連迪洛夫後的近射，29分鐘再救出捷維爾禁區頂的窩利射門。其餘時間多屬門前混戰而未需要迪基亞作出撲救，又或是混戰後的射門於柱邊出界而根本未能作出反應，無論如何，曼聯今季第二場零封對手出現了。

右閘方面，雲拜沙卡趕及傷癒復出，扼守右路而且亦有不斷助攻，基本上表現對板而且防守上仍然令對手難越半步城池。左閘方面，楊格繼續代替受傷的梳爾而表現是甚為不俗，於左路不斷助攻而防守上也有不俗表現，不過明顯看到突然又已一年的楊格於速率上有下降了，被人包圍時仍是會擔心他被迫甩的景象出現，不過善用老將卻能帶給球隊經驗吧。

中堅方面，連迪洛夫3分鐘便嚇一嚇大家，被麥迪臣入攝禁區並找到射門的空間，幸有迪基亞保住了。不過其餘與華迪的比拚並不於下風，亦有多次包抄或封阻做得不錯，始終速度為他較擅長一環，而也看得到經過國際賽後，他的信心也得以回復。倒戈的麥佳亞今仗繼續維持高水平，防守上基本無地方可以挑剔而曾接應楊格的角球更有機會直頂入網可惜被舒米高救出了，繼續做曼聯的後防重心吧，蜜瓜。

防守中場方面，馬迪於普巴缺陣下成功取得正選，今仗表現算是合格而有些情況仍然較慢，差點被迫甩亦有傳失大意波的情況，而其實最擔心是他跟不上比賽節奏，幸好也得平安過度，66分鐘由費特入替。費特今季首次為曼聯上陣，速率上不成問題但只係害怕他有時大意地失去控球權而被突擊的情況再次出現，今仗算是做得不錯不過仍然未能令人安心。

另一防守中場的麥湯米尼，今仗算是擔起了曼聯整個中場線，雖然曾有不小心的傳失但其餘時間像是無處不在，而且搏勁心強，雖然仍有不少進步空間但看到無論身材，力量，態度等等也是值得期待。55波爭奪更是勇猛，而最值得欣賞的是完場前他在右路邊線，他選擇了去角球旗保住今仗大部分時間受壓下的勝局，更引來對手球員與其爭執而令時間去得更快，這成熟表現值得一讚！賽後獲選為MOTM。

進攻線上，右路的佩利亞今仗表現還有待改善，除了開波初段的罰球有威脅外，其餘時間包括控球及護球也未算稱職。還記得下半場其中一次得到了隊友傳中的機會，於禁區頂一控便可順勢射門，但竟然控甩了。

占士今仗順勢移到左路發展而表現的確不俗，即使沒有入球但威脅力算是全隊最高，包括了上半場的切入中路再抽射及多次嘗試突破的勇氣，90分鐘由杜安沙比入替。杜安沙比入場只有幾分鐘的時間，未能看到甚麼但這是他今季首次為曼聯於英超的賽事。

進攻中場馬達方面，雖然速率上的確有著歲月不饒人之感但馬達在陣時的確令球隊的運作與組織做得更好，簡單的one two已將皮球穿越一重的能力，70分鐘由鍾泰希入替。鍾泰希入替後活躍於左路，而他雖然帶點緊張但慢慢地便開始踢出自己勇於突破的風格，為左路帶來一定威脅。

正前鋒拉舒福特，今仗開波初段便由他於禁區內搏得蘇恩祖的犯規並為球隊操刀射入12碼，看到其12碼的處理能力的確較普巴更好。不過其後的表現便不合格了，作為正前鋒，便是迎波再保護皮球，之後再傳送給後上隊友再進攻，這一點沒有做妥。另一個單箭頭加上球隊以兩翼傳中踢法的任務便是門前搶點，暫看不到，雖然曾經有一球罰球直射中楣角，但未算令人滿意其位置應有的表現。

戰術分析方面，為何題目用到了3分背後? 球隊問題真的不少。首先是普巴的作用，普巴在陣時，的確有時因控球太久而令球隊進攻節奏被破壞，更甚的是被迫甩後讓對手有突擊機會，不過普巴亦能為中前場帶來目前曼聯球員交不出的關鍵傳送，明顯地拉舒福特與占士 ( 及因傷缺陣了的馬斯亞 )會因為有普巴的傳送而踢得更為活躍。今仗沒有了普巴，防守上是穩定了但卻看不到有何靈光一閃的傳送，只有如麥湯米尼或馬迪這些正路的傳送出現。馬達雖然有創造力交出致命傳送但與普巴足以令球隊一轉眼由守轉攻的中距離傳送卻是不能相比較。

馬迪的虛設，當然馬迪位置感與經驗不俗，但速度不足及一旦退入自己防守禁區便會瞬間失掉位置感卻令人憂心。今場感覺有著麥湯米尼在掃蕩才能掩蓋馬迪的速率不足。費特入替後亦暫時令人有點擔憂，變相普巴復出後仍然要在此位置上爭扎著。

馬達與佩利亞同場的問題，其實上仗已經出現而令球隊的進攻速度突然拉慢，更重要是馬達的身位與速度被比下去，佩利亞卻未如想像般護球力強下，不時被打斷進攻或是防反時不夠直接了當。仍然認為二人只能其中一位於進攻中場出現而右翼可由速度行先的球員去負責做突破。

拉舒福特正前鋒的能力，對於福仔的技術與能力有著認同但卻不是正中鋒的材料，停球，門前搶點與禁區內的把握力問題仍然是關鍵，這些亦是一隊強隊前鋒需要的能力。看看雲佩斯或雲尼斯杜萊的這些能力便看到明顯分別，加上埋門的決心。或者如蘇斯克查所言，拉舒福特或馬斯亞都不算射手型，格連活特才是，可惜卻缺少上陣了機會。我K11常言道，既然福仔愛玩波，綠木似射手，何不於馬斯亞受傷缺陣下，試試放出福仔與占士作為左右兩翼配上正前鋒綠木的排陣呢？

