[多奇出品] - 李奧與維迪 X 麥佳亞與連迪洛夫

大家都知道李奧同維迪依對組合曾經令好多前鋒聞風喪膽，亦都為曼聯建立咗好多汗馬功勞，佢哋值得被一班後輩視為榜樣，現在就分析一下佢哋有咩特點：

個人能力方面：

李奧：曾經打過Boxing嘅佢，於一對一嘅防守非常有心得。佢响有啲人想帶波過佢時，會冷靜地等待，到盤球球員有少許甩腳或個時機合適就會出腳準確地攔截。有時候佢亦唔會只係"行"住人，佢會趁機响對方未攞波時先發制人去搶走個波。另外，佢處理高空球同對手爭頂時亦都會利用佢嘅身高同健碩身型去主動爭頂來球。仲有當要同對手爭奪有利位置而糾纏，佢係適當哋運用身型同手去壓迫對手但又好少犯規。而佢嘅控球技術亦都好精湛，佢係透過做一啲假動作去騙過對手，然後將個波帶生。好多時佢係後場發動攻擊嘅第一點，所以佢嘅交波同樣哋都十分穩陣同淡定。

維迪：佢係一位勇士，當對方有波在腳時，只要係响佢嘅防守區域，就會主動作出攔截。而佢嘅攔截係快而準。就算响嗰時未合時機出腳，佢都會主動彎低腰貼近對手力迫控球者。另外，佢都係一個健碩同肯去主動同高大前鋒糾纏嘅後衞，佢嘅對抗性好強。當敵方球員想攞位，佢就即刻用佢身體條件加雙手去力壓對方。相對李奧，佢嘅犯規就較多，因為佢嘅主要工作係要第一時間搶截。當然佢嘅頭搥亦都好強，佢係主動去力壓，衝住個波嚟頂。對手見到佢咁衝過嚟都未必敢迎個波。仲有佢嘅頭搥助攻特別厲害，佢嗰吓衝頂能力壓對方後衛，從而取得入球。

合作性方面：打雙中堅通常都係一前一後，一個包波一個清波，由於佢哋合作多年都建立咗相當默契。佢哋都有共識係可以互換位置。當李奧包波時，維迪就清波；有時候就相反。佢哋係唔需要特別溝通，而係自動自覺企在自己崗位。而佢哋兩個同時都可以擔當指揮工作同埋前線清波嘅工作，所以戰術運用就更加靈活。另外，佢哋合作咗咁耐亦都清楚知道自己拍擋有咩缺定，而且係完全入晒腦，所以當李奧或維迪偶爾有犯錯，佢哋可以即時作出本能反應去補救，所以有時一啲失誤反而加強佢哋兩個之間嘅溝通，增強番佢哋士氣。

隊友配合方面：由於當時前線有好多獨當一面嘅球員。例如：C朗、朗尼、史高斯同傑斯等，仲有好多，所以後防線相對嚟講個威脅冇咁大，而且前線往往都能夠領先住嚟打，所以响心理上李奧同維迪相對較輕鬆。加上，後防有亦有艾夫拿依個鐵人同埋處理高空波同地波俱佳嘅雲達沙呢位經驗豐富門將更加減少佢地防守上顧慮，令於我方有角球時就可以放心哋上前助攻。

個人能力方面：

連迪洛夫：佢屬於一個技術型後衞。曾經打過中場嘅佢，控球同傳球都算發揮得唔錯。不過，佢身體質素對比英超前鋒就差甚遠，再加上佢性格太過斯文，所以對抗性就差很多，而爭位同爭頂頭搥更係佢嘅弱點。但佢閱讀球賽能力同睇通對手路數不錯，可惜佢唔係一個擅於出擊嘅後衞，好多時佢面對對手都係傾向"行"住，而唔係把握有利時機去作出攔截。佢好似怕咗啲前鋒咁，就算响禁區佢都係咁"行"住，令對手有好充裕時間去諗點再組織攻勢或係考慮射門。

麥佳亞：佢嘅身型比連迪洛夫健碩，但佢同前者都係一個好斯文後衞，踢法唔夠硬朗，不過佢嘅對抗性同應付高空波會比連迪洛夫好。同樣地，麥佳亞嘅個人技術，响控、傳球方面亦做得唔錯，助攻有一定威脅。當有死球同角球佢會主動出擊，以高波衝擊對方防線，可惜由於得佢一個接應點，所以就較難取得入球。此外，佢防守時都係較鍾意"行"住對手，睇定對方起動先會作出反應。佢嘅速度相對連迪洛夫始終較慢，如果對手可以引到佢出嚟就好易俾人過。

合作性：麥佳亞主要做包位而連迪洛夫就主要做抄。不過兩者其實最擅長都係作為一個後防指揮，連迪洛夫跟本唔係一個擅長主動攔截嘅一名後衛。而且連迪洛夫單對單面對英超後衞因對抗性問題往往容易處於劣勢。由於佢哋合作時間唔算好長，所以大家都未完全吸收拍擋嘅優點同缺點。當其中一人犯錯，另一個未必可以即時修補。呢個除咗要大家溝通外，仲要响實戰從錯誤中學習。仲有蘇B搵麥佳亞做後防指揮實在太急，始終佢嚟咗曼聯都冇一季，佢仲需要融入曼聯依隊球隊入面。其實做指揮應該搵連迪洛夫，可惜俾佢做最後嗰個就唔夠人頂。

隊友配合方面：中場麥湯文尼同費特對掩護一對中堅有好大嘅幫助。可惜楊格唔係打閘出生，所以麥佳亞好多時要兼顧佢。另外，馬斯亞復出對前線幫助好大，但監於攻中位置較弱，所以常有組織到攻勢但入唔到波嘅情況，咁對麥佳亞同連迪洛夫做成壓力。而迪基亞雖然撲救技術了得，但救高空波弱同出迎經常猶豫，咁亦對佢哋做成壓力。

最後，現在麥佳亞、連迪洛夫跟李奧、維迪仲差幾個層次，最重要係連迪洛夫對出面歐洲前鋒還可以，但對住英超衝撞型前鋒真係冇優勢。而麥佳亞始終新嚟報到，對佢嚟講無論隊友、教練、球場各方面都係新，所以真係要俾時間佢適應。連迪洛夫雖然响曼聯做領導者都有一定經驗但就對抗性對住啲英超前鋒輸晒。長遠嚟講，蘇B真係要搵個衝得撞得後衞拍住麥佳亞打聯賽，連迪洛夫就打歐洲賽，除非連迪洛夫好似李奧咁學打Boxing，學到點樣同對方球員去抗行。

[多奇出品] - 阿仙奴對曼聯賽後檢討

本來今場對阿仙奴期待係一場大戰，可惜曼聯被對手㩒住嚟攻下輸2比0，究竟曼聯成隊波出咗咩問題？

一、攻擊線在連加特上陣嘅情況下有咩不足之處？

二、中場線費特拍住馬迪有咩不足之處？

三、防線失兩球究竟問題出嚟邊？

一、我諗蘇B一開始用連加特係想利用佢無球快速走動製造空位同交到位波俾馬斯亞、福仔同占士，等佢哋發揮本身嘅優勢。比賽初期曼聯係佔到少少甜頭。好似福仔有腳禁區外遠射，占士搏到球罰球同埋角球。但當曼聯意外地失咗第一球後，優勢就慢慢轉去阿仙奴嗰邊。曼聯前線球員嘗試做壓迫令對方犯錯可惜唔成功，之後曼聯球員想組織攻勢就受制於對方防線。