鳴謝各位支持文字直播及即討區，下場見。

[多奇出品] - 曼聯對李斯特城賽後檢討

曼聯贏咗1:0，終於拿下聯賽第二場勝仗，唔知你哋滿唔滿意佢哋嘅表現呢？

佢哋有做得好嘅地方，亦都有嘢需要調整，咁現在講吓我對佢哋嘅評價啦。

在攻擊線方面：福仔、占士、佩利亞同馬達在技術方面欠缺一種全面性。例如：佢哋好少用頭鎚攻門，除咗有一球係楊格開角球交俾麥佳亞頭搥攻門。仲有佢哋傳波嘅默契係幾差，尤其馬達攞到波後都要諗一諗，帶一帶個波至傳，有時仲會面對面傳失球，好似有球波馬達傳俾占士，但占士走快咗最尾交失咗。福仔都係老毛病，佢要攞住個波有一啲空位被佢爆先發揮到威力，但當要佢同對方守衛爭位，爭頂攞波佢就會縮。最重要佢唔係爭輸咗，而係佢做都唔做，所以到二十幾分鐘後福仔都好少接觸到皮球。占士係較突出嘅一個，在上半場都有幾次以速度進過守衛，擾亂對方後防，但可惜佢依種擺明以速到過人好快被對方睇穿，同好快適應咗，所以到之後占士就少咗機會用高速引球推進過人。佩利亞在右邊就可以話踢得麻麻，在右路冇咩出波，想做一啲小組滲入但唔成功，原因係佢一來未有板斧扭過班後防，二來佢同雲拜沙卡默契仲未建立。另外，除咗占士同福仔嘅十二碼外，其他球員仲未搵到入球嘅方程式，換句話講，就係佢地嘅得分點實在太少，試問如果在比賽過程中，球隊係冇咩得分板斧，咁點俾到一種威脅感俾佢哋，加上正選4個攻擊球員啲搶逼未有俾到壓力（除咗鍾泰希佢係逼得幾投入之外），所以之後李斯特城班守衛踢得比較輕鬆。

講完佢哋做得不足嘅地方，就講吓佢哋有咩做得好嘅嘢。

福仔處理十二碼有備而來，睇見佢射十二碼首先用橫移步之後加上普巴式碎步然後射右下角，動作做得流暢，無拖泥帶水嘅感覺。另外，兩球罰球都射中角位，係佩利亞射得爭少少隱蔽性。我相信佢哋班球員係預計到有射罰球嘅機會，所以睇得出佢哋有練過。

中場線方面：麥湯米尼同馬迪個默契都唔錯，佢哋知道幾時要一齊上去參與助攻，幾時要兩個一齊回防。有時候麥湯米尼上去馬迪就回氣，有時就對調。佢哋嘅表情話俾你知佢會點做，唔使成日指手劃腳咁。仲有佢哋做防守嘅時候係非常專注，而且回防速度係好快，頭鎚亦做得好，尤其係麥湯米尼在禁區多次用頭鎚解圍，攔截亦都做得硬淨同準確，仲有佢哋兩個好識得利用犯規去延遲對方進攻，賽後兩個防中竟然連一張黃牌都冇。費特亦都做得稱職，佢嘅跑動亦都幫咗後防好大忙。佢哋三個為後防做一道好穩固嘅屏障。

如果去講佢哋不足之處就係麥湯米尼都有在中後場失波，但佢同普巴唔同嘅係佢會即刻跑番去搶番個波，而馬迪亦都以佢嘅經驗去減少中場失波為已隊帶嚟嘅壓力。仲有佢哋防中缺少咗好似卡域克嘅隱蔽式地波傳送，例如：當卡域克到起腳至傳波俾隊友時對方係未察覺到個皮球，到察覺到時隊友已經攞到個波組織攻勢，如果防中球員可以調較佢哋嘅傳球技術就更好。

防守方面：後衛今場做得唔錯，當然其中一個原因係防中所做嘅第一道屏障做得非常穩固。另外，守角球就用聯防，搵咗麥佳亞、麥湯米尼等頭搥好嘅球員，盡量隱藏已隊係致命傷。而中堅處臻土回傳球做得好穩妥，麥佳亞嘅高空波幾乎係殺晒，連迪洛夫亦睇穿咗對方好多嘅攻擊，然後作出攔截，不過佢嘅對抗性亦都有待改進，開賽頭5分鐘爭啲輸波，始終佢嘅踢法太過斯文。左右閘亦都做得好稱職，雲拜沙卡同楊格助攻助守都做得唔錯。雲拜沙卡在防守方面，攔截非常準，根本對方想單對單扭過佢都好困難，而且佢頭搥又唔差，真係一個難得嘅收購。佢助攻就爭少少，主要係同前線未夾熟，再過多幾場夾熟啲之後睇睇十佢會唔會有助攻？楊格就好明顯你叫佢單對單防守對手就較困難，但如果你要佢以經驗去預先判斷對方嘅攻擊套路就還可以。另外，佢打翼出身，所以佢在有壓力低下處理皮球係做得好好，係好少在後場失波。而佢嘅助攻算係帶起少少左路嘅攻勢。

龍門方面：今場要撲救次數都唔多。係頭5分鐘有球要迪基亞用腳擋，係佢最擅長嘅一樣技術。而角球嗰度，蘇B安排打聯防，令到佢唔洗暴露佢弱點。整體表現算合格。

雖然贏波，但表現未必可以完全說服到球迷。球隊仲有好大嘅進步空間。

[多奇出品] - 蘇B份工唔易做?

到底蘇斯克查呢位曼聯現任領隊份工易唔易做？要答這個問題，首先要將蘇B現在所遇到問題但在費sir在90年代皇朝開始建立時從未遇到嘅列出嚟先。點解我要咁做呢？咁可以證明一樣嘢，想復興曼聯係一項不一樣的任務。

蘇B遇到而費sir從未遇過嘅問題有：

一、山神薪酬過高表現卻一塌糊塗。佢攞住周薪35萬磅嘅人工，但出場32場入得3球，其他隊友見到佢咁嘅樣，緊係個個要求加人工啦。有表現嘅主力，好似迪基亞咁，要求有山神咁嘅人工，而其他表現冇主力咁出色嘅，都要求加薪加成一倍，咁究竟俾唔佢哋好。俾佢哋嘅話，球會財政負擔會加重，唔俾又會造成球員不滿而影響場上表現，亦都減低佢哋對球隊嘅歸屬。

二、球員天價嘅轉會費。自從尼馬以2.2億由巴塞轉會到巴黎之後，球員嘅轉會市場簡直陷入瘋狂狀態。如果要買個有潛質做頂級球員嘅年青人都至少要5千萬磅，再加上方丈同摩佬用過大筆錢在轉會市場但都幫唔到曼聯攞聯賽冠軍，所以蘇B想買人都唔容易。唔似當時費sir只係用咗3千萬磅就買咗里奧費甸南，而C朗都係用咗1千2百萬磅左右就買到。

三、處理前領隊帶嚟嘅球員。例如：馬迪、山齊士、費特同盧卡古。球會領隊買球員前必定做晒資料搜集同分析佢哋嘅優點、缺點同性格。由於蘇B係上年季中接任球隊，所以一方面要處理班摩佬同方丈嘅部下，但另一方面要建立自己嘅班低。我唔係話佢哋用嘅人實力唔夠，而係大家買人嘅方針同準則係有差別。方丈同摩佬要即時睇到成績，蘇B就係要從新建立另一個皇朝；一邊係即食，一邊係睇長遠，所以無話對與錯，只係睇到領隊同球員之間係咪啱Channel。

四、沒有歐聯踢嘅賽季，有實力球員自然唔嚟。當然，曼聯今季踢唔到歐聯佢都需要查明原因。不過，英超競爭大咗係事實，以前車仔、阿仙奴同曼聯幾乎佔去歐聯三個席位，而現在係6隊爭頭四（車仔、阿仙奴、利記、曼城、熱刺同曼聯）。佢哋唔似西、意同德甲咁實力較懸殊。踢歐聯甚至攞冠軍係每個球員嘅夢想，咁可想而知，曼聯點樣可以吸引到啲實力同經驗兼備嘅球員呢？

睇完以上四點，我可以講句蘇B做曼聯領隊嘅時機真係不合宜。因為佢正面對住內憂外患嘅境況。第一同第三點係自己可以控制範圍內嘅問題，亦都係相對嚟講較易處理。但唔會在短時間內可以完成調整到囉。例如：明知冇前鋒用都要貼錢借走山神，另外又將唔合蘇B重建嘅球員（盧卡古）賣走。而第二同第四點係有外在因素影響，較難以球會一己之力去處理，佢哋可以做嘅就係做好自己本分。例如：在一啲名氣唔大球會買啲年輕又有潛質嘅球員同埋用自家青訓球員，透過比賽同前輩指導提升自己實力，亦都將目標訂在前四，藉此增加打歐聯嘅機會。蘇B處理以上問題嘅過程將會轉化成為佢寶貴嘅經驗，而這些經驗就係建立曼聯新皇朝嘅重要基礎。

咁究竟球迷會俾幾多時間蘇B去重建呢？這個冇一定答案，我都希望大家俾意見。

如果真係要我俾意見，我就話三年。點解？我係參考番曼聯在2002-2003年球季至2006-2007年球季中費sir點樣重建球隊同所用嘅時間嚟衡量。當時由碧咸、雲尼斯杜萊、堅尼、白蘭斯、華朗等球員點樣同C朗、朗尼、李奧費甸南、沙夏、星仔等球員新舊交替，我亦都見証咗曼聯在2002-2003球季奪冠之後嗰三年點樣同冠軍無緣，（2003-2004阿仙奴、2004-2005車路士、2005-2006車路士）直至2006-2007球季再重奪聯賽冠軍。

另外，我點解支持蘇B呢？原因有三。

一、費sir同名宿嘅支持。一隊球隊最重要係咩？就係有話事人同隊中有地位嘅人支持，佢哋嘅一句支持勝過千言萬語。最近之前成日指責摩佬名宿史高斯，雖然見球隊頭四場比賽戰績不濟，但係佢都照撐蘇B，仲話佢有心理準備對面曼聯嚟緊兩年與冠軍無緣。

二、曾用名帥領軍，但效果未達預期。球迷希望球隊再次奪聯賽冠軍並維持一段時間，可惜事與願為。成績最好都係得亞軍，但錢就用咗好多，而且唔知點解，球會球同佢哋關係好易轉壞。與其係咁，不如用一個對球會有深厚感情，熟悉球會歷史，使命同環境嘅人做領隊。

三、擁有寶貴奪標經驗，善於閱讀球賽同具備頂級球員成長經驗。經常後備出場嘅蘇B，曾經射入好多重要入球，有次甚至一場入四球，佢嘅球賽閱讀能力極佳。除咗球賽閱讀能力之外，作為前鋒嘅佢對傳球、射門、頭搥同走位亦有心得，佢可以引導年輕球員點樣改進自己。同時間，佢亦為球隊攞過6次聯賽冠軍，一次歐聯，所以一隊球隊要擁有咩元素建立皇朝佢係知嘅，這個亦都乎合曼聯重建嘅方向。

雖然我係希望蘇B繼續教，但有兩個因素蘇B或佢嘅支持者要留意：

一、死敵嘅興起。眾所皆知，曼城同利記同曼聯係死敵。近年曼城大大話話都攞咗四次聯賽冠軍，而對上兩個球季都係佢哋囉，歐聯更係四強嘅常客。另外利記由高普帶領下，上年差少少在聯賽可以奪冠，歐聯更係奪得冠軍，對比之下曼聯只可爭歐霸，對我隊球迷嚟講人哋繼續進步，我哋就持續走下坡，在這個對比之下，係好容易觸動到不滿情緒。

二、球迷對曾經係歐洲皇者（曼聯）嘅期望。球迷對自己愛隊有期望係好合理，作為一位支持者睇到愛隊贏波同奪冠，就好似打咗支興奮劑咁，開心到瞓唔到覺。球迷著住曼聯波衫就有一種優越感，帶著無限嘅光榮。唔知你哋之前有冇試過咁樣，但現在想出現這個情景係好困難，尤其係我哋捧咗曼聯十幾年嘅。如果再用現在嘅曼聯配對番過往對曼聯嘅期望，一來觀眾會睇到抑鬱，二來會俾太大壓力班球員，當然做得職業球員就遇咗啦！但足球係相對，一隊係以享受比賽嘅心態踢，一隊就帶有不滿情緒踢，如果兩隊對戰會邊隊佔優啲？蘇B就係要面對大部份係這類觀察嘅期望。

最後，想講係其實2007-2008球季曼聯都係打咗頭4場就5分，而最終攞咗聯賽同歐聯冠軍，當然現在情況同競爭對手實力都唔同，但如果因為咁而炒蘇B就不合理。首先，有邊個領隊會接手，莫耶斯之前話會俾時間佢重建，但教一季就再見。雲高爾同摩佬教曾經有點氣息又炒。如果連蘇B依個曾為曼聯立下咁多功勞，而又咁了解曼聯內部，當初又話咗會支持佢重建球隊兼最得曼聯名宿認同嘅領隊都炒埋，曼聯領隊依份工我諗好難搵到人做。

[多奇出品] - 皇朝？！過去與未來

打咗4場比賽之後，曼聯僅得5分，球迷當然唔收貨啦！有啲話球員未夠班，有啲話球員表現唔穩定，有啲話球員間冇默契。究竟點先至可以令到曼聯再次建立皇朝呢？

答案好簡單，就係要對這隊曼聯有一個合理期望。點為之合理嘅期望呢？將曼聯視作一隊中型班，如果可以排到第5至8名就可以接受。（這個係我嘅標準）咁點解我會有咁睇法呢？

我會從球員質素方面去講。我曾經睇過2005-2006年嘅曼聯season review作比較，我選擇這年度係因為當年亦都係球隊嘅低朝期；歐聯分組賽出局，堅尼季中退隊，阿倫史密夫斷腳，雲尼斯杜萊同費sir不和同埋新隊員與舊隊員嘅磨合。（當年新加盟球員主要有雲達沙、朴智星、維迪同艾夫拿。）