嗰時好需要一位傳波有滲透性，懂得透過盤球撕破對方防線同埋有遠射腳球嘅一位球員。通常傳球就係費特做嘅，但佢一攞波就被夾擊，俾唔到一啲有滲透性嘅傳球，好似拿卡錫迪多次回防唔俾費特鬆容地作出傳送。所以嗰時連加特就應該挺身而出去組織攻勢同走位。不過，連加特做唔到我所講嘅工作，個波傳落佢嗰度一係佢就回傳，就算係俾佢向前傳個波俾隊友，都無威脅感同隱蔽性，所以啲組織好容易斷。另外，就係由於佢起跑速度唔算高，所以有啲五五波佢都好容易爭輸，當佢爭輸咗又或者同對方爭身位碰撞佢，佢就會慣性地向球証投訴。仲有佢控定來球技巧係十分差，好多時隊友截到個波傳俾佢，往往因為第一腳控得差而失去反擊機會。最後佢嘅射門觸覺係弱，當一個攻中控球、組織、長短傳都弱，射門往往就係得分嘅重點，可惜佢連依樣嘢都無，好似今場有一球射門輕易地被大衞雷斯擋出。佢咁打法就唔係打少個咁簡單，應該話佢係癱瘓咗成條攻擊線。

連加特已經27歲，前兩季已經俾咗好多出場機會，所以佢有足夠經驗，應該係開始步向收成期，不過我就睇唔到。反而佩利亞我曾經批評佢踢得差，但現在開始有改進，當然在球技上可以更進一步。例如：射門嘅時間同準繩度，俾波嘅滲透性。不過佢係有啲技術，好似射罰球，傳波時間都做得好咗。同埋佢唔會好似以前咁帶死個波。例如：佢有一球在中場一邊帶波然後傳一個直線俾馬斯亞，雖然最後俾對方截到，但都係一個好嘅嘗試。馬達其實都係一個好選擇，佢閱讀球賽能力高，擅長小組入滲，亦都可以長傳同射罰球。不過可能蘇B覺得佢身型矮細對抗性弱同埋速度較慢，所以响英超比賽就少用佢。

二、費特同馬迪首先佢哋嘅合作時間唔係好耐，都係兩至三場波，有好多分工都未完全清晰。例如：邊個主要係組織攻勢，防守時企邊度等。大家都知馬迪係一個踢位置嘅球員，佢係憑經驗加上適當嘅企位去阻止對方嘅攻勢。如果要佢全場奔跑去攔截對方球員，佢無論响體力上同速度上都感到力有不逮。不過，佢响對抗性，應付高空波同埋補位方面係做得唔錯。所以佢對啲粗枝大葉以身體抗衡性做主導而速度同技術普通嘅攻擊球員係佔有優勢，不過如果佢要對付啲老鼠仔，踢法刁鑽同埋有速度嘅球員就會感到困難。好似今場要應付奧斯爾、拿卡錫迪同奧巴美揚等球員。佢哋有速度同技術好，防守佢哋腳步快啲同埋要勤力啲先可以應付。所以今場波費特拍住馬迪係打得好辛苦，因為實際上防中得費特一個周圍撲，而馬迪就踢位置，唔係兩個一齊撲，加上麥佳亞速度都唔快，所以唔係咁易跟上佢哋嘅節奏。馬迪唔似麥湯文尼喜歡跑動作出攔截，而且後者走動範圍大，攔截成功率高。就係佢勤於跑動，攔截力強，所以對住啲速度快同有技術嘅攻擊球員都唔會處於下風。

進攻就見到馬迪同費特有爭波踢嘅感覺，兩個都係想做主導，咁會令到費特嘅發揮有所限制，有時費特就企咗喺度，唔知做咩咁。仲有馬迪始終走位較慢，如果對方前場緊逼會好容易會被封住，好難組織攻勢。另外，佢哋兩個主要都係用左腳，所以組織攻勢偏向在左邊，反而右邊發動攻勢較少，令占士同雲拜沙卡上半場無咩波掂。等到下半場，費特多番用右腳傳向右路，又邊先有多啲攻勢。不過，馬迪傳波尚算平穩，要佢交波到腳都好少失，只不個要做小組就較困難。費特同麥湯文尼就一左一右，攻擊時兩邊會較平衡，當然左邊攻勢會略多一啲，因為始終馬斯亞同福仔都係打左邊。同埋麥湯文尼會主動讓個進攻話事權俾費特，等費特可以做更多發動攻勢嘅工作，有時當麥湯文尼搶到個波亦都會主動交個波俾費特。馬迪同費特分工問題要踢多幾場先至會熟。

三、失第一球有兩個偶然性。第一係連迪洛夫以為自己係打後衞嘅最後一個，所以當時佢自不然會佈越位，但佢一時醒唔起現在打最後係麥佳亞。所以我點解成日都話要連迪洛夫做指揮後場嘅工作，當然另外佢哋要在比賽節奏快嘅情況下建立更好嘅默契。第二個偶然性係當對方左邊出波時個波撞到連迪洛夫改變方向，之後成班後衞打咗個突，最後個波就在比比腳下，然後一射，迪基亞捉錯路就被射入。有時改變方向真係睇彩數，個波彈中俾你想唔入都幾難。

失第二球就係比比開角球，平時之前對嘅球隊，尤其係中下游。都係明刀明槍斬高波然後對方就湧過嚟頂波或者係製造混亂。但今次開嘅角球係有滲透性，開嘅方向係曼聯球員意會唔到，然後拿卡錫迪一批，迪基亞已經好反應撲到個波，但就係撲到連迪洛夫背部，控定晒俾柏柏，最後就被佢一射破網。依度亦都有一個偶然性。

今場防守關鍵首先在於兩個防中做唔到個屏障去阻止對方做一啲滲透性傳送，對方兩三腳波就傳到中前場。依個同無咗麥湯文尼有好大關係，始終馬迪防守踢法被對方快速進攻食住，而且佢同費特唔係夾咗好耐。然後，中場被攻破後防就容易散，因為麥佳亞、連迪洛夫同梳爾攔截力無雲拜沙卡咁高，佢哋主要都係"行"住對手，咁就任由佢哋擺佈。最後就係迪基亞開始真係狀態滑落，到依個時候係咩應該出羅美路呢？

踢完依場之後，硬仗陸續嚟。好明顯麥湯文尼嘅受傷影響好大，加上普巴又傷埋，對住一啲技術同速度兼備嘅球隊唔係咁易踢。現在就希望佢可以在轉會窗補強，重燃入前四嘅希望。

[多奇出品] - 般尼對曼聯賽後檢討

曼聯上場贏咗紐卡素，今場作客有驚無險又贏般尼，睇吓有咩嘢可以值得討論一下：

一、福仔同馬斯亞兩個入球處理手法嘅分別同佩利亞在踢法上改變對球隊嘅影響？

二、馬迪踢正選對防守有咩正面幫助？

三、威廉斯踢法上同梳爾有咩唔同效果？

一、首先講佩利亞。之前曾經批評佢踢法過於自我，佢喜歡作一啲關鍵傳送，希望自己每一腳都有機會製造到威脅。佢亦都希望自己爭取入球而經常起腳射門，但今場好明顯佢做少咗我上述所講嘅兩樣嘢，反而去做一啲睇落唔起眼嘅駁腳，睇到隊友就迅速地交啲到腳波，從而令到整個攻勢都順咗好多。第一球就係佢拍甩對方守衛個波然後即刻交俾馬斯亞單刀射入，當然佢响整場波踢得唔算突出，亦都唔係俾到好多致命傳送。但好明顯如果佢做少咗引球推進嘅動作，改咗做多啲分波同無球走動之後，佢嘅作用就比以前增加咗。不過我希望佢唔止做到咁少，响射門選擇同做滲透性傳送可以做得再進步啲，如果曼聯可以响攻中位搵到個識得入波嘅球員，咁就會帶動到福仔、馬斯亞、占士同格連活特多咗好多空間，令到對方守衛想集中防守佢哋感到困難。

然後就講馬斯亞同福仔處理單刀埋門有咩分別？福仔踢法就係明刀明槍以速度盤扭過人然後射門，就係以球速同力量去令龍門撲失。所以當佢單對單過龍門時，守門員係容易睇通佢條路。佢入嗰球當過龍門時龍門係掂到個波，只係最後有運地個波落翻喺福仔隻腳度，然後射入。福仔下次如果再遇到依啲機會，最好做一做個假身呃一吓個門將會好啲。