後防：雲達沙眾所皆知係曼聯一代鋼門，但當佢第一年加入曼聯時，曾經都試過因爲同里奧費甸南有誤會而輸啲核突波。同埋佢在整個賽季失波亦唔少，曾經對曼城同車仔各失3球，對米堡同布力般各失4球。另外，維迪同艾夫拿係在當季季中加盟，佢哋加盟後出場機會係唔算多，而且經常都有犯錯。維迪在有個訪問都講嗰時剛剛加盟曼聯係非常失落，好彩有費sir嘅不斷鼓勵同俾機會，就做就咗今日嘅維迪。當然其後由2006-2007年後因為大家夾過一年，熟悉各後衛嘅優點缺點後，再加上大家互相補位，所以這年失球數字大減，從而在聯賽再次奪冠。

講到迪基亞，當然佢加盟咗曼聯一段時間，而佢嘅把關能力亦不用懷疑。不過，佢嘅優點同缺點實在太明顯。佢優點係反應快同擅長用腳擋波，而缺點就係對方開角球時係好少出嚟接波，佢會留在龍門前守候，加上連迪洛夫嘅身高不夠，所以當對方有角球、罰球或做高波傳中就係佢哋入球嘅好機會！我相信新加盟嘅麥佳亞同雲拜沙卡係知，知道要在嗰啲時候要守護門前危險地帶，但知同做係兩回事，再者加上對方係有備而來，所以曼聯守高空波係難上加難。

當年曼聯嘅銅牆鐵壁都要夾過一段時間，你好難要現在這班後防在幾場後就建立到完整嘅默契，加上迪基亞已經被對手睇穿，俾我對住佢都唔會射地波同埋屈佢高空波啦，連迪洛夫都係一樣。要佢哋調整自己係好難（身高係天生）。睇吓其他隊友可否在高空波方面幫佢同連迪洛夫一把。

攻擊手：我點解唔用前鋒呢？因為我想將翼、攻中同前鋒一齊講。當時朗尼、C朗、沙夏同星仔都係新加盟曼聯冇耐。我想特別講講C朗；佢初初嚟到，只係識得死扭，交波時間欠準。係到佢加盟第二年先開始捉到傳波嘅要決，但當時射門同罰球嘅入球率係唔太高，直到2006-2007年開始見到佢獨有嘅百步穿楊。朗尼當年打副鋒，拍夥雲佬進攻；當雲佬被貶為後備之後，朗尼就取代雲佬位置，可惜佢初時亦頻頻失機。星仔初初加盟有活力有速度，可惜把握力較差，要到季中先取得首個入球。C朗、朗尼、星仔直到加盟第二、三季先開始建立默契同發揮自己獨有嘅技術同表現，使到無論在無球走動、傳球、傳中、頭搥、遠射同近射都樣樣皆精。

蘇B係攻擊球員出身，佢會唔知攻擊手需要啲咩？佢係需要班年青人去領悟，去自己創作一啲其他人學唔到嘅攻擊方法，換句話說蘇B係要福仔、馬仔、連舞王、占士佢哋要「精」於以上我所講嘅攻擊手法。「精」同「識」係唔同；識唔使我多解啦，「精」係對手明知你係做嗰樣嘢，但都阻止唔到你。例如：龍門明知你射左下角，但佢都阻止唔到你，被你射入網。C朗佢哋都要用成三年時間先至開竅，而福仔佢哋跟咗蘇B只係大半年，有時候真係要等待。

其實點解要去到咁盡呢？因為蘇B有個艱難嘅任務，就係要為曼聯建立新嘅皇朝！佢要超越曼城利記呢啲超班馬！（仲有熱刺）經歷過兩代皇朝嘅佢，相信佢已經知係要有咩元素，只不過都係一句知同做係兩回事。例如：我教個仔（佢讀小一）沖涼，沖涼對我嚟講好簡單，但要佢獨立識自己沖就可能要等一段時間。加上蘇B都算黑仔，4場波射失兩球十二碼，同埋馬仔又傷咗。所以希望國際賽時間，各球員有調整。

中場：本來唔想講普巴，因為佢既然有離心就唔好為難佢，應該放佢走。但佢現在始終係一位曼聯球員，我就略略講吓佢。我會以「表現自我」嚟形容普巴。佢毫無疑問係有天賦，加上在袓雲達斯跟派路學嘢，實力不容置疑。但佢點解水準咁飄忽，好簡單！因為佢會做一啲令自我享受到比賽嘅嘢，例如：參與進攻。因為可以爭取入球。但當要佢做啲佢厭惡嘅嘢，佢就會鬧情緒。例如：回防。回防成功又唔會得分。普巴如果要調整自己，佢要學習「承擔責任」！個意思係要佢樂意做一啲普遍球員唔係咁想做嘅事。例如：俾隊友控球，自己就無球走動或者回防。如果我要以一個球員做例子就係朴智星。佢嘅無球走動，除咗煩擾住對手，亦都給予隊友動力。但有時候佢嘅無球走動可能冇得益，不過佢都照做，原因就係「承擔責任」，佢一在場就會用盡力去打到最好。所以點解蘇B點解成日出連舞王，因為佢有星仔嘅影子。

最後，每個球員都有唔同嘅特質同性格，而每一種特質同性格都有正反兩面，好似連迪洛夫係一位好隨和嘅人，正面嚟睇佢易同隊友相處同合作，反面嚟睇當佢要同對手碰撞就顯得唔夠硬淨。我哋好難只係要每一個球員嘅正面影響，啲反面嘅影響就同我消失。如果係咁每隊球隊就毫無缺點。所以球員除咗要了解自己反面嘅影響外，還要將佢哋適時地隱藏。萬一弱點暴露咗出嚟，就盡量唔好傷到要害。（即係唔好俾對手輕易射門）

愛華士專欄：不完美、可接受、要改善？

開季一勝二和一負，主場負給三十年沒有輸過的水晶宮，作客面對最後十人應戰的修咸頓還是和波而回，曼聯的開季顯然並不是最理想，尤其是死敵的利物浦四戰全勝，同市宿敵曼城亦三勝一和，甚至在聯賽榜要委身李斯特城、水晶宮和韋斯咸之下，在這個沉重的氣氛下一眾曼聯迷自然不是味兒。

麥佳亞：普巴，成績唔多好有冇得攪呀？…….（Source: Newsweek）

藉著國際賽期，小弟總結了六個有賽後球員評分的網站/英國報章，根據他們的評分簡單地計了平均數，以此總結開季時的表現。當然這種評分少不免略帶主觀，例如 Manchester Evening News 經常對表現不佳的球員有頗激進的評分，而且不幸地六個媒體中也不是每場都有評分，略略令這個比較稍為不完美。，或許就可以看看開季至今有誰是曼聯餘下比賽可以依賴的對象，有誰應該被打入冷宮。六個網站/英國報章如下：

Manchester Evening News

Sky Sports

Squawka

Express.co.uk

Mirror Online

The Independent

*曼聯對水晶宮及修咸頓對曼聯部份報章沒有球員評分

*黃色格代表出場時間太短或報章沒有為後備球員評分

各球員表現（由高至低）

雲拜沙卡（平均分：7.06/10）- 極速融入，奈何傷後恢復如何有待觀察。

馬斯亞（平均分：6.69/10）- 移正中鋒後入球數字提升，但部分比賽期間依然隱型。

麥佳亞（平均分：6.60/10）- 算是穩定了後防，默契尚待建立。

占士（平均分：6.40/10）- 意外驚喜，唯望並非短暫虛火。

格連活特（平均分：6.00/10）- 出場時間太短，未見真章。

迪基亞（平均分：5.92/10）- 不在最佳狀態，連國家隊正選都受挑戰。

麥湯米尼（平均分：5.92/10）- 中場工兵，防守穩健有餘但串連未夠火喉。

梳爾（平均分：5.83/10）- 再成玻璃人，傷癒後能否重拾狀態令人懷疑。

拉舒福特（平均分：5.83/10）- 腳風欠順，處理傳射盤扭決定太急燥。

普巴（平均分：5.81/10）- 球隊運作寒暑表，奈何狀態比少女心事更捉摸不定。

馬達（平均分：5.75/10）- 未獲領隊信任，但出場時稍有改善中場運作。

楊格（平均分：5.75/10）- 救火老將，奈何傳中質素強差人意。

安祖斯佩利亞（平均分：5.53/10）- 除了第一場助攻一球外，開季至今未見實質貢獻。

連加特（平均分：5.52/10）- 隊中戰犯一號，中場屢屢失去控球罪魁之一。

連迪路夫（平均分：5.40/10）- 隊中戰犯二號，經常成為失球的佈景版。

（Source: The Sun）

馬迪（平均分：5.00/10）- 出場時間嚴重不足，評分未準確顯示其能耐。

光環耗盡後.....

（Source: Goal.com）

蘇斯克查（3/10） - 頂著 99 年神奇三冠王絕殺封王的無敵光環，加上費 Sir 左右手費蘭，蘇斯克查一度帶領曼聯打出一段長時間的長勝，亦曾在作客巴黎落後兩球下淘汰陣容豪華的巴黎聖日門。奈何自作客輸給阿仙奴之後，球隊表現直線下降，以至丟失歐聯的參賽資格。開季主場赢了車路士四比零之後，作客被黑馬分子狼隊迫和尚算情有可原，但接連在水晶宮及修咸頓失分則叫一眾曼聯迷失望。

歸根究底，曼聯自換上蘇斯克查帶領之後，打法一直十分單一，四二三一或四三三打法其實自雲高爾三後衛實驗失敗之後已經一直使用。到蘇斯克查手上其實打法上只是更著重提升球隊運作速度。的確，曼聯陣中快速球員不少，可是蘇斯克查麾下這種打法極度依賴球員的狀態，以至當球員尤其是中場腳風稍有不順便錯漏百出。這種情況在水晶宮及修咸頓的比賽上更為明顯，球隊不是在中場自己搓失被人反擊，就是只只能刻板地橫傳及盲目地作無謂的個人突破。

希望你渡完假之後有得出場啦！（Source: The Sun）

蘇斯克查另一被質疑的地方在於用人上，上述表上可見球隊用人非常固定，只有在修咸頓的比賽因為球員傷患及剛主場輸波後才有稍大的變動，而且用人都偏向自家的青訓，而忽略部份前幾任領隊收購的球員上。重用青訓球員本身是好事，奈何球隊陣中實在欠缺一位堅尼式的老將帶領，將一眾夢遊的年青球員叫醒，出場陣中除了最老資格的楊格外，在隊中稍具資歷的竟然是連加特、普巴和馬斯亞，怎能寄望他們可以以領袖身分帶領球隊。個人認為，經過開季之後，一些較少出場的球員如馬達和馬迪、甚至去季未盡人意的費特、鍾斯和洛荷都值得一個出場機會，讓部分開季後狀態一般的球員如連加特、佩尼亞或連迪路夫有喘息的機會。

開季的十二碼風波，突顯了蘇帥管治的幼嫩（Source: The Independent ）

最後，蘇斯克查自己管治實在有檢討的必要，戰術單一和換人永遠只是對位換人已經不用多言。狼隊一仗的十二碼風波更加顯示蘇斯克查欠缺強勢的一面。個人認為本身十二碼沒有固定人選雖然不常見，但也不一定是不可行。可是蘇斯克查在普巴射失十二碼導致和波之後，卻讓人有一種怯於傳媒質問的形象，並沒有強硬捍衛自己的決定。雖然他堅不堅持己見和拉舒福特是否射失對水晶宮的十二碼沒有直接關係（況且十二碼中柱實在是欠運多於一切），但他對球隊長期的懷柔，只有安撫而沒有鐵腕的形象，難免對他的管治威信有所削弱，難怪縱使管理層開出三十七萬周薪的高薪，迪基亞仍然對續約猶豫不決；普巴縱使盡享場外場內的自由，但總是記掛何時轉會爭歐聯和金球獎。試問連球隊兩大具級數的主力都不是對曼聯沒有異心，球隊怎能運作順利？

陣痛未完

毫無疑問，經過一個暑假的收購和演練之後，曼聯的深層次問題依然未有得到完滿解決，縱使今季至今三個新收購的球員都有令人滿意，甚至三人都候選八月的球隊的最佳球員，可是打法上的不成熟，隊內本身球員不論狀態或相互配合方面都未臻完美。而以帶領一隊受全球球迷注視、同時擁有輝煌歷史的曼聯，這一刻的蘇斯克查的確未證明自己有相符的能力。

話雖如此，其實曼聯如今面對的問題早就在費 sir 退休之後已經漸漸浮現，而經過三任領隊，甚至兩位曾經是歐聯冠軍領隊帶領下，曼聯的進步依然未足以壓到其他列強取得歐聯的入場券，就知現時曼聯的狀況，並不是一個暫時欠實質帶隊功績，只是在球會有特別地位的蘇斯克查可以獨立處理。今季收購暫時總算對症下藥，而為球隊帶來不穩因素、人工亦高的盧卡古和山齊士都已經離隊，若果領導層可以盡快確定本該去季尾聘請的技術總監，幫助領隊去解決部份問題，並且給予足夠時間讓領隊找到心中可以發揮的打法，即使開季脫腳，失去七分也未必一定等於整季都失敗。

不知道登了這篇文之後，會否見到他坐上技術總監之位？（Source: Telegraph.co.uk）

[多奇出品] - 曼聯，請給領隊多一點時間！

一個人如果要進步，首要因素係要有偏差。偏差嘅意思係指人們所做出嚟嘅結果，同自己所預期嘅結果差。偏差出現了就需要用時間搵出偏差嘅根源，作出調整，然後透過反覆練習，從而令自己所作出嚟嘅結果同預期嘅相同。