馬斯亞處理單刀波就比較在行。由於佢射門同帶波都係比較隱蔽，即係對方唔容易察覺佢嘅球路，响對方門將估唔到佢想點嘅情況下，龍門自自然然就要先作出反應，嗰時只要馬斯亞夠冷靜去觀察門將舉動，就可以睇住嚟食。依個就係點解馬斯亞個埋門把握力高過福仔，當然其他人可以話佢哋係兩個唔同類型嘅球員，大家都保持獨有嘅踢法，同埋一個打左翼一個打正前鋒。不過佢哋嘅踢法已經曝晒光，對方球員每次同佢哋比賽已經準備好一連串嘅方法去對付馬斯亞同福仔，所以為自己增加入球本錢係需要。

二、今場好高興馬迪踢翻正選，因為球隊正正需要一名經驗豐富嘅防守球員去分擔同指揮後場工作。雖然馬迪年紀唔輕，而且對住啲速度型嘅球員係比較輸蝕，但如果叫佢對住技術粗枝大葉同抗衡性較強攻擊球員，馬迪還應付得嚟。今場波馬迪佢係跑動唔多但位置感好，佢往往出現响一啲對方唔想佢喺度嘅位置，阻止對方攻勢嘅發動。例如：佢會做一啲協防，响禁區頂塞位，影響對方攻擊球員射門嘅準成度，喺防守角球時佢作用都好大。

另外，馬迪亦間唔中提點麥佳亞應該點樣去企位同防守，分擔咗麥佳亞嘅一啲指揮工作，令到麥佳亞比賽時都有其他經驗豐富嘅隊友去倚靠。始終馬迪响曼聯第4個球季，佢對大部分球員，例如：迪基亞、連迪洛夫、楊格同埋梳爾都有深層認識。加上佢踢法對比一班後生仔嚟講夠硬淨，身型亦都算高，所以對住一啲中下游球隊嘅攻擊球員個幫助係好大。

仲有佢今場波喺控傳球、走位亦都幫到球隊唔少。上半場剛開波時同費特都有少少格格不入，因為費特過去踢正選嘅球賽都係由佢全盤組織攻勢，馬迪初時亦都係想咁。不過，踢到中段之後，馬迪就將個組織攻勢嘅權利漸漸地俾翻費特，自己就多咗做後場控波同駁腳嘅工作，好讓發揮費得嘅長處，自己幫手响中後場做防守屏障。馬迪嗰種同隊友合作性亦都係憑經驗累積翻嚟。

三、威廉斯今場獲選為最佳球員。當然佢最大本錢就係佢嘅活力同埋助攻嘅膽量，今場波當球隊站穩陣腳之後，佢就頻頻上嚟助攻，間中亦都有適當地盤扭。佢嘅助攻引空咗福仔，而且出啲波好有威脅，好似有一球出俾占士，然後占士射門省中對方守衛，彈咗俾馬斯亞，可惜最後射門俾對方守衞護空門。當然佢哋嘅默契仲係有待磨合，如果唔係嘅話進攻威力會更強。不過，佢响防守方面要注意佈越位，因為吓吓都係佢最後一個後衛散出嚟，今場有一球越位爭啲幫對手包越位。

梳爾踢法就比較穩陣，佢主要都係睇隊友走位然後傳波，自己就好少做個人突破，可能之前斷腳對佢做成一啲陰影。但佢嘅踢法係好易被對方守住，因為只係做一樣相同嘅嘢好容易被對方守衛睇穿。所以如果比賽响膠着狀態，佢需要間唔中引球推進引開敵人。防守方面感覺上都係間中有甩漏，佢唔算話踢得好差，但都算合格。今場雖然出場時間唔多，不過作用都好大，進攻唔需要佢做好多嘢，防守就要佢幫威廉斯，等佢唔好走甩人，同埋守角球同罰球時都可以幫手，佢亦都做足本份。

最後，曼聯今場贏波可以話係逼對手犯錯，仲未真係可以完全技術性擊倒對手。始終要破密集唔係咁易。不過今場防守就做得唔錯，希望球隊可以繼續進步。

[多奇出品] - 屈福特對曼聯賽後檢討

曼聯之前贏咗熱刺同曼城諗住前四有望，點知之後兩場一和一負，仲要唔係對強隊，究竟隊波出現咗啲咩問題呢？

有三點值得去討論：

一、連加特無球走動同俾到腳波嘅打法對屈福特究竟有冇威脅呢？

二、換咗普巴落嚟後嘅攻擊線有咩分別？

三、咩因素令曼聯後防一攻就破？

一、有好多球迷對連加特近兩場表現都有唔少嘅批評，覺得佢唔適合打攻中，因為佢冇個人技術，埋門把握力又差同埋又做唔到串連嘅工作。

首先我哋要知道佢係有個人之處，就係佢嘅無球走動同埋一攞到波即刻傳到位波係响前鋒線中少有，球隊亦需要有依種球員。可惜响職業層面嚟睇，得一、兩樣長處跟本就唔足夠幫到球隊場場贏波，因為其他對手會做足準備令佢發揮唔到長處。就好似今場波咁，對手後面塞死晒，前後左右都有人，跟本無位俾連加特去走，而當佢控到個波後，只係分啲到位波，對球隊整個攻勢又唔係特別有幫助。

尤其係當其他隊友都被對方睇通晒路。例如：福仔只係左路引球推進然後推向右邊大位射門。不過今場對方已經睇通咗，所以逼佢去左邊要佢出波，球迷們都知連加特同馬斯亞都唔係搶點型球員，所以根本製造唔到威脅。另外，馬斯亞都被睇通缺乏遠射腳頭同埋身型單薄，所以今場對方守衛主要都係安排後面兩至三個球員响佢身邊，減少佢走動空間。而當佢想入涉時就裝越位，令佢無咁輕易單刀面對龍門。占士就直情搵人專門釘實佢，唔俾佢用速度引球推進。所以佢今場比賽直情係未出過波。

不過我亦不得不佩服連加特，只要一有機會就為自己製造機會。佢上半場曾經有球馬斯亞傳直線然後佢就個人突破單刀，可惜最後佢挑射高出。依個攻勢證明咗兩樣嘢，只要對方後衞一走漏眼佢就可以走位為自己同隊友製造機會，但另一樣嘢係足球比賽最重要嘅把握力佢係好差，如果嗰球入咗，結局可能改寫。除咗依球之外，其他時間佢就無咩表現。

當去到依個位連加特係咪要選擇，究竟佢係要堅持繼續原本無球走動同俾到腳波嘅踢法定改變策略呢？可惜佢只係得一招，如果要佢做小組滲入同一啲穿透性嘅傳送就好困難，佢唔係唔識，只係佢唔夠精，見佢做親都斷欖。攻中最致命就係無變化，就好似猜包、剪、揼，連加特只係識得出剪，對方第一次唔知就有機會俾佢贏，但第二，第三次知道就會被識穿，好容易輸。好似隊隊波都知道佢得一招，所以就作出針對性部署，令佢唔可以發揮佢優點，但弱點就暴露晒出嚟。

二、普巴在球場上嘅能力就真係好強同埋多樣化，後備落嚟短短25-30分鐘，可以作出多次唔同套路嘅進攻。有交完波之後，然後走位入涉到禁區製造機會。當對方後防屯重兵，佢就起腳遠射。佢睇到格連活特同福仔走入禁區，然後就傳個過頭波俾佢哋。當單對單面對後衛佢又可以嘗試扭過對方。仲有佢有把握可以用球鎚入波。我諗依個係蘇B唔俾佢走嘅原因。當然普巴都有佢弱點，就係佢狀態唔夠穩定，有時可以打到曉飛，有時踢到差得慘不忍睹。過去曾試過對曼城落後兩球下追番兩球，但有時候亦會喺中後場扭失波被人反擊。同埋佢係好睇心情踢波，當佢連續有兩、三腳失誤就會發脾氣，跟住表現就開始差。