在這裏，我想探討一下偏差嘅根源同調整這兩件事。

一，偏差根源。一個偏差可以由好多成因做成，知道偏差根源可以有效率地作出修改，從而得到理想嘅效果。例如：我在禁區外和十二碼點起腳射龍門。在十二碼點起腳射10球有10球射中龍門，但在禁區外10球只有7球射中龍。這樣可能有好多原因，好似射門隻腳用力過度，重心腳不穩或唔適應新球鞋等。我哋可以錄影搵出有偏差嘅原因。

二，調整。我哋搵到偏差嘅根源，然後要作出調整。我用調整點解唔用改正呢？改正係當人犯錯之後要做出嘅對應，錯就係否定當時人所做的，將件事重新再做一次。偏差係係對以前還有價值的一部分保留，然後將冇用的部分消去，再加入一些新元素。例如：當有人邊睇住個波邊盤球，咁樣佢盤球時好難睇到其他人，這個時候教練就叫佢改正，叫佢唔好望住個波盤球。調整係當有人射波時射唔中龍，可能佢踏重心腳唔夠穩，所以佢做射門動作略略微調，鎖緊腳腕。

而點樣可以做好搵偏差根源同作調整除咗靠天賦就要靠時間嘅浸淫。現在曼聯就需要走回舊路，要容許領隊有偏差，然後調整；時間可能要幾年，原因唔係單單在於領導能力，亦都唔係班後生主力唔夠成熟咁簡單，而係因為足球係要用相對嘅概念。

即係話曼聯進步時，其他隊都會進步。曼聯隊波在一方面有優勢，另一隊在其他方面亦都可以有優勢。強如曼城同利物浦亦都要經過艱難期先有現在嘅成績。我相信費格遜如要插手，佢係可以嘅。而佢選擇放手俾下一代就係想佢哋增加經驗值，透過自身經歷去打造一隊以自己為獨特風格嘅隊伍。這難怪佢哋唔要渣古、山神同馬迪(馬迪仍在隊內)，靴里拉亦都走咗。

最後，如果曼聯想再次建立皇朝就一定唔可以炒蘇B，我寧願曼聯用幾年時間浸淫，原因好簡單，因為佢哋之前已經請過摩佬，方丈同莫耶斯。佢哋建立唔到皇朝其中一樣重要因素係英超對手一係太強，一係就實力非常接近。唔似以前90年代只係得阿仙奴，或2000年代得車路士同阿仙奴做競爭對手。當年英超競爭性唔似依家，就好似西甲咁，上季衰極嘅皇馬都仲有歐聯踢，英超果季衰d隨時連歐霸位都無埋。現在有Big6，而中游球隊亦都因為賣有潛質球員而獲取高額轉會費，從而有能力簽入多名質高嘅球員，無疑令大家嘅實力拉近。

總結，如果以蘇B計劃去建立新皇朝，一係就好快被炒，一係就等到流失一班球迷之後，慢慢建立一支有過往曼聯特色嘅球隊。球迷們，你哋會選擇邊樣？

[多奇出品] - 普巴與連加特

首先我覺得普巴係攻守俱佳嘅球員，但在防守時我看唔到佢享受防守，佢嘅身體語言表達在回防時係唔願跑去回防。不過，在到佢參與進攻我可以睇到佢處事集中，全程投入同具有創造力的一面。我哋成日講佢要點改善缺點，倒不如俾佢哋發揮長處，做佢喜歡同享受嘅工作。

連加特在進攻方方面嘅特點係佢擅於分波，在前場做逼搶較其他隊員快同有威脅，而當佢冇波在腳時佢亦都勤於走動同埋佢同福仔，馬仔嘅默契佳，佢有當年朴智星嘅特質。可惜，作為一位攻擊球員佢欠缺咗兩重最重要特質；就係俾對方後衛嘅危機感同埋射門嘅準成度。例如：當佢見到對手在前面，佢就多數都係橫傳，佢唔會在適當嘅時候正面挑戰對手。而在射門方面，佢唔係冇射門欲，只不過係經常射唔中龍門同埋撻Q。

不過，我哋可以推普巴振10號位。如果普巴可以利用佢有威脅嘅遠射，獨到短傳入滲加上佢嘅高大身形嘅頭搥，就可以增強曼聯進攻嘅強度，亦都可以減少佢在後場扭波失誤被人打反擊的機會。仲有普巴係唔係一個喜歡經常跑動嘅人，佢係屬於一個踢位置嘅球員，即係跑動唔使多，只係適當時候走到一個有威脅嘅位置就得。

反而連加特可以俾佢試吓打防中。因為防中需要一個擅於跑動嘅人，再加上曼聯現有嘅中場麥湯文尼同馬迪都係踢位置，靴里拉又走咗，所以中場補個勤於跑動嘅人係好重要。佢能夠不斷回防為中堅作屏障，亦都可以在後場拉空位置等後場嘅人可以送個皮球去前面，就似以前當時費sir將前鋒阿倫史密夫改造成防守中場。另外，佢亦都喜歡當有敵人在前面時就將個波傳俾人而唔係去扭過人，咁就減少好似普巴在後場扭失波嘅情況。

我個人覺得，踢波要進步唔係好似讀書咁，要搵出錯誤然後改正，而係要因材施用，利用球員嘅優點，隱藏佢哋嘅缺點。當一個球員開始踢到有信心，缺點都會變成優點。

[K11出品] 曼聯K角度 - 力有不逮

敗給水晶宮後，開季三戰勝和負各一，由夢幻回到現實，其實開季前已知今季會是磨合期，不應抱有太大期望。來到作客修咸頓，開賽前已有心理準備未能全取3分，而開波後主隊的修咸頓更主動壓迫，極害怕不穩的曼聯會先失球，幸好球隊用冷靜回應了，更由占士於10分鐘射出漂亮的入球領先，不過其後球隊未再能拋開比數，下半場更被修咸頓不多的攻門追和。當危機感再臨時，修咸頓的丹素於73分鐘兩黃一紅，總算解除了曼聯今仗落敗的危險，餘下便是能否於打多一人下勝出，可惜蘇斯克查的換人及球隊的板斧不足，感覺像是力有不逮的情況下，以1:1完場，各得1分。

正選陣容方面，門將為迪基亞，後防右至左為雲拜沙卡，中堅為連迪洛夫及麥佳亞，左閘為隊長楊格。防中為麥湯米尼及普巴，進攻中場右至左為佩利亞，馬達及占士，正前鋒為拉舒福特。

門將方面，迪基亞今仗所面對的兩次中框攻門，其中一次便是失球前救出丹尼恩格斯的頭鎚，但不足一分鐘後便被維斯達哥於小禁區壓贏連迪洛夫一頂入網。或者有球迷認為此失球可以由迪基亞出迎但要知道此外彎的急勁傳中，最易令門將失位而更增加了撲救的難度。(雖然最終仍然被頂入)。除此之外，其實迪基亞沒受甚麼威脅。