普巴後備出場之後，佢會令到對方守衛開始分心。因為佢哋已經唔可以只係屯重兵喺後防咁簡單，普巴令曼聯攻勢增加咗變化，唔係單單靠速度去製造威脅。當猜包、剪、揼唔係只係出剪後，對手就要去選擇點樣去對應。慢慢個主動權就落番去曼聯身上，連帶其他隊友都開始發揮到佢哋自己本身實力。例如：馬斯亞在左路引球扭過三個守衛射門。福仔走直線接應普巴長處轉身勁射，格連活特亦都有一吓挑射。普巴亦都以小組滲入於小禁區近射。可惜就係當時屈福特領先緊兩球同埋賓科士打踢到上晒身，唔係嘅話已經入翻一球。所以我覺得今場波雖然係輸咗，但就睇到普巴嘅重要性，只要佢心理質素可以提升同埋能夠解決到佢留隊嘅問題對曼聯嚟講係好事。

三、首先我認為係氣勢問題。麥佳亞無論响頭鎚同攔截方面都做得唔錯，而連迪洛夫比初初加入球隊時無論係對抗性同技術發揮都進步咗，加上有迪基亞快反應嘅撲救，但點解場場都有失波呢？就係後防線無一位熱血領袖帶領同指揮後防。麥佳亞、連迪洛夫同迪基亞性格上都比較內斂，感覺上無嗰種拼搏精神同殺氣，對手遇到依個組合，氣勢上都唔會驚佢哋。我諗响依刻嚟講連迪洛夫比麥佳亞會更適合做領袖。因為始終佢上季踢咗一年，論經驗應該好過新嚟報到嘅麥佳亞。

然後就係抗衡性嚴重不足。曼聯後防太多技術型嘅後衛，要佢哋同其他身型高大同健碩嘅球員抗衡就顯得不足夠。睇番曼聯之前所失嘅波都係對方開死球斬入嚟爭頂製造混亂，然後趁機執雞近門射入。當然曼聯本身都有踢法硬朗嘅球員。例如：拜利同洛荷。可惜佢哋傷晒，唯有繼續用踢法斯文嘅連迪洛夫同埋麥佳亞鎮守中路。

仲有，佢哋唔懂得利用犯規戰術。佢哋已經士氣同抗衡性唔夠其他對手強，佢哋喺後半場輸罰球簡直同自殺冇分別，所以佢哋要避免不必要嘅犯規，但有時亦都要學習响對手開始打反擊時就以犯規阻止佢哋進攻。當然講同做係兩樣嘢，但依個辦法睇到係非常有效，而且相對嚟講唔難，因為大部份球隊都係咁做。

最後，我要講蘇B在球員時代加盟到退休都未經歷過球隊現在嘅狀況，所以在處理危機方面係需要適應調整同加快步伐。加上季初傷兵出現令到陣容調動都有一定困難。例如：有馬斯亞、然後洛荷、梳爾同普巴等。現在傷兵慢慢康復，希望球隊陣容更有深度之餘，蘇B在用人方面就更加適宜。

[多奇出品] - 曼聯對愛華頓賽後檢討

今場比賽之前，曼聯連贏熱刺同曼城，諗住今場可以贏埋愛華頓，可惜最後1比1打和。我哋可以睇吓究竟隊波發生咩事，點解對Big6成績咁好，但對所謂弱隊點解會發揮唔到實力呢？

攻擊線：福仔多次在左路發難，可惜唔能夠轉化成有威脅嘅射門。佢最突出嘅就係上半場嗰球罰球。馬斯亞就响前線冇波傳送俾佢，攻門次數寥寥可數。占士响右路俾對方有極大威脅，有幾次於邊路出波。下半場轉打左邊之後，嘗試帶波入中路，但都係製造唔到入球。連加特表現對比上兩場差好遠，帶動唔到攻勢之餘，發揮唔到嗰種無球走動嘅威力。格連活特射嗰球非常冷靜，穿過對方後衞大細然後入網。但之後再無機會俾佢射門。

簡略地講咗佢哋嘅場上表現，我就想分析翻佢哋咩原因發揮得唔好。個關鍵在於費特同連加特兩個球員發揮唔到佢哋長處。首先費特今場被對方前鋒同中場前後夾擊，令佢做唔到一啲滲透性傳送俾前場，佢多數將啲波分邊，而連加特又分擔唔到費特嗰種傳送工作，所以少啲能夠為福仔同馬斯亞製造入涉嘅機會。而且連加特嘅缺點响今場顯露晒出嚟，就係打攻中最後要係變化，當一套路嘅進攻被睇穿，就要去嘗試改變，但佢帶唔出改變。

另外，愛華頓後防除咗封殺咗費特之外，佢哋屯積重兵在禁區頂，令到馬斯亞同福仔唔容易靠個人能力去突破。尤其係福仔，佢一帶波就有兩至三人去釘實佢，一個包佢，另一個等佢有啲甩腳就去攔截，而且對方後衞一見到佢擺軚就即刻阻止佢做射門動作，從而減低佢嘅威力。馬仔就直情唔俾佢响禁區頂同禁區入面掂波，盡量減低佢一擊中龍嘅能力。對方中堅盡量唔俾佢轉身，即使佢想走位接應來球就會用身體抗衡性去阻止佢攞波。反而占士方面，愛華頓班後衞就容易被佢落底出波，不過其實作用唔大。原因係占士出波唔夠急勁，尤其係地波，所以好容易就俾對方後衛解圍。仲有馬斯亞同福仔都唔係搶點型攻擊球員，加上佢哋响接應傳中波嘅默契完全未建立，所以於邊路側擊發揮唔到威力。

中場突破唔到，就要一啲變化。然後就靠邊線出波，邊線出波被對方後衞睇通咗就要靠角球或死球。可惜，制空力最強嘅麥佳亞對抗性實在太弱，只要有守衞單對單纏繞佢就已經解決到問題，其他球員衝頂能力都唔高。仲有曼聯中前場球員好少可以靠製造混亂而入波，所以雖然班後生仔係有天賦，但應變能力就唔高。仲有愛華頓班球員好識得利用犯規去阻止佢哋打反擊，上下半場夾埋都有三、四次，尤其係戴維斯第一次犯麥湯文尼嗰球。

中場線：麥湯文尼在防守上做得好稱職。無論企立遮線，幫手協防佢都做到防守第一道屏障。由於佢身高腳長，在攔截同爭搶皮球亦都佔有優勢。而當佢搶到個皮球就會第一時間交回個波俾中堅或俾其他有空位嘅球員。不過由於今場壓住對方嚟打，所以期望佢在進攻上有多啲貢獻，尤其係角球同罰球應該利用身高優勢去爭取入球。

費特可以話做到基本要求，在防守上冇咩甩漏。進攻又可以將個波運上前，如果要講就係射門嘅準繩度實在太差，我個人認為在無後衞影響下應該都要射中龍門。基於今場被對方前後夾擊，費特有時可以同連加特互換位置，等响進攻效果上有一定嘅變化，從而令對方出錯。

後防線：兩閘在今場比賽被重點攻擊，好明顯係想搏角球，所以受到嘅壓力都唔少。雲拜沙卡攔截效率極高，基本上係冇人可以輕易過到佢，而且佢好少犯規。不過對方都有一招去對付佢，就係搵兩個球員夾擊佢，務求做成二打一局面，令佢要兼顧埋第二個敵。如果有咁嘅情形，占士會幫手協防。助攻方面始終都係冇咁熟練，出波威脅性不足。梳爾防守就冇雲拜沙卡穩健，但都算稱職，反而佢就喜歡上前場助攻，仲有一球射門，差啲俾佢得手。不過佢同福仔睇落唔算太夾。佢出波亦都係差啲，做唔到一個令對方混亂嘅後果。

連迪洛夫同麥佳亞兩位中堅都冇乜犯大錯，連迪洛夫嗰球失球係非戰之罪，其餘時間都冇走甩人。兩位中堅用波傳波都非常淡定，好少話响後場交失波。攔截方面大致上都準確，而高空波麥佳亞頂晒。麥佳亞有時亦會帶波上中場，引出多啲空位俾隊友。唯一做得唔夠好就係角球同死球嘅助攻威力唔夠強，因為如果前場入唔到波，但又搏到好多罰球同角球，咁中堅就要做嘢。當然唔一定要入波，但都希望可以衝散對方防線。

龍門：迪基亞今場失嗰球係有人犯規，但冇辦法，VAR判入球，但迪基亞係咪都要去強化身體條件，增強對抗性，除非佢唔係踢英超咁體力化嘅聯賽。

最後，都係果句: 問題唔會一時三刻可以即刻解決，始終有潛質年青人都需要時間同機會。不過，冬季轉會窗就快嚟，究竟買人同培訓之間點平衡，就係蘇B嚟緊嘅考驗，始終曼聯都要爭前四。

[多奇出品] - 曼城對曼聯賽後檢討

曼聯繼打贏熱刺2:1後再打低埋曼城2:1，真係做咗今輪英超焦點。我哋不如睇吓曼聯三線嘅表現先：

攻擊線：我個人覺得連加特比佩利亞更配合到同發揮到馬斯亞、福仔同占士嘅能力。雖然佢哋兩個能力都唔高，但事實上係有不同之處。連加特佢就控波唔算穩陣，射門入球率低，身體對抗性不足。不過就係因為佢咁様，所以當個波在腳下就會立刻傳球俾前線球員去組織攻勢，佢通常都係交到腳波，然後自己就不斷走位嚟為自己同隊友製造空位，就好似今場咁有兩三球邊線位近射，佢心態上係俾隊友發揮，自己就做一個配角。而佩利亞都係控波唔穩，射門入球率低同身體對抗性不足。但佢就喜歡自己做一個進攻重心嘅角色，希望每次進攻都由佢發起，經常希望隊友走位配合佢嘅傳球，令進攻節奏拖慢。加上論合作時間佩利亞同福仔、馬斯亞較短，佢哋未必知道佩利亞想點。

除咗連加特之外，福仔、馬斯亞同占士都發揮得唔錯，佢哋在速度上佔好大嘅優勢，尤其係打反擊。福仔於左路以速度盤球去嘗試做個人突破，造就今場嗰球十二碼，而佢射十二碼嘅方式係首先向左橫移步，然後再加碎步再射門，咁做令到龍門跟唔到福仔起步節奏，做判斷時間就可能會亂咗。其後福仔亦都繼續有射門機會，有一球係費特地波交俾佢第一時間撞射，可惜射斜。福仔擅於帶住個波擺順個駄射波，如果叫佢無球在腳去撞射，就時間掌握嗰度未做得咁好。占士就比賽初段有腳射門，之後多次在右路成功突破，可惜係佢同幾位師兄在默契仲未建立得好好。例如：佢哋未預計到占士出波嘅時間，好多時占士出完波，馬斯亞同福仔先至走入細禁區搶點接應。又或者占士交去十二碼點後面，而連加特就走咗入去小禁區。依個真係要俾時間去配合。馬斯亞就顯出佢冷面殺手嘅本色，佢機會唔使多但就一刀插中要害咁。佢球入波係後衞同龍門唔能夠第一時間意識到，而未能及時作出欄截同撲救。

另外，我要指出點解今仗馬斯亞、福仔同占士可以發揮得咁出色。原因係對方守衞實在太斯文，佢哋唔懂得有效地利用犯規去拖延我隊前線球員助攻。還有由於對方係主攻，所以敵方後防暴露太多空間俾班後生仔去衝，而曼城班後衞面對佢哋只係"行"住佢哋，咁令佢哋有足夠時間去組織攻勢。最後曼城班後衞被福仔佢哋牽引住嚟打。

中場線：費特今場發揮出色，佢係難得跟到曼城搶逼節奏。動作反應快同埋好定，曼城球員唔容易搶到佢個波。另外，佢傳波具滲透性。好似有球交俾福仔面對龍門近射，而佢傳球分邊亦做得合時。佢在短時間內已經建立到默契。在防守方面，佢勤於跑動，有充足嘅體力應付曼城急速嘅節奏，整體上佢可以做到進可攻，退可守嘅地步。

麥湯文尼做防守第一道屏障係做得唔錯，係初初未完全跟到曼城嘅節奏，有時候會走甩人。不過，佢比賽投入感同埋鬥志令佢就算走甩人亦都會好快咁追番。佢嘅防守意識同集中力令到對方想攻亦都唔係咁易。有佢喺度，俾自己隊友一種穩定軍心嘅作用。今場佢唔係有好多機會引球推進上去助攻。

後防線：後防表現出色，尤其係兩閘。多次被對方翼鋒挑戰，都能夠化險為夷。雲拜沙卡對住史達寧毫無畏懼之色，多次作準確嘅欄截，令佢威力大減。而梳爾對住賓拿度施華亦都毫無懼色，速度上可以跟到佢。中堅連迪洛夫同麥佳亞睇落對應地波攻勢較在行，多次能夠瓦解曼城地波組織，而高空波亦都冇太大威脅。

迪基亞今場相當集中，有兩次必入波都能夠擋出。但始終佢出迎接波都係唔夠決斷。

我今次得別要講就係點解己隊防守可以做得咁好，個關鍵就係曼城球員太過集中做地面攻勢。佢哋係想猜散班後衞然後製造機會，而依個進攻模式同曼聯進攻概念係相似，所以唔多唔少佢哋腦海中有對應方法。反而奧達文迪衝頂破網嗰球就唔同，佢係用身體抗衡性力壓麥佳亞，依種靠身體質素去對應曼聯嘅防守就最容易撕破我隊嘅防線。另外，仲有一個進攻模式係曼聯唔擅長應付，就係對方唔打組織而係斬入禁區搏亂，即係曼聯唔識對應爛仔波。一有意料之外混亂，個個就企係度。不過當合作時間耐咗，出現依個問題機會會減少。

最後，雖然贏咗熱刺同曼城，但曼聯亦有隱憂。首先，後備深度不足，好似當麥湯文尼受咗傷，中場就冇人頂替。第二，中堅抗衡性不足，連迪洛夫同麥佳亞太斯文，一有衝擊好易被人製造混亂，搵到機會。第三，攻擊線如果冇空位俾佢哋或者對方主守，咁就進攻會塞死晒。仲有佩利亞係一個不安因素，只要正選出佢，前鋒威力減半。所以蘇B對體力型球隊就要更加小心。

[多奇出品] - 曼聯對熱刺賽後檢討

對曼聯迷嚟講今場贏熱刺2:1令球隊升翻上第6位，上翻積分榜頭一版，暫時令到蘇b舒緩一點壓力。今場勝仗可以睇到啲咩呢？

攻擊線：今場搵咗連加特打攻中，而格連活特打前鋒，感覺上比之前由佩利亞打攻中有好大嘅差異。最大唔同係佩利亞無論响咩情況之下都主係想由自己做攻擊發起點，組織攻勢，但佢好少話會作無球走動去配合隊友，所以當佢控球在腳時，前面三個隊友（福仔、馬斯亞同占士）就企咗喺度等佢餵波，令到進攻嘅變化好少。對方防守嚟講相對比較容易同埋會有時間去做準備。

連加特佢唔係唔會主動組織攻勢，但比佩利亞做多咗一樣嘢係佢好似會對自己隊友踢法同特點有相當嘅了解，然後就做一個配角，將組織攻勢嘅主動權俾隊友，等佢哋可以發揮佢哋嘅強項。好似多次在左路俾波福仔然後自己就走位，等福仔有選擇可以自己過人或傳波做撞牆。又或者當曼聯進攻時打唔入去，佢亦會主動走去禁區頂做滲入或引空對手。當然佢亦都有啲嘢做得唔好，就係控波技術麻麻同埋得分能力差，見到佢間中接應來球都會甩腳。