後防方面，右閘雲拜沙卡今仗助攻頻頻，17分鐘入禁區接應麥湯米尼傳中射門高出，而他自己真正有威脅的傳中球要去到78分鐘才出現，可惜拉舒福特來遲一步了。

左閘的楊格，今仗代替梳爾上陣，表現算是不錯，而且也頻頻助攻，但可能久疏戰陣而令其傳中質素也受影響，到了88分鐘助攻嘗試了燙射可惜柱邊出界。

中堅方面，今仗麥佳亞基本上做足自己本份令修咸頓鋒線難越城池半步。如果要雞蛋裡挑骨頭便是如同里奧大哥所言，麥佳亞應該要於所失一球的防守佈陣時選擇對手那位球員最具威脅而去作出防守。另一中堅連迪洛夫，今仗又成為焦點了，5分鐘便開始作出驚嚇大家的場面，回傳乏力差點令迪基亞遇上危險。54分鐘由後場帶波出擊，誰不知被迫搶後令修咸頓來一次突擊，結果57分鐘難逃一劫，修咸頓的傳中被維斯達哥壓贏直頂入網。修咸頓幾分鐘後馬上換入朗治明顯嘗試再次衝擊連迪洛夫而作出的調動，幸好未再有危險出來。雖然賽後蘇斯克查作出維護，不過連迪洛夫這兩仗過禮貌的缺點再次浮現。

防守中場方面，麥湯米尼今仗其實有不俗演出，為普巴及後防線做好了保護。亦有參與助攻，傳中或射門也有一定威脅，更引來丹素侵犯領下第二張黃牌使球隊得以多打一人，只是球隊最終未能勝出而已，82分鐘由格連活特入替。加強攻勢的曼聯換入格連活特期望能取得致勝球，不過出場後被委派到右翼的他發揮不多，曾於禁區內被踢跌但球証無表示，87分鐘於禁區頂的燙射極具威脅但又被門將根恩救出。期望日後能看到格連活特出任前鋒位置，使他的最強能力可以有更多的發揮。

普巴方面，今仗表現有點患得患失，特別是在上半場尾段的時候更甚，多次傳失或被迫搶後失掉控球權。不過下半場情況慢慢改善而且於馬迪入替後壓得較前，兩次斜傳入攝禁區的拉舒福特也有威脅，只是拉舒福特均未能把握。

進攻中場方面，今仗馬達取代連加特成為正選，明顯地令球隊的質感與流暢度更高，包括了與隊友的one two或簡單的斜線也做得更好，68分鐘由馬迪入替。馬迪今季首次英超登場，而他的入替正可以讓普巴推前一格進攻，而馬迪則負責防守及控球節奏，表現未算突出但絕對合格。

右路的佩利亞今仗未能表現自己，無論攻守上也不顯眼，接近半隱形狀態，使右路未能為對手產生威脅，結果68分鐘由連加特入替。連加特入替後其實同樣不太顯眼，始終面對密集便更難令連加特發揮，最有威脅來自86分鐘禁區頂的燙射柱邊出界。

左翼的占士，今仗再次展現光芒，11分鐘的漂亮射門便為球隊打開紀錄。2分鐘後便差點再下一城可惜被門將根恩救出，其後也有兩次的傳中球極有威脅，可惜隊友未能把握。至後比賽末段亦盡力跑動，但體力明顯下降後，也未能再帶來威脅了。

正前鋒的拉舒福特，今仗最少有4腳射門可惜均未能好好把握。再加上一兩次接應傳中球的衝門決心與觸覺，感覺上拉舒福特未在狀態。而直接一點說，我K11感覺他不夠決心，就是要有前鋒埋門的決心。另外，他太多的回到自己中後場迎波，不是不好但卻是太多了，有時需要互動讓隊友後上，但有時便需要於前點控好球權等待隊友支援。

戰術分析方面，蘇斯克查今仗肯改變了，把馬達代替連加特但卻同時帶來佩利亞，此安排會出現一個問題便是球隊過多控球型的球員，結果中前場真正不斷無球跑動的只有占士及拉舒福特，嚴格只有前者因為福仔也開始喜歡持球了。這樣會失去了一個前後拉出空位的互動力。若果正選排位是左占士，右福仔，前鋒讓格連活特出任而進攻中場則由馬達或佩利亞來擔任，球隊的速度與組織力仍然可以維持均衡吧。

防守上，基於上場連迪洛夫被舒立普頂贏後令艾耶有機會單刀入球，今仗看到麥佳亞與雲拜沙卡於連迪洛夫在三閘線與對手跳頂時也作好準備，收窄防守網及準備包抄，結果上半場有一次類似情況，連迪洛夫再次頂輸但今次雲拜沙卡作好準備取得第二點奪回球權。未知是否蘇斯克查的要求還是他們防守線的溝通，但總算是改善了這個問題。

最後是蘇斯克查臨場換人的安排，用馬迪換馬達，將普巴推上一格這安排算是合適，亦令普巴有更加交出致命傳送的機會，不過用連加特而不以格連活特入替佩利亞則有點商榷餘地，這個換人可說是毫無效果。而即使82分鐘由格連活特入替也不把他放在最前線而是右翼也見蘇斯克查未夠果斷。未能發揮格連活特的最強一環 - 埋門。希望在未來能看到臨場換人的決定能更加好吧。

雖然回望過去，今季曼聯是要慢慢靜待的，也從今場賽事看到球隊有想谷但谷不起的感覺，即使對手少踢一人也不見得尾段有如大軍壓境之氣勢，顯得力有不逮的感覺。鳴謝各位支持文字直播及即討區，國際賽後見。

[K11出品] 曼聯K角度 - 成事不足

今季以主場大勝車路士揭幕，其後作客與狼隊和波，回到主場面對水晶宮，期望再以大勝回歸，球隊亦以強勢開賽並佔盡控球，可惜卻被水晶宮一次簡單高空攻勢二傳後，單刀射入被領先。雖然曾經再次獲得12碼但拉舒福特射中柱彈出不入，以為要失分之時卻由占士於88分鐘追平。由失望變希望再期望反勝之時，93分鐘再次被對手領先，3分全失。今場即使佔盡控球優勢且極多攻門，可惜空有控球，變得成事不足之感，亦有射門但多屬不中框的攻勢，總是差一點點卻最終變成落敗而回。

球隊陣容方面，門將為迪基亞，後防維持今季正選，分別為梳爾及雲拜沙卡作為左右閘，中堅由連迪洛夫及麥佳亞負責，防中為麥湯米尼及普巴，進攻中場由占士，連加特及拉舒福特負責，正前鋒為馬斯亞。