另外，福仔同占士今場同樣表現出色。其中一個主要原因係對方球員對福仔同占士太斯文，對咗佢哋啲技術咁好嘅球員，竟然可以咁少犯規（除咗上半場攔截占士嗰吓），比較其他球隊就唔會咁易俾佢哋兩個過。仲有就係當福仔同占士攞到個波推進，對方守衞係縮，令到曼聯上半場頭20分鍾就有8對1嘅射門。當中福仔上半場射入嗰球係有偶然性，就係連加特同山齊士一個碰撞，福仔趁機攞到個波，然後在禁區內擺定個駄射門，龍門撲到都入。占士就响右路有極大威脅，單在上半場已經有兩，三球出波，而下半場亦都有兩腳射門，可惜嘅係在禁區頂起腳動作太明顯，龍門早有準備地接住。格連活特礙於同隊友未建立默契，所以為佢製造嘅機會唔多，主要做吓駁腳。

中場線：麥湯文尼嘅復出令到費特毫無顧慮地組織攻勢。費特愈打愈有信心，慢慢在控球同傳球回復自己水準。今場對手實在係無法適應同睇穿佢嘅傳波，佢嘅傳波俾隊友感覺到有一種侵略性，當隊友接應到就差唔多好以突破到防線，就好似入第一球之前係佢在左路交個波俾連加特，然後山齊士攔截得唔夠清脆，間接製造機會俾福仔。

另外，由於費特在中場防守亦都十分出色，佢除咗勤於跑動同補位之外，中場遮線同捉路亦都做得恰到好處。在中後場控球亦都俾對方有種難以捉摸嘅感覺，所以熱刺球員唔容易搶到佢腳下球。可惜嘅係曼聯所失嘅一球係佢同人抗衡時被阿里挑過個波過咗佢，然後有單對單面對龍門嘅機會，最後俾阿里射入埋。

麥湯文尼今場表現佳，佢作為球隊防守嘅第一屏障，無論在企位，遮線都恰到好處。當對方球員引球推進，佢就會出現喺對手面前，好少走甩人。而且佢俾人有種壓迫感，令對手組織攻勢時感到困難。而佢傳波方面做得非常簡潔，只要有人走空位，佢就即時將個波交出去。佢嘅地面傳球時機同速度掌握得準備，所以成功率非常高。除咗防守，麥湯文尼偶爾亦會引球助攻。

防守線：今場full team上陣令我睇到防守上有一個大問題，而個大問題就個根源在於指揮後防線嘅麥佳亞。我唔係話佢防守技術唔好，佢响制空能力同攔截做得唔錯，自己個人犯錯亦唔多。佢最大問題係當熱刺球員已經攻入禁區，但佢唔係話主動作出攔截，而係企最後好似一個統領睇實個環境，其實到嗰刻，統領嗰個應該係迪基亞負責，而佢係要出嚟釘實其他攻擊球員。如果唔係就會由一啲唔擅於防守中堅位嘅球員企咗麥佳亞個位，咁就非常危險。好似今場失球就係費特企喺禁區入面嘅中堅位，而麥佳亞仲要企後一格。舉多個例子就係對般尼茅夫時雲拜卡沙在禁區中堅位對住京治，麥佳亞就企喺雲拜加沙後一格，最後被京治射入。

不過，今場其餘時間麥佳亞同連迪洛夫防守得唔錯，主要原因係簡尼速度唔算好快同埋身型對比其他隊前鋒唔夠大隻，純粹以技術去對付佢哋係唔會驚簡尼。另外，雲拜卡沙對住孫興慜防守得好好，對住亞洲其中一個速度同技術俱佳嘅球員都冇抾場，而且冇俾佢扭過，間接令熱刺左邊攻勢啞火。楊格就間唔中會走甩人，好彩係冇製造直接威脅俾對手。

龍門：迪基亞一貫水準，失球亦都唔關佢事，但佢要學習點樣去領導後防線。

今場過後就已經證明英超冇強弱隊之分，曼聯亦都唔再係強隊。我只可以話曼聯對技術型隊伍係有點優勢，反而對啲体力型隊伍後防更容易出現漏洞。只要曼聯後防仲係用連迪洛夫拍麥佳亞，而麥佳亞做後防最後一個，問題會重復出現，曼聯亦都會繼續在所謂「弱隊」失分。

[多奇出品] - 曼聯對阿士東維拉賽後檢討

今場波又係令人失望地打和2:2，今場攻力其實唔錯，上下半場總共有16次射門，但中後場所失嘅兩球波都非常不值，現在有兩樣問題可以檢討：

1）馬達打正選攻中對整體攻擊線帶嚟咩境況？

2）曼聯所失兩球揭露防守啲咩弱點？

3）攪到現在兵源不足係傷兵問題定蘇B用人問題？

1）首先講馬達特性，佢陣中嘅老大哥。頭腦冷靜嘅佢，有好強球賽閱讀能力。懂得控制比賽節奏，擅於做小組短傳滲入，佢交完波會即刻走位。在禁區內更係佢最能發揮把握能力嘅區域，佢既可以得分亦都可以為隊友製造機會。可惜速度慢，身型輸蝕。

就因為咁馬達帶住三位攻擊線隊友（福仔、馬斯亞同占士）打出變化多端嘅攻勢。尤其係左邊馬達同福仔多次做叠瓦，然後落底傳中。可惜係禁區入面嘅球員接應唔到。另外，佢做嘅駁腳亦都恰到好處，因為佢傳波係以一個令隊友容易，舒服嘅心去傳波，就係咁有幾球快攻都成功落底。

不過，由於之前攻中位都係由佩利亞打正選，前鋒線所得嘅供應唔多，令馬斯亞、福仔同占士都係習慣單打獨鬥。反應現在要打一啲小組，短傳滲入有啲唔自然嘅感覺，大家係要諗一諗同埋要就住，依個情況最常見係出現係在中場帶波上前場同埋在禁區頂。

雖然係咁，我都覺得做多啲小組滲入係好，因為可以打多一範攻勢，好過一味靠湧，單槍匹馬死去爛去。當然佢哋擁有速度同體力，但用死一招就好容易被對方後衞睇穿，所以現在開始用馬達可能遲啲同埋要時間建立默契，但馬達係可以帶出新嘅攻擊元素俾班後生仔。

2）球隊所失嘅第一球完全係佩利亞嘅責任，竟究可以單對單被人呃一呃，然後俾對方擺順從容地起腳射入，迪基亞欲救無從。其實搵佩利亞做防中等於擺個計時炸彈在後防，因為佢根本唔係擅於防守。多次在中後場地帶犯規輸罰球，間接製造機會俾對方，球迷都知曼聯守高空波唔係咁強，咁好容易會失球。

此外，佩利亞在中場防守亦都做唔到本份，在身型同對抗性不及對手之下，五五波往往都唔夠對手爭，所以就經常犯規甚至被人推過。另外，佢頭搥亦都唔係咁好，要爭頂都唔夠人哋爭。而在企位同遮線亦都唔夠經驗，所以希望蘇B可以換一個正宗防中去打依個位置。

失第二球係威廉斯出唔切包咗越位，我個人覺得威廉斯嗰刻當然唔夠醒目。但我又會睇到麥佳亞表情，佢好明顯唔清楚係咪對方有越位就舉手，佢唔係應該提場叫啲隊友散出去？其實如果論做後防指揮，連迪洛夫上季都係做麥佳亞嘅角色，即係佢已經有比麥佳亞多經驗。無錯麥佳亞有佢嘅優點。例如：制空力強、控傳球技術不錯。但佢始終在曼聯係新人，在戰術體系、同隊友合作同埋球迷要求對比在李斯特城唔同，有時我個人覺得可以搵連迪洛夫做後防指揮，打最後個位，咁可能有番新景象。

3）當然季初馬斯亞、普巴同梳爾受傷令福仔被逼打箭頭直接令今季戰積低迷。到對完諾域治贏波之後開始個勢有啲順就到中路大將麥湯文尼傷出，蘇B係有啲唔好運。但我個人真係唔明點解蘇B咁鍾意用佩利亞，打咗12場得1入球2助攻依個戰績真係難啲接受。當中人同事係點只有內部人先知，但一嚟要俾班年青球員同蘇B時間，二嚟就到冬季轉會窗，希望球隊有啱方向嘅動作，補一啲球員入嚟，現有球員間就再合作得好啲，建立默契，唔好令曼聯迷失望。

總結，希望下場對熱刺中會見到麥湯文尼或馬迪上陣啦。

[多奇出品] - 我哋應唔應該再俾佩利亞機會呢？

打完維拉嗰場之後，曼聯以14戰18分排第9位。我諗有部分球迷睇曼聯比賽開始冇期望，有啲人希望可以早啲炒咗蘇B，有啲人覺得應該俾多啲時間佢，但其實主導曼聯成績嗰個係佩利亞。

佩利亞今季出場13次入1球助攻次數係2次。以佢嘅數據相信係曼聯迷嘅我哋就當然唔接受，尤其係佢前鋒線上有馬斯亞、福仔、占士同格連活特等好手。只要稍微有球賽閱讀能力嘅人同埋佩利亞肯睇吓重播都應該知道自己有啲咩不足之處。但佢打咗12場都係打到成劈屎咁，我好懷疑佢練習或比賽前有冇好好做準備。

上場對錫菲聯已經有球控甩腳俾人打反擊射入迪基亞嘅十指關。今場又再整一球「眼神制敵」嘅防守，然後被人右腳射死角入網。仲有開死球個質素認真麻麻，經常都開唔過頭，而且有好多時都出現不必要嘅犯規，犯完規之後仲要同球證爭論。今場最少有三次在我方後半場犯規，為我方後防帶嚟好多威脅。

無錯我之前都有寫要容許年青球員有偏差然後調整，但有偏差係指盡量唔好犯一啲容易翻唔到轉頭嘅錯。例如：之前所講對錫菲聯同維拉嘅兩球失球。另外，時間調整長短亦都好關鍵，你打咗12場波，但明顯進步都唔見得好明顯。與其係咁，暫時將d機會俾其他更適合嘅隊友，自己就從中學習，兼再努力去加操。好似以前C朗練完習會搵雲達沙做練習對手。

其實曼聯陣中都有馬達、馬迪，佩利亞都可以請教佢哋。踢足球除咗要建立自己風格外，仲要學習新技術。例如：佩利亞鍾意上腳盤扭同遠射，但亦可以向馬達學習滲透性傳同埋禁區入面嘅射門技巧。佢現在就正正缺乏學習新事物嘅能力，而踢法上已經將自己定型。

其實曼聯好多年青球員都等緊機會，如果佩利亞再經常犯下一啲致命嘅錯誤，你會令曼聯去到一個進退失據嘅地步。

[多奇出品] - 錫菲聯對曼聯賽後檢討

今場波可以話峰迴路轉，由頭70分鐘作客輸兩球，到10分鐘內連入三球，之後都90分鐘被逼和。就依個情況我有三個問題要講講。

1）點解頭嗰70分鍾（尤其係上半場）發生咩事，踢得咁差？

2）曼聯由威廉斯追翻第一球到連入三球，究竟原因何在？

3）當曼聯領先番3:2後，到90分鐘被對手追平3:3，失嗰球原因何在？

1）麥湯米尼因傷缺陣，由佩利亞代替佢嘅位置。依個調動對成隊影響好大，打這個位置除咗要作防線第一屏障之外，仲要係組織攻勢。之前麥湯米尼同費特有默契地輪流做攻同守工作，可惜今場佩利亞在攻同守都做得唔稱職。

在防守上，由於佩利亞打開進攻中場，平時比賽都唔係做開防守工作，所以睇到佢在防守上有好大嘅漏洞。佢在身體條件上同對抗性已經不及對手，再加上佢在企位同遮線亦都做得唔到位，而且佢又無防守球員嘅壓場感，中場防守只係打費特一個，所以對手在中場攞住個波都唔洗驚你，好容易組織到攻勢同壓住曼聯嚟攻。

在進攻上，我個人覺得佩利亞打法太過自我，每次進攻都要俾佢控住個波同埋希望可以由佢發動每個攻勢，當佢交咗個波之後就企在後面等隊友回傳俾佢轉邊。但當佢在無波之下，佢唔會主動走位去引開對方守衛，做唔到進攻上變化，福仔、占士同馬斯亞變相企死分別左邊、前面同右邊。另外，佩利亞嘅傳波亦都做得好平庸，其實拍住福仔、占士同馬斯亞交啲到腳波然後讓佢哋自由發揮就可以。但佢就係要交啲位置波，交波嘅重點就係要令接球者好容易同舒服地控到個波，可惜佢做唔到。

當然講失波要負責任就要鍾斯，但我唔會怪佢，因為佢只係第一次打正選。而且如果唔係洛荷傷咗，正選位置就唔會係佢。不過，佩利亞就令我有點激動，因為蘇B已經俾佢好多次機會，但佢嘅表現係說服唔到球迷，上半場一個拖累咗成隊，而第二個甶失球係輸佢。

2）首先講威廉斯入第一球。嗰球睇到占士永不放棄嘅精神同威廉斯嗰種射門決斷性。占士雖然都知道自己出嘅高空波未必成功直接製造入球，但都照出而唔係回傳俾佩利亞，。就在同對方守衞爭頂嘅過程出了咗一個意料之外嘅機會，威廉斯就諗都唔諗起腳射門，皮球就應聲入網。

然後蘇B換走佩利亞，換入格連活特令到曼聯有兩個改變。第一就係連加特改打防中。好明顯佢同佩利亞打防中風格完全唔同，連加特一攞到波之後唔係諗住自己發動攻勢，而係即刻將波傳俾其他隊友，俾佢哋進攻。佢自己交完波就立即配合走位，就好似融入球隊咁。當連加特咁做，大家進攻組織嘅想法就出現，並且實行。

最後就係馬斯亞由射手轉做助攻手，格連活特插入禁區。由於對方後衛習慣咗點樣睇住馬斯亞，當佢退後一格，唔企在禁區入面，轉咗格連活特入涉禁區，就要重新適應曼聯攻擊模式。就响對方守衛做調整時，曼聯中場節奏亦都因連加特打中場而節奏改變，所以令我隊前鋒有機可乘，再連入兩球。

3）蘇B尾段將馬斯亞換出，然後換入杜安沙比就係被追和嘅伏線。因為當曼聯氣勢正旺，攻勢勁強時換走馬斯亞，咪即係削骨我隊嘅氣勢，而且當時佢哋又打得咁好，所以我真係唔係好明點解會咁換人。

另外，失嗰球之前出現偶然性甩漏，就係占士想跑去截住右路對手嘅波時佢標甩咗。然後個皮球傳入禁區裡中路，同樣地我都講過無數次，連迪洛夫同麥佳亞主要都係睇定然後就"行"住對方前鋒，如果响禁區內而個主動權於前鋒身上，就會有空間俾對手起腳。最後就被逼和。

响贏白禮頓之後，我都對曼聯能否取得連勝持保守態度，原因係曼聯一對中堅，佢哋都係同一類型。現在亦都好不幸出現我所諗嘅情況出現。另外佩利亞嘅問題亦都存在。我諗蘇B要在冬季換會窗要諗諗計，如果唔係會令好多球迷對蘇B不滿。

[多奇出品] - 莫耶斯與蘇斯克查

到後費格遜年代，莫耶斯曾負起一個偉大嘅任務，就係重建曼聯令佢再次成為歐洲同英超霸者。雖然高層話俾莫耶斯時間，簽咗6年合約，而且高層亦都講會俾足夠時間佢，可惜都最後執教不到一季就被辭退。

另外，蘇B蘇斯克查就上季季中臨危受命接替摩佬執教球隊，起初成績理想，但當正式接任下成績就每況愈下。今季高層亦都講話支持蘇B重建球隊，可惜季初成績未如理想。究竟佢會唔會步莫耶斯後塵？