迪基亞方面，今仗又是相對得閒的一天不過上半場的32分鐘卻突然迎來佐敦艾耶的單刀波，結果就此失球了，3分鐘後差點被沙夏考起，幸好今次面對近射直接擋出。下半場又是再來得閒的時光，入鏡率也不多，可惜比賽去到補時階段，93分鐘面對雲當賀治的近射卻竟然失掉了近柱，此失球迪基亞也要負上一點點責任了。

後防方面，左閘梳爾今仗只踢了半小時多一點便因傷退下火線，而其實開賽8分鐘便有一次助攻的機會接應麥佳亞二傳後上射門高出，最終33分鐘由楊格入替。楊格入替後於左路相當活躍，始終楊格於體力充足下仍有一定戰鬥力，更曾經助攻至對手禁區內作出突破及傳中，而其後多次的死球或角球也由他來處理。53分鐘也曾助攻至禁區內接應雲拜沙卡右路傳中可惜食死了撻Q彈高出界。

右閘的雲拜沙卡，今仗倒戈戰其實維持一定戰鬥力，不過面對舊隊友的沙夏也未能完全壓制對手，而所失第二球其實已盡力將沙夏腳下球踢走但偏偏落在雲當賀治腳下且推過雲拜沙卡再施以射門。

中堅方面，連迪洛夫今場必定是第一個失球的罪人，由於被舒立普頂贏而讓散耶有單刀機會。當然中堅不一定要百份百頂贏但對手絕非擅於高空球的球員，而且亦未見此球對於一名要立足於英超的中堅來說是太大難度下，也可能因此令身旁的雲拜沙卡及麥佳亞未有戒心要包抄......麥佳亞方面，除了第一個失球以其能力可以更早預測並作出包抄，其餘時間其實仍是水準之作。高空波及搶截也做足，而且亦有助攻的制空力，9分鐘的直傳更是致命，可惜仍未能協助球隊補住一分。

防守中場方面，麥湯米尼繼續正選而今場波非常積極，8分鐘便接應角球頭鎚攻門可惜高出，其後與普巴平排於防中位置負責控球節奏表現也算不俗。由於仍然落後，到了下半場壓得比普巴更前，68分鐘闖入禁區被踢跌為球隊搏得12碼，77分鐘禁區頂的射門雖然帶點勉強但也屬值得嘗試的舉動，84分鐘由馬達入替。馬達入替後於中路變成自由人的角色，走上走落去牽引著中前場，但時間不多，效果不明。

普巴方面，經過上仗射失12碼成為眾矢之的後，今仗似乎不太影響他的演出，不過由於需要墮後教炮，也壓制了其出擊能力，只能於一些角球或死球才能衝入禁區作嘗試。直到41分鐘的直射罰球機會才來第一腳起腳射門可惜楣頂高出。下半場由於球隊繼續壓前進攻，普巴衝入禁區的機會也增加，中段曾連續兩次衝頂高出。戰至88分鐘，普巴失掉球權但拼力搶回並發動了追成平手的入球。可惜的是，92分鐘於中場被賓迪基迫脫腳下球，今次回不了身且球隊亦因此而被絕殺。總體來說，普巴今場表現不俗，更有幾次關鍵傳球，但若要作為球隊重心且有成熟領軍力，完場前的失掉球權可以處理得更為小心，以其級數應要洞悉球隊已經大軍壓前，而且作為其保護的麥湯米尼也已經換了出場下，此時此地便更要小心，這是經驗來的，只是今次學費是球隊的3分而已。

進攻中場方面，右翼的占士今場其實表現相當活躍，16分鐘的近射埋門若非雲當賀治封阻便已經開了紀錄。47分鐘重演多一次又是雲當賀治封阻成功而已。到了70分鐘，占士移到左路進攻，一次推進被阻卻被球証反指插水再次領下黃牌。不過88分鐘終於努力得到回報，接應馬斯亞傳送於禁區頂燙射死角入網，只可惜最後球隊未能取得分數。

左翼的拉舒福特，今仗相信是今次兩隊球員射門次數最多的一位，可惜罰球或遠射甚少命中，即使中框也 變得軟弱無力的射門。到了68分鐘有射12碼的機會，門將撲錯了方向，卻又射得太盡而中柱彈出。今天絕非拉舒福特的一天。不過值得留意，當連加特被換出後，拉舒福特移到10號位置的中場中，感覺是有不俗的可能性，或者日後可以再看到此安排吧。

進攻中場中的連加特，今仗開賽初段看似表現有所改善，不過慢慢地又只是駁腳及迫搶的工作，曾經有更好機會亦白白錯過，包括了其中一球普巴的直傳，最終一控.....非一射而是一彈，控離了身，到底連加特的定位如何呢？是否有必要場場均是正選進攻中場中的位子呢？馬達或佩利亞是否真的不能發揮蘇斯克查的戰術體系呢？仍是一個迷。56分鐘由格連活特入替。格連活特入替後，位置於右翼但表現一般，可能如蘇斯克查之前的評價，中鋒位置才是綠木的戰場。

正前鋒的馬斯亞，今仗表現其實不俗，包括控球，運球等等，看到其狀態不俗。不過面對密集後防，本身不是柱躉式中鋒的他確實不易應付。最有威脅的攻門要去到54分鐘，接應直線於禁區頂順勢轉身，被守將拉住仍然勉強射門因此偏離目標。奇怪在於球証卻對此拉人視若無睹，即使完成攻門亦不認為有何得益可言，VAR也沒回看，想不通吧。不過到了88分鐘，因為馬斯亞的策動後再直接助攻給占士取得入球。到了補時階段，馬斯亞疑似拉傷，但已用盡換人名額下也未能再多作貢獻，而且被絕殺的一球也因此未能作好防守雲當賀治的準備了。

戰術分析方面，首先又是用人及排陣問題，強強對碰用上連加特，我K11不認為有問題，但與中下游球隊兼預計會佈嚴密後防加突擊為主的球隊，何不用上一位技術型多一點並可以傳出關鍵傳送的球員如馬達或佩利亞呢？結果連加特於今場比賽的作用又是駁腳再駁腳，就是欠缺了能交出手術刀般傳送的球員去撕破對手防線吧。

直到格連活特入替後，蘇斯克查嘗試了將拉舒福特退落10號位置，這也是一個好的嘗試，不過如果想球隊攻守平衡做得更好，其實可以用佩利亞入替，以便他與普巴可以輪流壓入禁區，又不怕中場不夠防守力。

另外，其實球隊今仗的確如蘇斯克查賽後所說，統治了比賽卻控制不了球賽，做到了控球，亦產生了機會，埋門質素卻不足成為了關鍵。感覺如同拿到了控球，控制了比賽，卻成事不足.......最後更落得被絕殺的餘地。

學費交了，要有所進步，希望下一場看得到。鳴謝各位支持文字直播及即討區，下場見。