其實我個人覺得佢哋雖然都係重建曼聯，但佢哋在各方面都有好大嘅分別。現在我哋可以深入去了解：

心態方面：莫耶斯缺乏一種危機感，始終球會同佢簽咗6年合約，又話俾時間佢重建球隊。可惜就因為咁，佢嚴重忽略咗球隊成績滑落所帶嚟嘅負面聲音。一個人沒有危機感，做事動力就冇咁高，而所做嘅決策亦都唔夠快同有效率。例如：在轉會市場只係簽咗費蘭尼同馬達，但就冇於後防補強。當然你可能話因為莫耶斯缺乏吸引力去招攬有星級球員，但依個唔係藉口囉。

曼聯就經歷過季初表現不穏加上前車可鑑（方丈教得兩年而摩佬就過唔到摩三季嘅魔咒），仲有球迷在6年間得唔到英超冠軍所積聚嘅怒氣，所以蘇B係好感受到危機感。危機感正面嚟睇可以帶俾人動力，但過大危機感只係令人失去冷靜同判斷力。就算球會話支持蘇B又同佢簽約三年，轉吓手一個唔該炒咗佢，佢真係冇聲出。

陣容方面：費格遜留俾莫耶斯嘅係上季冠軍嘅陣容，當中有後防里奧、維迪、艾夫拿，中場有卡域克、傑斯，前鋒有朗尼、雲佩斯同小豆。當然唔係話有冠軍隊嘅球員就玩晒，在陣容上都要加一啲新血，但個成績都冇理由差咁遠。佢哋最大問題係防守，唔知咩原因李奧同維迪狀態起落得犀利，後防失波頻頻。班後生仔湯卡華利、韋碧克、鍾斯同史摩寧都打唔起水準。係進攻嗰班較好一啲，有新人贊奴沙、朗尼、雲佩斯（但同對上一季比，個入球數字都差十幾球）。

而摩佬留俾蘇B嘅陣容相對嚟講就唔係咩冠軍陣容，但係上嗰季都有亞軍，不過好多都走下坡，或者打唔番攞亞軍嘅水準。例如：薪酬同表現唔成正比嘅山齊士、漸走下坡嘅馬迪同拜利，而福仔同馬仔就打唔出水準，仲有後防漏洞鍾斯同連迪洛失，成日鬧情緒又話要走嘅普巴，對住弱隊入球率高但對強隊就冇入球嘅盧卡古。當蘇B季中接手完成賽季之後，就要去重新建立佢哋嘅冠軍陣容。

個人榮譽方面：莫耶斯在任教曼聯之前未有攞過任何冠軍經驗，佢只係帶過愛華頓打過入英超前四。當然在有限人腳之下，加上冇咩球星在陣都可以攞前四的確唔簡單。但嚟到曼聯依隊攞過N咁多個冠軍嘅球隊，是旦有一季冇錦標攞！就算費格遜教嘅時期（2004-2006年兩個球季）冇錦標落袋，球迷們都勁唔滿意啦。好彩就係之後嗰季攞番個英超冠軍，否則佢嘅壓力都幾大。

蘇B在球員時代就犀利，共攞過6次英超冠軍，1次英足盃同1次歐聯。佢亦都試過首位後備落場連入四球嘅球員。退役後，佢於曼聯青年軍做過教練，所以佢對曼聯文化、年青球員嘅特性都有認識。佢亦都知曼聯需要啲咩球員，而球員要有邊啲特質佢都知。不過，佢執教英超經驗尚淺，僅僅教過卡迪夫城，仲要係降班添。依個係佢嘅一個死穴，因為一來英超其他領隊（除咗林伯特之外）個個都有豐富嘅經驗，二來球迷會唔會俾咁多時間佢去經歷偏差同調整呢？

如果費格遜退休嗰時就即刻搵蘇B，個重建效果唔知會唔會有改變呢？始終蘇B對班球員認識深。相反如果現在搵莫耶斯教番曼聯又會唔會好過蘇B，因為莫耶斯擅長用有限嘅人腳去打出理想嘅成績，但唔係話攞到冠軍嗰隻。

另外，我覺得依家個情況同當年搵緊鋼門舒米高嘅接班人有少少相似，費sir先後搵咗泰比、保斯尼治、巴夫斯等龍門但都唔係最適合人選，最後兜兜轉傳搵咗在英超球隊富咸浮沉咗4年嘅雲達沙，先至叫搵啱人。究竟曼聯幾時先搵到個大家認同嘅領隊呢？

[多奇出品] - 給佩利亞的話

好高興今賽波曼聯可以主場3:1贏咗白禮頓，當然贏波固然開心，但有個球員我好在意，就係佩利亞。

佢入第一個入球係非常重要，尤其係當佢其他三位拍檔，福仔、馬斯亞同占士在比賽初段已經製造到好多攻勢。而馬斯亞助攻嗰球就更加呃一呃守衞，然後傳俾佩利亞，從而做到我所講嘅對方「意料之外」嘅攻門。雖然佩利亞射得麻麻，但都省中人彈入。佢嘅入球令到成隊波可以放開嚟打。

仲記得上場對般尼矛夫，佢頭20分鐘都有兩個入球機會，可惜佢入唔到。結果之後對方企穩陣腳就被對方一次攻勢收死。佩利亞要明白到自己係掌握曼聯比賽嘅關鍵人物，蘇B俾得佢打依個位，即表示對佢嘅信任同認同，而其他尤其係一班年青球員當佢入波後圍埋一齊，除咗表現出佢哋係齊心外，仲有可能表示班同伴話等你入球依刻等咗好耐。

講完佩利亞嘅入球帶起咗隊波之後，就講番實話其實佢真係仲有好大進步空間。我有一樣睇到係當我隊戈兩邊出波，通常只有福仔同馬斯亞後上，但佩利亞好少殺入去，如果佢能趁兩翼出波走入去就可以為自己製造更多機會。

除此之外，佢都係少交具侵略性嘅波俾前場球員，尤其係馬斯亞。亦都係咁令馬斯亞在前場射門機會都少好多，當然這個又唔可以完全怪晒佢，始終佢哋都唔係合作好耐，大家交波、入滲、走位都要估估下。仲有我發現今場佩利亞有時候在發動進攻時，佢係唔知自己應該點做，而福仔、馬仔佢哋繼續自己組織攻勢，咁即係暗示啲咩呢？直接啲講其實有冇佢分別係唔大！

就因為咁佩利亞就更加要分擔入球工作，兩邊出波要多啲殺入禁區。仲有一樣好重要嘅嘢要講就係暫時專注多啲禁區入面射波，嘗試提高射波嘅質素多於射波嘅次數。因為佢遠射成功率太低，相對起我隊有馬斯亞、福仔都係前場終結者，我建議佢暫時專注學者以自己做餌，然後為馬、福製造機會，除非佢盤球到禁區入面或禁區頂。

仲有，我唔知巴西球員係咪真係好喜歡上腳，可能佢哋對自己腳法好有信心。我相信佢亦都對自己嘅控球同盤扭有點心得，可惜在身型方面就真係好輸蝕。如果佩利亞真係想做一位令守衞顧忌嘅一位攻擊球員就要好似一隻老鼠仔咁，懂得冇波在腳時走啲盲眼位，嗰啲位置應該係對方禁區位置，就算係攞唔到個波都會令守衛分心。

其實打10號位最重要係咩呢？就係令守衞唔能夠專心。一個人唔專心就會亂，一個人亂就會令身邊嘅隊友分心，整個後防線亂，龍門就要單打獨鬥，就會暴露出更多空隙。

有幾多人曾經發過足球夢，有幾多個可以踢到曼聯依啲大球會，能夠效力到有幾多個可以打都正選，而打到正選有幾多個可以打都心所想嘅位置。我希望佢可以珍惜蘇B俾佢機會，因為佢個發揮唔只感染到球隊上下，還會感染到全球曼聯支持者。